អង្គុយទទួលទានអាហារ នៅក្នុងភោជនីយដ្ឋានស្ថិតតាមបណ្ដោយផ្លូវជាតិលេខ ៦A ក្មេងប្រុសជំទង់លក់ស៊ីឌីនិងវីស៊ីឌី មុខជានឹងដើរមករកអ្នក ហើយសួរថា «ពូៗត្រូវការទិញវីស៊ីឌីទេ»។ បើសិនជាអ្នកស្ទាក់ស្ទើរ អ្នកលក់វីស៊ីឌីមុខជានឹងដកយកវីស៊ីឌីសិចមកបង្ហាញ ហើយអ្វីដែលគួរឲ្យភ្ញាក់ផ្អើលបំផុតនោះគឺ «វីស៊ីឌីសិចខ្មែរ» ។
ទោះបីជាកម្ពុជាត្រូវបានគេយល់ថា ជាប្រទេសមួយដែលមានការអភិរក្សខាងវប្បធម៌ប្រពៃណីក្ដី ខ្សែវីដេអូអាសអាភាស ត្រូវបានថតចំលងលក់យ៉ាងព្រោងព្រាត ។ ឥឡូវនេះការធ្វើអាជីវកម្មបែបនេះបានឈានទៅដល់ការយកគ្លីបវីដេអូសិចរបស់ខ្មែរ យកមកដាក់បញ្ចូលគ្នាជាវីស៊ីឌីមួយលក់យ៉ាងទូលំទូលាយ។ នៅលើគំរបវីស៊ីឌីបានសរសេរអក្សរថា «សិចខ្មែរ» ហើយវាមានរូបភាពឈុតក្ដៅសាច់ជាច្រើន ។ រាល់ឈុតសិចខ្មែរនៅក្នុងវីស៊ីឌីនោះ គឺបានមកពីការថតតាមទូរសព្ទ័ដែលសាមីខ្លួនមិននឹកគិតឡើយថា រូបអាក្រាតនិងសកម្មភាពផ្លូវភេទរបស់ខ្លួន ត្រូវគេយកមកធ្វើអាជីវកម្មលក់យ៉ាងគគ្រឹកគគ្រេង។
ដោយសារតែវប្បធម៌ខ្មែរ និងច្បាប់បានហាមឃាត់ចំពោះការថតអាសអាភាស និងឈុតក្ដៅសាច់នោះ វីស៊ីឌីសិចខ្មែរដែលគេផលិតឡើងយ៉ាងគឃ្លើននោះ បានលក់ដាច់ខ្លាំងគ្រាន់បើ បើប្រៀបធៀបទៅនឹងស៊ីឌី ឬក៏វីស៊ីឌីផ្សេងទៀត។ ដូចជាវីស៊ីឌីថតចម្លងឯទៀតដែរ វីស៊ីឌីសិចខ្មែរនោះត្រូវបានគេលក់ក្នុងតម្លៃពី ពីរពាន់រៀល ទៅបួនពាន់រៀល ឬក៏មួយដុល្លារអាមេរិក។ ក្មេងប្រុសអ្នកលក់វីស៊ីឌីម្នាក់បាននិយាយថា «ខ្ញុំបង្ហាញវីស៊ីឌីសិចខ្មែរនេះ តែនៅពេលដែលគេសួររក ឬក៏នៅពេលដែលខ្ញុំមើលទៅឃើញថាភ្ញៀវគាត់ចូលចិត្តវីដេអូសិច» ។
វីស៊ីឌីសិចខ្មែរនោះ មានរយៈពេលចំនួន៤០នាទី ។ វាបានចាប់ផ្ដើមឡើងដោយឈុតនៅលើគ្រែរបស់យុវជន និងយុវជន និងយុវនារីដែលថតតាមទូរសព្ទ័នៅទីក្រុងព្រះសីហនុ។ ឈុតក្ដៅសាច់នៅទីក្រុងព្រះសីហនុត្រូវបន្តដោយឈុតវៃសិចនៅកាំជណ្ដើរ។ វាក៏នៅមានការថតអាក្រាត និងឈុតសិចមួយចំនួនទៀតផងដែរ។ គួរបញ្ជាក់ថាកាលពីប៉ុន្មានខែមុននេះ មានរឿងអាស្រូវមួយបានផ្ទុះឡើងនៅទីក្រុងកំពង់សោម ដោយរូបប្រុសស្រីក្មេងៗរួមរក្សគ្នា បានត្រូវគេថតចំលងតាមទូរសព្ទ័ចែកគ្នាមើល ។ គឺរូបនេះឯងដែលឥឡូវនេះត្រូវបានគេបញ្ចូលធ្វើជាវីស៊ីឌីសិចខ្មែរ ។
លោកឃឹម សារិទ្ធ រដ្ឋលេខាធិការក្រសួងវប្បធម៌និងវិចិត្រសិល្បៈ បានមានប្រសាសន៍ឲ្យដឹងនៅល្ងាចថ្ងៃទី៦ មិនាថា បើមានរឿងអាសអាភាសមាននៅក្នុងស៊ីឌី និងវីស៊ីឌី វាងាយស្រួលបង្ក្រាបជាង ដែលពួកខិលខូចបាញ់រូបភាពអាសអាភាសនេះបញ្ចូលតាមទូរសព្ទ័ ។ លោកបន្តថា បន្ទាប់ពីមានព័ត៌មាននេះ កាលពី២-៣ថ្ងៃកន្លងមកនេះ ក្រសួងវប្បធម៌បានសហការជាមួយសាលាក្រុង ដោយបានចេញលិខិតណែនាំមួយឲ្យមន្ត្រីជំនាញចុះបង្ក្រាប នៅតាមហាងលក់ស៊ីឌី និងវីស៊ីឌី ក៏ដូចនៅតាមភោជនីយដ្ឋាន ។
លោករដ្ឋលេខាធិការបានឲ្យដឹងបន្តថា ក្នុងរយៈពេលប៉ុន្មានខែចុងក្រោយនេះ ក្រសួងវប្បធម៌បានសហការជាមួយលោកនាយឧត្ដមសេនីយ៍ ហុក ឡងឌី ដោយបានធ្វើសកម្មភាពយ៉ាងខ្លាំង ដើម្បីទប់ស្កាត់ និងរឹបអូសស៊ីឌីនិងវីស៊ីឌីបានរាប់សែនបន្ទះ នៅទីផ្សារក្នុងរាជធានីភ្នំពេញ ក៏ដូចនៅតាមខេត្តក្រុង។
លោកបញ្ជាក់ថា នៅថ្ងៃទី១២ មិនា ជាទិវាវប្បធម៌ខាងមុខនេះ ក្រសួងវប្បធម៌នឹងចុះទៅដុតកំទេចចោលស៊ីឌីនិងវីស៊ីឌីអាសអាភាសជាងពីរម៉ឺនបន្ទះនៅខេត្តកំពត ។ ឯខេត្តផ្សេងទៀតដែលរឹបអូសបានរាប់ម៉ឺនបន្ទះដូចគ្នា ក៏នឹងត្រូវដុតកំទេចចោលផងដែរ៕
