ខេត្តកំពត៖ មហាទុក្ខសម្រាប់បុរសជាប្ដី និងក្រុមគ្រួសារ គឺមិនអាចពិពណ៌នាបាននោះទេ ខណៈដែលស្ត្រីជាភរិយាបានស្លាប់ពេលទទួលការវះកាត់ឆ្លងទន្លេ ហើយវារឹតតែក្ដុកក្ដួលចិត្តថែមទៀតនោះ គឺទារកដែលចាកពីឧទរម្ដាយគ្មានវាសនានឹងបានស្គាល់មុខម្ដាយ។ រឿងរ៉ាវនៃជីវិតទុក្ខសោកតែមួយប៉ប្រិចភ្នែកនេះ ត្រូវបានក្រុមគ្រួសារស្ត្រីដែលស្លាប់ ដោយការវះកាត់សំរាលកូនបានធ្វើការ ស្ដីបន្ទោសដល់ក្រុមគ្រូពេទ្យថា ការស្លាប់នេះដោយសារតែខ្វះឈាម ហើយគ្រូពេទ្យមិនយកចិត្តទុកដាក់។
តាមប្រភពព័ត៌មានទាក់ទិននឹងករណីខាងលើបានឲ្យដឹងថា ស្ត្រីដែលស្លាប់ឈ្មោះ សុខ ម៉ៅ អាយុ២៨ឆ្នាំ នៅភូមិដំណាក់ក្រឡាញ់ ឃុំកន្ថោរខាងកើត ស្រុកកំពង់ត្រាច ត្រូវបានស្លាប់បាត់បង់ជីវិតយ៉ាងសោកសៅបំផុត ខណៈដែលស្ត្រីរូបនេះឆ្លងទន្លេមិនរួចហើយត្រូវបានក្រុមគ្រូពេទ្យស្រុកកំពង់ត្រាចធ្វើការសំរាលដោយប្រើវិធីវះកាត់យកទារកពីក្នុងផ្ទៃម្ដាយចេញ កាលពីវេលាម៉ោង៨ព្រឹកថ្ងៃទី១៣ធ្នូ។ តាមការរៀបរាប់របស់បុរសជាប្ដីឈ្មោះ ឌុប ដៀង បាននិយាយថា នៅយប់ថ្ងៃទី១៣ធ្នូ ប្រពន្ធរបស់គាត់ឈឺពោះឆ្លងទន្លេ ហើយបានបញ្ជូនមកមណ្ឌលសុខភាពកន្ថោរ តែគ្រូពេទ្យប្រចាំការមិនអាចជួយសំរាលបាន ក៏បញ្ជូនបន្តទៅមន្ទីរពេទ្យស្រុកកំពង់ត្រាច ដើម្បីធ្វើការសំរាលដោយវះកាត់។ នៅព្រឹកថ្ងៃទី១៤ ធ្នូ ការវះកាត់របស់ក្រុមគ្រូពេទ្យបានសម្រេច យកទារកចេញពីផ្ទៃម្ដាយ និងមានសុខភាពល្អ តែគាត់ក៏មិនដឹងថា បច្ចេកទេសវះកាត់របស់គ្រូពេទ្យយ៉ាងណានោះដែរ ស្រាប់តែប្រពន្ធរបស់គាត់មានការឈឺក្រហល់ក្រហាយ ទើបគ្រូពេទ្យសម្រេចបញ្ជូនទៅមន្ទីរពេទ្យខេត្ត លុះដល់ម៉ោង១០យប់ ប្រពន្ធគាត់ក៏ស្លាប់។ បុរសជាប្ដីស្ត្រីរងគ្រោះនិយាយទៀតថា ក្នុងការវះកាត់ គាត់បានបង់ថ្លៃគ្រូពេទ្យអស់លុយ៣០ម៉ឺនរៀល ហើយពេលទៅដល់មន្ទីរពេទ្យខេត្តកំពត គ្រូពេទ្យទារលុយ៣០ម៉ឺនរៀលទៀតដើម្បីទិញឈាម។
លោកពៅ សារី ប្រធានមន្ទីរពេទ្យស្រុកនិយាយថា ការវះកាត់ស្ត្រីឆ្លងទន្លេនោះមកពីទារកនោះកើតមិនរួច ព្រោះចេញមកទទឹងទ្វារមាស ទើបសំរេចធ្វើការវះកាត់យកទារកជាកូនចេញ ហើយបានជោគជ័យទៀតផងតែបន្ទាប់ពីវះកាត់រួច ស្ត្រីសំរាលកូនមានឈាមធ្លាក់ច្រើន ក៏បញ្ជូនបន្តទៅមន្ទីរពេទ្យខេត្ត ហើយខ្វះឈាម ទើបបណ្ដាលឲ្យស្លាប់នៅវេលាម៉ោង១០យប់ថ្ងៃទី១៤ធ្នូ។ លោក ពៅ សារី និយាយថា នៅមន្ទីរពេទ្យ ក៏មានថវិកាសម្រាប់ជួយឧបត្ថម្ភដល់ក្រុមគ្រួសារសពដែរ ព្រោះការស្លាប់នេះដោយអចេតនាទេ។
ទោះជាបែបណាក្រុមគ្រួសារស្ត្រីរងគ្រោះ បានស្ដីបន្ទោសទៅដល់ក្រុមគ្រូពេទ្យស្រុក និងខេត្តដែលមានការធ្វេសប្រហែសក្នុងការជួយសង្គ្រោះ ទើបស្ត្រីជាម្ដាយត្រូវស្លាប់។ សូមបញ្ជាក់ថា បុរសជាប្ដីឲ្យដឹងថា ការសំរាលកូននេះ គឺជាកូនដំបូង ហើយគាត់ធ្លាប់បាននាំប្រពន្ធមកពិនិត្យផ្ទៃពោះនៅខែដំបូងតែក្រោយមកមិនបានមកពិនិត្យទៀតទេ លុះដល់ឈឺពោះឆ្លងទន្លេ ទើបនាំមកមន្ទីរពេទ្យ។ នេះជាមេរៀនមួយដែលស្ត្រីមានផ្ទៃពោះគួរតែមកកាន់មណ្ឌលសុខភាព ឬមន្ទីរពេទ្យផ្នែកសម្ភពដើម្បីពិនិត្យតាមដានផ្ទៃពោះ មិនត្រូវបណ្ដែតបណ្ដោយដូចករណីខាងលើនេះទេ៕
