ប្រវត្តិអង្គការប្រឆាំងអំពើហិង្សាក្នុងគ្រួសារ
អង្គការប្រឆាំងអំពើហិង្សាក្នុងគ្រួសារ ជាអង្គការមិនមែនរដ្ឋាភិបាលក្នុងស្រុក ដែលបានបង្កើតឡើងនៅខែមករា ឆ្នាំ១៩៩៥ ក្រោយការស្រាវជ្រាវ "ចានក្នុងរាវគង់រណ្ដំ" នៅក្នុងឆ្នាំ ១៩៩៤ ដែលបានរៀបចំឡើងដោយរដ្ឋលេខាធិការដ្ឋានកិច្ចការនារី ក្រោមការឧបត្ថម្ភពី USAID តាមរយៈមូលនិធិអាស៊ី និងអង្គការ UNICEF ។ អង្គការបានចុះបញ្ជីទទួលស្គាល់ជាផ្លូវការ ដោយក្រសួងមហាផ្ទៃលេខ ៨៦៩ សជណ ចុះថ្ងៃទី ១១ ខែសីហា ឆ្នាំ១៩៩៧។
ទស្សនៈវិស័យរបស់អង្គការ
មានសង្គមមួយ ដែលមនុស្សគ្រប់រូបរស់នៅចាកផុតពីអំពើហិង្សាក្នុងគ្រួសារ។
បេសកកម្ម
អង្គការប្រឆាំងអំពើហិង្សាក្នុងគ្រួសារ ជាអង្គការមិនមែនរដ្ឋាភិបាលក្នុងស្រុក ធ្វើការដើម្បីទប់ស្កាត់ កាត់បន្ថយ លប់បំបាត់ និងជួយជនរងគ្រោះដោយអំពើហិង្សាក្នុងគ្រួសារ។
កម្មវិធីរបស់អង្គការ
អង្គការប្រឆាំងអំពើហិង្សាក្នុងគ្រួសារ មានកម្មវិធី ចំនួន ៥ សំរាប់អនុវត្តន៍យុទ្ធសាស្ត្ររបស់ខ្លួនគឺ ៖ កម្មវិធីទូទៅ កម្មវិធីផ្ដល់ព័ត៌មាន និងគាំទ្រ កម្មវិធីផ្សព្វផ្សាយអោយមានការយល់ដឹងជាសាធារណៈ កម្មវិធីអប់រំ និងកម្មវិធីបុរសបញ្ឈប់អំពើហិង្សាលើស្ត្រី។
១. កម្មវិធីទូទៅ
ជាកម្មវិធីមួយធំក្នុងអង្គការ ទទួលខុសត្រូវលើសកម្មភាពទាំងអស់របស់អង្គការ ដោយរាប់បញ្ចូលទាំងការងាររដ្ឋបាល គ្រប់គ្រងគណនេយ្យហិរញ្ញវត្ថុ ការតស៊ូមតិ រកប្រភពថវិកា តាមដានសកម្មភាព និងធ្វើការស្រាវជ្រាវ។ នាយិកាអង្គការជាអ្នកទទួលខុសត្រូវរួមលើរាល់សកម្មភាពរបស់អង្គការ។
២. កម្មវិធីអប់រំ
កម្មវិធីអប់រំបានផ្ដល់ការយល់ដឹងពីបញ្ហាអំពើហិង្សាក្នុងគ្រួសារ ដល់មន្ត្រីរាជការ អង្គការមិនមែនរដ្ឋាភិបាលជាតិ និងអន្តរជាតិដែលធ្វើការពាក់ព័ន្ធ អោយពួកគេមានលទ្ធភាពជួយអ្នករងគ្រោះ ដោយសារអំពើហិង្សាក្នុងគ្រួសារ អោយកាន់តែប្រសើរ និងមានប្រសិទ្ធិភាពខ្ពស់។ ផ្ដល់ការយល់ដឹងតាមរយៈ ៖
- វគ្គបណ្ដុះបណ្ដាលស្ដីអំពីអំពើហិង្សាក្នុងគ្រួសារ ជាមួយមន្ត្រីនគរបាល និងមន្ត្រីក្រសួងកិច្ចការនារី និងអតីតយុទ្ធជន។
