កំពត៖ សមត្ថកិច្ចប៉ូលិសខេត្តកំពតបានធ្វើការឃាត់ខ្លួនបុរសមានវ័យ៤៤ឆ្នាំម្នាក់ កាលពីថ្ងៃទី២៣ ខែកញ្ញា បន្ទាប់ពីមានការប្ដឹងចោទប្រកាន់ដោយក្មេងស្រីអាយុ១៦ឆ្នាំ ដែលជាកូនបង្កើតបុរសនោះថា បានចាប់រំលោភនាងរហូតបានសម្រេច។
បុរសដែលប៉ូលីសឃាត់ខ្លួននោះឈ្មោះ ម៉ែន ជន។ ចំណែកក្មេងស្រីនោះឈ្មោះ ជ.ស.ស។ ក្រុមគ្រួសារនេះរស់នៅឃុំកោះតូច ស្រុកកំពត។ តាមការបញ្ជាក់របស់ក្មេងស្រីរងគ្រោះបានឲ្យដឹងថា កាលពីថ្ងៃទី១២ ខែកញ្ញា ឆ្នាំ២០០៨ ឪពុករបស់នាងបាននាំម្ដាយ និងនាងទៅព្រៃដើម្បីកាប់ឈើធ្វើរបងនិងដុតធ្យូងនៅចំណុចជើងភ្នំបូកគោដោយដេកនៅទីនោះ ព្រោះជាកន្លែងឡធ្យូងរបស់ឪពុកនាង។ លុះដល់វេលាម៉ោង១និង៣០នាទី រំលងអធ្រាត្រឈានចូលថ្ងៃទី១៧ ខែកញ្ញា ខណៈពេលកំពុងដេកនៅលើគ្រែទាំងបីនាក់ ឪពុករបស់នាងបានចាប់រំលោភនាងរហូតបានសម្រេច។ ពេលកើតហេតុនាងមិនហ៊ានស្រែកទេ ព្រោះឪពុករបស់នាងបានដាក់ពូថៅនៅលើក្បាលដំណេកដោយខ្លាចគាត់សម្លាប់ រីឯម្ដាយដែលដេកជាមួយគ្នាមិនដឹងថា គាត់បានដឹងឬអត់នោះទេ។
នៅល្ងាចថ្ងៃទី១៧ ខែកញ្ញា ឪពុករបស់នាងបាននាំម្ដាយនិងនាងត្រឡប់មកផ្ទះវិញ តែនាងក៏មិនហ៊ានស្ដីអ្វីដែរ។ រហូតដល់ព្រឹកថ្ងៃទី២៣ ខែកញ្ញា ដោយមិនអាចទ្រាំបាននាងក៏យករឿងនេះ និយាយប្រាប់អ្នកភូមិទើបអ្នកភូមិឲ្យទៅប្ដឹងប៉ូលិស ព្រោះគ្មានអ្នកណាហ៊ានលូកលាន់ទេ។ ពេលនាងទៅនិយាយប្រាប់ប៉ូលិស ប៉ូលិសប៉ុស្ដិ៍ក៏នាំនាងទៅកាន់អធិការដ្ឋានស្រុកកំពតដើម្បីធ្វើកំណត់ហេតុ រួចសំណូមពរឲ្យចាប់ខ្លួនឪពុករបស់នាងនាថ្ងៃដដែល (២៣កញ្ញា)នេះតែម្ដង។
ក្មេងរងគ្រោះរៀបរាប់អំពីប្រវត្តិរបស់នាងថា ដើមឡើយនាងរស់នៅជុំគ្រួសារនៅភូមិត្រពាំងរូង ឃុំអណ្ដូងទឹក ស្រុកបទុមសាគ ខេត្តកោះកុង ដោយមានបងប្អូន៥នាក់ (ប្រុស២ស្រី៣) នាងជាកូនទី៣។ កាលនោះនាងមានអាយុប្រហែល៦ឆ្នាំ ឪពុកម្ដាយរបស់នាងបានលែងលះគ្នា ហើយឪពុកនាងបានយកតែនាងម្នាក់មកតាម រួចម្ដងនៅនេះម្ដងនៅនោះ ដោយយកប្រពន្ធជាបន្តបន្ទាប់ រហូតចុងក្រោយមកយកប្រពន្ធឈ្មោះចិន នៅភូមិគីឡូលេខ១២ ឃុំកោះតូច ដែលនៅទីនេះរូបនាងគ្មានសេចក្ដីសុខទេ ត្រូវបានប្រពន្ធចុង និងកូនប្រុស (កូនប្ដីមុន) របស់គាត់ធ្វើបាបជារៀងរាល់ថ្ងៃ ជាក់ស្ដែងពេលកើតហេតុបែបនេះក៏គ្មានអ្នកឈឺឆ្អាលដែរ ទើបនាងរត់រកអង្គការសិទ្ធិមនុស្សឲ្យជួយ។
លោកស្រី ង៉ែត សូរ្យសែង អ្នកសម្របសម្រួលអង្គការលីកាដូ ប្រចាំខេត្តកំពតបាននិយាយថា បន្ទាប់ពីបានទទួលនូវព័ត៌មានដែលរៀបរាប់ដោយជនរងគ្រោះ លោកស្រីបាននាំនាងទៅកាន់មន្ទីរពេទ្យដើម្បីក្រុមគ្រូពេទ្យធ្វើកោសល្យវិច័យទាក់ទិនទៅនឹងការចោទប្រកាន់រឿងរំលោភសពសន្ថវៈនេះ តែលទ្ធផលយ៉ាងណាអាស្រ័យលើជំនាញ និងការចាត់ការរបស់សមត្ថកិច្ច។ លោកស្រីបន្តទៀតថា យោងតាមការរៀបរាប់របស់កុមារីរងគ្រោះ ការប្រឈមមុខនឹងកើតឡើងបន្តបន្ទាប់ទៀតយ៉ាងងាយ បើពុំមានការយកចិត្តទុកដាក់ទេ ម្ល៉ោះហើយលោកស្រីនឹងទំនាក់ទំនងជាមួយផ្នែកណាមួយដែលអាចទទួលយកកុមារីរងគ្រោះទៅថែរក្សាបីបាច់បណ្ដុះបណ្ដាលទាំងចំណេះដឹងទូទៅក៏ដូចជាជំនាញសម្រាប់ជីវិតទៅអនាគត ហើយមកដល់ព្រឹកថ្ងៃទី២៥ ខែកញ្ញានេះ លោកស្រីបានទាក់ទងជាមួយអង្គការអាស្ពេកា (ASPECA) ហើយសង្ឈឹមថា នឹងបានទទួលលទ្ធផលវិជ្ជមាន៕
