រាជធានីភ្នំពេញ៖ ស្ត្រីមានផ្ទៃពោះគ្រប់ខែម្នាក់បានឈឺពោះឆ្លងទន្លេរហូតដល់ស្លាប់បាត់បង់ជីវិតទាំងម្ដាយ និងកូនក្នុងពោះនៅក្នុងមជ្ឈមណ្ឌលជាតិគាំពារមាតានិងទារក កាលពីវេលាម៉ោង៣និង៣០នាទីរំលងអធ្រាត្រឈានចូលថ្ងៃទី២៧មិថុនា។ មរណភាពរបស់ស្ត្រីមានផ្ទៃពោះធ្វើឲ្យក្រុមគ្រួសារ និងសាច់ញាតិនៃសពមានប្រតិកម្ម និងបានចាត់ទុកថា ជាការធ្វេសប្រហែសរបស់គ្រូពេទ្យ ដែលមិនបានយកចិត្តទុកដាក់ក្នុងការជួយសង្គ្រោះដល់ស្ត្រីនិងកូនក្នុងផ្ទៃដោយទុកចោលរហូតដល់ឈឺពោះប្រកាច់បែកពពុះមាត់ស្លាប់នៅលើគ្រែយ៉ាងអាណោចអាធ័ម។
ស្ត្រីរងគ្រោះត្រូវបានក្រុមគ្រួសារឲ្យដឹងថា ឈ្មោះ អ៊ុយ រស្មី អាយុ៤១ឆ្នាំ ជាអាជីវករលក់សាច់ជ្រូកនៅផ្សារដើមគរ មានទីលំនៅផ្ទះលេខ១៧០ ផ្លូវលេខ៣៣៦ សង្កាត់បឹងសាឡាង ខណ្ឌទួលគោក។ តាមបុរសម្នាក់ឈ្មោះ សាន់ ធឿន អាយុ៣១ឆ្នាំ ត្រូវជាប្ដីស្ត្រីរងគ្រោះបានឲ្យដឹងថា ប្រពន្ធរបស់គាត់បានឈឺពោះឆ្លងទន្លេនៅវេលាម៉ោង១១ព្រឹកថ្ងៃទី២៦ មិថុនា ហើយត្រូវរូបគាត់នាំយកទៅមជ្ឈមណ្ឌលជាតិគាំពារមាតា និងទារកដើម្បីសម្រាល។ នៅពេលទៅដល់មន្ទីរពេទ្យ រូបគាត់បានបង់ប្រាក់ថ្លៃសម្រាលកូនចំនួន៣១ម៉ឺនរៀល ហើយប្រពន្ធគាត់ត្រូវគេដាក់នៅលើគ្រែសម្រាល ដោយនាងចេះតែឈឺពោះខ្លាំងឡើងៗ។ ដោយសារតែឈឺពោះខ្លាំងពេកប្រពន្ធរបស់គាត់ និងរូបគាត់បានសម្រេចចិត្តឲ្យគ្រូពេទ្យធ្វើការវះកាត់ដើម្បីសម្រាលកូន តែគ្រូពេទ្យនិយាយថា មិនអ្វីទេទុកឲ្យកើតតាមសម្រួលទៅព្រោះកូនក្នុងផ្ទៃនោះតូចទេ។ បុរសជាប្ដីបានបន្តទៀតថា ដោយសារតែប្រពន្ធឈឺពោះខ្លាំងពេករូបគាត់ចេះតែតឿនគ្រូពេទ្យតែគ្រូពេទ្យចេះតែថាមិនអីទេ ហើយគិតតែពីដាក់សេរ៉ូម និងចាក់ថ្នាំរហូតដល់វេលាម៉ោង៣និង៣០នាទីរំលងអធ្រាត្រប្រពន្ធរបស់គាត់បានឈឺពោះរហូតបែកពពុះមាត់ស្លាប់តែម្ដង។
បុរសជាប្ដីបានបន្តទៀតថា នៅពេលប្រពន្ធគាត់ស្លាប់ គ្រូពេទ្យមិនបានជួយសង្គ្រោះកូនក្នុងផ្ទៃទេគឺទុកឲ្យកូននោះស្លាប់ទៀត។ បុរសរូបនោះបានមានប្រតិកម្មថា នេះជាការធ្វេសប្រហែស និងមិនយកចិត្តទុកដាក់ក្នុងការជួយសង្គ្រោះអ្នកជំងឺពីសំណាក់គ្រូពេទ្យ ទើបបង្កឲ្យប្រពន្ធ និងកូនស្រីរបស់គាត់ក្នុងផ្ទៃក្នុងស្លាប់បែបនេះ។ តាមព័ត៌មានឲ្យដឹងទៀតថា ស្ត្រីរងគ្រោះមានកូនពីរនាក់ ហើយកូនក្នុងផ្ទៃជាកូនទី៣។ មុនពេលឆ្លងទន្លេស្ត្រីរូបនោះបានទៅមណ្ឌលសុខភាពត្រឹមត្រូវ ហើយដល់ថ្ងៃឆ្លងទន្លេក៏ទៅមន្ទីរពេទ្យត្រឹមត្រូវទៀតតែបែរជាឈឺពោះរហូតដល់ស្លាប់នៅមន្ទីរពេទ្យយ៉ាងអាណោចអាធ័មទៅវិញ។ សពស្ត្រីរងគ្រោះត្រូវបានក្រុមគ្រួសារបញ្ជូនទៅកាន់ឈាបនដ្ឋានវត្តព្រះពុទ្ធដើម្បីធ្វើបុណ្យតាមប្រពៃណី។ ទោះបីជាយ៉ាងណាកោះសន្តិភាពពុំទាន់ទទួលបានការបំភ្លឺណាមួយពីមន្ទីរពេទ្យនៅឡើយទេចំពោះការចោទប្រកាន់របស់គ្រួសារស្ត្រីដែលស្លាប់នេះ៕
