RSS មកពីពាក្យថា Really Simple Syndication ឬ Rich Site Summary ឬក៏ RDF Site Summary ។ វាគឺជាវិធីសាស្ត្រមួយ ដែលគេប្រើសម្រាប់បោះពុម្ពផ្សាយ និងប្រមូលនូវមាតិកាដែលគេឧស្សាហបញ្ចូលខ្លឹមសារជាញឹកញាប់។ មាតិកាទាំងនោះអាចមានដូចជា៖ ធាតុកំណត់ហេតុបណ្ដាញ ឬព័ត៌មានផ្សេងៗ (ឧ. ព័ត៌មាននៅ BBC, CNN ឬសូម្បីតែព័ត៌មាន នៅក្នុងវិបផតថលស្ត្រីក៏ដោយ) ។ ដោយប្រើ RSS យើងអាចដឹងនិងទទួលបាន នូវរាល់មាតិកានៅក្នុងតំបន់បណ្ដាញ (Website) ណាមួយដែលយើងចូលចិត្ត ដោយយើងមិនចាំបាច់ចូលទៅបើកតំបន់បណ្ដាញនោះឡើយ ដូច្នេះយើងអាចសន្សំសំចៃពេលវេលាបានច្រើន ។
ដើម្បីអានមាតិកា RSS យើងត្រូវប្រើកម្មវិធីកុំព្យូទ័រមួយ ដែលមានសមត្ថភាពអាចអានមាតិកា RSS ។ ខាងក្រោមនេះគឺបញ្ជីនៃកម្មវិធីកុំព្យូទ័រ ដែលអាចអានមាតិកា RSS (អ្នកអាចប្រើកម្មវិធីមួយណាក៏បានដែរ) ៖
- មយូរា - Moyura ឬ Mozilla Thunderbird ៖កម្មវិធីអ៊ីមែលដែលមានចំណុចប្រទាក់ (User Interface) ជាភាសាខ្មែរ (អ្នកក៏អាចប្រើជាភាសាអង់គ្លេសផងដែរ) ។ ក្រៅពីសមត្ថភាពក្នុងការសរសេរ និងផ្ញើសារអេឡិចត្រូនិច អ្នកក៏អាចប្រើវាសម្រាប់អានមាតិកា RSS ផងដែរ ។
- Feed Reader ៖ កម្មវិធីសម្រាប់អានមាតិកា RSS ដែលមានចំណុចប្រទាក់គួរឲ្យចាប់អារម្មណ៍ ។ អ្នកអាចទាញយកវាមកប្រើដោយសេរី និងឥតគិតថ្លៃ ។
- RSS Reader ៖ កម្មវិធីនេះមានលក្ខណៈប្រហាក់ប្រហែលនឹង Feed Reader ដែរ ប៉ុន្តែវាមានលក្ខណៈសាមញ្ញជាង ។
យើងសូមលើកឧទាហរណ៍អំពីរបៀបអានមាតិកា RSS នៅក្នុងវិបផតថលស្ត្រី ដោយប្រើកម្មវិធីមយូរា ។ បន្ទាប់ពីអ្នកដំឡើងមយូរារួច មុននឹងអាចអានមាតិកា RSS បាន លោកអ្នកត្រូវបន្ថែមមាតិកា RSS នោះចូលទៅក្នុងមយូរាជាមុនសិន ។ សូមអនុវត្តតាមជំហានខាងក្រោម៖
1. សូមចូលទៅកាន់វិបផតថលស្ត្រី ដោយចូលតាមរយៈអាសយដ្ឋាន http://women.open.org.kh ។
2. បន្ទាប់មក សូមចុចលើតំណ (Link) មួយឈ្មោះថា ជាវ RSS ជាប្រចាំ (សូមមើលរូបខាងក្រោម) ។
សូមចំណាំ រូបសញ្ញា
។ តំបន់បណ្ដាញខ្លះ ប្រើរូបសញ្ញា 
ឬ 
។ រូបសញ្ញាទាំងនេះបញ្ជាក់ថា ទីតាំងក្នុងតំបន់បណ្ដាញដែលអ្នកស្ថិតនៅ មានផ្ដល់សេវាមាតិកា RSS។
3. បន្ទាប់ពីចុចលើតំណខាងលើរួច កម្មវិធីរុករកអ៊ីនធឺណិត (Web Browser) របស់អ្នកនឹងព្យាយាមបើកទីតាំងតំណនោះ ។ អ្នកត្រូវចម្លងទីតាំងនោះ ពីរបារអាសយដ្ឋាន (Address Bar) របស់កម្មវិធីរុករកអ៊ីនធឺណិត (សូមមើលរូបខាងក្រោម) ។
4. សូមបើកកម្មវិធីមយូរា ។ អ្នកត្រូវបង្កើតគណនីមួយសម្រាប់អានមាតិកា RSS ។
សូមជ្រើសម៉ឺនុយ Tools បន្ទាប់មកជ្រើស Account Settings ។ រួចសូមអនុវត្តតាមរូបភាពខាងក្រោម ៖
ចុចប៊ូតុង Add Account
ជ្រើស RSS News & Blogs រួចចុចប៊ូតុង Next
វាយឈ្មោះគណនីចូលក្នុងប្រអប់ Account Name រួចចុចប៊ូតុង Next ។ បន្ទាប់មកចុចប៊ូតុង Next ទៀតរួចប៊ូតុង Finish
សូមចុចកណ្ដុរស្ដាំ (Right Click) នៅលើគណនីដែលអ្នកទើបបានបង្កើត ។ បន្ទាប់មកជ្រើស Subscribe
នៅក្នុងផ្ទាំងដែលលេចឡើង សូមចុចប៊ូតុង Add រួចបិទភ្ជាប់ (Paste) អាសយដ្ឋានមាតិកា RSS (ដែលអ្នកបានចម្លងនៅចំណុចទី 3) ចូលក្នុងប្រអប់ Feed URL ។ រួចចុចប៊ូតុង OK ជាការស្រេច
ចុងក្រោយ អ្នកនឹងទទួលបានលទ្ធផលដូចរូបភាពខាងលើ ។ សូមអបអរសាទរ ចាប់ពីពេលនេះតទៅ អ្នកអាចតាមដានមើលព័ត៌មានថ្មីៗនៅក្នុងវិបផតថលស្ត្រី ដោយមិនចាំបាច់ចូលទៅ http://women.open.org.kh ឡើយ ។
ប្រសិនបើលោកអ្នកជួបប្រទះការលំបាកក្នុងការអនុវត្តតាមជំហានខាងលើ សូមទាក់ទងក្រុមការងារគម្រោងយើងខ្ញុំតាមរយៈ ទំនាក់ទំនងនេះ ។
ព័ត៌មានខ្លះនៃទំព័រនេះ ត្រូវបានដកស្រង់ពី wikipedia ជាភាសាអង់គ្លេស ស្តីអំពី RSS និងប្រែសំរួលពីភាសាអង់គ្លេសមកជាភាសាខ្មែរដោយអង្គការវិទ្យាស្ថានបើកទូលាយ។
សូមអានព័ត៌មានបន្ថែម អំពីកំណត់ហេតុបណ្តាញ នៅលើតំបន់បណ្តាញរបស់ wikipedia http://en.wikipedia.org/wiki/RSS_(protocol)
