ប្រជាពលរដ្ឋប្រមាណ ២៤៥ នាក់មកពីបណ្ដាខណ្ឌចំនួន៣ ក្នុងរាជធានីភ្នំពេញ បានធ្វើការរួមចំណែកបំផុសចលនាផ្សព្វផ្សាយអំពីសារៈសំខាន់នៃគ្រួសារដែលជាកោសិកាសង្គម និងការបង្កើតតួនាទីកសាងធនធានមនុស្សប្រកបដោយគុណភាព និងអភិវឌ្ឍន៍សេដ្ឋកិច្ច សង្គមកិច្ច ពិសេសការកាត់បន្ថយអំពើហិង្សាក្នុងគ្រួសារ និងអំពើអសកម្មផ្សេងៗដែលនាំឲ្យគ្រួសារបែកបាក់។ ជាមួយនិងការចូលរួមរបស់ពលរដ្ឋយ៉ាងសកម្មនេះ ក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំពិធីអបអរសាទរទិវាអន្តរជាតិស្ដីពីគ្រួសារនៅទីស្នាក់ការក្រសួងសង្គមកិច្ច កាលពីថ្ងៃទី៨ ឧសភាម្សិលមិញនេះ ក្នុងបំណងធ្វើការផ្សព្វផ្សាយគោលនយោបាយជាតិរបស់រដ្ឋាភិបាលចំពោះគ្រួសារ និងលទ្ធផលនៃចលនារបស់គ្រួសារនៃសង្គមនីមួយៗ។
