នៅពេលដែលសង្គមជាតិមានការវិវឌ្ឍជឿនលឿនតាមបែបសម័យទំនើបបានធ្វើឲ្យមនុស្សដែលរស់នៅក្នុងសង្គមនោះមានការប្រែប្រួល ឬភ្លើតភ្លើនតាមនោះដែរ។បច្ចុប្បន្ននេះ សម្រាប់បុរសមួយចំនួនដែលគេមានប្រាក់ហូរហៀរចាយមិនអស់ ដើម្បីបំពេញកាមកិលេសរបស់គេ គេបានចំណាយប្រាក់ជាច្រើនសន្ធឹកសន្ធាប់ដើម្បីទិញស្រីក្មេងៗយកមកបម្រើកាមគុណរបស់ពួកគេ។ ហេតុដូចនេះហើយបានធ្វើឲ្យក្មេងស្រីមួយចំនួននៅតាមតំបន់ជនបទ ត្រូវបានគេបោកយកមកលក់ឲ្យផ្ទះបន ឬឲ្យម៉ូយបុរសៗ។
បុប្ឆា ជាក្មេងស្រីម្នាក់ស្ថិតនៅក្នុងចំណោមក្មេងស្រីរងគ្រោះទាំងនោះដែលត្រូវបានម្ដាយមីងសាច់ថ្លៃរបស់នាងបោកយកមកលក់ឲ្យផ្ទះបនដែលពាក់ស្លាកយីហោហាងខារ៉ាអូខេមួយនៅក្នុងទីក្រុងភ្នំពេញ។
តាមពិតទៅ "បុប្ផា" ជាឈ្មោះដែលអ្នកនិពន្ធរបស់យើងដាក់ឲ្យ។ តាំងពីកើតដឹងក្ដីមក បុប្ផាបានជួបនូវរឿងរ៉ាវអភ័ព្វៗជាច្រើន ដែលនាងមិននឹងស្មានថា ជីវិតរបស់នាងធ្លាក់ចូលក្នុងស្ថានភាពបែបនេះទាល់តែសោះ។ នៅក្នុងកិច្ចសម្ភាសជាមួយ "ប្រជាប្រិយ" បុប្ផាបានរ៉ាយរ៉ាប់ថា ដើមចមនៃបញ្ហាដែលធ្វើឲ្យរូបនាងធ្លាក់ចូលទៅក្នុងក្រញាំបិសាចតណ្ហានោះ ដោយតែគ្រួសាររបស់នាងមានជីវភាពទ័ល ក្រខ្លាំងពេកហើយឪពុកមានជំងឺប្រចាំកាយទៀត ដែលធ្វើឲ្យម្ដាយរបស់នាងដើរខ្ចីបុលគេ ដើម្បីយកប្រាក់ទាំងនោះមកព្យាបាលជំងឺឪពុករបស់នាង និងមួយផ្នែកទៀតទុកសម្រាប់ទិញអង្ករដាំបាយហូប។ ពីមួយថ្ងៃទៅមួយថ្ងៃ ពីមួយខែទៅមួយខែ បំណុលក៏កាន់តែកើនឡើង ហើយម្ដាយរបស់នាងមិនមានប្រាក់សម្រាប់សងគេម្ចាស់បំណុលគេមកទារប្រាក់ស្ទើរតែរាល់ថ្ងៃ ដោយគេជេរតិះដៀលគ្រប់បែបយ៉ាង ទោះបីជាម្ដាយ និងរូបនាងផ្ទាល់ ខំទៅស៊ីឈ្នួលគេយ៉ាងណាក៏ដោយ ក៏មិនអាចដោះបំណុលសងគេបានឡើយ បើរកតែប្រាក់ទិញអង្ករដាំបាយហូបមិនចង់បានផងនោះ។ នៅថ្ងៃមួយ ដោយមើលឃើញជីវភាពក្នុងគ្រួសារជួបនូវការលំបាកពេក និងមិនអាចអត់ទ្រាំនឹងការជេរតិះដៀលពីម្ចាស់បំណុលបាន ស្ថិតក្នុងអាយុដប់បីឆ្នាំ បុប្ផា ត្រូវបានម្ដាយរបស់ខ្លួនឲ្យទៅស៊ីឈ្នួលគេនៅម្ដុំផ្សារសួង ហើយម្ចាស់ផ្ទះនោះបានឲ្យម្ដាយនាងខ្ចីប្រាក់មុន។