- សិក្ខាសាលាស្ដីពីអំពើហិង្សាក្នុងគ្រួសារ ជាមួយអាជ្ញាធរមូលដ្ឋានខេត្ត-ក្រុង ដើម្បីកែប្រែទស្សនៈថា អំពើហិង្សាក្នុងគ្រួសារជាបញ្ហាសង្គម ដែលគ្រប់គ្នាចូលរួមធ្វើអន្តរាគមន៍ និងផ្ដល់សេវាផ្នែកសុខភាព សុវត្ថិភាព និងផ្នែកច្បាប់ដល់ជនរងគ្រោះអោយកាន់តែប្រសើរឡើង។
- ផ្ដល់បាឋកថា ស្ដីពីអំពើហិង្សាក្នុងគ្រួសារ ដល់បណ្ដានិស្សិតនៅសកលវិទ្យាល័យសុខាភិបាល ភូមិន្ទនីតិសាស្ត្រ និងភូមិន្ទភ្នំពេញ ដើម្បីពង្រីកសីលធម៌រស់នៅ ដោយបង្រៀនអោយពួកគេចេះ និងយល់ពីការទំនាក់ទំនងប្រកបដោយអហិង្សា និងសារៈសំខាន់នៃការកសាងគ្រួសារប្រកបដោយសុភមង្គល។
- បង្កើតបណ្ដាញធ្វើការផ្សព្វផ្សាយស្ម័គ្រចិត្ត នៅតាមសហគមន៍ក្នុងខណ្ឌដង្កោ នៅក្នុងសង្កាត់ព្រៃស សំរោងក្រោម និងភ្លើងឆេះរទេះ។
៣. កម្មវិធីផ្ដល់ព័ត៌មាន និងគាំទ្រ
ដើម្បីសំរេចបាននូវគោលបំណងរបស់កម្មវិធី និងស្របតាមទស្សនៈរួមរបស់អង្គការ កម្មវិធីផ្ដល់ព័ត៌មាន និងគាំទ្រ ផ្ដល់នូវសេវាកម្មសង្គ្រោះដូចតទៅ ៖
- ផ្ដល់សេវាកម្មផ្ទាល់ទៅអ្នករងគ្រោះដោយអំពើហិង្សាក្នុងគ្រួសារ តាមរយៈការគាំទ្រ ផ្ដល់ព័ត៌មាន ការពិគ្រោះយោបល់ និងបញ្ជូនទៅកាន់សេវាចាំបាច់ ព្រមទាំងសម្របសម្រួលកិច្ចប្រជុំរវាងស្ត្រីរងគ្រោះ ដែលកំពុងដោះស្រាយបញ្ហា និងស្ត្រីរងគ្រោះដែលបានចាកពីបញ្ហាហិង្សាក្នុងគ្រួសារ ដើម្បីផ្លាស់ប្ដូរបទពិសោធន៍ ព្រមទាំងផ្ដល់អោយពួកគេនូវដំបូន្មានល្អៗ ទាក់ទិនទៅនឹងសុខភាពផ្លូវចិត្ត ព្រមទាំងបញ្ហាច្បាប់។
- ហ្វឹកហ្វឺនជំនាញ និងបច្ចេកទេស ផ្ដល់សេវាកម្មជួយអ្នករងគ្រោះ។
- ប្រជុំភ្នាក់ងារផ្ដល់សេវាកម្ម ពីអំពើហិង្សាក្នុងគ្រួសារ ដើម្បីពង្រឹងកិច្ចសហប្រតិបត្តិការ រវាងសមាជិកបណ្ដាញ តាមរយៈការផ្លាស់ប្ដូរព័ត៌មាន បទពិសោធន៍ និងដំណោះស្រាយនានា។
៤. កម្មវិធីផ្សព្វផ្សាយជាសាធារណៈ
កម្មវិធីផ្សព្វផ្សាយ មានទិសដៅបង្កើនការយល់ដឹងជាសាធារណៈស្ដីពីបញ្ហាអំពើហិង្សាក្នុងគ្រួសារ ដោយធ្វើអោយសង្គមទាំងមូល មានការគិតគូរខ្ពស់ជាសាធារណៈ។ ទិសដៅទាំងនេះត្រូវបានបំពេញតាមរយៈ ៖
