លោកប្រធានមន្ទីរឡើងថ្លែងផ្សព្វផ្សាយពីបញ្ហាដីធ្លី និងអ្នកចូលរួមជាអាជ្ញាធរឃុំ-ភូមិ និងប្រជាពលរដ្ឋ (រូបថត៖ ធឿន)ខេត្តស្វាយរៀង៖ នៅថ្ងៃទី២៤ មេសា ឆ្នាំ២០០៨ រយៈពេលពេញមួយថ្ងៃក្រុមការងារដីធ្លីដើម្បីអភិវឌ្ឍន៍ខេត្តស្វាយរៀងបានរៀបចំវគ្គផ្សព្វផ្សាយស្ដីពីនីតិវិធីនៃការចុះបញ្ជីដីធ្លី និងការដោះស្រាយទំនាស់ដីធ្លីដល់ក្រុមប្រឹក្សាឃុំស្វាយជ្រំ ដោយមានការចូលរួមពីមេភូមិ ចាស់ព្រឹទ្ធាចារ្យ និងប្រជាពលរដ្ឋឃុំស្វាយជ្រំចំនួន១០០នាក់។
មន្ត្រីផ្សព្វផ្សាយបាននិយាយថា នេះជាវគ្គផ្សព្វផ្សាយឲ្យយល់ដឹងអំពីនីតិវិធីចុះបញ្ជី និងដោះស្រាយទំនាស់ដីធ្លី។ ពិធីនេះ បានធ្វើឡើងនៅវត្តស្វាយជ្រំ ស្ថិតក្នុងឃុំស្វាយជ្រំ ស្រុកស្វាយជ្រំក្រោមអធិបតីភាពលោក ប៊ឿយ យ៉ា ប្រធានមន្ទីររៀបចំដែនដីនគរូបនីយកម្ម សំណង់ និងសុរិយាដីខេត្ត ដោយមានការចូលរួមពីលោក ទេព លី អភិបាលរងស្រុកស្វាយជ្រំ និងលោក វ៉ាន់ ប៊ុនធឿន នាយកអង្គការ SADA និងជាប្រធានក្រុមការងារដីធ្លីអភិវឌ្ឍន៍ខេត្ត។
លោក វ៉ាន់ ប៊ុនធឿន បានថ្លែងថា គោលបំណងនៃវគ្គផ្សព្វផ្សាយនេះ គឺដើម្បីលើកកម្ពស់ការយល់ដឹងដល់ប្រជាពលរដ្ឋក្នុងតំបន់វិនិច័្ឆយចុះបញ្ជីជាលក្ខណៈប្រព័ន្ធឲ្យយកចិត្តទុកដាក់លើសិទ្ធិរបស់ខ្លួនចំពោះទ្រព្យសម្បត្តិ និងដីធ្លី ដឹងនូវដំណើរការចុះបញ្ជីដីធ្លី និងការដោះស្រាយទំនាស់ដីធ្លី ជាពិសេសឲ្យប្រជាពលរដ្ឋយល់ដឹង និងចូលរួមក្នុងដំណើរការចុះបញ្ជីដីធ្លី ការដោះស្រាយទំនាស់ដីធ្លីឲ្យមានភាពល្អប្រសើរ ហើយប្រជាពលរដ្ឋអាចត្រៀមខ្លួនចូលរួមគ្រប់ដំណើរការ។
លោក ប៊ឿយ យ៉ា បានថ្លែងក្នុងពិធីបើកវគ្គនោះថា ប្រជាពលរដ្ឋឃុំស្វាយជ្រំមានភ័ព្វសំណាងល្អណាស់ ដែលក្រសួងរៀបចំដែនដីនគររូបនីយកម្ម និងសំណង់ បានផ្ដល់អាទិភាពចុះបញ្ជីជាលក្ខណៈប្រព័ន្ធផ្ដល់ប័ណ្ណកម្មសិទ្ធិជូនមុនគេក្នុងខេត្តស្វាយរៀង។ ប័ណ្ណកម្មសិទ្ធិ ឬវិញ្ញប័នបត្រសំគាល់ម្ចាស់អចលនវត្ថុមានសារសំខាន់ណាស់ សម្រាប់ប្រជាពលរដ្ឋខ្មែរគ្រប់រូប ព្រោះពេលយើងទទួលបានប័ណ្ណកម្មសិទ្ធិនេះហើយ យើងអស់មានការព្រួយបារម្ភពីទំនាស់ដីធ្លី យើងអាចយកទៅបញ្ចាំនៅធនាគារ ដើម្បីយកប្រាក់មកប្រកបមុខរបរបានងាយស្រួល ដូច្នេះប្រជាពលរដ្ឋទាំងអស់ត្រូវតែចូលរួមជាមួយគណៈកម្មការចុះបញ្ជីដីធ្លី។ មេរៀនគឺបញ្ជាក់អំពីច្បាប់ភូមិបាល និងសិទ្ធិនានាលើកម្មសិទ្ធិប្រភេទនៃកម្មសិទ្ធិ កម្មសិទ្ធិ ស្របច្បាប់ភោគៈលើអចលនវត្ថុនីតិវិធីនៃការចុះបញ្ជី និងការដោះស្រាយទំនាស់។
លោក ទេព លី អភិបាលរងស្រុកស្វាយជ្រំបានថ្លែងថា ក្នុងនាមរូបលោកតំណាងឲ្យលោកអភិបាលស្រុកស្វាយជ្រំ និងជាសមាជិកគណៈកម្មការចុះបញ្ជីដីធ្លី សូមថ្លែងអំណរគុណដល់ក្រុមការងារដីធ្លី ជាពិសេសលោក វ៉ាន់ ប៊ុនធឿន នាយកអង្គការ SADA និងអង្គការ NGO FORUM ដែលបានរៀបចំផ្សព្វផ្សាយនីតិវិធីនៃការចុះបញ្ជី និងការដោះស្រាយទំនាស់ដល់ប្រជាពលរដ្ឋឃុំស្វាយជ្រំឲ្យបានយល់ដឹង។ នេះជាការចូលរួមចំណែកយ៉ាងសំខាន់ជាមួយរាជរដ្ឋាភិបាលដែលមិនអាចខ្វះបានក្នុងការធ្វើជាដៃគូក្នុងការអភិវឌ្ឍន៍សង្គមជាតិ ជាពិសេសក្នុងការចុះបញ្ជីជាលក្ខណៈប្រព័ន្ធ។ សេចក្ដីត្រូវការរបស់ប្រជាពលរដ្ឋគ្រប់រូប គឺប័ណ្ណកម្មសិទ្ធិស្របច្បាប់ក្នុងការគ្រប់គ្រងដីធ្លីនេះ ដើម្បីចៀសវាងទំនាស់ ដោយសារមនុស្សគ្រប់រូបត្រូវការទ្រព្យសម្បត្តិដីធ្លីនេះដែលជាទ្រព្យដ៏មានតម្លៃសម្រាប់សាងសង់លំនៅឋាន និងធ្វើស្រែចម្ការប្រកបរបរចិញ្ចឹម៕