គណៈអធិបតី និងមន្រី្តសង្គមស៊ីវិលនៅក្នុងការបោះឆ្នោតរើសប្រធាន CEDAW ថ្មី (រូបថត៖លាងគង់)ភ្នំពេញ ៖ គណៈកម្មាធិការលុបបំបាត់រាល់ទម្រង់រើសអើងប្រឆាំងនឹងនារីភេទ(CEDAW) កាលពីសប្តាហ៍មុនបានធ្វើការបោះឆ្នោតជ្រើសរើសគណៈប្រធានរបស់ខ្លួនស្របតាមអាណត្តិពីរឆ្នាំម្តង។
លោកស្រីវេជ្ជបណ្ឌិត ពុង ឈីវកេត ប្រធានអង្គការលីការដូជាប់ជាប្រធានCEDAW និងលោកសុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជាជាប់ជាអនុប្រធាន ជំនួសលោកស្រី អ៊ុង ចាន់ថុល ដែលជាប្រធានអាណត្តិមុន ហើយបានសុំលាលែងពីតំណែង និងលោកស្រី ហួយ សុជីវណ្ណី អនុប្រធានគណៈកម្មាធិការនេះដែលផុតអាណត្តិ។
គណៈកម្មាធិការលុបបំបាត់រាល់ទម្រង់រើសអើងប្រឆាំងនារីភេទត្រូវបានបង្កើតឡើងក្នុងឆ្នាំ១៩៩៥ ដោយមានការចូលរួមពី៩អង្គការរហូតដល់ពង្រីកបាន៦៩អង្គការនាពេលបច្ចុប្បន្ននេះ។
លោក ទេព នន្ទរី អនុប្រធានក្រុមប្រឹក្សាជាតិកម្ពុជាដើម្បីស្រ្តី និងជារដ្ឋលេខាធិការក្រសួងមហាផ្ទៃបានមានប្រសាសន៍ថាគណៈកម្មាធិការCEDAW បានជួយដល់ក្រុមប្រឹក្សាជាតិដើម្បីស្រ្តីបានច្រើននៅក្នុងឆ្នាំ២០០៦ ក្នុងការកសាងសមត្ថភាពក្រុមការងារតាមក្រសួង ឲ្យក្លាយជាគ្រូបង្គោលចំនួន៤វគ្គសម្រាប់ការអប់រំ និងរៀបចំយុទ្ធសាស្រ្តក្នុងស្ថាប័នខ្លួនបន្ត៕