កំពង់ធំ៖ គ្រូបង្រៀនម្នាក់ត្រូវប្រពន្ធប្ដឹងពីបទប្រើអំពើហិង្សា និងរំលោភផ្លូវភេទ ហើយសមត្ថកិច្ចប៉ូលិសស្រុកសន្ទុកចាប់ខ្លួនបញ្ជូនទៅតុលាការ និងត្រូវបានឃុំខ្លួនកាលពីរសៀលថ្ងៃទី១៦ ខែកញ្ញា ឆ្នាំ២០០៩។
រឿងនេះ មជ្ឈដ្ឋានទូទៅបាននាំគ្នាយល់ថា ជាប់គុកព្រោះតែរំលោភប្រពន្ធឯង។ ប៉ូលិសស្រុកសន្ទុកបានបញ្ជូនគ្រូបង្រៀនជាប់ចោទមកកាន់សាលាដំបូង ជាមួយនឹងពាក្យបណ្ដឹងរបស់នារីជាប្រពន្ធមកជាមួយផង។ គ្រូបង្រៀនជាប់ចោទឈ្មោះ ទិត ដេត អាយុ៣៦ឆ្នាំ ស្នាក់នៅភូមិជ័យជំនះ ឃុំកកោះ ស្រុកសន្ទុក បង្រៀនថ្នាក់ទី៦ នៃសាលាបឋមសិក្សាកកោះ។ សេចក្ដីរាយការណ៍បានឲ្យដឹងថា ដើមចោទដែលជាប្រពន្ធឈ្មោះ អ៊ុក ស្រីរដ្ឋា អាយុ៣៤ឆ្នាំ រស់នៅភូមិឃុំជាមួយគ្នា ជាជាងកាត់ដេរនៅផ្សារកកោះ។ ពួកគេទាំងពីរនាក់មានកូនពីរនាក់រួចមកហើយ។
ប៉ូលិសបាននិយាយថា ការរួមភេទដែលធ្វើឡើងដោយបង្ខំដោយគ្មានការព្រមព្រៀង ទោះជាប្ដីប្រពន្ធក៏ដោយ ឲ្យតែភាគីម្ខាងប្ដឹងត្រូវតែមានទោស។ ប៉ូលិសឲ្យដឹងទៀតថា មុនពេលកើតហេតុ ជនជាប់ចោទជាប្ដីបានវាយធ្វើបាបប្រពន្ធ ហើយចាប់នាងបោះទៅលើពូក និងចាប់រំលោភទាំងកំរោលហើយប្រពន្ធបានរត់ទៅដាក់ពាក្យបណ្ដឹងនៅប៉ុស្តិ៍ ហើយរត់ទៅប្ដឹងចៅអធិការទៀត។ ជនជាប់ចោទ ទិត ដេត នៅចំពោះមុខក្រឡាបញ្ជីសាលាដំបូងបានរៀបរាប់ថា ប្រពន្ធរបស់ខ្លួនឆ្នាស់ណាស់ ពួកគេស្រឡាញ់គ្នារហូតបានកូនពីរនាក់ទៅហើយ តែពេលនេះគេមួលបង្កាច់ប្ដឹងឲ្យគេចាប់ប្ដីឯងបែបនេះ គឺព្រោះតែប្រពន្ធមានបំណងផ្សេង។
ជនជាប់ចោទនិយាយទៀតថា កាលពីប៉ុន្មានថ្ងៃមុន មានមនុស្សប្រុសទូរស័ព្ទមកជួបប្រពន្ធរបស់ខ្លួន ហើយខ្លួនតាមដានដឹងថា ប្រុសនោះនៅឃុំស្រយូវ។ ព្រោះតែយល់ថា ប្រពន្ធចង់បែកចិត្ត ទើបខ្លួនមានអំពើហិង្សាខ្លះទៅលើប្រពន្ធ តែគ្រាន់តែជាការឈ្លោះទាស់ទែងគ្នាក្នុងនាមជាប្ដីប្រពន្ធប៉ុណ្ណោះ។ ចំពោះសំណួរសួរថា មានការចាប់រំលោភដោយបង្ខំមែនឬទេ? ទិត ដេត ឆ្លើយថាមិនពិតទេនៅពេលឈ្លោះប្រកែកគ្នាប្រតាយប្រតប់គ្នា ខ្លួនបានរុញប្រពន្ធដួលទៅលើគ្រែពូក ហើយប្រពន្ធយកលេសថាចាប់បង្ខំគេនៅលើគ្រែតែម្ដង។
