រាជធានីភ្នំពេញ៖ ក្រសួងអប់រំ យុវជននិងកីឡាបានប្រារព្ធពិធីប្រកាសផ្សព្វផ្សាយជាផ្លូវការនៃគំនិតផ្ដួចផ្ដើមពន្លឿនការអប់រំសម្រាប់ទាំងអស់គ្នានារសៀលថ្ងៃទី២៩ ខែមិថុនា ឆ្នាំ២០០៩ នៅសណ្ឋាគារអាំងទែរកុងទីណង់តាល់ ក្រោមអធិបតីភាពលោក អ៊ឹម សិទ្ធី រដ្ឋមន្ត្រីក្រសួងអប់រំ យុវជននិងកីឡាព្រមទាំងមានការអញ្ជើញចូលរួមពីតំណាងដៃគូអភិវឌ្ឍន៍វិស័យអប់រំ តំណាងធនាគារពិភពលោក មន្ត្រីអប់រំ និងប្រតិភូមន្ទីរអប់រំយុវជន និងកីឡារាជធានី/ខេត្តមានចំនួនសរុប២០០នាក់។
គោលបំណងនៃពិធីប្រកាសផ្សព្វផ្សាយកម្មវិធីពន្លឿនការអប់រំសម្រាប់ទាំងអស់គ្នាត្រូវបានធ្វើឡើងដើម្បីឆ្លើយតបទៅនឹងលក្ខណៈវិនិច្ឆ័យក្នុងការទទួលកញ្ចប់ថវិកាចំនួន៥៧,៤លានដុល្លារពីដៃគូអភិវឌ្ឍន៍ដែលជាជំនួយឥតសំណងសម្រាប់អនុវត្តកម្មវិធីពង្រីកការគាំទ្រវិស័យអប់រំនៅកម្ពុជា។ កិច្ចព្រមព្រៀងទទួលកញ្ចប់ថវិកាជំនួយដែលជាកញ្ចប់ថវិកាធំជាងគេក្នុងចំណោមជំនួយផ្ដល់ទៅឲ្យប្រទេសផ្សេងៗទៀតនេះត្រូវបានចុះហត្ថលេខាដោយក្រសួងសេដ្ឋកិច្ច និងហិរញ្ញវត្ថុតំណាងឲ្យរាជរដ្ឋាភិបាលកម្ពុជានាឆ្នាំ២០០៨។
គម្រោងនេះផ្ដោតជាសំខាន់ទៅលើការកែលំអការចូលរៀននៅបឋមសិក្សា ហើយដំណើរការនៅគ្រប់រាជធានី/ខេត្តទាំងអស់ស្របតាមកម្មវិធីពង្រីកការគាំទ្រវិស័យអប់រំដែលមានសមាសភាព៣សំខាន់ៗ:
១- ការពង្រីកការអប់រំកុមារតូច
សកម្មភាពលំអិតក្នុងសមាសភាគទី១ រួមមាន: ការកសាងថ្នាក់មត្តេយ្យសិក្សានៅក្នុងសាលាបឋមសិក្សាចំនួន៦៥០បន្ទាប់ ការកសាងសាលាមត្តេយ្យសិក្សាចំនួន២៥ខ្នង ការបង្កើតមត្តេយ្យសិក្សាសហគមន៍ថ្មីចំនួន៤៥០កន្លែង ការបង្កើតមត្តេយ្យសិក្សាតាមខ្នងផ្ទះថ្មីចំនួន៤៥០កន្លែង និងការកសាងអគារសិក្សានៅក្នុងសាលាមធ្យមសិក្សាគរុកោសល្យមត្តេយ្យមជ្ឈិម១ខ្នងបីជាន់មានចំនួន១៥បន្ទប់។
២- ការកែលំអការចូលរៀន និងគុណភាពបឋមសិក្សា
សកម្មភាពលំអិតក្នុងសមាសភាគទី២ រួមមាន: ការកសាងថ្នាក់រៀន២.៦០០បន្ទប់នៅក្នុងសាលាមិនគ្រប់កំរិតចំនួន៦៥០សាលាដើម្បីឲ្យក្លាយទៅជាសាលារៀនគ្រប់កំរិតថ្នាក់ ការពង្រីកសាលារៀនដែលមានសិស្សច្រើនចំនួន២៥សាលា ដោយសាងសង់អគារសិក្សាបន្ថែមមួយខ្នង៥បន្ទប់នៅក្នុងសាលារៀននីមួយៗ ការផ្ដល់អាហារូបករណ៍ដល់សិស្សបឋមសិក្សាដែលក្រីក្រ និងជួបការលំបាកចំនួន១២.០០០នាក់នៅខេត្តព្រះវិហារ មណ្ឌលគីរី និងរតនគីរី ដើម្បីធ្វើឲ្យពួកគេអាចបន្តរៀនបានចាប់ពីថ្នាក់ទី៣ដល់ថ្នាក់ទី៦ ការបំប៉នគ្រូបង្រៀនចំនួន១៥.០០០នាក់ នាយកសាលាចំនួន ១.៥០០នាក់ និងបុគ្គលិកអប់រំ នៅមន្ទីរអប់រំយុវជននិងកីឡារាជធានី/ខេត្ត និងការិយាល័យអប់រំស្រុក/ក្រុងចំនួន៦០០នាក់ ការផ្ដល់ថវិកាកែលំអសាលារៀនដល់សាលាបឋមសិក្សាចំនួន៦៥០សាលា និងការផ្ដល់កញ្ចប់សំភារសិក្សា និងបណ្ណាល័យដល់សាលារៀនចំនួន ៦៥០សាលា។
