ពោធិ៍សាត់៖ ក្មេងស្រីរងគ្រោះម្នាក់ដែលត្រូវគេចាប់រំលោភបាននិយាយថា តុលាការខេត្តពោធិ៍សាត់ពុករលួយ និងអយុត្តិធម៌ខ្លាំងណាស់ ពីព្រោះតែបានដោះលែងជនល្មើសឲ្យនៅក្រៅឃុំ បន្ទាប់ពីជាប់គុកបានជាងបីខែ ដោយគ្មានធ្វើការជំនុំជម្រះ ហើយមិនបានសងជំងឺចិត្តដល់រូបនាងទៀត នាងបានអំពាវនាវជួយរកយុត្តិធម៌ឲ្យនាងផង។
ក្មេងស្រីរងគ្រោះបាននិយាយរៀបរាប់ប្រាប់រស្មីកម្ពុជាកាលពីចុងសប្ដាហ៍មុននេះនៅឯស្នាក់ការអង្គការលីកាដូប្រចាំខេត្តពោធិ៍សាត់នៅក្នុងខណៈពេលដែលនាងមកកាន់អង្គការនេះ និងអង្គការអាដហុក ដើម្បីឲ្យអង្គការជួយអន្តរាគមន៍ទៅតុលាការពោធិ៍សាត់ដោយធ្វើយ៉ាងណាត្រូវចាប់ជនល្មើសមកដាក់គុកកាត់ក្ដីតាមច្បាប់។
ក្មេងស្រីរងគ្រោះអាយុ១៨ឆ្នាំរស់នៅភូមិតាណៃ ឃុំអូរតាប៉ោង ស្រុកបាកាន ត្រូវបានយុវជននៅក្នុងភូមិជាមួយគ្នាឈ្មោះ នៅប៉ី អាយុ២៤ឆ្នាំ ចាប់រំលោភបានសម្រេចកាលពីវេលាយប់ក្នុងខណៈនាង និងមិត្តភក្ដិពីរបីនាក់ទៀតនាំគ្នាទៅជួលរឿង (ឌីស)មើលដែលមានចម្ងាយ១០០ម៉ែត្រពីផ្ទះ។ នាងរងគ្រោះបាននិយាយថា ពេលនោះវេលាម៉ោង៧និង៣០នាទីយប់ ថ្ងៃទី២ ខែតុលា ឆ្នាំ២០០៨ នាងនិងមិត្តភក្ដិស្រីៗពីរទៅបីនាក់ទៀត បានត្រូវឈ្មោះ ប៉ី ស្ទះមកចាប់នាងខ្ទប់មាត់ ហើយអូសទៅលើពំនូកចំបើងចំណុចទួលអង្គហើយចាប់នាងរំលោភ។ ពេលរំលោភហើយ ជនល្មើសបានគំរាមថា បើហ៊ាននិយាយរឿងនេះប្រាប់គេវានឹងសម្លាប់ចោល។ នាងមានការភិតភ័យយ៉ាងខ្លាំង។
ការសង្ស័យក៏កើតឡើងនៅពេលមិត្តភកិ្ដទៅជួលឌីសគេនោះមិនឃើញនាង។ ពេលត្រឡប់មកដល់ផ្ទះ ពួកគេក៏ប្រាប់ម្ដាយនាង ពេលនោះនាងបានរៀបរាប់ថា ឈ្មោះ ប៉ីបានចាប់រំលោភនាងនៅពេលនាងដើរក្រោយគេ។ ឮដូច្នេះ ម្ដាយនាងក៏បានទៅប្ដឹងប្រធានភូមិ និងប៉ូលិសប៉ុស្តិ៍ទាំងយប់។ ព្រឹកស្អែកឡើងថ្ងៃទី៣ ខែតុលា ឆ្នាំ២០០៨ ប៉ូលិសប៉ុស្តិ៍ក៏ទៅចាប់ជនល្មើស ហើយកសាងសំណុំរឿងបញ្ជូនមកតុលាការ។ នៅថ្ងៃទី៦ ខែតុលា ឆ្នាំ២០០៨ តុលាការបានសម្រេចឃុំខ្លួនជនសង្ស័យក្នុងពន្ធនាគារ ក្រោមបទចោទប្រកាន់រំលោភសេពសន្ថវៈបានសម្រេច។
