១/ ការកកើតនៃយុទ្ធនាការ
យុទ្ធនាការនេះ គឺជាការងារមួយដែលបន្តប្រតិបត្តិជាច្រើនឆ្នាំមកហើយ របស់កម្មវិធីគាំទ្របណ្តាញស្ត្រី នៃអង្គការ Association for Progressive Communications ក្នុងការព្យាយាមដើម្បីតភ្ជាប់រវាង ការតស៊ូមតិ ទៅលើសិទ្ធិស្ត្រី និងសិទ្ធិក្នុងការប្រាស្រ័យទាក់ទង ។
ការប្រឆាំងអំពើហិង្សាទៅលើស្ត្រី គឺជាប្រធានបទប្រកបដោយលក្ខណៈជាប្រព័ន្ធមួយ ដែលយើងកំពុងប្រឈមនាទូទាំងពិភពលោក ក្នុងលក្ខណៈផ្សេងៗគ្នា ។
នាឆ្នាំ២០០៥ កម្មវិធីគាំទ្របណ្ដាញស្ត្រី (WNSP) បានផលិតនូវឯកសារមួយ ដែលលើកឡើងនិងបង្ហាញយ៉ាងច្បាស់អំពី ទំនាក់ទំនងទៅវិញទៅមក រវាងការប្រឆាំងអំពើហិង្សាទៅលើស្ត្រី និងបច្ចេកវិទ្យា គមនាគមន៍ ព័ត៌មានវិទ្យា ។ វគ្គចុងក្រោយនៃឯកសារមួយនេះ គឺជាការចាប់កំណើតឡើងនៃ «តំរូវការបច្ចេកវិទ្យា» ដែលអាចយកទៅកែសម្រួលនិងធ្វើអោយសមស្រប ក្នុងការប្រើប្រាស់បច្ចេកវិទ្យា ជាមធ្យោបាយផ្សេងៗ សំរាប់កិច្ចការងារដែលពាក់ព័ន្ធទៅនឹងសិទ្ធិស្រ្តី និងការតស៊ូមតិ នានារបស់សកម្មជនស្ត្រី ។
២/ តើយុទ្ធនាការនេះចាប់ផ្តើមនៅពេលណា ?
យុទ្ធនាការនេះចាប់ផ្តើមនាឆ្នាំ២០០៦ តាមរយៈកំលាំងសកម្ម និងការចូលរួមសហការ ពីសំណាក់អង្គការនានា នៅជុំវិញពិភពលោក ដូចជា CREA និង Tarshi នៅឥណ្ឌា G2G និង Mediataticaនៅប្រេស៊ីល KOMAS នៅម៉ាឡេស៊ី Silence Speaks នៅសហរដ្ឋអាមេរិក Women's Net នៅអាហ្វ្រិកខាងត្បូង និង AWID និង IWTC ជាអង្គការអន្តរជាតិ ។ អ្នកប្រើប្រាស់អ៊ិនធឺណិតជាច្រើន ក៏បានចូលរួមរៀបចំយុទ្ធនាការនេះ ដោយផ្តល់នូវមតិយោបល់ គំនិត ផ្ញើខ្លឹមសារអំពីសកម្មភាពផ្សេងៗ ដែលពួកគាត់បានចូលរួម ក្នុងយុទ្ធនាការ ។ កម្មវិធីគាំទ្របណ្តាញស្ត្រី (WNSP) ផ្តួចផ្តើមយុទ្ធនាការនេះ ដោយកសាងនិងផ្តល់អោយនូវឧបករណ៍និងប្រព័ន្ធ សំរាប់សកម្មភាពផ្សេងៗ ទាញយកនូវខ្លឹមសារពីអ្នកចូលរួមយុទ្ធនាការ និងរៀបចំខ្លឹមសារទាំងនោះ ផ្សព្វផ្សាយទៅលើតំបន់បណ្តាញ របស់យុទ្ធនាការ ។
៣/ គោលបំណងរបស់យុទ្ធនាការ
បង្កើតនូវទីកន្លែងជាលក្ខណៈអេឡិចត្រូនិក ដែលការពារនូវសិទ្ធិរបស់បុគ្គលគ្រប់រូប ក្នុងការផ្លាស់ទីដោយសេរី ដែលផុតពីការបៀតបៀន ឬការគំរាមទៅលើសុវត្ថិភាព (បំពងបន្ត នូវយុទ្ធនាការ «យកពេលយប់មកវិញ» ) ។
ការដឹងអំពីសិទ្ធិនានារបស់យើង ដើម្បីកែច្នៃ កំណត់ ចូលរួម ប្រើប្រាស់និងចែករំលែកចំណេះដឹង ព័ត៌មាន និងបច្ចេកវិទ្យាព័ត៌មាន ។
លើកឡើងនិងដោះស្រាយ នូវចំណុចប្រសព្វរវាង សិទ្ធិក្នុងការប្រាស្រ័យទាក់ទង និងសិទ្ធិមនុស្សរបស់ស្រ្តី ជាពិសេសការប្រឆាំងអំពើហិង្សាទៅលើស្ត្រី ។
ទទួលស្គាល់នូវការចូលរួមជាប្រវត្តិសាស្ត្រ និងដ៏មានសារៈសំខាន់ និងការរួមចំណែកក្នុងការអភិវឌ្ឍន៍ បច្ចេកវិទ្យា ពីសំណាក់ស្ត្រី ។
៤/ ក្រុមគោលដៅរបស់យុទ្ធនាការ
យុទ្ធនាការនេះ សំដៅទៅកាន់ សហគមន៍ អ្នកប្រើប្រាស់ និង អ្នកអភិវឌ្ឍន៍ បច្ចេកវិទ្យាព័ត៌មាន ជាពិសេស ស្ត្រី អ្នកតស៊ូមតិដែលធ្វើការពាក់ព័ន្ធការប្រឆាំងអំពើហិង្សាទៅលើស្ត្រី អ្នកផលិតខ្លឹមសារ អ្នកផ្តល់ព័ត៌មាន និងអ្នកផ្សព្វផ្សាយព័ត៌មាន ។
យើងខ្ញុំក៏អំពាវនាវផងដែរ ទៅកាន់អ្នករាល់គ្នា ដែលប្រើប្រាស់ បច្ចេកវិទ្យាព័ត៌មាន (ដែលមិនចាំបាច់តែជាអ៊ិនធឺណិត ឬបច្ចេកវិទ្យាកំរិតទំនើប) ក្នុងជីវិតប្រចាំថ្ងៃ តាមរយៈការទំនាក់ទំនង និងការបង្កើតខ្លឹមសារ ដើម្បីចូលរួមការប្រឆាំងអំពើហិង្សាទៅលើស្ត្រី ក្នុងរយៈពេល ១៦ ថ្ងៃ ។
