លោក ម៉ម ប៊ុនហេង ថតរូបអនុស្សាវរីយ៍ជាមួយសិក្ខាកាមដែលបានចូលរួមបាត់ដំបង៖ នៅក្នុងវគ្គបណ្ដុះបណ្ដាលការងារថែទាំអ្នកជំងឺគ្រុនឈាមជូនដល់គិលានុប្បដ្ឋាក-យិកា នៅសាលប្រជុំនៃមន្ទីរសុខាភិបាលខេត្ត កាលពីព្រឹកថ្ងៃទី៤ ខែកញ្ញា ឆ្នាំ២០០៨ លោក ម៉ម ប៊ុនហេង រដ្ឋលេខាធិការក្រសួងសុខាភិបាលមានប្រសាសន៍ថា ករណីគ្រុនឈាមលើកុមារនៅឆ្នាំ២០០៨នេះ បើប្រៀបធៀបនឹងឆ្នាំ២០០៧កន្លងទៅគឺមានការថយចុះចំនួន៦ដង។
លោករដ្ឋលេខាធិការ បានបញ្ជាក់ថា នៅឆ្នាំ២០០៧កន្លងមក នៅទូទាំងប្រទេសកុមារគ្រុនឈាមមានជិត៤ម៉ឺននាក់ ហើយមានកុមារស្លាប់ជាង៤០០នាក់។ ប៉ុន្តែដោយសារមានការខិតខំប្រឹងប្រែងរបស់ថ្នាក់ដឹកនាំមន្ទីរពេទ្យ ព្រមទាំងបុគ្គលិកមន្ទីរពេទ្យជាបន្តបន្ទាប់នៅក្នុងឆ្នាំ២០០៨នេះ អ្នកជំងឺគ្រុនឈាមមានការថយចុះចំនួន៦ដង។ ការថយចុះនេះមិនមែនដោយសារតែមូសខ្លាវាអាណិតកូនចៅយើងមិននាំគ្នាខាំទេ គឺដោយសារតែយើងមានវិធានការបង្ការទប់ស្កាត់ជាមុនទាំងថ្នាក់ជាតិ ថ្នាក់តំបន់ និងថ្នាក់ស្រុក ដោយរួមសហការជាមួយដៃគូអភិវឌ្ឍន៍ ធ្វើការផ្សព្វផ្សាយឲ្យប្រជាពលរដ្ឋចូលរួមបំផ្លាញប្រភពដង្កូវទឹក ដែលមាននៅជុំវិញផ្ទះ។ បើបំបាត់ដង្កូវទឹកបាន គឺបំបាត់មូលខ្លាបានដែរ។
លោក ម៉ម ប៊ុនហេង បានបន្ដថា ជំងឺគ្រុនឈាមជាជំងឺមួយកាចសាហាវវាឆក់យកជីវិតកុមារ បើសិនជាយើងមានការធ្វេសប្រហែសមិនបញ្ជូនអ្នកជំងឺមកមណ្ឌលសុខភាព ឬក៏មន្ទីរពេទ្យបង្អែកបានទាន់ពេលវេលា។ ជាក់ស្ដែងនៅឆ្នាំ២០០៧ ក្នុងខែសីហា-កញ្ញានេះ មានផ្ទុះករណីគ្រុនឈាមលើកុមារចំនួនជិត៤ម៉ឺនករណី ធ្វើឲ្យកុមារស្លាប់ជាង៤០០នាក់។ ហើយនៅឆ្នាំ២០០៨នេះ គិតរយៈពេលដូចគ្នា ជំងឺគ្រុនឈាមលើកុមារមានតែជាង ៥.០០០ករណី និងធ្វើឲ្យកុមារស្លាប់តែ៥៤នាក់ គឺមានការថយចុះ៦ទៅ៧ដង។
លោករដ្ឋលេខាធិការក្រសួងសុខាភិបាល បានលើកឡើងប្រាប់សិក្ខាកាមទាំង៥០នាក់មកពីមណ្ឌលសុខភាព និងមន្ទីរពេទ្យបង្អែកថា ក្រៅពីជំងឺគ្រុនឈាមត្រូវយកចិត្តទុកដាក់លើការងារសំខាន់ៗចំនួន៥ទៀត គឺទី១ការងារបណ្ដុះបណ្ដាលពេទ្យឆ្មបបឋម និងមធ្យមឲ្យដល់មូលដ្ឋានជនបទទី២-ការគ្រប់គ្រងឱសថស្ថាន ឱសថស្ថានរង គ្លីនិកឯកជនត្រូវជំរុញឲ្យមានច្បាប់ត្រឹមត្រូវ ពិសេសត្រូវត្រួតពិនិត្យការចរាចរឱសថក្លែងក្លាយ ទប់ស្កាត់ឲ្យមានប្រសិទ្ធភាពទី៣-ការងារមូលនិធិសមធម៌ជួយដល់ជនក្រីក្រ ទី៤- ត្រូវគិតគូររៀបចំឲ្យមានសេវាធានារ៉ាប់រងសុខភាព ដោយយកគំរូតាមខេត្តពោធិ៍សាត់ និងទី៥-ត្រូវគ្រប់គ្រងបុគ្គលិកឲ្យបានដិតដល់ទើបដំណើរទៅរលូន។