ក្មេងស្រីរងគ្រោះនិយាយថា ចៅក្រមដែលកាន់សំណុំរឿងក្ដីរបស់នាង ឈ្មោះ អ៊ិន បូផា។ នាងនិយាយថា នៅក្នុងដំណាក់កាលជនល្មើសឃុំខ្លួននៅក្នុងពន្ធនាគារនោះ ចៅក្រមបានហៅនាងមកសាកសួរតែម្ដងប៉ុណ្ណោះ ហើយបាននិយាយថា សូមឲ្យសម្របសម្រួលគ្នាដកបណ្ដឹង ហើយទទួលយកសំណងរដ្ឋប្បវេណីទៅ។ តែនាងបានបដិសេធន៍ដោយសុំឲ្យធ្វើយ៉ាងណាកាត់ទោសជនល្មើសដាក់គុកតាមកំណត់ច្បាប់។
នាងឲ្យដឹងថា នៅថ្ងៃទី២២ ខែមករា ឆ្នាំ២០០៩ ស្រាប់តែឃើញជនល្មើសមានមុខក្រឡឺមឯផ្ទះរបស់ខ្លួនវិញហើយពេលរសៀលគេជប់លៀងផឹកស៊ីរាំរែក ព្រមទាំងប្រើពាក្យឌឺដងដាក់នាង និងក្រុមគ្រួសារនាងទៀតផង ធ្វើឲ្យនាងភ័យមិនហ៊ានដេកផ្ទះ។ នាងនិយាយថា បណ្ដឹងរបស់នាងប្ដឹងទាមទារសំណងជំងឺចិត្តចំនួន៨លានរៀល និងផ្ដន្ទាទោសជនល្មើសតាមច្បាប់ តែឥឡូវនេះសំណងមួយរៀលក៏គ្មានផង។
លោក អ៊ិន បូផា ចៅក្រមស៊ើបសួរនៃតុលាការដំបូងខេត្តពោធិ៍សាត់ដែលកាត់ក្ដីរឿងនេះមិនអាចធ្វើការទាក់ទងទូរស័ព្ទបានឡើយនៅថ្ងៃទី២៧ ខែមករា ឆ្នាំ២០០៩នេះ ដើម្បីចង់បញ្ជាក់ពីបញ្ហាខាងលើ។ ប៉ុន្តែក្រឡាបញ្ជីរបស់លោកម្នាក់ដែលសូមមិនបញ្ចេញឈ្មោះ បានប្រាប់ឲ្យដឹងក្នុងថ្ងៃដដែលនេះថា ជនជាប់សង្ស័យគ្រាន់តែដោះលែងឲ្យនៅក្រៅឃុំបណ្ដោះអាសន្នប៉ុណ្ណោះ ដោយមិនបានផ្លាស់ប្ដូរបទចោទប្រកាន់ទេ។ យោងតាមក្រមនីតិវិធីព្រហ្មទណ្ឌថ្មី ក៏មិនមានមាត្រាណាមួយហាមឃាត់មិនឲ្យជនជាប់សង្ស័យថា មិនអាចឲ្យនៅក្រៅឃុំបានដែរ។ មន្ត្រីក្រឡាបញ្ជីដដែលនិយាយថា ជនសង្ស័យអាចនៅក្រៅឃុំបាន ដោយបង់តម្កល់ប្រាក់ធានា។
ក្រុមមន្ត្រីអង្គការអាដហុក និងអង្គការលីកាដូនិយាយថា ករណីខាងលើនេះ គឺជាបទល្មើសឧក្រិដ្ឋ ដែលមិនអាចធានាឲ្យនៅក្រៅឃុំបានឡើយ។ បើបទឧក្រិដ្ឋសុទ្ធតែធានាឲ្យនៅក្រៅឃុំបានយ៉ាងនេះ នោះនិទណ្ឌភាពនៅតែអាចកើតមាន ហើយតុលាការមិនអាចឯករាជ្យ ឬយុត្តិធម៌បានឡើយ។
ក្មេងស្រីរងគ្រោះបាននិយាយពាក្យយ៉ាងមុតមាំចុងក្រោយថា នាងសូមអំពាវនាវដល់សម្ដេចនាយករដ្ឋមន្ត្រី ហ៊ុន សែន និងលោកជំទាវ ជួយអន្តរាគមន៍រកយុត្តិធម៌ដល់ខ្លួនផង និងសូមឲ្យសម្ដេចនាយករដ្ឋមន្ត្រីធ្វើកំណែទម្រង់ឲ្យខ្លាំងមែនទែនលើប្រព័ន្ធយុត្តិធម៌នៅក្នុងអាណត្តិទី៤ នៃរាជរដ្ឋាភិបាលនេះ៕
