ទិដ្ឋភាពក្នុងវេទិកានៅសាលាគរុកោសល្យមត្តេយ្យមជ្ឈឹមរាជធានីភ្នំពេញ ៖ បុរសស្ត្រីចំនួនជាង១០០នាក់ មកពីប្រទេសសហគមន៍ចំនួន១៥របស់អង្គការអភិវឌ្ឍន៍ស្ត្រីក្រីក្រ ក្នុងទីក្រុង បានចូលរួមក្នុងវេទិកាស្ដីពីសុខភាពស្ត្រី និងអំពើហិង្សាកាលពីថ្ងៃទី២ វិច្ឆិកា នៅសាលាគរុកោសល្យមត្តេយ្យមជ្ឈិមដែលពិធីនេះបានរៀបចំឡើងដោយអង្គការអភិវឌ្ឍន៍ស្ត្រីក្រីក្រក្នុងទីក្រុងហៅកាត់ថា UPWD ។
អង្គការអភិវឌ្ឍន៍ស្ត្រីក្រីក្រក្នុងទីក្រុង (UPWD) គឺជាអង្គការក្រៅរដ្ឋាភិបាលក្នុងស្រុកមួយ ដែលបានធ្វើសកម្មភាពផ្ដោតទៅលើការផ្ដល់សិទ្ធិអំណាចដល់ស្ត្រី ដែលរស់នៅក្នុងតំបន់ក្រីក្រក្នុងទីក្រុងភ្នំពេញ។
អង្គការអភិវឌ្ឍន៍ស្ត្រីក្រីក្រក្នុងទីក្រុង គឺជាអង្គការមួយដែលធ្វើការមិនរកកម្រៃ និងមិនពាក់ព័ន្ធទៅនឹងនយោបាយ ដែលត្រូវបានបង្កើតឡើងកាលពីឆ្នាំ១៩៩៧ ហើយត្រូវបានចុះក្នុងបញ្ជីក្រសួងមហាផ្ទៃ ។ជាអង្គការមួយដែលមានការរៀបចំ និងទទួលខុសត្រូវ ដើម្បីទាមទារ និងរក្សានូវសិទ្ធិក្នុងការរស់នៅប្រកបដោយសេចក្ដីថ្លៃថ្នូរ ។
កាលពីឆ្នាំ២០០៦ កន្លងមកនេះ អង្គការអភិវឌ្ឍន៍ស្ត្រីក្រីក្រក្នុងទីក្រុងបានអនុវត្តគម្រោងនីមួយៗទទួលបានជោគជ័យធ្វើឲ្យសហគមន៍មានឱកាសក្នុងការពង្រីក និងពង្រឹងនូវចំណេះដឹងជាមូលដ្ឋាន ដើម្បីឲ្យពួកគាត់ចេះប្រើប្រាស់នូវសិទ្ធិក្នុងការរស់នៅប្រកបដោយសេចក្ដីថ្លៃថ្នូរ ដូចជាសិទ្ធិស្ត្រីសិទ្ធិទទួលបានចំណីអាហារគ្រប់គ្រាន់ សិទ្ធិទទួលបាននូវការអប់រំ សិទ្ធិទទួលបាននូវការថែទាំគាំពារ អ្នកផ្ទុកមេរោគអេដស៍ និងជំងឺអេដស៍ ។
គោលដៅចម្បងរបស់អង្គការអភិវឌ្ឍន៍ស្ត្រីក្រីក្រក្នុងទីក្រុង គឺលើកកម្ពស់សមត្ថភាពស្ត្រីជារួមដើម្បីធ្វើឲ្យមានឥទ្ធិពល និងតម្រង់ទិសដៅអភិវឌ្ឍន៍តំបន់អ្នកក្រីក្រ និងការអភិវឌ្ឍន៍គេហដ្ឋាន រចនាសម្ព័ន្ធនៃតំបន់អ្នកក្រីក្រក្នុងទីក្រុង ។ ក្រៅពីនេះអង្គការមានបេសកកម្មសម្របសម្រួល ក្រុមគោលដៅអ្នកក្រីក្រក្នុងទីក្រុង ពិសេសស្ត្រី និងយុវជនដើម្បីឆ្ពោះទៅរកអង្គការប្រជាជនមួយ ដែលមាននិរន្តរភាព និងឯករាជ្យសំដៅលើកកម្ពស់ការចិញ្ចឹមជីវិត សន្តិសុខ និងចូលរួមនៅក្នុងដំណើរការអភិវឌ្ឍន៍៕