រាជធានីភ្នំពេញ៖ ស្របពេលដែលប្រព័ន្ធបច្ចេកវិទ្យាព័ត៌មានកាន់តែខ្ពស់ និងកាន់តែរីកចម្រើនឡើងនាដំណាក់កាលចុងក្រោយនេះ រូបភាពអាសអាភាសជាច្រើនបានស្ថិតនៅក្នុងទូរស័ព្ទដៃទំនើបៗរបស់មនុស្សមួយចំនួនដែលចូលចិត្តទស្សនារូបភាពបែបនេះ។ បញ្ហានេះយើងមិនអាចបន្ទោសលើបច្ចេកវិទ្យាបម្រើដល់សេចក្ដីត្រូវការរបស់ជនគ្រប់រូបនោះទេ តែវាអាស្រ័យលើសីលធម៌របស់អ្នកប្រើប្រាស់ប៉ុណ្ណោះ ថាតើគប្បីប្រកាន់ឥរិយាបថបែបណា។
បញ្ហាបញ្ជូនរូបភាពតាមទូរស័ព្ទដៃកន្លងមកដែលធ្លាប់បង្កឲ្យមានប្រតិកម្មយ៉ាងខ្លាំងក្លានោះហាក់បានស្ងាត់រលត់មួយរយៈពេលដែរ តែពេលថ្មីៗនេះវីដេអូឃ្លីបដែលមានថិរវេលារយៈពេល៤នាទី០៣ ត្រូវបានគេបញ្ជូនតៗគ្នាជារូបភាពនារីស្រស់ផូរផង់ម្នាក់ស្ថិតក្នុងវ័យ២០ផ្លាយឆ្នាំកំពុងងូតទឹកក្នុងបន្ទប់ទាំងមានរាងកាយអាក្រាត។ តាមរយៈវីដេអូហាក់ដូចជាការលួចថត តាមរន្ធបន្ទប់ទឹកនោះដែលនាងមិនបានចាប់អារម្មណ៍នោះទេ គឺមានន័យថា នាងងូតទឹកនៅក្នុងបន្ទប់មួយដែលមិនមែនជាផ្ទះរបស់នាង។ អ្វីដែលត្រូវបានចាប់អារម្មណ៍ទៀតនោះ គឺទឹកដែលនាងដងងូតនោះមានស្រទាប់ផ្កាឈូកដែលអាចមានន័យថា ជាទឹកមន្ត តែមិនអាចដឹងច្បាស់ថា ទឹកមន្តគ្រូពេទ្យ ឬព្រះសង្ឃនោះទេ។ រយៈពេលប៉ុន្មានថ្ងៃនេះ តាមរយៈវីដេអូឃ្លីបនេះបានក្លាយទៅជាព័ត៌មាន ដែលគេនិយាយថា មានស្ត្រីម្នាក់ទៅស្រោចទឹកនៅក្នុងវត្តមួយ តែមិនច្បាស់ថា វត្តណាទេ ឬក៏ទីអាស្រមរបស់គ្រូមន្តអាគមណាមួយឡើយ។ ប៉ុន្តែការពិនិត្យមើលតាមរូបភាពនៅលើអេក្រង់ទូរស័ព្ទគឺបានបង្ហាញឲ្យឃើញពីភាពអាក្រាតរបស់ស្ត្រីម្នាក់នោះនៅក្នុងបន្ទប់មួយ ស្រាតមុជទឹកក្នុងបន្ទប់ និងកំពុងដួសទឹកពីក្នុងធុងជ័រមួយមានផ្កាឈូកអណ្ដែតទំនងជាទឹកមន្តអាគមរបស់គ្រូអាចារ្យណាមួយ ដោយអត់ដឹងថាមានព្រានកំពុងប្រមាញ់រូបភាពអាក្រាតរបស់ខ្លួនឡើយ។
ទោះបីជាមានការផ្សាយរូបភាពដែលបង្កឲ្យប៉ះពាល់កិត្តិយសយ៉ាងធ្ងន់ធ្ងរដល់ស្ត្រីរងគ្រោះយ៉ាងណាក្ដី ក៏បានធ្វើឲ្យមានចំងល់ថា តើជនណាលួចថតនារីរូបនេះ ជាប់គ្រប់សកម្មភាពនៃការមុជទឹកជំរះខ្លួនតាំងពីដើមដល់ចប់នោះដោយរបៀបណា។ ប្រភពព័ត៌មានខ្លះសន្និដ្ឋានថា អាចថតរូបតាមកាមេរ៉ាចាប់រូបភាពដែលម្ចាស់ទីតាំងបង្កប់នៅក្នុងបន្ទប់សំងាត់របស់នារី។
ប្រភពព័ត៌មានខ្លះទៀតបានលើកឡើងថា នារីដែលជាម្ចាស់ខ្លួននៅក្នុងទូរស័ព្ទដៃដែលគេកំពុងនាំគ្នាបាញ់បញ្ជូនតៗគ្នាសម្រាប់កម្សាន្តភ្នែកតាមទូរស័ព្ទនោះ ទំនងជាពុំដឹងខ្លួនថា មានគេលួចថតចម្លងចែកគ្នាមើលរូបភាពអាក្រាតរបស់នាងតាមទូរស័ព្ទឡើយ។ ឬក៏ម្ចាស់ខ្លួនដឹង ហើយធ្វើព្រងើយមិនអើពើ ដោយសារតែខ្លួនមិនមែនជាជនជាតិខ្មែរ? ប៉ុន្តែបើនាងមិនមែនជាជនជាតិខ្មែរអាចជា ចិន កូរ៉េ ឬវៀតណាម។ ប៉ុន្តែរូបភាពអាក្រាតនេះប្រសិនជានារីខ្មែរវិញ គឺពិតជាធ្វើឲ្យមានការឈឺចាប់ ហើយវីដេអូឃ្លីបនេះកំពុងបំផ្លាញកិត្តិយសនារីខ្មែរដែលគោរពទំនៀមទម្លាប់ប្រពៃណីដ៏ផូរផង់យូរលង់របស់ជាតិផងដែរ។
ប្រភពព័ត៌មានមួយបានបង្ហើបឲ្យដឹងថា ខាងសមត្ថកិច្ចកំពុងមានការចាប់អារម្មណ៍លើបញ្ហាខាងលើនេះ ហើយបានអំពាវនាវដល់ម្ចាស់ខ្លួនជាស្ត្រីភេទរូបនេះឲ្យប្ដឹងមកសមត្ថកិច្ចដើម្បីចាត់ការជនកំហូចដែលលួចថតនេះ ព្រោះមានតែនាងទេដែលដឹងថានាងងូតទឹកនៅទីណា?
គេមិនគួរទុកឲ្យក្រុមជនខិលខូចប្រព្រឹត្តអំពើបែបនេះទៅលើស្ត្រីភេទរហូតបញ្ជូនរូបភាពបន្តគ្នាពីមួយទៅមួយ ធ្វើដូចជារឿងលេងសើចធម្មតាបែបនេះឡើយ។ ចុះបើចំលើប្រពន្ធកូនខ្លួនវិញ តើមានការឈឺចាប់ដែរ ឬយ៉ាងណា? ទន្ទឹមនឹងនេះដែរ ក៏ជាព័ត៌មានមួយសំណូមពរទៅដល់នារីភេទទូទៅដែលធ្លាប់លង់ជឿលើការប្រោះព្រំទឹកមន្ត ឬក៏ធ្លាប់ទៅស្រោចទឹកនៅទីណា មិនគួរសំរាតខ្លួនទាំងស្រុង ដោយគិតថា ជាបន្ទប់សុវត្ថិភាពគ្មានមនុស្សណាឃើញក្រៅពីខ្លួនឯងទេ គឺគួរឈប់ទុកចិត្តពេកទៅ ព្រោះសម័យទំនើបនេះគេធ្វើអ្វីក៏បានដែរ៕
ការប្រើប្រាស់បច្ចេកវិទ្យា គមនាគមន៍ ព័ត៌មានក្នុងផ្លូវត្រូវ
កម្មវិធីស្ត្រី នៃអង្គការវិទ្យាស្ថានបើកទូលាយ បានដកស្រង់យកអត្ថបទនេះមកផ្សព្វផ្សាយ ក្នុងគោលបំណងបង្ហាញពីការប្រើប្រាស់បច្ចេកវិទ្យា គមនាគមន៍ ព័ត៌មានវិទ្យា ក្នុងផ្លូវអវិជ្ជមានរបស់បុគ្គលមួយចំនួន ដែលការប្រើប្រាស់ខុសផ្លូវនេះ បាន និងកំពុងបំផ្លាញដល់ការខិតខំអភិវឌ្ឍន៍សង្គមកម្ពុជារបស់រដ្ឋាភិបាល និងប្រជាជនកម្ពុជាទាំងមូល។
បច្ចេកវិទ្យា គមនាគមន៍ ព័ត៌មានវិទ្យា-ICT ដើរតួនាទីដ៏សំខាន់ក្នុងការអភិវឌ្ឍន៍សង្គម និងក្នុងការលុបបំបាត់អំពើហិង្សាលើស្ត្រី។ ICT ធ្វើឲ្យស្ត្រីអាចទទួលបានព័ត៌មាន មានឱកាសស្វែងរកប្រាក់ចំណូលផ្ទាល់ខ្លួន កសាងសមត្ថភាព និងមានលក្ខណៈប្រកួតប្រជែង បើទោះបីជាស្ត្រីទាំងនោះ មិនមានពេលវេលាគ្រប់គ្រាន់សម្រាប់ចេញមកបំពេញការងារនៅខាងក្រៅក៏ដោយ។
ដូច្នេះ ស្ត្រីគួរពង្រឹងសមត្ថភាពផ្ទាល់ខ្លួនក្នុងការស្វែងយល់ និងប្រើប្រាស់បច្ចេកវិទ្យា គមនាគមន៍ ព័ត៌មានវិទ្យា ដែលការយល់ដឹងនេះ នឹងអាចជួយឲ្យស្ត្រីរួចផុតពីការរំលោភបំពាន ពីការប្រើប្រាស់ក្នុងផ្លូវខុសរបស់បុគ្គលមួយចំនួន៕
កម្មវិធីស្ត្រី នៃអង្គការវិទ្យាស្ថានបើកទូលាយ