សំណង់អគារផ្ទះល្វែងថ្មី ក្នុងរាជធានីភ្នំពេញ ដែលនៅកំពុងសាងសង់។
(រូបថត៖ Juil Jeate) ក្រុមហ៊ុនអភិវឌ្ឍន៍ការសាងសង់បានទទួលតម្រុយខ្លះៗទាក់ទងនឹងអនុក្រឹត្យថ្មី ដែលអនុញ្ញាតឲ្យជនបរទេស មានសិទ្ធិកាន់កាប់អគារខុនដូប្រហែល ៧០ភាគរយ ដើម្បីលើកកម្ពស់វិស័យអចលនវត្ថុ និងសំណង់នៅកម្ពុជា។
អនុក្រឹត្យដែលអនុម័តដោយទីស្ដីការគណៈរដ្ឋមន្ត្រី ចែងថា ជនបរទេសនៅកម្ពុជា អាចមានសិទ្ធិកាន់កាប់ផ្ទះប្រហែល ៧០ភាគរយ។
តួលេខនេះ មានចំនួនទាបជាងតួលេខដែលបានកំណត់នៅក្នុងសេចក្ដីព្រាងច្បាប់ ក្រសួងរៀបចំដែនដី នគរូបនីយកម្ម និងសំណង់ កាលពីខែមុន ដែលបានកំណត់ថា ជនបរទេសអាចមានសិទ្ធិកាន់កាប់ផ្ទះចំនួន ៨០ភាគរយ។ ទោះបីជាយ៉ាងណាក៏ដោយ តួលេខនេះនៅតែមានចំនួនខ្ពស់ជាងសេចក្ដីព្រាងច្បាប់លើកដំបូងស្ដីពីកម្មសិទ្ធិរបស់ជនបរទេសកាលពីចុងឆ្នាំ២០០៩ដែលមានតែ៤៩ភាគរយ។
លោកស្រី នន់ ភានី អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានឲ្យដឹងកាលពីម្សិលមិញថា «ការសម្រេចចិត្តដូច្នេះគឺដើម្បីឲ្យជនជាតិកម្ពុជា អាចមានចំណែកកាន់កាប់អចលនវត្ថុបានកាន់តែច្រើនដោយមិនឲ្យជនបរទេសកាន់កាប់ច្រើនពេកនោះទេ»។
ទោះបីតួលេខកាន់កាប់អចលនវត្ថុរបស់ជនបរទេសបានធ្លាក់ចុះក៏ដោយ ប៉ុន្តែអនុក្រឹត្យនេះជាចំណុចចាប់ផ្ដើមលើកទឹកចិត្តវិនិយោគិនបរទេស ជួយជំរុញទីផ្សារអចលនវត្ថុនៅកម្ពុជា ឲ្យមានការអភិវឌ្ឍន៍។
លោកស្រី ភានី ជឿជាក់ថា ការអភិវឌ្ឍវិស័យនេះ មិនអាចពឹងផ្អែកតែលើអ្នកទិញក្នុងស្រុកឡើយ។
អ្នកវិភាគ បានឯកភាពថា ការអនុម័តរបស់រដ្ឋាភិបាល លើសិទ្ធិជាកម្មសិទ្ធិរបស់ជនបរទេស អាចជួយដល់រដ្ឋាភិបាល ដើម្បីលើកកម្ពស់សេដ្ឋកិច្ចកម្ពុជាដែលទទួលរងផលប៉ះពាល់ធ្ងន់ធ្ងរដោយវិបត្តិហិរញ្ញវត្ថុពិភពលោក។
តម្លៃដីធ្លី និងផ្ទះនៅកម្ពុជា បានធ្លាក់ចុះ៤០ទៅ៦០ភាគរយ បើប្រៀបធៀបទៅនឹងតម្លៃកាលឆ្នាំ២០០៨ ខណៈដីធ្លី និងផ្ទះនៅកម្ពុជា ឡើងថ្លៃកប់ពពក។