មុនពេលចៅក្រមសាលាដំបូងចេញដីកាឃុំខ្លួនគ្រូបង្រៀន គេឃើញប្រជាពលរដ្ឋ នាយកសាលាដែលមកពីភូមិឃុំជាមួយគ្នា ប្រមាណជា៣០ទៅ៤០នាក់ ជិះឡានកូរ៉េមកតវ៉ា និងសុំឲ្យដោះលែងគ្រូបង្រៀននោះឲ្យមានសេរីភាពវិញ។ ប៉ុន្តែបន្ទាប់ពីចៅក្រមពន្យល់អំពីច្បាប់ ទើបប្រជាពលរដ្ឋ និងនាយកសាលា ព្រមត្រឡប់ទៅផ្ទះវិញ។
អ្នកភូមិដែលមកតវ៉ាម្នាក់បានបង្ហើបថា ប្ដីជាគ្រូបង្រៀនទំនងជាអាចយល់ច្បាស់បានច្រើនជាងពលរដ្ឋធម្មតា ហើយទំនងជាមិនឈានដល់ការចាប់បង្ខំរំលោភដូចគ្នាចោទប្រកាន់នោះទេ ប៉ុន្តែទំនងជាដោយភ្លើងប្រច័ណ្ឌ ព្រោះប្ដីយល់ថា ប្រពន្ធមានប្រុស ទើបឈានដល់ប្រើអំពើហិង្សាខ្លះបែបនេះ។ ចំណែកឯប្រពន្ធវិញ ហេតុអ្វីក៏រហូតឈានដល់ប្ដឹងថាប្ដីរំលោភបំពានលើផ្លូវភេទ មនុស្សទូទៅគេនឹងវិភាគហើយដាក់ពិន្ទុឲ្យភាគីទាំងសងខាង ប៉ុន្តែនេះជារឿងចម្លែកដែលប្ដឹងថា ប្ដីរំលោភផ្លូវភេទ។ ថ្ងៃក្រោយឲ្យតែប្រពន្ធស្អប់ប្ដី ឬខ្លួនចង់មានថ្មី ប្ដឹងថាប្ដីរំលោភឲ្យប៉ូលិសចាប់ប្ដីដាក់គុកទៅ ប្រពន្ធនឹងមានសេរីភាពហើយ (SIC)៕
ប្រពន្ធពិតជាមានសិទ្ធិប្ដឹង
ក្នុងករណីខាងលើនេះចៅក្រមត្រូវតែធ្វើការស៊ើបអង្កេតអោយបានច្បាស់មុននឹងធ្វើការវិនិច្ឆ័យ ថាតើបុរសជាប្ដីពិតជាបានប្រើអំពើហិង្សា និងរំលោភផ្លូវភេទលើប្រពន្ធមែនឬអត់។ ព្រោះថាពាក្យប្ដឹង និងចម្លើយសារភាពមិនដូចគ្នា (បុរសជាប្ដីបដិសេធថាមិនបានរំលោភផ្លូវភេទលើប្រពន្ធគាត់ទេ)។ ប៉ុន្តែទោះជាយ៉ាងណាក៏គាត់នៅតែជាប់ចោទពីបទបើអំពើហិង្សាក្នុងគ្រួសារដែរ (គាត់បានសារភាពថាគាត់ពិតជាបានប្រើអំពើហិង្សាលើប្រពន្ធគាត់មែន ព្រោះតែក្ដីប្រច័ណ្ឌ)។
ម្យ៉ាងការប្រើអំពើហិង្សាលើប្រពន្ធ ដោយសំអាងលេសថាដោយក្ដីប្រច័ណ្ឌនេះមិនមែនជាហេតុផលសមស្របនោះទេ។ អំពើហិង្សាមិនមែនជាវិធីល្អក្នុងការដោះស្រាយបញ្ហានោះទេ។ ការចរចាដោយសន្តិវិធីទេទើបជាវិធីសាស្ត្រល្អ។ បុរសជាស្វាមីគឺជាគ្រូបង្រៀន គាត់គួរណាស់តែមានដំណោះស្រាយល្អជាងនេះ ជៀសអោយផុតពីអំពើហិង្សា។
