សន្នីសិទស្ដីពីទិវាអន្តរជាតិ ស្ដីពីចំណាកស្រុក (រូបថត ៖ ប៊ុណ្ណា)ភ្នំពេញ ៖ អង្គការខារាមប្រចាំតំបន់អាស៊ី (CARAM) បានធ្វើការអំពាវនាវ សូមឱ្យក្រសួងស្ថាប័នរដ្ឋាភិបាល និងទីភ្នាក់ងារមិនមែនរដ្ឋាភិបាលទាំងអស់ ចូលរួមបញ្ឈប់អំពើហិង្សា ដែលកើតមានជាប្រចាំមកលើកម្មករចំណាកស្រុក នៅទូទាំងពិភពលោក។
លោកយ៉ា ណាវុធ នាយកប្រតិបត្តិអង្គការខារាមកម្ពុជា បានមានប្រសាសន៍នៅក្នុងសន្និសីទកាសែត កាលពីព្រឹកថ្ងៃទី១៤ ខែធ្នូ ឆ្នាំ២០០៧ ថា មានកម្មករកម្ពុជាចំណាកស្រុកដោយខុសច្បាប់ប្រមាណជាង២សែននាក់ ដែលជាក្រុមងាយរងគ្រោះពីទម្រង់នៃអំពើហិង្សា និងការរំលោភបំពានផ្សេងៗ ហើយការរំលោភនេះនៅតែមានការកើនឡើង។ លោកបន្តថា អំពើហិង្សាដែលកើតមានឡើងចំពោះកម្មករចំណាកស្រុកនោះ តាមការសិក្សាស្រាវជ្រាវបង្ហាញថា មុនពេលចេញដំណើរ ពលករត្រូវជំពាក់បំណុលក្រុមហ៊ុននាំពលករ ក្នុងការស្នាក់នៅ និងបំពេញបែបបទផ្សេងៗ ពលករភាគច្រើនមិនបានយល់ដឹងពីកិច្ចសន្យាការងារ មុនពេលចេញដំណើរ ការរំលោភកិច្ចសន្យាការងារពីនិយោជក ដោយត្រូវប្ដូរកិច្ចសន្យាការងារជាថ្មី នៅពេលទៅដល់ប្រទេសទទួល ដែលខុសពីអ្វីដែលបានចុះកិច្ចសន្យានៅប្រទេសបញ្ជូន សិទ្ធិសេរីភាពក្នុងការដើរហើរ និងលិខិតឆ្លងដែនត្រូវបានគេដកហូត ដែលនាំឱ្យពួកគាត់ខ្វះលទ្ធភាពទំនាក់ទំនងមករកគ្រួសារ។ លោកបន្តថា ពលករខ្លះទៀតមានពេលសម្រាកតិចតួច ការហូបចុកមិនគ្រប់គ្រាន់ ដែលបញ្ហាទាំងអស់ខាងលើនេះ ច្រើនកើតមាននៅប្រទេសថៃ និងម៉ាឡេស៊ី។
លោកហ្គាណេស ហ្គូរុន (Ganesh Gurung) ប្រធានខារាមប្រចាំតំបន់អាស៊ីបានថ្លែងថា បើទោះបីជាចំណូលបានពីកម្មករចំណាកស្រុក នៅតែត្រូវបានចាត់ទុក ជាកត្តារួមចំណែកមួយក្នុងការអភិវឌ្ឍន៍ក៏ដោយ ក៏សន្តិសុខ និងសិទ្ធិរបស់ជនចំណាកស្រុកនោះ មិនបានទទួលការយកចិត្តទុកដាក់ថាជាផ្នែកមួយនៃការអភិវឌ្ឍន៍ឡើយ។ ជនចំណាកស្រុកបានក្លាយជាក្រុមងាយរងគ្រោះ ពីទម្រង់នៃអំពើហិង្សាផ្សេងៗ ដូចជាការរំលោភបំពានរាងកាយ អំពើហិង្សាលើផ្លូវភេទ ការបង្ខិតបង្ខំឱ្យធ្វើការ ការជួញដូរ និងការរំលោភបំពានលើសរីរាង្គ និងចិត្តសាស្ត្រផ្សេងៗ នៅគ្រប់ដំណាក់កាលទាំងអស់នៃការធ្វើចំណាកស្រុក។
អង្គការខារាមប្រចាំតំបន់អាស៊ី (CARAM) និងអង្គការខារាមកម្ពុជា នឹងរួមគ្នាប្រារព្ធទិវាចំណាកស្រុកអន្តរជាតិ នៅថ្ងៃទី១៦ ខែធ្នូ ឆ្នាំ២០០៧ នៅសួនច្បារសម្ដេចតេជោហ៊ុន សែន ដោយមានអ្នកចូលរួមប្រមាណ១០០០នាក់ ជាកម្មករចំណាកស្រុក សកម្មជនមកពីប្រទេសផ្សេងៗក្នុងតំបន់អាស៊ី និងមជ្ឈិមបូព៌ា មន្ត្រីរាជរដ្ឋាភិបាល និងតំណាងមកពីទីភ្នាក់ងារអង្គការសហប្រជាជាតិ ក្រោមប្រធានបទការបញ្ឈប់អំពើហិង្សាមកលើកម្មករចំណាកស្រុក ព្រមទាំងមានការរៀបចំក្បួនដង្ហែពីវត្តលង្កា ឆ្ពោះទៅកាន់សួនច្បារសម្ដេចតេជោ ហ៊ុន សែន ផងដែរ។ ឆ្នាំ២០០៦ ប្រទេសកម្ពុជាបានបញ្ជូនពលករទៅធ្វើការស្របច្បាប់ នៅប្រទេសកូរ៉េចំនួន៣៣៩៩នាក់ ហើយនៅឆ្នាំ២០០៧នេះ បានបញ្ជូនពលករស្របច្បាប់ទៅធ្វើការនៅប្រទេសថៃចំនួន៥២៦៨នាក់ ទៅប្រទេសម៉ាឡេស៊ីចំនួន៩៣៧៧នាក់៕