លោក Bretton G Sciaroni ជាដៃគូជាន់ខ្ពស់របស់ក្រុមហ៊ុន Sciaroni & Associates និងជាទីប្រឹក្សាផ្នែកច្បាប់ដល់រដ្ឋាភិបាល បានឲ្យដឹងកាលពីម្សិលមិញថា អនុក្រឹត្យនេះបានផ្ដល់ឱកាសថ្មីដល់សេដ្ឋកិច្ចកម្ពុជា។ លោកបានលើកឡើងថា «វាអាចជួយកម្ពុជាតាមមធ្យោបាយច្រើន ដោយមិនត្រឹមតែបង្កើតអាជីវកម្មយូរអង្វែងប៉ុណ្ណោះទេ ថែមទាំងអាចទាក់ទាញវិនិយោគិនថ្មីៗ មកពីក្រៅប្រទេសទៀតផង»។ លោកបានផ្ដល់តម្រុយថា អនុក្រឹត្យនេះនឹងអាចជួយប្រែក្លាយកម្ពុជាទៅជាកន្លែងទាក់ទាញប្រចាំតំបន់ ដោយសារអនុក្រឹត្យនេះមិនសូវតឹងរ៉ឹងដូចនៅប្រទេសជិតខាង។
លោកបានលើកឡើងថា «យើងកាន់តែបើកចំហ និងមានបរិយាកាសកាន់តែសេរីជាងនៅប្រទេសថៃ»។ នៅប្រទេសថៃជនបរទេសអាចកាន់កាប់ផ្ទះបានតែ៤៩ភាគរយប៉ុណ្ណោះ។
ក្រុមហ៊ុនអភិវឌ្ឍន៍សាងសង់ទីក្រុងរណបនៅរាជធានី ស្វាគមន៍ការសម្រេចចិត្តរបស់រដ្ឋាភិបាលដោយបង្ហាញក្ដីសង្ឃឹមថា វានឹងជួយអភិវឌ្ឍទីផ្សារអចលនវត្ថុនៅកម្ពុជា ដោយធ្វើឲ្យការលក់ផ្ទះមានកំណើន នៅពេលវិនិយោគិន អាចទិញអចលនវត្ថុកាន់តែប្រសើរ។
លោក ទូច សំណាង ប្រធានគ្រប់គ្រងគម្រោងនៅកោះពេជ្រក្នុងរាជធានីភ្នំពេញ បានលើកឡើងថា «អនុក្រឹត្យនេះ ល្អសម្រាប់ការអភិវឌ្ឍទីផ្សារអចលនវត្ថុនៅកម្ពុជាឲ្យកាន់តែរីកចម្រើន។ យើងរំពឹងថា តាមរយៈការផ្ដល់សិទ្ធិកាន់កាប់នេះជនបរទេសកាន់តែច្រើន នឹងពិចារណាអំពីការវិនិយោគនៅកម្ពុជា»។
ក្រុមហ៊ុនលោក កំពុងអភិវឌ្ឍសាងសង់ផ្ទះ និងវិទ្យា ១៦៨ល្វែងនៅកោះពេជ្រ។ មកទល់នឹងពេលបច្ចុប្បន្ននេះការសាងសង់នោះបានបញ្ចប់៤០ភាគរយ។
លោក ស៊ឹង ប៊ុណ្ណា ប្រធាន និងនាយកប្រតិបត្តិរបស់ក្រុមហ៊ុនប៊ុណ្ណារៀលធីគ្រូប យល់ឃើញថា អនុក្រឹត្យនេះអាចធ្វើឲ្យកម្ពុជា ក្លាយទៅជាកន្លែងកាន់តែទាក់ទាញសម្រាប់វិនិយោគិនបរទេស។ តែលោកព្រមានថា អនុក្រឹត្យនោះមិនគ្រប់គ្រាន់សម្រាប់ទាក់ទាញវិនិយោគិន ឲ្យមកបណ្ដាក់ទុននៅកម្ពុជាទេ «កម្ពុជាចាំបាច់ត្រូវមានគ្រឿងជំរុញទឹកចិត្តផ្សេងទៀត»៕