លោកវេជ្ជបណ្ឌិត ញ៉ឹក ប៊ុនឈុប ប្រធានមន្ទីរសុខាភិបាលខេត្តមានប្រសាសន៍ថា នៅខេត្តបាត់ដំបងក្នុងត្រីមាសទី៣ឆ្នាំ២០០៧មានផ្ទុះឡើងករណីគ្រុនឈាមចំនួន១៨ករណីបណ្ដាលឲ្យស្លាប់កុមារចំនួន៩នាក់។ លោកប្រធានមន្ទីរបានបញ្ជាក់ពីមូលហេតុបណ្ដាលឲ្យស្លាប់កុមារដែលមានជំងឺគ្រុនឈាមច្រើន ដោយសារតែអាណាព្យាបាលនៅជនបទឆ្ងាយដាច់ស្រយាលពិបាកក្នុងការធ្វើដំណើរបញ្ជូនកូនមកកាន់មន្ទីរពេទ្យទុកទាល់តែជំងឺធ្ងន់ធ្ងរ ទើបមិនអាចជួយសង្គ្រោះអាយុជីវិតបាន។ ដោយឡែកនៅឆ្នាំ២០០៨នេះ គិតរយៈពេលដូចគ្នាគឺមានតែជំងឺគ្រុនឈាមចំនួនម្នាក់គត់ ដែលស្លាប់ បើប្រៀបធៀបនឹងឆ្នាំ២០០៧ មានការថយចុះ៧ទៅ៨ផងដង។
លោកវេជ្ជបណ្ឌិត ចាង ម៉កសេង ជនជាតិម៉ាឡេស៊ី តំណាងអង្គការសុខភាពពិភពលោកមានប្រសាសន៍ថា ជំងឺគ្រុនឈាមគឺបានក្លាយជាប្រធានបទមួយយ៉ាងសំខាន់ដល់សុខភាពសាធារណៈនៅក្នុងតំបន់ដែលកំពុងធ្វើការរាតត្បាតនៅក្នុងប្រទេសកំពុងអភិវឌ្ឍន៍ ជាក់ស្ដែងនៅក្នុងប្រទេសកម្ពុជាកាលពីឆ្នាំ២០០៧កន្លងមក មានករណីគ្រុនឈាមលើកុមារចំនួន ៣៩.៨៥០ករណី ហើយមានកុមារចំនួន៤០៧នាក់បានស្លាប់បាត់បង់ជីវិត។ នៅឆ្នាំ២០០៨នេះស្ថានភាពជំងឺគ្រុនឈាមមានភាពល្អប្រសើរជាងឆ្នាំ២០០៧ ដោយកើតមានតែ ៥.៣០០ករណីប៉ុណ្ណោះ ហើយមានកុមារស្លាប់តែ៥៤នាក់ គឺមានការថយចុះគួរឲ្យកត់សម្គាល់។
លោក ចាង ម៉កសេង បានបញ្ជាក់ថា នៅថ្ងៃទី២៩ ខែកញ្ញា ឆ្នាំ២០០៨ ខាងមុខនេះ អង្គការសុខភាពពិភពលោករួមជាមួយដៃគូនឹងរៀបចំកិច្ចប្រជុំពិភាក្សាមួយដើម្បីស្វែងរកយុទ្ធសាស្ត្រកាត់បន្ថយការពារជំងឺគ្រុនឈាមឲ្យមានកម្រិតទាបបំផុត ដោយអនុវត្តតាមសភាពការណ៍ប្រទេសនីមួយៗ។ ផែនការប្រជុំសង្កត់ធ្ងន់លើការស្វែងរករោគវិនិច្ឆ័យ និងរកវិធីការពារជំងឺគ្រុនឈាម ជាពិសេសគឺសំដៅទៅលើមធ្យោបាយដឹកជញ្ជូនអ្នកជំងឺគ្រុនឈាមពីតំបន់ជនបទឆ្ងាយដាច់ស្រយាលមកកាន់មន្ទីរពេទ្យបង្អែករបស់ស្រុក ឬខេត្តឲ្យបានឆាប់រហ័សនិងទាន់ពេលវេលា៕