ភ្នំពេញ៖ វិបត្តិហិរញ្ញវត្ថុពិភពលោកអាចឲ្យពលរដ្ឋកម្ពុជាក្រីក្រងាយនឹងប្រឈមមុខនឹងបញ្ហានៃការជួញដូរមនុស្សនេះបើតាមការអះអាងរបស់មន្ត្រីអង្គការក្រៅរដ្ឋាភិបាលដែលធ្វើការទាក់ទងនឹងអំពើជួញដូរមនុស្សនៅកម្ពុជា។
លោក លឹម ទិត្យ អ្នកសម្របសម្រួលនៃគម្រោងអន្តរភ្នាក់ងារអង្គការសហប្រជាជាតិស្ដីអំពីអំពើរត់ពន្ធមនុស្ស បានអះអាងកាលពីថ្ងៃទី២៧ ខែមករាថា វិបត្តិហិរញ្ញវត្ថុអាចនឹងជំរុញឲ្យពលរដ្ឋកម្ពុជាដែលក្រីក្រ និងនៅជនបទប្រឈមមុខខ្លាំងទៅនឹងអំពើជួញដូរមនុស្សគ្រប់រូបភាពប្រសិនបើកម្ពុជាមិនមានវិធានការទប់ទល់ទេនោះ។
លោកបានអះអាងថា ក្ដីរំពឹងរបស់ប្រជាពលរដ្ឋក្រីក្រនៅជនបទ គឺមកទីក្រុងដើម្បីរកការងារធ្វើ ប៉ុន្តែប្រសិនបើការងារដែលពួកគេកំពុងតែធ្វើ ប៉ុន្តែប្រសិនបើការងារដែលពួកគេកំពុងតែធ្វើត្រូវបាត់បង់ ដោយសារតែការរីករាលដាលនៃវិបត្តិហិរញ្ញវត្ថុនោះ វានឹងធ្វើឲ្យពួកគេត្រូវតែបង្ខំចិត្តស្វែងរកមធ្យោបាយផ្សេងៗ ដើម្បីស្វែងរកប្រាក់ចំណូលសម្រាប់ចិញ្ចឹមគ្រួសារ និងជីវិតរបស់ពួកគេ ដូច្នេះវាងាយបំផុតនៅក្នុងការធ្លាក់ខ្លួនទៅក្នុងអំពើជួញដូរមនុស្ស។
លោក លឹម ទិត្យ បានបង្ហាញអំពីការព្រួយបារម្ភរបស់លោកខ្លាំងមែនទែននៅពេលដែលផលប៉ះពាល់នៃវិបត្តិហិរញ្ញវត្ថុពិភពលោកកំពុងតែធ្វើដំណើរសន្សឹមៗមកដល់ប្រទេសកម្ពុជា។
វិបត្តិហិរញ្ញវត្ថុបានរីករាលដាលខ្លាំងនៅលើពិភពលោក កាលពីចុងឆ្នាំ២០០៨ ដោយចេញដំណើរពីអាមេរិកមកកាន់អឺរ៉ុប ហើយនឹងមកដល់អាស៊ីហើយវាកំពុងតែមកដល់ប្រទេសកម្ពុជាបើទោះបីជាអ្នកសេដ្ឋកិច្ចបានអះអាងថា វានឹងមិនធ្វើឲ្យកម្ពុជាប៉ះពាល់ចំ និងប្រឈមមុខធ្ងន់ធ្ងរនឹងវិបត្តិនេះក៏ដោយ។
នៅក្នុងរបាយការណ៍ខែមករាធនាគារពិភពលោកប្រចាំនៅក្នុងប្រទេសកម្ពុជាបានអះអាងថា ទោះបីជាកម្ពុជាបច្ចុប្បន្ននេះមិនរងផលប៉ះពាល់ច្រើនពីវិបត្តិនេះ តែកម្ពុជាក៏មិនអាចជៀសផុតពីផលប៉ះពាល់នៃវិបត្តិនេះបានឡើយ។
លោក ហួត អេងតុង ប្រធានសមាគមមីក្រូហិរញ្ញវត្ថុកម្ពុជា បានអះអាងកាលពីពេលថ្មីៗកន្លងទៅនេះថា ការរីករាលដាលនៃវិបត្តិនោះកំពុងតែធ្វើឲ្យបណ្ដាស្ថាប័នឥណទានខ្នាតតូចទាំងអស់នៅក្នុងប្រទេសកម្ពុជាប្រឈមមុខនឹងកង្វះខាតទុននៅក្នុងការគាំទ្រសហគ្រាសខ្នាតតូច និងមធ្យមនៅក្នុងប្រទេសកម្ពុជា ខណៈពេលដែលឥណទាននេះកំពុងតែដើរតួនាទី យ៉ាងសំខាន់នៅក្នុងការលើកកម្ពស់ជីវភាព និងកាត់បន្ថយភាពក្រីក្រនៅតំបន់ជនបទ។