វាមិនមែនជារឿងចម្លែកទេប្រសិនបើភរិយាប្ដឹងថាប្ដីរំលោភផ្លូវភេទនោះ ព្រោះថាថ្វីត្បិតតែគាត់ជាស្វាមី តែគាត់ពុំមានសិទ្ធិបង្ខំភរិយាគាត់ក្នុងរឿងនេះទេ។ ក្នុងមាត្រា៣ និងមាត្រា៧ នៃច្បាប់ស្ដីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ បានចែងថា ៖
មាត្រា ៣
អំពើហិង្សាក្នុងគ្រួសារ ទាមទារឱ្យមានការទប់ស្កាត់ទាន់ពេលវេលានិងប្រកបដោយប្រសិទ្ធភាព ហើយតម្រូវឱ្យចាត់វិធានការសមស្របបំផុត ដើម្បីការពារជនរងគ្រោះ ឬ ជនអាចនឹងរងគ្រោះ។
អំពើហិង្សារួមមាន ៖
- ការប៉ះពាល់ដល់ជីវិត
- ការប៉ះពាល់ដល់បូរណភាពរូបកាយ
- ការធ្វើទារុណកម្ម ឬ ការធ្វើអំពើឃោរឃៅ
- ការឈ្លានពានខាងផ្លូវភេទ ។
មាត្រា ៧
អំពើឈ្លានពានខាងផ្លូវភេទ រួមមាន :
- ការប្រើហិង្សាសេពសន្ថវៈ
- ការបៀតបៀនកេរ្តិ៍ខ្មាស
- ការធ្វើអាស្រូវភាស។
សម្រាប់អត្តបទច្បាប់ទាំងមូលសូមចុចទីនេះ។
មួយវិញទៀតការយល់ឃើញរបស់អ្នកតវ៉ាម្នាក់ដែលថា «ថ្ងៃក្រោយឲ្យតែប្រពន្ធស្អប់ប្ដី ឬខ្លួនចង់មានថ្មី ប្ដឹងថាប្ដីរំលោភឲ្យប៉ូលិសចាប់ប្ដីដាក់គុកទៅ ប្រពន្ធនឹងមានសេរីភាពហើយ (SIC) » ពិតជាការយល់ឃើញខុសទាំងស្រុង។ បើសិនប្រពន្ធស្អប់ប្ដី ឬប្រពន្ធមានថ្មី ច្បាប់ពិតជាមិនអាចចាប់ប្ដីដាក់គុកបានទេ លុះណាតែប្ដីនោះបានប្រព្រឹត្តអំពើហិង្សា ឬអំពើឧក្រិដ្ឋណាមួយដែលខុសច្បាប់៕
Wife has the right to log police complain over sex violation by her husband
There nothing difficult to accuse a husband of committing sex violation over his wife. The lady can just have sex with her hated husban, then after sex just try to scuffle abit with the exhausted husband then use that proof to log the complain to the police. It is enough evidence of sex violation for him to go to jail and then the lady can be free at her will.
