ភ្នំពេញ៖ ឪពុកបង្កើត និងម្ដាយចុងដែលរួមគំនិតគ្នាយកកូនស្រីអាយុ១៥ឆ្នាំទៅលក់ឲ្យធ្វើស្រីរកស៊ីផ្លូវភេទនៅសង្កាត់ចាក់អង្រែក្រោមខណ្ឌមានជ័យ ក្រុងភ្នំពេញ បានត្រូវតុលាការសម្រេចតម្កល់សាលក្រមចុះថ្ងៃទី២៧ ខែវិច្ឆិកា ឆ្នាំ២០០៧ឲ្យនៅដដែល ពោលគឺត្រូវជាប់គុកក្នុងម្នាក់ៗរយៈពេល២ឆ្នាំពីបទជួញដូរមនុស្ស។ ជនជាប់ចោទជាឪពុកបង្កើតឈ្មោះ ចាន់ធី ហៅ ថន វុទ្ធី អាយុ៣៧ឆ្នាំ និងម្ដាយចុងឈ្មោះ សារ៉ន រិន ហៅ នៅរិន អាយុ៣៥ឆ្នាំ បានត្រូវសមត្ថកិច្ចប៉ូលិសចាប់ខ្លួននៅខែមករា ឆ្នាំ២០០៨ ក្រោយពេលដែលតុលាការក្រុងភ្នំពេញបានបើកសវនាការជំនុំជម្រះកាលពីថ្ងៃទី២៧ ខែវិច្ឆិកា ឆ្នាំ២០០៧ ដោយសម្រេចកំបាំងមុខផ្ដន្ទាទោសដាក់ពន្ធនាគារក្នុងម្នាក់ៗរយៈពេល២ឆ្នាំពីបទជួញដូរមនុស្សប្រព្រឹត្តនៅសង្កាត់ចាក់អង្រែក្រោមខណ្ឌមានជ័យ ក្រុងភ្នំពេញ កាលពីថ្ងៃទី៧ ខែកក្កដា ឆ្នាំ២០០៣។
អង្គហេតុនៃរឿងក្ដីនេះ គឺផ្ដើមចេញពីជនជាប់ចោទទាំង២បាននាំកូនស្រីអាយុ១៥ឆ្នាំមកភ្នំពេញដើម្បីរកការងារធ្វើនៅផ្ទះលក់បាយមួយកន្លែងស្ថិតនៅសង្កាត់ចាក់អង្រែក្រោម ខណ្ឌមានជ័យតម្លៃ៤៥ដុល្លារអាមេរិកក្នុងមួយខែ។ ប៉ុន្តែពេលជនជាប់ចោទទទួលយកលុយរួចចេញបាត់នោះ មានបុរសម្នាក់មកចាប់ក្មេងស្រីអាយុ១៥ឆ្នាំបង្ខាំងក្នុងបន្ទប់ហើយបង្ខំឲ្យរួមភេទជាមួយភ្ញៀវ ដោយនិយាយថា ឪពុកម្ដាយបានលក់កូនស្រីឲ្យមកពួកខ្លួនហើយ។
អំឡុងពេលដែលរស់នៅទីនោះក្មេងស្រីអាយុ១៥ឆ្នាំបានត្រូវម្ចាស់ផ្ទះធ្វើទារុណកម្មបង្ខំឲ្យរួមភេទជាមួយភ្ញៀវដូចជាវាយដំ និងឆក់ខ្សែភ្លើងជាដើម លុះក្រោយមកប៉ូលិសបានសហការជាមួយអង្គការក្រៅរដ្ឋាភិបាលចូលរំដោះក្មេងស្រីរូបនោះឲ្យមានសេរីភាពវិញ ហើយក៏បានកសាងសំណុំរឿងបញ្ជូនទៅតុលាការចោទប្រកាន់លើឪពុកបង្កើត និងម្ដាយចុងរូបនេះពីបទជួញដូរមនុស្ស។
ក្រោយពេលប៉ូលិសចាប់ខ្លួន បានកាលពីខែមករាឆ្នាំ២០០៨ ជនជាប់ចោទទាំងពីរបានប្ដឹងទាស់នឹងសាលក្រមរបស់តុលាការដែលសម្រេចដាក់គុកពួកគេក្នុងម្នាក់ៗរយៈពេល២ឆ្នាំ។ ដូច្នេះហើយនៅថ្ងៃទី២០ ខែសីហា ឆ្នាំ២០០៨តុលាការបានលើកយកបណ្ដឹងទាស់នេះមកបើកសវនាការជំនុំជម្រះ ដោយមានលោក អ៊ីវ គឹមស៊្រី ជាប្រធានក្រុមប្រឹក្សាជំនុំជម្រះ លោក ភូ ពៅស៊ុន លោក ឌិន ស៊ីវុទ្ធី ជាសមាជិកក្រុមប្រឹក្សា និងលោក សុខ កល្យាណ ជាតំណាងអយ្យការ។
ក្នុងសវនាការជនជាប់ចោទទាំងពីរបានបដិសេធថា ពួកគេពុំបានប្រព្រឹត្តដូចការចោទប្រកាន់នេះទេពោលគឺកូនស្រីមានចរិតមិនល្អ ដើរលេងជាមួយមិត្តភ័ក្ដិ ទើបធ្លាក់ចូលផ្លូវអាក្រក់យ៉ាងដូច្នេះ។ ប៉ុន្តែតាមចម្លើយក្មេងស្រីអាយុ១៥ឆ្នាំ ដែលអានដោយក្រឡាបញ្ជីសវនាការបានបញ្ជាក់ថា ឪពុកបង្កើតនិងម្ដាយចុងពិតជាបានយកនាងទៅលក់នៅផ្ទះបនចាក់អង្រែក្រោមប្រាកដមែន។ ដូច្នេះហើយតុលាការបានតម្កល់សាលាក្រមឲ្យនៅដដែល៕