ទិដ្ឋភាពក្នុងពិធីតែងតាំងអភិបាលរងខេត្តបាត់ដំបង៖ អនុក្រឹត្យស្ដីពីការប្រគល់ភារកិច្ចជូនមន្ត្រីរាជការរបស់រាជរដ្ឋាភិបាលកម្ពុជាលេខ៧០៨ អនក្រ តត ចុះថ្ងៃទី ១៦ ខែមិថុនា ឆ្នាំ២០០៨ ចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន បានប្រគល់ភារកិច្ចជូនលោកស្រី ស៊ឹម ម៉ារី មន្ត្រីក្របខណ្ឌក្រសួងកិច្ចការនារីជាអនុប្រធានមន្ទីរកិច្ចការនារីមកបំពេញតួនាទីជាអភិបាលរងខេត្តបាត់ដំបងដែលជាស្ត្រីដំបូងបង្អស់នៅក្នុងមុខតំណែងថ្មីនេះរបស់ខេត្ត។
ព្រមជាមួយការប្រកាសស្ដីពីការដំឡើងឋានន្តរសក្ដិតែងតាំង និងប្រគល់ភារកិច្ចជូនមន្ត្រីរាជការរបស់ក្រសួងមហាផ្ទៃលេខ៩២១ ប្រក ចុះថ្ងៃទី២៧ ខែមិថុនា ឆ្នាំ២០០៨ ដោយឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស ខេង បានសម្រេចដំឡើងឋានន្តរសក្ដិ និងតែងតាំងមន្ត្រីរាជការចំនួន២រូបឋានន្តរសក្ដិក្រមការដើមខ្សែថ្នាក់លេខ៧ ទៅជានាយក្រមការថ្នាក់លេខ៦ក្នុងនោះ គឺលោកស្រី រស់ ស៊ីថា ជាអភិបាលរងស្រុកថ្មគោល និងលោកស្រី សុំ ចិន្ដា ជាអភិបាលរងស្រុកសង្កែខេត្តបាត់ដំបង។
ពិធីប្រកាសតែងតាំងអភិបាលរងខេត្តបាត់ដំបង និងអភិបាលរងស្រុកទាំង ១៣ រូបដែលជាបេក្ខភាពជាស្ត្រីរបស់ខេត្តត្រូវបានប្រារព្ធធ្វើឡើងកាលពីល្ងាចថ្ងៃទី ០៨ ខែ កក្កដា ឆ្នាំ២០០៨ ក្រោមវត្តមានលោក នូ ភឿង អនុរដ្ឋលេខាធិការក្រសួងមហាផ្ទៃ និងជាតំណាងដ៏ខ្ពង់ខ្ពស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ លោក សៀង ស៊ុតថង អភិបាលរងខេត្ត និងជាតំណាងអភិបាលខេត្តបាត់ដំបង ប្រាជ្ញ ចន្ទ ព្រមទាំង អស់លោក លោកស្រី អភិបាលរងខេត្ត និងស្ថាប័ន មន្ទីរជុំវិញខេត្តជាច្រើនទៀត។
ដោយឡែកនៅក្នុងប្រការ ២ ក្នុងសេចក្ដីប្រកាសរបស់ក្រសួងមហាផ្ទៃក៏បានប្រគល់ភារកិច្ចជូនដល់មន្ត្រីរាជការចំនួន ១១ រូបនៅខេត្តបាត់ដំបងក្នុងនោះ ១- កញ្ញា ភោគ ស៊ិនណាវី ជាអភិបាលរងស្រុកបាត់ដំបង ២- លោកស្រី ម៉ូត សំប៊ុន ជាអភិបាលស្រុកឯកភ្នំ ៣- លោកស្រី ទន់ សូលីណែត ជាអភិបាលរងស្រុករតនមណ្ឌល ៤- លោកស្រី អ៊ុយ មួយ ជាអភិបាលរងស្រុកបាណន់ ៥- កញ្ញា អ៊ុត គឹមហឿង ជាអភិបាលរងស្រុកមោងឫស្សី ៦- លោកស្រី គង់ រម្យ ជាអភិបាលរងស្រុកសំពៅលូន ៧- កញ្ញា រស់ សុគុណ ជាអភិបាលរងស្រុកបវេល ៨- កញ្ញា នួន ភិរម្យ ជាអភិបាលរងស្រុកកំរៀង ៩- លោកស្រី ឃឹម ស្រ៊ាន ជាអភិបាលរងស្រុកភ្នំព្រឹក ១០- កញ្ញា ប៊ិន បូឡែន ជាអភិបាលរងស្រុកគាស់ក្រឡ ១១- លោកស្រី ឌី សាម៉េត ជាអភិបាលរងស្រុតសំឡូត។
លោក សៀង ស៊ុតថង អភិបាលរងខេត្ត និងជាតំណាងលោកអភិបាលខេត្តបាត់ដំបងប្រាជ្ញ ចន្ទ បានមានប្រសាសន៍ក្នុងថ្ងៃនោះថា ចំពោះការតែងតាំងប្រគល់ភារកិច្ចជាអភិបាលរងខេត្ត និងអភិបាលរងស្រុកក្នុងថ្ងៃនេះ គឺជាលទ្ធផលដែលបានមកពីការអនុវត្តតាមអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសដែលសម្ដេចបានអញ្ជើញចូលរួមជាអធិបតីភាពដ៏ខ្ពង់ខ្ពស់បំផុតក្នុងពិធីបិទសន្និបាតបូកសរុបលទ្ធផលការងារឆ្នាំ២០០៧ និងលើកទិសដៅអនុវត្តបន្តឆ្នាំ២០០៨ របស់ក្រសួងមហាផ្ទៃដោយកំណត់ឲ្យគ្រប់ខេត្ត- ក្រុង ស្រុក- ខណ្ឌ មាននាទីមួយរូបក្នុងខេត្ត- ក្រុង ស្រុក- ខណ្ឌ ដើម្បីទទួលមុខតំណែងជាអភិបាលរងខេត្តក្រុង និងជាអភិបាលរងស្រុក- ខណ្ឌ។
ជាមួយគ្នានេះដែរក៏មានការប្ដេជ្ញាចិត្តរបស់លោកស្រី ស៊ឹម ម៉ារី អភិបាលរងខេត្តបាត់ដំបងដែលទើបតែងតាំងថ្មី និងជំនួសមុខឲ្យអភិបាលរងស្រុកទាំង ១៣ ក្នុងខេត្តដោយបានគូសបញ្ជាក់ថា នាងខ្ញុំទាំងអស់គ្នាដែលបានទទួលមុខតំណែងក្នុងឱកាសនេះ នឹងខិតខំបន្តការអនុវត្តន៍ជាក់ស្ដែងស្របតាមគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជា និងការអនុវត្តន៍ជាក់ស្ដែងសមធម៌យេនឌ័រ ដែលមានចែងអំពីតួនាទីក្នុងច្បាប់ស្ដីពីការគ្រប់គ្រងរដ្ឋបាលរាជធានីខេត្ត- ក្រុង ស្រុក- ខណ្ឌដែលជាការឆ្លុះបញ្ចាំងពីការយកចិត្តទុកដាក់ខ្ពស់ថែមទៀតដល់នាទីយើង។ ក្នុងថ្ងៃនោះក៏មានជូនបាច់ផ្កា វត្ថុអនុស្សាវរីយ៍ពីស្ថាប័ននានាជុំវិញខេត្តផងដែរដល់លោកស្រី នាងកញ្ញា ដែលទើបទទួលមុខតំណែងជាអភិបាលរងខេត្ត អភិបាលរងស្រុកទាំង ១៣ រូបទៀតផង៕