Regards,
ជ្រុងមួយនៃបញ្ហា និងហេតុផល
អ្វីដែលលោកលើកឡើងគឺជារូបភាពមួយជ្រុងទៀតនៃបញ្ហានេះ។ ប៉ុន្តែក្នុងនាមជាប្ដីប្រពន្ធដែលមានគោលបំណងរួម គឺកសាងគ្រួសារនេះឲ្យមានសេចក្ដីសុខ និងអប់រំកូនចៅ និងបណ្ដុះបណ្ដាល ដើម្បីឲ្យពួកគាត់មានអនាគតនោះ ខ្ញុំមិនយល់ថា វាមានហេតុផលណាមួយដែលស្ត្រីជាប្រពន្ធគួរធ្វើដូចអ្វីដែលលោកបានលើកឡើងនេះទេ។
ករណីនេះគឺជាករណីមួយក្នុងចំណោមករណីជាច្រើនដែលបានកើតមានលើស្ត្រីកម្ពុជា ដែលកន្លងមកស្ត្រីខ្មែរត្រូវបានអប់រំ និងយល់ថា ក្នុងនាមជាប្រពន្ធ ស្ត្រីត្រូវតែតស៊ូ អត់ធ្មត់ ទោះបីជាប្ដីបានប្រព្រឹត្តហិង្សាមកលើស្ត្រីជាប្រពន្ធបែបណាក៏ដោយ។ ដូច្នេះ មានស្ត្រីភាគច្រើនត្រូវបានបុរសជាស្វាមីបង្ខំរួមភេទតាមសេចក្ដីត្រូវការរបស់គាត់ ដោយមិនគិតអំពីអារម្មណ៍ ឬសេចក្ដីត្រូវការរបស់ស្ត្រីជាប្រពន្ធទេ។ ខ្ញុំគិតថា លោកអាចស្វែងរកបានព័ត៌មានជាច្រើនអំពីករណីនេះ តាមរយៈសារព័ត៌មាន និងទស្សនាវដ្ដីជាច្រើន។
ខ្ញុំមិនមានន័យសំដៅក្នុងការការពារ ឬគាំទ្រស្ត្រីទាំងអស់នោះទេ ព្រោះវាក៏អាចមានស្ត្រីមួយចំនួនអាចយកចំណុចនេះសម្រាប់ទាមទារការលែងលះដែរ។ តែអ្វីដែលខ្ញុំចង់បាន គឺការពិភាក្សា ចែករំលែកមតិយោបល់ ក្នុងគោលបំណងឲ្យមានការគោរពសិទ្ធិគ្នាទៅវិញទៅមករវាងបុរស និងស្ត្រី ជាស្វាមី និងប្រពន្ធ ជ្រើសរើសយកការពិភក្សាគ្នាជាដំណោះស្រាយ ដែលជាកត្តាធ្វើឲ្យគ្រួសារមានសុភមង្គល និងធ្វើឲ្យសង្គមមានការរីកចម្រើន។
សុខាយុ
Family Violence
Dear Ms. Sokhayu,
Thank you for your time in explaining on the issue. I do understand the situation and I feel very sad for what happened to those poor ladies. I have follow up all the news from home though I am an ocean apart from my homeland, and please understand that I am not a "male chauvanist" that you might think.
First of all let me apologise for not being able to type in Khmer as I do not have khmer fonts in my computer. My concern was that why promoting the right of women, once should also educate the women to use their right in a correct way. The story of the Teacher in kg Thom was a sad one as he is a teacher, yet he use violence for just pure motive of jealousy. I have follow up with the abuse of human rights by some people as well as by some organizations which also use the human right for their pure political purpose. At the end of the day, who suffer? Cambodian people. some people over joy over their rights to do anything, but forgot to observe other people's right, thus violating other rights while enjoying your own rights. This was the result of human rights influx into the people with giving them proper education on the rights. What I wrote earlier was a suggestion of people who could take benefit using her right, and it is very possible.
OK, nice talking to you. I will write again next time.
