រាជធានីភ្នំពេញ៖ ក្រសួងកិច្ចការនារីបានរៀបចំធ្វើសន្និសីទកាសែតស្ដីពីការផ្សព្វផ្សាយខ្សែភាពយន្តខ្នាតខ្លីមួយ ប្រយោជន៍ទប់ស្កាត់អំពើហិង្សាក្នុងប្រទេសកម្ពុជា ដែលបានក្លាយជាទម្លាប់អាក្រក់មួយនាពេលកន្លងមក។ ខ្សែភាពយន្តខ្នាតខ្លីនេះផ្ដួចផ្ដើមគំនិតផលិតដោយក្រសួងកិច្ចការនារីតែម្ដង មានចំណងជើងថា "ឥទ្ធិពលក្នុងការផ្លាស់ប្ដូរ" ដែលបញ្ចាំងមានរយៈពេល៣០នាទី។
លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានថ្លែងថា អំពើហិង្សាក្នុងគ្រួសារគឺជាការរំលោភបំពានមួយដែលប្រព្រឹត្តឡើងដោយសមាជិកទាំងឡាយនៅក្នុងរង្វង់គ្រួសារ ហើយអំពើទាំងនោះរួមមាន ដូចជាការបំពានផ្លូវកាយចិត្ត ឬការរំលោភបំពានផ្នែកជីវភាពសេដ្ឋកិច្ចជាដើម។ អំពើហិង្សាក្នុងគ្រួសារមានផលប៉ះពាល់យ៉ាងធ្ងន់ធ្ងរដល់ជីវភាពរស់នៅ និងការអភិវឌ្ឍន៍ស្ត្រីរាប់ពាន់នាក់នៅក្នុងប្រទេសកម្ពុជា។ បច្ចុប្បន្នអំពើហិង្សាក្នុងគ្រួសារគេលែងចាត់ទុកថាជាបញ្ហាក្នុងគ្រួសារទៀតហើយ គឺបានរាប់បញ្ចូលក្នុងបញ្ហាសង្គមផងដែរ ពីព្រោះមានការប៉ះពាល់ខ្លាំងចំពោះស្ត្រីនិងកុមារ។ ហេតុដូច្នេះហើយទើបច្បាប់ស្ដីពីការទប់ស្កាត់អំពើហិង្សាក្នុងគ្រួសារត្រូវបានបង្កើតឡើងដើម្បីដល់ការពារជនរងគ្រោះ។
លោកជំទាវរដ្ឋមន្ត្រីបញ្ជាក់ថា អំពើហិង្សាក្នុងគ្រួសារអាចរាប់បញ្ចូលផងដែរទាំងការគំរាមកំហែង និងការទុកឲ្យនៅឯកោ។ យោងតាមមាត្រា៣៨នៃរដ្ឋធម្មនុញ្ញនៃព្រះរាជាណាចក្រកម្ពុជាបានតម្រូវឲ្យមានច្បាប់ ដើម្បីធានាឲ្យមានការរំលោភបំពានលើរូបរាងកាយបុគ្គលណាម្នាក់ឡើយ។ច្បាប់ត្រូវតែការពារជីវិត កិត្តិយស និងសេចក្ដីថ្លៃថ្នូររបស់ប្រជាពលរដ្ឋទាំងអស់។
លោកជំទាវ ជូ ប៊ុនអេង អគ្គនាយកនៃអគ្គនាយកដ្ឋានអភិវឌ្ឍន៍សង្គមរបស់ក្រសួងកិច្ចការនារីបានថ្លែងថា ខ្សែភាពយន្តខ្នាតខ្លីនេះមិនមែនជាមធ្យោបាយតែមួយគត់ដែលអាចធ្វើឲ្យបុរសមានការកែប្រែនិងផ្លាស់ប្ដូរឥរិយាបថក្នុងការប្រព្រឹត្តអំពើហិង្សានោះទេ។ ជាការពិតចាំបាច់ត្រូវរកមធ្យោបាយជាច្រើនទៀត ដើម្បីធ្វើការផ្លាស់ប្ដូរសង្គមមួយ គឺមិនអាចធ្វើបានតែមួយចំណុចនោះឡើយ៕