ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍នៅក្នុងកិច្ចប្រជុំបូកសរុប វាយតម្លៃដកស្រង់បទពិសោធន៍ការងារផ្សព្វផ្សាយប្រចាំឆមាសទី១ ឆ្នាំ២០០៩ របស់ក្រសួងព័ត៌មាន នាថ្ងៃទី២៩ ខែមិថុនា ឆ្នាំ២០០៩នេះថា ក្រសួងព័ត៌មាននឹងខិតខំធ្វើយ៉ាងណាបង្កើតស្ថានីយវិទ្យុជាតិ ឲ្យបានគ្រប់ខេត្ត-ក្រុងនៅទូទាំងប្រទេសកម្ពុជា ហើយឆ្នាំនេះ បើសិនជាវៀតណាមផ្ដល់សម្ភារៈវិទ្យុឲ្យតាមការសន្យានោះ យើងនឹងអាចតម្លើងស្ថានីយវិទ្យុបាន៣ទៅ៤ខេត្តបន្ថែមទៀត។ ហើយទោះបីជាយ៉ាងណាក៏ដោយ ក្រសួងព័ត៌មាននឹងខិតខំបង្កើតស្ថានីយវិទ្យុឲ្យបានគ្រប់ខេត្តទូទាំងប្រទេស១ឆ្នាំ ឬ២ឆ្នាំទៀតយ៉ាងយូរ។
លោករដ្ឋមន្ត្រីក៏បានបញ្ជាក់ផងដែរថា បើកាលណាមានស្ថានីយវិទ្យុហើយនោះយើងក៏មានចំណូលផងដែរ ដូច្នេះតាមមន្ទីរព័ត៌មាននីមួយៗត្រូវចេះត្រៀមលក្ខណៈរកថវិកាសម្រាប់រំលោះ និងដោះស្រាយនូវការជួសជុល ឬទិញសម្ភារៈខ្លះដោយខ្លួនឯងនូវរបស់របរណា ដែលមានតម្លៃល្មមៗលើកលែងតែរបស់របរមានតម្លៃខ្ពស់ ចាំស្នើសុំទៅក្រសួង។ លោករដ្ឋមន្ត្រីក៏បានស្នើឲ្យមន្ទីរព័ត៌មាននីមួយៗ ចេះសហការគ្នារវាងវិទ្យុ និងទូរទស្សន៍ ដើម្បីធ្វើឲ្យដំណើរការផ្សព្វផ្សាយប្រព្រឹត្តទៅបានល្អប្រសើរព្រោះថា នេះជាយុទ្ធសាស្ត្ររួមរបស់ប្រទេសជាតិយើង។ ទាក់ទិនទៅនឹងការបណ្ដុះបណ្ដាលធនធានមនុស្ស លោករដ្ឋមន្ត្រីក៏បានឲ្យមន្ទីរព័ត៌មាននៅតាមខេត្តនីមួយៗពិនិត្យមើលមន្ត្រីណា ដែលបានសិក្សានិងមានសញ្ញាបត្រផ្សេងៗបញ្ជូនមកក្រសួងដើម្បីងាយស្រួលក្នុងការជ្រើសរើសទៅបន្តបណ្ដុះបណ្ដាលនូវវគ្គផ្សេងៗនៅក្នុងនិងក្រៅប្រទេស។
លោករដ្ឋមន្ត្រីក៏បានជម្រាបផងដែរថា នៅពេលដ៏ខ្លីខាងមុខនេះ ក្រសួងព័ត៌មាននឹងមានរៀបចំបើកវគ្គបណ្ដុះបណ្ដាលជំនាញអ្នកនាំពាក្យចំនួន២វគ្គផងដែរ ដោយវគ្គទី១ អញ្ជើញមន្ត្រីនគរបាល និងយោធាមកបណ្ដុះបណ្ដាល និងវគ្គទី២ អញ្ជើញមន្ត្រីរាជការតាមបណ្ដាក្រសួង ស្ថាប័ននានាមកបណ្ដុះបណ្ដាល ដើម្បីបានយល់អំពីការផ្ដល់ព័ត៌មាន ព្រោះថា ការផ្ដល់ព័ត៌មានមិនពិតជាគ្រោះថ្នាក់មួយដ៏ធំសម្រាប់យើងទាំងអស់គ្នា។ ដោយឡែកក្រសួងព័ត៌មានក៏មានត្រៀមរៀបចំបើកវគ្គបណ្ដុះបណ្ដាលអ្នកថតរូបផងដែរ ដើម្បីឲ្យអ្នកថតទាំងនេះចេះថតរូបសិល្បៈ និងរូបភាពល្អផ្សេងៗទៀត៕