ការទៅស៊ីឈ្នួលគេនៅផ្សារសួងអស់រយៈពេលជាងមួយឆ្នាំ ស្រាប់តែនៅថ្ងៃមួយនៅពេលដែលប្រពន្ធនិង កូនៗមិននៅផ្ទះ ម្ចាស់ផ្ទះប្រុសដែលជាថៅកែរបស់នាងបានចូលទៅក្នុងបន្ទប់របស់នាង ក្នុងខណៈពេលដែលនាងកំពុងលង់លក់ ក្នុងគោលបំណងបម្រុងចាប់រំលោភនាង តែដោយនាងភ្ញាក់ទាន់ហើយក៏បានយំសំពះអង្វរបុរសម្ចាស់ផ្ទះនោះ។ ពីដំបូងបុរសម្ចាស់ផ្ទះនោះបានល្អជាមួយនាងយ៉ាងខ្លាំង តែនាងមិនដឹងអំពីពុតត្បុតអាក្រក់របស់បុរសម្ចាស់ផ្ទះនោះឡើយ។ ពីរ ឬបីថ្ងៃក្រោយមក នាងបុប្ផាបានអង្វរសុំប្រពន្ធម្ចាស់ផ្ទះនោះត្រឡប់ទៅផ្ទះរបស់នាងនៅឯស្រុកពញាក្រែកនោះវិញ ប៉ុន្តែបុរស និងប្រពន្ធម្ចាស់ផ្ទះនោះ មិនចង់ឲ្យនាងចេញពីផ្ទះនោះឡើយ តែដោយគេឃើញនាងយំអង្វរខ្លាំងពេក ប្រពន្ធម្ចាស់ផ្ទះនោះ ក៏យល់ព្រមឲ្យនាងត្រឡប់ទៅផ្ទះរបស់នាងវិញ។ ទៅដល់ផ្ទះវិញមិនបានមួយសប្ដាហ៍ផង បុរសម្ចាស់ផ្ទះដែលនាង បុប្ផា ធ្លាប់ទៅស៊ីឈ្នួលនោះបានទៅរករឿងម្ដាយរបស់នាង ហើយក៏បានទារប្រាក់ជំពាក់ដែលនៅសល់ ប៉ុន្តែម្ដាយរបស់នាងមិនមានប្រាក់ឲ្យគេគ្រប់បុរសនោះ ក៏ជេរតិះដៀលប្រមាថយ៉ាងធ្ងន់ៗទៅលើម្ដាយរបស់នាង។ ដោយឃើញស្ថានភាពបែបនេះ លុះដល់ព្រឹកឡើង ម្ដាយមីងសាច់ថ្លៃរបស់នាងម្នាក់ក៏បាននិយាយលួងលោមនាងថា "ក្មួយឯងទៅធ្វើការនៅទីក្រុងភ្នំពេញជាមួយមីងទៅ មីងមានកន្លែងឲ្យក្មួយឯងធ្វើ ហើយបានប្រាក់ខែច្រើនទៀត មីងឃើញគ្រួសាររបស់ក្មួយឯងពិបាកពេក ទើបមីងជួយរកការងារឲ្យធ្វើ"។
នៅពេលឮមីងរបស់ខ្លួននិយាយដូច្នេះ ដោយគិតថា ជាប់សាច់ឈាមជាបងប្អូនផងនោះ នាងបុប្ផា ក៏បានសុំម្ដាយមកធ្វើការនៅទីក្រុងភ្នំពេញជាមួយម្ដាយមីងរបស់ខ្លួន ហើយម្ដាយរបស់នាងក៏យល់ព្រម។ រយៈពេលប្រហែលជាប្រាំថ្ងៃក្រោយមក នាងបុប្ផា ក៏មកទីក្រុងភ្នំពេញជាមួយម្ដាយមីងរបសនាង។ នៅពេលមកដល់ភ្នំពេញ ម្ដាយមីងរូបនោះបាននាំនាងទៅដាក់ក្នុងហាងខារ៉ាអូខេមួយនៅម្ដុំដេអិន ប៉ុន្តែពីដំបូងនាងមិនដឹងថា ជាកន្លែងអ្វីនោះទេ។ មកនៅក្នុងហាងនោះបានបីថ្ងៃ បុប្ផាក៏បានសួរម្ដាយមីងរបស់នាងថា មីងពេលណាទើបគេឲ្យខ្ញុំទៅធ្វើការ? ពេលនោះម្ដាយមីងចិត្តអប្រិយរបស់នាងក៏បានប្រាប់ថា ក្មួយឯងនៅទីនេះពីរ ឬបីថ្ងៃ ថៅកែឲ្យក្មួយឯងធ្វើការហើយ។ មុនដំបូងនាងនឹកស្មានថា ហាងខារ៉ាអូខេនោះជាកន្លែងច្រៀងធម្មតា។ មួយថ្ងៃក្រោមមក មានបុរសចំណាស់ម្នាក់ដែលមានវ័យប្រហែលជាងហាសិបឆ្នាំ នៅក្នុងដៃមានកាន់កំប៉ុងប៊ីយែរមួយកំពុង ផឹកបណ្ដើរមើលមកនាងបណ្ដើរ បុរសនោះមកអង្គុយមើលនាងរយៈពេលពីរថ្ងៃជាប់គ្នា។ លុះដល់ថ្ងៃទីបីបុរសចំណាស់នោះក៏បានបបួលនាងឡើងជិះរថយន្តដោយនិយាយថា នាំនាងទៅធ្វើការដោយមានការជំរុញពីម្ដាយមីងរបស់នាងផង បុប្ផា ក៏យល់ព្រមទៅជាមួយបុរសនោះ។ បុរសម្នាក់នោះមិនបានយកនាងទៅធ្វើការត្រឹមត្រូវនោះទេ តែគេយកនាងចូលទៅក្នុងផ្ទះសំណាក់មួយនៅឯត្រើយម្ខាងស្ពានជ្រោយចង្វា។ នៅពេលគេនាំនាងចូលក្នុងបន្ទប់នាងភ្ញាក់ខ្លួនព្រើត ហើយមានការស្លុតក្នុងចិត្តយ៉ាងខ្លាំង បុរសនោះបានឲ្យនាងដេកជាមួយគេ ពេលនោះនាងបានទ្រហោយំហើយអង្វរបុរសម្នាក់នោះ តែបុរសនោះមិនលើកលែងឲ្យនាងឡើយ ដោយគេយកកាំភ្លើងមកភ្ជង់គំរាមនាង ដោយឲ្យផ្លូវនាងជ្រើសរើស ទីមួយបើនាងចង់រស់ដេកជាមួយគេតាមសម្រួល ទីពីរ បើនាងមិនព្រម ត្រូវគេបាញ់សម្លាប់ដោយខ្ទប់នឹងខ្នើយ។
ឮដូច្នេះនាងបុប្ផា មានការអស់សង្ឃឹមក្នុងជីវិតយ៉ាងខ្លាំង ហើយបុរសបិសាចតណ្ហាម្នាក់នោះក៏បានចាប់បង្ខំនាងដេកជាមួយនាងទាំងតំណក់ទឹកភ្នែករបស់នាងហូរជោកខ្នើយ។ គេបានបង្ខាំងនាងទុកនៅក្នុងបន្ទប់ផ្ទះសំណាក់នោះអស់រយៈពេលមួយសប្ដាហ៍ដើម្បីប្រើកាមគុណរបស់គេ ហើយគេបានដឹកនាងយកមកទម្លាក់ចោលនៅខាងមុខហាងខារ៉ាអូខេនោះហើយគេឲ្យប្រាក់ទៅនាងចំនួនសាមសិបដុល្លារ។ ពេលចូលទៅដល់ក្នុងហាង បុប្ផា ក៏បានប្រាប់មីងរបស់នាងដែលជាអ្នកលក់ស្រាឲ្យភ្ញៀវនៅទីនោះថា បុរសនោះយកនាងទៅធ្វើបាប មីងរបស់នាងនោះឆ្លើយធ្វើជាមិនដឹងរឿងថា មីងស្មានតែគេយកក្មួយឯងទៅធ្វើការ បើដឹងថា គេយកក្មួយឯងទៅធ្វើបាបដូច្នេះ មីងមិនឲ្យក្មួយឯងទៅនោះទេ តែពេលដែលបុប្ផា បង្ហាញប្រាក់ដែលបុរសនោះឲ្យ ម្ដាយមីងរបស់នាងបានសុំប្រាក់ពីនាង តែនាងមិនឲ្យហើយគេក៏បានទៅប្រាប់ថៅកែហាង ថៅកែហាងក៏បានវាយយកប្រាក់ពីនាងអស់។ ចាប់ពីពេលនោះមក គេឲ្យបុប្ផាទៅដេកខាងក្រៅជាមួយភ្ញៀវរហូតនៅពេលនាងក្រាញមិនទៅដេកជាមួយភ្ញៀវ ថៅកែនោះបានឲ្យជើងកាងមកវាយ ហើយយកខ្សែភ្លើងឆក់សន្លប់បី ឬបួនដង ពេលដែលនាងអស់តម្លៃដេកជាមួយភ្ញៀវនៅខាងក្រៅ ថៅកែហាងបានឲ្យនាងទទួលភ្ញៀវ ឬដេកជាមួយភ្ញៀវនៅនឹងកន្លែងម្ដង ហើយគេឲ្យនាងទទួលភ្ញៀវមិនថា មានជំងឺ ឬមានរដូវនោះទេ គេបង្ខំឲ្យនាងទទួលភ្ញៀវរហូត គឺម្ភៃបួនម៉ោងលើម្ភៃបួនម៉ោង បើអស់កម្លាំងហើយងងុយដេកពេក គេបង្ខំឲ្យប្រើថ្នាំញៀន នាងបានរករត់ប៉ុន្មានដងដែរ តែនាងមិនស្គាល់អ្វីទាំងអស់ នៅក្នុងទីក្រុងភ្នំពេញ។
មកដល់ពេលនេះ បុប្ផា មានអាយុម្ភៃឆ្នាំ នាងបានចាញ់បោកម្ដាយមីងរបស់នាងយកមកលក់ឲ្យផ្ទះបនបង្កប់នៅក្នុងហាងខារ៉ាអូខេនោះតាំងពីនាងមានអាយុដប់បួនឆ្នាំមកម្ល៉េះ។ ដូច្នេះនាងបានផុងខ្លួននៅក្នុងផ្ទះបននោះអស់រយៈពេលជិតប្រាំមួយឆ្នាំ ទម្រាំតែអង្គការ AFESIPសហការជាមួយសមត្ថកិច្ចប៉ូលិសទៅរំដោះនាង និងក្មេងស្រីរងគ្រោះដទៃទៀត។ ឥឡូវនេះបុប្ផា គិតថា នាងមានជីវិតរបស់ឡើងវិញហើយ អ្វីដែលនាងកំពុងយកចិត្តទុកដាក់នៅពេលនេះគឺការរៀនជំនាញកាត់ដេររបស់នាងដែលអង្គការ AFESIP បានបណ្ដុះបណ្ដាល នៅពេលរៀនចប់អង្គការនឹងផ្ដល់ឧបករណ៍សម្ភារៈកាត់ដេរទៀត។ បុប្ផាជាកូនច្បងទីពីរ ក្នុងបងប្អូនរបស់នាងចំនួនប្រាំមួយនាក់ ឪពុកម្ដាយ បងប្អូន របស់នាងមិនដឹងថា នាងធ្លាក់ខ្លួនចូលក្នុងក្រញាំបិសាចតណ្ហាដូច្នេះទេ៕
កេចម៉ាត់ក្រពើឡើងលើខ្លា
ក្នុងនាមខ្ញុំជាកូនខ្មែរមួយរូប នៅពេលបានអានអត្ថបទនេះចប់ ខ្ញុំមានការព្រួយបារម្ភយ៉ាងខ្លាំង
ដល់កូនខ្មែរមួយចំនួនដែលជួបប្រទះនិងបញ្ហាគ្រួសារក្រីក្រ បណ្ដាលអោយរូបនាងធ្លាក់ខ្លួនទៅក្នុងជីវិតមួយដូចជាការស្លាប់ទាំងរស់ ដូចនេះសូមអោយអង្គការ និងស្ថាប័នរដ្ឋ ជួយពង្រឹងច្បាប់អោយបានរឹងមាំ ដើម្បីជួយកូនខ្មែរអោយរួចផុតពីអំពើដ៏សែនវេទនានេះ។