- ការផ្សព្វផ្សាយតាមសហគមន៍ ៖ មានគោលបំណងផ្ដល់ព័ត៌មាន ជំរុញអោយមានការផ្លាស់ប្ដូរមតិយោបល់ និងការចែករំលែកបទពិសោធន៍ ក្នុងគោលបំណងបង្កើនការចូលរួមធ្វើអន្តរាគមន៍ ពីសំណាក់រាជរដ្ឋាភិបាល អង្គការក្រៅរដ្ឋាភិបាល អាជ្ញាធរមូលដ្ឋាន សហគមន៍។
- ការផ្សព្វផ្សាយតាមវិទ្យុ និងទូរទស្សន៍ ៖ នូវឈុតអប់រំខ្លី និងការផ្សាយបន្តផ្ទាល់តាមរយៈទូរស័ព្ទ ដោយមានការចូលរួមពីសំណាក់ប្រិយមិត្តអ្នកស្ដាប់គ្រប់មជ្ឈដ្ឋាន ដោយធ្វើការពិភាក្សា និងសំនួរចំលើយ ដែលទាក់ទងនឹងអំពើហិង្សាក្នុងគ្រួសារ តាមវិទ្យុ។
- សកម្មភាពចែកផ្ទាំងរូបភាពក្នុងទិវាបុណ្យជាតិ និងអន្តរជាតិ។
៥. កម្មវិធីបុរសបញ្ឈប់អំពើហិង្សាលើស្ត្រី ៖
គោលបំណងនៃកម្មវិធីនេះគឺ បុរសនឹងមានការទទួលខុសត្រូវ និងត្រូវបានផ្ដល់ឱកាសស្មើៗគ្នា ដើម្បីចូលរួមក្នុងបេសកកម្មកាត់បន្ថយអំពើហិង្សាក្នុងគ្រួសារ និងឈានទៅលប់បំបាត់ទាំងស្រុង រាល់ការរំលោភបំពានលើស្ត្រីនៅក្នុងប្រទេសកម្ពុជា។
ក្រុមពិភាក្សាបុរស
- ផ្ដល់ការពិភាក្សាមួយដងក្នុងមួយខែ ដែលទាក់ទងទៅនឹងប្រធានបទមួយចំនួនដូចជា ៖ អំពើហិង្សាក្នុងគ្រួសារ ការរំលោភបំពានផ្លូវភេទ អ៊ិនដូឌ័រ សិទ្ធិស្ត្រី ឥទ្ធិពលនៃការអនុវត្តប្រពៃណីវប្បធម៌ និងជំនឿលើតួនាទីភេទ ទស្សនៈអំពីភាពជាបុរស ការគ្រប់គ្រងកំហឹង ផលប៉ះពាល់នៃការហូបសុរាជាដើម។ កម្មវិធីបានរៀបចំប្រារព្ធវេទិកាសាធារណៈសំរាប់យុវវ័យរៀងរាល់បួនខែម្ដង។
ក្រុមពិភាក្សាស្ត្រី
- ផ្ដល់ការពិភាក្សាដែលទាក់ទងទៅនឹងរបៀបចរចា ការដោះស្រាយបញ្ហា ដើម្បីគេចចេញពីគ្រោះថ្នាក់ដែលបង្កមកពីអំពើហិង្សាក្នុងគ្រួសារ។ ពេលដែលបុរសបានកែប្រែអាកប្បកិរិយា ស្ត្រីត្រូវលើកទឹកចិត្ត ដើម្បីអោយបុរសបន្តធ្វើល្អទៅមុខទៀត។
ស្ថាប័នពាក់ព័ន្ធ
- ជាអ្នកអនុវត្តសកម្មភាពផ្ទាល់នៅក្នុងមូលដ្ឋាន ដើម្បីជួយធ្វើការអប់រំ អន្តរាគមន៍លើបញ្ហាអំពើហិង្សាក្នុងគ្រួសារ។ ក្រុមនេះតែងតែប្រជុំរៀងរាល់ខែ ក្នុងគោលបំណងចែករំលែកបទពិសោធន៍ពីគ្នាទៅវិញទៅមក។
ព័ត៌មានផ្សេងៗ សូមទាក់ទងអង្គការប្រឆាំងអំពើហិង្សាក្នុងគ្រួសារ
តាមរយៈទូរស័ព្ទ ៖ (០២៣) ៧២១ ៦៥៤
ប្រអប់សំបុត្រលេខ ៖ ២៤៥៩ ភ្នំពេញ ៣