រាជធានីភ្នំពេញ៖ អំពើរំលោភសេពសន្ថវៈ ការជួញដូរផ្លូវភេទនៅតែគំរាមកំហែងដល់កុមារ និងស្ត្រីកម្ពុជា។ ទោះបីជាមានច្បាប់កំណត់អំពើទាំងនេះជាបទឧក្រិដ្ឋ និងបានផ្ដន្ទាទោសធ្ងន់ធ្ងរដល់ជនល្មើសក៏ដោយ ក៏ជនល្មើសហាក់ដូចជាមិនមានការខ្លាចរអាឡើយ។ បច្ចុប្បន្ន កុមារ និងស្ត្រី ហាក់ដូចជាកំពុងរស់នៅក្រោមការភ័យខ្លាចពីការរំលោភបំពាន និងស្លាកស្នាមផ្លូវចិត្តដែលពួកគេមានកន្លងមក បន្ទាប់ពីពួកគេបានក្លាយជាជនរងគ្រោះ។
ជាក់ស្ដែងក្នុងរយៈពេល២ត្រីមាសដើមឆ្នាំ២០០៨នេះ តាមការអង្កេត និងដកស្រង់ករណីរំលោភសេពសន្ថវៈ ការជួញដូរផ្លូវភេទ និងអំពើអនាចារ ដោយគណៈកម្មាធិការអ៊ិកផាតកម្ពុជា ពីបណ្ដាញសារព័ត៌មានក្នុងស្រុកចំនួនបួនរួមមាន កាសែតកោះសន្ដិភាព រស្មីកម្ពុជា កម្ពុជាថ្មី និងឌឹខេមបូឌៀដេលី បានបង្ហាញថា មានអំពើរំលោភសេពសន្ថវៈបានកើតឡើងចំនួន ១៣១ករណី។ បើប្រៀបធៀបនឹងរយៈពេលដូចគ្នាក្នុងឆ្នាំ២០០៧ តួលេខនេះមានការថយចុះចំនួន ១៤ករណី ប្រហែលនឹង ១១%។ ករណីទាំងនេះ បណ្ដាលឲ្យមានជនរងគ្រោះចំនួន ១៤២នាក់ (៧៩នាក់ជាអនីតិជន ក្នុងនោះ៦១នាក់ជាកុមារដែលមានអាយុក្រោម ១៥ឆ្នាំ) ក្រៅពីជនជាតិខ្មែរក៏មានជនជាតិខ្មែរអ៊ិស្លាម វៀតណាម និងថៃផងដែរ។ ក្នុងចំណោមករណីទាំងអស់មាន ១៤ករណីដែលទាំងជនរងគ្រោះ និងជនសង្ស័យជាអនីតិជនដូចគ្នា។ អំពើអមនុស្សធម៌ទាំងនេះបានបង្កឡើង ដោយជនសង្ស័យ ១៨១នាក់ ក្នុងនោះមានស្ត្រី ២នាក់ជាសហចារី។ ១០៩នាក់ក្នុងចំណោមជនសង្ស័យទាំងអស់ត្រូវបានឃាត់ខ្លួន និងបានបំពេញសំណុំរឿងបញ្ជូនទៅតុលាការចំនួន ៦៧ករណី និង ៧០នាក់ផ្សេងទៀត បានគេចខ្លួន។ តួលេខបានបង្ហាញពីករណីរំលោភបូកបានកើនឡើងចំនួន ១៦ករណី ដែលក្នុងមួយករណីៗ ជនសង្ស័យមានគ្នាពី២នាក់រហូតដល់ ១០នាក់ក៏មាន។ បើសង្កេតពីទំនាក់ទំនងរវាងជនសង្ស័យ និងជនរងគ្រោះជាកុមារវិញ យើងឃើញថា មានកុមារ៧នាក់ត្រូវបានរំលោភដោយឪពុកបង្កើត ឬឪពុកចុងរបស់ខ្លួន ៣នាក់ដោយបងប្អូនជីដូនមួយ ៣២នាក់ដោយអ្នកជិតខាង ឬអ្នករស់នៅក្នុងភូមិជាមួយ ១៥នាក់ដោយអ្នកស្គាល់គ្នា ៥នាក់ដោយគ្រូបង្រៀន ២នាក់ដោយបុរសជាសង្សារ ២នាក់ដោយអ្នកមិនដែលស្គាល់គ្នា។
