គណៈកម្មាធិការជាតិរៀបចំបោះឆ្នោត (គ.ជ.ប) បានបង្ហាញនៅក្នុងសេចក្ដីថ្លែងការណ៍របស់ខ្លួនកាលពីថ្ងៃម្សិលមិញថា ដំណើរការនៃការបោះឆ្នោតជ្រើសតាំងតំណាងរាស្ត្រអាណត្តិទី៤ កន្លងទៅនេះ គឺបានឆ្លុះបញ្ចាំងពីការវិវឌ្ឍន៍លទ្ធិប្រជាធិបតេយ្យមួយជំហានទៀតនៅកម្ពុជា។ ក្នុងនោះគ.ជ.ប បានលើកឡើងថា ថ្វីត្បិតមានបញ្ហាមួយចំនួនត្រូវបានលើកឡើងពីគណបក្សនយោបាយក៏ដោយ ប៉ុន្តែជាលទ្ធផល គឺការបោះឆ្នោតត្រូវបានវាយតម្លៃជាវិជ្ជមានពីសំណាក់អ្នកពាក់ព័ន្ធជាតិ និងអន្តរជាតិ ហើយថា នេះជាមោទនភាពរបស់ប្រជាជនកម្ពុជា។
គ.ជ.ប បានលើកឡើងថា៖ "គណបក្សនយោបាយខ្លះនិយាយថា ប្រជាពលរដ្ឋ១លាននាក់មិនបានបោះឆ្នោត ហើយឥឡូវកំពុងអំពាវនាវប្រជាពលរដ្ឋឲ្យប្រឆាំងនឹងលទ្ធផលបោះឆ្នោតនោះ"។ ករណីនេះ គ.ជ.ប បញ្ជាក់ថា៖ "ក្នុងអំឡុងពេលនៃការត្រួតពិនិត្យបញ្ជីឈ្មោះលើកចុងក្រោយនៅក្នុងឆ្នាំ២០០៧ចំនួនឈ្មោះដែលបានលុបពីក្នុងបញ្ជី គឺមានចំនួន ៥៨៥ ៧២៣ គឺមិនមែន ១លាននាក់ទេ។ ហេតុផលនៃការលុបឈ្មោះទាំងនោះ គឺដោយសារតែមានការផ្លាស់ប្ដូរទីលំនៅ មរណភាព ឈ្មោះស្ទួន និងការបាត់បង់សិទ្ធិក្នុងការបោះឆ្នោត"។
គ.ជ.ប បញ្ជាក់ថា ការលុបឈ្មោះនេះ គឺ គ.ជ.ប បានធ្វើដោយតម្លាភាព និងប្រុងប្រយ័ត្នជាទីបំផុត ដែលក្នុងនោះ គ.ជ.ប បានអនុវត្តន៍ទៅតាមមាត្រា ៦៣ និង ៦៤ ថ្មីដែលតម្រូវឲ្យ គ.ជ.ប បិទផ្សាយជាដំបូងនៅតាមឃុំ-សង្កាត់សម្រាប់ឲ្យប្រជាពលរដ្ឋតវ៉ា និងពិនិត្យក្នុងរយៈពេល៥ថ្ងៃ និងបន្ទាប់មកទៀតនៅក្នុងអំឡុងមុនពេលបោះឆ្នោត គ.ជ.ប ណែនាំឲ្យក្រុមប្រឹក្សាឃុំ-សង្កាត់បិទផ្សាយបញ្ជីឈ្មោះដែលត្រូវបានលុបចេញពីបញ្ជីបោះឆ្នោតជូនប្រជាពលរដ្ឋពិនិត្យ និងតវ៉ាជាថ្មីម្ដងទៀត ក្នុងរយៈពេលជាង ៨០ថ្ងៃដោយមានការចូលរួមពិនិត្យពីគណបក្សនយោបាយ និងអ្នកសង្កេតការណ៍។
ចំពោះទម្រង់ ១០១៨វិញ គ.ជ.ប បានពន្យល់ថា គ.ជ.ប ប្រើសម្រាប់អ្នកដែលបាត់ឯកសារបោះឆ្នោតដោយបញ្ជាក់ថា៖ "គ.ជ.ប ណែនាំឲ្យអាជ្ញាធរឃុំ-សង្កាត់ចេញទម្រង់ ១០១៨នេះ ត្រឹមថ្ងៃទី២៦ ខែកក្កដា ឆ្នាំ២០០៨។ ក្នុងករណីទម្រង់នេះចេញខុសពីថ្ងៃនេះ គឺខុសច្បាប់"។ គ.ជ.ប បញ្ជាក់ថា រាល់បណ្ដឹងរបស់គណបក្សនយោបាយ គ.ជ.បនឹងដោះស្រាយដោយយុត្តិធម៌ និងស្របទៅតាមច្បាប់។
ការលើកឡើងរបស់ គ.ជ.ប នេះត្រូវបានលោក មុត ចន្ថា មន្ត្រីអ្នកនាំពាក្យគណបក្សនរោត្តម រណឫទ្ធិ ចោទប្រកាន់ គ.ជ.បថា ជា "ឧក្រិដ្ឋជនដែលបានលួចបន្លំលុបឈ្មោះអ្នកបោះឆ្នោតពីក្នុងបញ្ជីឈ្មោះបោះឆ្នោត"។ លោក មុត ចន្ថា មានប្រសាសន៍ថា៖ "គ.ជ.ប លុបឈ្មោះអ្នកបោះឆ្នោត គឺមានចំនួនប៉ុណ្ណឹងមែនហើយ ប៉ុន្តែអ្នកមិនបានបោះឆ្នោតមានជាង ១លាននាក់ផ្សេងទៀត ព្រមទាំងអ្នកដែលមានឈ្មោះបោះឆ្នោតហើយ ប៉ុន្តែត្រូវបានបោះឆ្នោតលើឈ្មោះរបស់គាត់ តើ គ.ជ.បគិតយ៉ាងម៉េច? ខ្ញុំគ្មានជំនឿលើ គ.ជ.បយូរហើយ"។ លោក មុត ចន្ថា បានចោទជាសំនួរថា៖ "លទ្ធិប្រជាធិបតេយ្យដើរទៅមុខយ៉ាងម៉េច បើប្រជាពលរដ្ឋទៅបោះឆ្នោតបានតែ ៧០%? ខ្ញុំនៅតែចាត់ទុក គ.ជ.បដែលមានសមាសភាព ៩រូបនោះ ជាឧក្រិដ្ឋជន គឺឧក្រិដ្ឋជនដែលប្លន់សិទ្ធិបោះឆ្នោតប្រជាពលរដ្ឋជាង៦០ម៉ឺននាក់"។
ចំណែកលោក កឹម សុខា ប្រធានគណបក្សសិទ្ធិមនុស្ស មានប្រសាសន៍ថា៖ "ប្រជាធិបតេយ្យ (នៅកម្ពុជា) បច្ចុប្បន្នថយក្រោយខ្លាំងណាស់។ សិទ្ធិបោះឆ្នោតគឺធំណាស់ កាលណាលុបសិទ្ធិបោះឆ្នោតរបស់ប្រជាពលរដ្ឋហើយ គឺជាការរំលោភលទ្ធិប្រជាធិបតេយ្យ"។ លោក កឹម សុខា បញ្ជាក់ក្នុងពាក្យពេចន៍ធ្ងន់ៗថា៖ "ចោរគេមិនដែលសារភាពថា ខ្លួនគេចោរទេ"។ លោកកឹម សុខា មានប្រសាសន៍ថា មានប្រជាពលរដ្ឋជាច្រើនធ្លាប់មានឈ្មោះបោះឆ្នោត ប៉ុន្តែត្រូវ គ.ជ.ប លុបឈ្មោះរបស់គេចោល។ លោកបន្ថែមថា ប្រសិនបើមន្ត្រី គ.ជ.ប សុខចិត្តចុះចេញពីតំណែង គឺលោកនឹងប្រមូលប្រជាពលរដ្ឋទាំងនោះទៅបង្ហាញនៅចំពោះមុខ។
លោក យឹម សុវណ្ណ អ្នកតំណាងរាស្ត្រគណបក្ស សម រង្ស៉ី បានចាត់ទុកថា កម្ពុជាមិនមានលទ្ធិប្រជាធិបតេយ្យរីកចម្រើនដូចការអះអាងរបស់ គ.ជ.ប នោះទេ។ លោកមានប្រសាសន៍ថា៖ "គ.ជ.ប គឺធ្វើការរណបឲ្យគណបក្សកាន់អំណាចប៉ុណ្ណោះ។ មនុស្សជាច្រើនត្រូវបានគេលុបឈ្មោះ ចំណែកទម្រង់ ១០១៨ ត្រូវបានគេចេញឲ្យជាប្រព័ន្ធទូទាំងប្រទេសចំពោះមនុស្សណាដែលគេគិតថា ជាអ្នកគាំទ្រគណបក្សប្រជាជន។ យើងមានភស្តុតាងច្រើនណាស់ដែលទាក់ទងទៅនឹងភាពមិនប្រក្រតីជាលក្ខណៈជាប្រព័ន្ធនេះ"។ លោក យឹម សុវណ្ណ លើកឡើងថា មិនមានប្រទេសណាមួយដែលជាប្រទេសប្រជាធិបតេយ្យមានការក្ដោបក្ដាប់ប្រព័ន្ធផ្សព្វផ្សាយដូចប្រទេសកម្ពុជានោះទេ ហើយម្យ៉ាងទៀតក៏មិនដែលមានប្រទេសប្រជាធិបតេយ្យណាបាញ់សម្លាប់មនុស្សទាំងឪពុក ទាំងកូនដូចករណីបាញ់លោក ឃឹម សម្បូណ៍ អ្នកកាសែតមនសិការខ្មែរនោះដែរ។
បើទោះបីជាការចោទប្រកាន់ធ្ងន់របស់ក្រុមគណបក្សប្រឆាំងថា ដំណើរការបោះឆ្នោតមានករណីមិនប្រក្រតីច្រើនជាពិសេសការបាត់ឈ្មោះរបស់អ្នកបោះឆ្នោត។ ប៉ុន្តែសម្រាប់ការបោះឆ្នោតសភាអាណត្តិទី៤ នេះក្រុមអ្នកសង្កេតការណ៍ជាតិ និងអន្តរជាតិបានវាយតម្លៃថា មានដំណើរការល្អជាងការបោះឆ្នោតមុនៗ។ ជាមួយគ្នានេះដែរ គ.ជ.ប សន្យាថានឹងត្រួតពិនិត្យទៅលើបញ្ហាបញ្ជីបោះឆ្នោត និងទទួលស្គាល់នូវសារៈសំខាន់របស់វាថាជាបញ្ហាមួយក្នុងចំណោមបញ្ហាសំខាន់ៗនៃការបោះឆ្នោត និងខិតខំធ្វើការដោះស្រាយ។ គ.ជ.ប ក៏បានអំពាវនាវដល់ប្រជាពលរដ្ឋទាំងអស់ចូលរួមពិនិត្យបញ្ជីឈ្មោះ និងចុះឈ្មោះនៅខែតុលា ខាងមុខនេះសម្រាប់ការបោះឆ្នោតលើកក្រោយ៕