៣- ការអភិវឌ្ឍន៍ស្ថាប័ន និងសមត្ថភាព
សកម្មភាពលំអិតក្នុងសមាសភាគទី៣រួមមាន: ការកសាងការិយាល័យអប់រំស្រុកចំនួន៦០ និងការអភិវឌ្ឍន៍សមត្ថភាពដល់មន្ត្រីនៅក្រសួងអប់រំយុវជននិងកីឡាចំនួន៣០០នាក់។
លោក អ៊ឹម សិទ្ធី រដ្ឋមន្ត្រីក្រសួងអប់រំយុវជននិងកីឡា បានថ្លែងថា រាជរដ្ឋាភិបាលកម្ពុជាសម្រេចបាននូវវឌ្ឍនភាពគួរជាទីមោទនៈក្នុងការអនុវត្តយុទ្ធសាស្ត្រ "អប់រំសម្រាប់ទាំងអស់គ្នា" តាមរយៈការធានាការអប់រំមូលដ្ឋានរយៈពេល៩ឆ្នាំសម្រាប់កុមារគ្រប់រូប។ សមិទ្ធផលធំៗ រួមមាន ចំនួនសាលាបឋមសិក្សាមាន ៦.៥៦៥អត្រាពិត នៃការសិក្សាមាន៩៤,៤% អត្រាបញ្ចប់ការសិក្សា ៨៥,៥៨% អនុវិទ្យាល័យមាន ១.១២២ក្នុងចំណោម ១.៦២១ ឃុំ-សង្កាត់ដែលត្រូវបានបង្កើតឡើងនៅក្នុងស្ទើរគ្រប់ឃុំ សង្កាត់ទូទាំងប្រទេស។ ទន្ទឹមនឹងនេះរាជរដ្ឋាភិបាលបានបង្កើនថវិកាយ៉ាងច្រើនសម្រាប់វិស័យអប់រំ។ ក្នុងនីតិកាលទី៣ កន្លងទៅនេះថវិកាចំណាយចរន្តសម្រាប់វិស័យអប់រំបានកើនឡើងទ្វេដងក្នុងឆ្នាំ២០០៧ធៀបទៅនឹងឆ្នាំ២០០៣ បើគិតជាភាគរយថវិកាចំណាយចរន្តសម្រាប់វិស័យអប់រំមានប្រមាណ១៩,២%។
ក្រសួងអប់រំយុវជននិងកីឡាដែលជាសេនាធិការរបស់រាជរដ្ឋាភិបាលនឹងខិតខំប្រើប្រាស់កញ្ចប់ថវិកាប្រកបដោយប្រសិទ្ធភាពក្នុងស្មារតីឆ្លើយតបទៅនឹងសេចក្ដីថ្លែងការណ៍ទីក្រុងប៉ារីស និងផែនការសកម្មភាពទីក្រុងអាក្រាលើមូលដ្ឋានសុខដុមនីយកម្ម ការតម្រឹមការផ្ដោតលើលទ្ធផលបំពេញការងារគណនេយ្យភាពទ្វេទិស និងភាពជាម្ចាស់ ព្រមទាំងការពង្រឹងភាពជាដៃគូ។ ប្រការនេះនឹងត្រូវបានឆ្លុះបញ្ចាំងយ៉ាងប្រត្យក្សតាមរយៈការធ្វើសុខដុមនីយកម្មផែនការយុទ្ធសាស្ត្រវិស័យអប់រំទៅនឹងផែនការយុទ្ធសាស្ត្រអភិវឌ្ឍន៍ជាតិបច្ចុប្បន្នកម្ម (២០០៩-២០១៣) ក្នុងក្របខណ្ឌយុទ្ធសាស្ត្រចតុកោណដំណាក់កាលទី២។
ទោះបីមានការកើនឡើងទាំងនេះក៏ដោយ ក៏យើងនៅឃើញមានកត្តាប្រឈមធំៗជាច្រើនទៀតដែលនៅចោទចំពោះមុខដូចជា ភាពខុសគ្នានៃអត្រាការចុះឈ្មោះចូលរៀននៅតាមតំបន់ទីក្រុង ជនបទ និងដាច់ស្រយាល នៅតាមតំបន់ខ្លួនមានសាលា តែនៅខ្វះគ្រូ ការផ្ដល់សេវាអប់រំដែលគុណភាពនៅមានកម្រិត និងខ្វះប្រសិទ្ធភាពនៅកន្លែងខ្លះក៏នៅតែចោទជាបញ្ហាដែលចាំបាច់ត្រូវដោះស្រាយ។ គោលនយោបាយ និងផែនការអប់រំរបស់រាជរដ្ឋាភិបាលបានបញ្ជាក់យ៉ាងច្បាស់ពីការប្ដេជ្ញាចិត្តរបស់ខ្លួនក្នុងការលើកកម្ពស់គុណភាពអប់រំតាមរយៈ ១. ការធានាឲ្យបាននូវសមធម៌ក្នុងការចូលរៀន ២. ការបង្កើនគុណភាព និងប្រសិទ្ធភាពនៃសេវាអប់រំ ៣. ការអភិវឌ្ឍន៍ស្ថាប័ន និងការពង្រឹងសមត្ថភាពសម្រាប់វិមជ្ឈការ។ គោលនយោបាយជាយុទ្ធសាស្ត្រទាំងនេះត្រូវបានអនុវត្តនៅក្នុងកម្មវិធីគាំទ្រវិស័យអប់រំឆ្នាំ២០០៦-២០១០៕
