ទាំងមន្ត្រីរាជការ រួមនិងប្រជាពលរដ្ឋកម្ពុជាបានទទួលស្វាគមន៍កាលពីម្សិលមិញចំពោះការលើកឡើងរបស់លោកនាយករដ្ឋមន្ត្រីហ៊ុន សែន ដែលចង់ឲ្យមានការផ្ដល់ស្លាកម៉ូតូ រថយន្ត ដល់អតិថិជននៅផ្ទាល់នឹងកន្លែងលក់តែម្ដង ដោយពួកគេបានអះអាងថា ការផ្ដល់ស្លាកលេខនាពេលកន្លងមកមានការលំបាក និងមានភាពយឺតយ៉ាវយ៉ាងខ្លាំង។ ការគាំទ្រនេះគឺធ្វើឡើងបន្ទាប់ពីប្រមុខរដ្ឋាភិបាលកម្ពុជាបានផ្ដល់អនុសាសន៍កាលពីថ្ងៃទី ៨ ឧសភាកន្លងមកទៅក្នុងសន្និបាតបូកសរុបការងារឆ្នាំ ២០០៧ និងទិសដៅឆ្នាំ ២០០៨ ទៅឲ្យក្រសួងសាធារណការ និងដឹកជញ្ជូនពិចារណារកវិធីសាស្ត្រដើម្បីកំណត់ឲ្យក្រុមហ៊ុនលក់រថយន្ត និងឃ្លាំងម៉ូតូនានានៅតាមខេត្ត-ក្រុងទាំងអស់ផ្តល់ស្លាកលេខឲ្យអតិថិជនភ្លាមៗក្រោយពីពួកគេទិញយកទៅប្រើប្រាស់។
នាយករដ្ឋមន្ត្រីហ៊ុន សែន បានគូសបញ្ជាក់ថា ៖ «ដើម្បីជួយសម្រួលដល់អ្នកទិញនិងម្ចាស់ក្រុមហ៊ុនលក់ឡាន លក់ម៉ូតូ គឺថាទិញភ្លាមអាចទទួលបានស្លាកលេខភ្លាមៗ នោះក្រុមហ៊ុនលក់ឡាន និងម៉ូតូ នឹងសប្បាយចិត្តចំណែកឯអ្នកទិញមិនចាំបាច់ទៅរកធ្វើលេខអ្វីទេ គឺអាចធ្វើលេខនៅនឹងកន្លែងលក់ដូររបស់ក្រុមហ៊ុនផ្ទាល់តែម្តង»។
លោកនាយករដ្ឋមន្ត្រីបានបន្តទៀតថា ៖ «ការធ្វើរបៀបនេះគឺជាវិធីល្អ ព្រោះថា នៅពេលដែលពួកគេទទួលបានសេវាងាយស្រួលបែបនេះ ហើយពួកគេនឹងបញ្ជូនព័ត៌មានឲ្យមករដ្ឋទាំងម៉ូតូនិងរថយន្ត»។ លោកហ៊ុន សែនក៏បានបន្តថាបញ្ហាកំណត់ការចេញស្លាកលេខដោយផ្ទាល់ពីក្រុមហ៊ុនឡាន ម៉ូតូ គឺជាផែ្នកមួយនៃកំណែទម្រង់រដ្ឋបាលសាធារណៈដែលផ្តល់សេវាកាន់តែល្អ។
ទាក់ទិននិងបញ្ហានេះលោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនមានប្រសាសន៍ថា ៖ «ការលើកឡើងរបស់សម្តេចហ៊ុន សែន គឺជាអនុសាសន៍ល្អត្រឹមត្រូវ។ ចំណែកខាងក្រសួងសាធារណការ និងដឹកជញ្ជូននឹងយកអនុសាសន៍ទៅសិក្សារកវិធីសម្រួលក្នុងការចេញស្លាកលេខដល់អ្នកទិញរថយន្ត និងម៉ូតូនៅតាមក្រុមហ៊ុនផ្ទាល់»។ លោកស៊ុន ចាន់ថុល បានបន្តថា៖ «ការធ្វើរបៀបនេះគឺងាយស្រួល ទិញឡានភ្លាមពាក់ស្លាកលេខភ្លាមដោយយើងអាចចេញស្លាកលេខបណ្តោះអាសន្ននៅគ្រានោះ ហើយទុកពេលវេលាឲ្យធ្វើស្លាកលេខធម្មតាឲ្យវិញ»។ ប៉ុន្តែលោកគឹម សុខា ប្រធានគណបក្សសិទ្ធិមនុស្សបានធ្វើការរិះគន់ចំពោះនិតិវិធីនៃការធ្វើស្លាកលេខរថយន្ត ម៉ូតូបច្ចុប្បន្ន និងបានលើកឡើងថា៖ «ទី១ កុំឲ្យយឺតយ៉ាវចេញស្លាកលេខ ទី២ កុំឲ្យបង្កើនអំពើពុករលួយច្រើនពេក»។ ទោះបីជាយ៉ាងណាលោកកឹម សុខា អះអាងថាភាពគឺស្ថិតនៅលើការអនុវត្ត។ លោកក៏បានផ្តល់អនុសាសន៍ថាប្រសិនបើរដ្ឋគ្មានមធ្យោបាយធ្វើស្លាកលេខ ឬធ្វើមិនត្រឹមត្រូវ គឺគួរតែឲ្យឯកជនធ្វើប៉ុន្តែត្រូវឲ្យមានការដេញថ្លៃ ដែលនេះជាការល្អមួយហើយឆាប់រហ័សទៀត»។
