ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានមានប្រសាសន៍កាលពីថ្ងៃពី១៥ ខែកញ្ញា ឆ្នាំ២០០៨ ថាព័ត៌មានស៊ើបអង្កេតមានសារៈសំខាន់ណាស់ ព្រោះវាបានផ្ដល់ការវិភាគឯករាជ្យសម្រាប់អ្នកសារព័ត៌មាន បើទោះបីជាគេត្រូវការពេលវេលាស្រាវជ្រាវហើយក្ដាប់ព័ត៌មានពីប្រភពជាច្រើនក្ដី។
លោក ខៀវ កាញារីទ្ធ បានមានប្រសាសន៍ក្នុងពិធីបើកសិក្ខាសាលាស្ដីពីការសរសេររបាយការណ៍ព័ត៌មានស៊ើបអង្កេតដែលឧបត្ថម្ភដោយអង្គការ UNESCO នៅមជ្ឈមណ្ឌលវិជ្ជាជីវៈនិងវិក្រិតការសារព័ត៌មានថា ព័ត៌មានស៊ើបអង្កេតជាបច្ចុប្បន្នភាពរយៈពេលវែង វាជាការសរសេរដែលមានចរិតស៊ីជម្រៅជាងព័ត៌មានប្រចាំថ្ងៃ ឬជាព័ត៌មានបច្ចុប្បន្នភាពរយៈពេលខ្លី។
សិក្ខាកាមចំនួន២០នាក់មកពីស្ថាប័នសារព័ត៌មានរដ្ឋ ឯកជននិងជាមន្ត្រីរាជការក្រសួងព័ត៌មានបានចូលរួមក្នុងសិក្ខាសាលាដែលនិងបញ្ចប់នៅថ្ងៃទី១៨ ខែកញ្ញា ឆ្នាំ២០០៨។