ប្រភពដដែលក៏បានរាយការណ៍ដែរថា មាន៤៣ករណីដែលជនសង្ស័យគ្រោងទុកជាមុន ១៩ករណី ជនសង្ស័យស្ថិតក្នុងភាពស្រវឹងជោកជាំ ៣ករណីត្រូវបានដឹងថា ជនសង្ស័យមើលរឿងអាសអាភាសជាប្រចាំ និង១ករណីបានប្រើថ្នាំសម្រើប។ ទាក់ទងនឹងដំណើរការផ្លូវច្បាប់វិញ មាន១ករណីដែលតុលាការតំកល់ទុកមិនចាត់ការ ១ករណីតុលាការដោះលែងជនសង្ស័យឲ្យនៅក្រៅឃុំ ៣ករណីត្រូវបានដោះស្រាយក្រៅប្រព័ន្ធតុលាការ និង២៣ករណីស្ថិតក្រោមការស៊ើបអង្កេតបន្ថែមទៀតរបស់មន្ត្រីមានសមត្ថកិច្ច។ បណ្ដា ខេត្ត- ក្រុងដែលកើតមានករណីទាំងនេះច្រើនជាងគេគឺ នៅខេត្តកំពង់ចាម២២ករណី ក្រុងភ្នំពេញ១២ករណី ខេត្តកណ្ដាល និងខេត្តបាត់ដំបងចំនួន ១១ករណីដូចគ្នា ខេត្តកំពង់ឆ្នាំង និងខេត្តបន្ទាយមានជ័យ ៩ករណីស្មើគ្នា។
តាមរយៈសេចក្ដីរាយការណ៍ដដែលយើងសង្កេតឃើញថា រូបភាពស្ដែងចេញពីករណីរំលោភសេពសន្ថវៈហាក់ដូចជាកាន់តែព្រៃផ្សៃឡើងៗ ដូចជា ចំនួនជនសង្ស័យក្នុងករណីរំលោភបូកនីមួយៗ មានការកើនឡើងរហូតដល់១០នាក់ក្នុងករណីខ្លះ និងសូម្បីតែកុមារក៏ជាជនល្មើសក្នុងករណីនេះដែរ) ការចាប់រំលោភពីសំណាក់ឪពុកបង្កើត ឬឪពុកចុងដោយមានធ្វើទារុណកម្មទៅលើកូនម្នាក់ ឬច្រើន និងគួរឲ្យសង្វេគបំផុត គឺការចាប់រំលោភជនរងគ្រោះដែលមានភាពវិកលវិការ និងមានជនរងគ្រោះរហូតដល់១១នាក់ត្រូវបានសម្លាប់ដើម្បីបំបាត់ភស្តុតាង បន្ទាប់ពីត្រូវបានរំលោភសេពសន្ថវៈហើយ។ ដោយឡែកករណីភាគច្រើនបង្កឡើងដោយអ្នកភូមិផងរបងជាមួយ អ្នកស្គាល់គ្នា សាច់ញាតិ និងឪពុកបង្កើត ឬឪពុកចុងក៏មាន។ ទាក់ទងនឹងដំណើរការផ្លូវច្បាប់វិញ មានជនសង្ស័យជាច្រើនដែលបានគេចខ្លួនពីការទទួលខុសត្រូវ និងមិនទាន់មានសេចក្ដីរាយការណ៍ណាមួយពីការឃាត់ខ្លួនជនសង្ស័យបន្ថែមទៀតនោះទេ ដូចគ្នានោះដែររហូតមកទល់ពេលនេះមិនទាន់មានករណីណាមួយត្រូវបានរាយការណ៍ពីដំណើរការជំនុំជំរះឡើយ។
ក្នុងឆមាសទី១នេះដែរ ក៏មានករណីជួញដូរផ្លូវភេទចំនួន៥ករណីបានកើតឡើងដែលបណ្ដាលឲ្យមានជនរងគ្រោះ២២នាក់ ក្នុងនោះមាន៤នាក់ជាជនជាតិវៀតណាម។ មានជនល្មើស ៩នាក់ ២នាក់ជាស្ត្រីដែលជាប់ពាក់ព័ន្ធក្នុងបទឧក្រិដ្ឋនេះ ដែល៧នាក់ត្រូវបានឃាត់ខ្លួនដើម្បីបំពេញសំណុំរឿងបញ្ជូនទៅតុលាការ និងម្នាក់ទៀតបានរត់គេចខ្លួន។ ស្ត្រីម្នាក់ក្នុងចំណោមជនសង្ស័យខាងលើ គឺជាម្ដាយបង្កើតរបស់ជនរងគ្រោះម្នាក់ដែលមានអាយុ១៧ឆ្នាំ ដែលនាងត្រូវបានម្ដាយអគតិរូបនោះនាំនាងទៅលក់ព្រហ្មចារីឲ្យជនបរទេសម្នាក់ដើម្បីប្ដូរយកប្រាក់។ ពុំមានករណីណាមួយក្នុងចំណោមករណីខាងលើត្រូវបានរាយការណ៍ឲ្យដឹងថា ដំណើរការជំនុំជំរះត្រូវបានធ្វើឡើងនោះឡើយ។ ផ្លូវនៃការជួញដូរនៃករណីទាំងនេះត្រូវបានរាយការណ៍ឲ្យដឹងថា មានការជួញដូរនៅក្នុងខេត្តបាត់ដំបង និងខេត្តសៀមរាបផ្ទាល់ ពីខេត្តកណ្ដាលមកខេត្តរតនគីរី និងពីប្រទេសវៀតណាមមកក្រុងព្រះសីហនុ។
ក្នុងរយៈពេលដូចគ្នានេះ ក៏មានករណីអនាចារចំនួន៦ករណីបានកើតឡើង និងបានបណ្ដាលឲ្យមានជនរងគ្រោះ១៦នាក់ ៨នាក់ជាកុមារី និង៥នាក់ជាកុមារាដែលមានអាយុពី៦ដល់១៦ឆ្នាំ។ ករណីទាំងនោះបានប្រព្រឹត្តដោយជនសង្ស័យចំនួន៦នាក់ដែលក្រៅពីជនជាតិខ្មែរម្នាក់មានជនជាតិរុស្សី ចិន អ៊ីតាលី អាមេរិក និងបារាំង ៥នាក់ក្នុងចំណោមពួកគេត្រូវបានឃាត់ខ្លួន និងបំពេញសំណុំរឿងបញ្ជូនទៅតុលាការ និងម្នាក់ទៀតមិនត្រូវបានឃាត់ខ្លួនទេ តែស្ថិតក្រោមការស៊ើបអង្កេតរបស់ប៉ូលិសមូលដ្ឋាន។ ករណីនោះបានកើតឡើង៣ករណីនៅក្រុងព្រះសីហនុ ២ករណីនៅក្រុងភ្នំពេញ និង១ករណីនៅខេត្តកំពត។ ដូចគ្នានឹងករណីរំលោភសេពសន្ថវៈ និងជួញដូរផ្លូវភេទផងដែរ ពុំមានដំណើរការជំនុំជំរះណាមួយត្រូវបានរាយការណ៍ឲ្យដឹងថា បានធ្វើឬយ៉ាងណានោះទេ។
គណៈកម្មការអ៊ិកផាតកម្ពុជា រួមជាមួយអង្គការជាសមាជិកទាំង២៧របស់ខ្លួន សូមអំពាវនាវសាជាថ្មីដល់ស្ថាប័នមានសមត្ថកិច្ចពាក់ព័ន្ធ ជាពិសេសមន្ត្រីប៉ូលិស សូមមេត្តាជួយជំរុញការអនុវត្តន៍ច្បាប់ឲ្យមានប្រសិទ្ធភាព ដោយចៀសវាងការដោះស្រាយក្រៅប្រព័ន្ធតុលាការ ដែលផ្ទុយនឹងនីតិវិធី និងបទប្បញ្ញត្តិច្បាប់ ព្រមទាំងការតាមប្រមាញ់លើជនសង្ស័យ ដើម្បីកសាងសំណុំរឿងបញ្ជូនទៅតុលាការ។ ម្យ៉ាងទៀត យើងសូមអំពាវនាវលើកយកករណីទាំងនោះមកជំនុំជំរះអោយបានឆាប់រហ័ស និងផ្ដន្ទាទោសជនល្មើសអោយបានធ្ងន់ធ្ងរ ដើម្បីចៀសវាងការទុកសំណុំរឿងមិនចាត់ការ ដោយផ្ដល់ឱកាសអោយជនល្មើសបានរស់នៅក្រៅសំណាញ់ច្បាប់។ ទាក់ទងនឹងបញ្ហាដ៏ក្ដៅគគុកខាងលើនេះដែរ យើងខ្ញុំសូមសំណូមពរដល់ជនដែលងាយរងគ្រោះ សូមមេត្តាបង្កើនការប្រុងប្រយ័ត្នចំពោះសុវត្ថិភាពផ្ទាល់ខ្លួន ជាពិសេសឪពុកម្ដាយ និងអាណាព្យាបាលទាំងឡាយមិនត្រូវផ្ដល់ការទុកចិត្តដល់សាច់ញាតិ មិត្ដភ័ក្ដិ និងអ្នកជិតខាង ឬបណ្ដោយឲ្យកូនចៅរបស់ខ្លួននៅតែម្នាក់ឯងឡើយ៕