ចំពោះការលើកឡើងថា និងអាចមានផ្តល់ស្លាកលេខឡាន ម៉ូតូនៅនឹងកន្លែងលក់ដោយផ្ទាល់នោះ ត្រូវបានលោកចាន់ ទី មន្ត្រីបម្រើការនៅរាជាយស្ម័យយានកម្ពុជាសំដែងនូវការគាំទ្រ ដោយលោកថ្លែងថា៖ «គឺជាការងាយស្រួលដល់អ្នកប្រើប្រាស់ពេលទិញរថយន្ត ឬទិញម៉ូតូគឺមិនពិបាកទៅរកធ្វើលេខ ព្រោះការសុំធ្វើស្លាកលេខកន្លងមកពិបាកណាស់។ ប្រសិនបើចេញស្លាកលេខនៅនិងកន្លែងគឺងាយស្រួលដល់អ្នកទិញប្រើប្រាស់ហើយអាចមានពេលវេលារកស៊ីធ្វើការអ្វីផ្សេងទៀតបានជាជាងចំណាយពេលវេលាច្រើនទៅរង់ចាំធ្វើស្លាកលេខ»។
ទោះមានព័ត៌យ៉ាងដូចនេះក្តីក៏ប៉ុន្តែលោករដ្ឋមន្ត្រីស៊ុន ចាន់ថុល មិនបានបញ្ជាក់ពីវិធានការ ឬពេលវេលាជាក់លាក់ណាមួយដើម្បីចាប់ផ្តើមអនុវត្តនូវឡើយទេដោយលោកគ្រាន់តែអះអាងថា ក្រសួងសាធារណការ និងដឹកជញ្ជូននិងធ្វើការពិចារណា សិក្សាលើអនុសាសន៍នេះជាបន្ទាន់។
ក្រៅពីផ្តល់អនុសាសន៍ខាងលើ លោកនាយករដ្ឋមន្ត្រីហ៊ុន សែន ក៏បានបង្ហើបឲ្យដឹងថា ការធ្វើស្លាកលេខម៉ូតូ ក៏អាចទម្លាក់ទៅដល់ថ្នាក់ស្រុកផងដែរដើម្បីងាយស្រួលដល់ប្រជាពលរដ្ឋនៅតាមខេត្តធ្វើស្លាកលេខម៉ូតូរបស់ខ្លួន។ ជាវិធានការដែលលោកនាយករដ្ឋមន្ត្រីអះអាងថា នឹងឲ្យមានភាពងាយស្រួលក្នុងការគ្រប់គ្រងយានយន្តនៅកម្ពុជា។ យានយន្តនៅប្រទេសកម្ពុជាដែលបានចុះបញ្ជីគិតត្រឹមឆ្នាំ២០០៧ រួមមានទោចក្រយានយន្តចំនួន៦៧១ ០០០ គ្រឿង និងរថយន្តគ្រប់ប្រភេទចំនួន ១៩៧ ០០០ គ្រឿង។ ចំនួននេះមិនគិតយានយន្តដែលមិនទាន់ចុះបញ្ជីនៅឡើយទេ។ ជាមួយគ្នានេះដែរលោកនាយករដ្ឋមន្ត្រីហ៊ុន សែន ក៏បានអះអាងបញ្ជាក់ឲ្យដឹងទៀតថា៖ «កម្ពុជាកំពុងមានវិបត្តិខ្វះម៉ូតូលក់»។ លោកក៏បានលើកឡើងថា ចំនួនគ្រោះថ្នាក់ចរាចរណ៍ត្រូវបានកើនឡើងពី ៤ ២៥០ ករណីនៅឆ្នាំ២០០៥ ដល់ចំនួន ៩ ៤៥០ ករណីនៅឆ្នាំ២០០៧។ អត្រាកំណើនមានសន្ទុះ
ឡើងដល់ ១៣៦%ហើយថាមានមនុស្សស្លាប់ជាបធ្យមមាន ៣,៧នាក់ក្នុងមួយថ្ងៃ ហើយនៅឆ្នាំ ២០០៦ មានចំនួនមនុស្សស្លាបជាមធ្យម ៤,២២ នាក់ក្នុងមួយថ្ងៃ។
កាលពីថ្ងៃទី ០៨ ខែកុម្ភៈ ឆ្នាំ ២០០៨ កន្លងទៅនេះ ដើម្បីជម្រុញឲ្យអ្នកជិះម៉ូតូ ប្រើប្រាស់មួកសុវត្ថិភាពគ្រប់គ្នាស្របតាមច្បាប់ចរាចរណ៍ផ្លួវគោក និងគោលបំណងកាត់បន្ថយគ្រោះថ្នាក់ចរាចរណ៍ដល់អាយុជីវិតនៅពេលធ្វើដំណើរ សាលាក្រុងភ្នំពេញក៏បានធ្វើការណែនាំដល់ម្ចាស់ហាង និងម្ចាស់ឃ្លាំងលក់ម៉ូតូនៅទីក្រុងភ្នំពេញត្រូវផ្តល់បន្ថែមនូវមួកសុវត្តិភាព ២ទៅឲ្យអតិថិជនណាដែលបានទិញម៉ូតូមួយគ្រឿងយកទៅប្រើប្រាស់។