ក្រៅពីនេះផលប៉ះពាល់មកលើវិស័យឥណទាន ហើយវិបត្តិនេះក៏កំពុងតែមកដល់វិស័យកាត់ដេរ ដែលជាវិស័យមួយកំពុងតែដើរតួនាទីដ៏សំខាន់នៅក្នុងការផ្ដល់ការងារធ្វើ និងប្រាក់ចូលជាតិ និងកម្មករប្រមាណជា៤០០.០០០នាក់ហើយ។
កាលពីចុងឆ្នាំកន្លងទៅនេះ សមាគមរោងចក្រកាត់ដេរនៅកម្ពុជា បានអះអាងថា ការបញ្ជាទិញផលិតផលកាត់ដេររបស់កម្ពុជាគឺធ្លាក់ចុះ ហើយរោងចក្រមួយចំនួនខ្លះបានបិទទ្វារ។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជាបានធ្វើការប៉ាន់ប្រមាណកាលពីពេលថ្មីនេះថា ប្រសិនបើរោងចក្រកាត់ដេរនៅកម្ពុជានៅតែមិនអាចទទួលបញ្ជាទិញបានច្រើនទៀតនោះ នៅខែឧសភាខាងមុខនេះ រោងចក្រជាច្រើននឹងត្រូវបិទទ្វារ ហើយកម្មករមានរហូតដល់ទៅ៧ម៉ឺននាក់នឹងបាត់បង់ការងារធ្វើ។
ពាក់ព័ន្ធនឹងបញ្ហានេះ លោក លឹម ទិត្យ បានអះអាងថា ប្រសិនបើពួកគេពិតជាត្រូវបាត់បង់ការងារធ្វើមែននោះពួកគេអាចជាក្រុមដែលងាយរងគ្រោះមួយនៅក្នុងការជួញដូរមនុស្សបាន។
លោកបានបន្តទៀតថា "ខ្ញុំជឿជាក់ថា មួយចំនួននៃកម្មករទាំងអស់នោះនឹងមិនត្រឡប់ទៅភូមិស្រុករបស់គេឡើយដោយសារតែតម្រូវការប្រាក់ចំណូល និងកិត្តិយស"។
លោកបានបញ្ជាក់ថា "ការស្វែងរកប្រាក់ចំណូល និងការកែលំអជីវភាព គឺជាអន្ទាក់មួយរបស់ជនដែលងាយរងគ្រោះធ្លាក់ទៅក្នុងអំពើជួញដូរមនុស្ស"។
លោកបានបន្តទៀតថា ពួកគេអាចនឹងក្លាយខ្លួនទៅជាជនរងគ្រោះនៃអំពើជួញដូរផ្លូវភេទនៅតាមទីក្រុងនៅក្នុងប្រទេស និងក្រៅប្រទេស ហើយក៏អាចក្លាយខ្លួនជាជនរងគ្រោះដោយសារតែអំពើជួញដូរមនុស្សលក់កម្លាំងពលកម្ម អ្នកសុំទាននៅប្រទេសជិតខាងជាដើម។
លោកបានបន្តទៀតថា តាមបទពិសោធន៍កន្លងមក យើងធ្លាប់រកឃើញមានករណីជួញដូរមនុស្សទៅកាន់ប្រទេសអារ៉ាប់ប៊ីសាអ៊ូឌីត ហើយក៏សង្ស័យពីការជួញដូរមនុស្សទៅរហូតដល់សូម៉ាលីជាដើម ជាក់ស្ដែងដូចជាករណីកងទ័ពឥណ្ឌាបាញ់ច្រឡំទូកនេសាទថៃមួយគ្រឿងថា ជាទូកចោរសមុទ្រ ដោយនៅក្នុងនោះមានជនរងគ្រោះជាជនជាតិខ្មែរមួយរូបនៅរស់រានមានជីវិត។