Regards,
Ses Khmao
អំពើហិង្សាគឺជាវិធីដោះស្រាយដ៏អាក្រក់បំផុត
សួស្ដីលោក SES KHMAO
ជាបឋម ខ្ញុំសូមអរគុណលោកដែលបានចំណាយពេលដ៏មានតម្លៃរបស់លោកនៅឯនាយសមុទ្រ ដើម្បីចូលរួមការក្នុងការពិភាក្សាលើវិបផតថលស្ដីអំពីស្ត្រី។
អំពើហិង្សាមិនមែនជាវិធីល្អបំផុតក្នុងការដោះស្រាយបញ្ហានោះទេ វាគឺជាវិធីអាក្រក់បំផុត ព្រោះវាមិនត្រឹមតែមិនអាចដោះស្រាយបញ្ហាបាននោះទេ វាថែមទាំងធ្វើអោយបញ្ហានោះកាន់តែធ្ងន់ធ្ងរថែមទៀត។ ដូចក្នុងករណីលោកគ្រូនេះអញ្ចឹង គាត់បានបង្កើតបញ្ហាជាន់លើបញ្ហា។ អ្វីដែលខ្ញុំនិយាយនៅពេលនេះ និងអ្វីដែលខ្ញុំបានលើកឡើងក្នុងសេចក្ដីអធិប្បាយមុន មិនមែនមានន័យថា ខ្ញុំកាន់ជើងស្ត្រីគ្នាឯងដោយងងឹតងងល់នោះដែរ គឺខ្ញុំគ្រាន់តែចង់មានន័យថា បុរសម្នាក់នោះ គាត់ជាគ្រូបង្រៀន គាត់គួរណាស់តែមានដំណោះស្រាយដោយល្អជាងការប្រើអំពើហិង្សា ទោះបីជាគាត់បានដឹងយ៉ាងពិតប្រាកដថា ភរិយារបស់គាត់មានអ្នកថ្មីក៏ដោយ គឺគាត់អាចចរចាជាមួយភរិយារបស់គាត់ដោយសន្តិវិធី សម្រុះសម្រួល ហើយប្រសិនបើចំណងអាពាហ៍ពិពាហ៍របស់ពួកគាត់ទាំងពីដល់ទីបញ្ចប់ហើយ គាត់អាចសុំលែងលះគ្នាតាមផ្លូវច្បាប់ (ទោះបីដំណោះស្រាយនេះមិនសូវជាល្អប៉ុន្មាន ព្រោះវាអាចជះផលអាក្រក់ដល់កូនៗ)។ ហើយក្នុងករណីដែលភរិយារបស់គាត់ពិតជាមានអ្នកថ្មីមែននោះ គាត់អាចរកភស្តុតាងដើម្បីប្ដឹងដោយប្រទេសខ្មែរយើងមានច្បាប់ឯកពន្ធភាពដើម្បីកាត់ក្ដីក្នុងរឿងនេះបាន។
ទោះបីជាយ៉ាងណា ខ្ញុំនៅតែនិយាយម្ដងហើយម្ដងទៀតថា «អំពើហិង្សាគឺជាវិធីដោះស្រាយដ៏អាក្រក់បំផុត» ទោះបីជាគាត់ជាបុរសដែលមិនសូវមានសំណាង ដែលបានភរិយាមិនស្មោះត្រង់ (ប្រសិនបើភរិយាគាត់មានថ្មីមែន[ប្រហែលមានតែស្ត្រីមួយចំនួនដ៏តិចតួចប៉ុណ្ណោះ] ព្រោះថានៅក្នុងសង្គមខ្មែរយើង ជាពិសេសស្ត្រីខ្មែរតែងតែចង់បាន និងខិតខំរៀបចំគ្រួសារអោយក្លាយជាគ្រួសារដែលប្រកបទៅដោយសុភមង្គលមួយ នៅពេលដែលគាត់សម្រេចចិត្តដើរចូលក្នុងជីវិតអាពាហ៍ពិពាហ៍ហើយ)។
ខឹងខុស ខឹងខូច ខឹងខាត
លក្ខិណា