លោកសាយ ឈុំ តំណាងរាស្ត្រមណ្ឌលកំពង់ស្ពឺអញ្ជើញជាអធិបតី (រូបថត ៖ អ៊ុយសុង)រាជធានីភ្នំពេញ ៖ សន្និបាតបូកសរុបការងារប្រចាំឆ្នាំ២០០៧ និងទិសដៅអនុវត្តឆ្នាំ២០០៨ របស់សមាគមនារីកម្ពុជាដើម្បីសន្តិភាព និងអភិវឌ្ឍន៍ បានប្រារព្ធធ្វើឡើងនាថ្ងៃទី១៥ ខែកុម្ភៈ ឆ្នាំ២០០៨ នៅសាលប្រជុំនៃទីស្នាក់ការកណ្ដាល គណបក្សប្រជាជនកម្ពុជា ក្រោមអធិបតីភាពលោកសាយ ឈុំតំណាងរាស្ត្រមណ្ឌលកំពង់ស្ពឺ និងជាប្រធានគណៈប្រចាំការ គណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងលោកជំទាវម៉ែន សំអន ទេសរដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច តំណាងរាស្ត្រ មណ្ឌលស្វាយរៀង និងជាប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍។
គោលបំណងនៃសន្និបាត គឺធ្វើការបូកសរុបលទ្ធផលនៃការបំពេញភារកិច្ចរបស់សមាជិក សមាជិកាសមាគមនារីកម្ពុជាដើម្បីសន្តិភាព និងអភិវឌ្ឍន៍ និងបណ្ដាញស្ត្រីទូទាំងប្រទេស និងធ្វើការវាយតម្លៃលើការរីកចម្រើន និងចំណុចខ្វះចន្លោះដែលមានក្នុងរយៈពេលមួយឆ្នាំកន្លងមក ព្រមទាំងកំណត់ទិសដៅសម្រាប់អនុវត្តការងារឆ្នាំ២០០៨ ដែលផ្ដោតជាសំខាន់ទៅលើសកម្មភាពឈានឆ្ពោះទៅកាន់ការបោះឆ្នោតជ្រើសរើសតំណាងរាស្ត្រក្នុងខែកក្កដា ឆ្នាំ២០០៨ ខាងមុខនេះ។ សន្និបាតដាក់ចេញនូវសេចក្ដីសម្រេចចិត្តមួយដែលប្រកាសជាឱឡារិក គាំទ្របេក្ខភាពសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី សម្រាប់អាណត្តិទី៤នៃរាជរដ្ឋាភិបាល ដោយបានអនុម័តរួចជាស្រេចក្នុងមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជាដែលបានប្រព្រឹត្តទៅកាលពីថ្ងៃទី១២ - ១៣ ខែមករា ឆ្នាំ២០០៨ និងផ្សព្វផ្សាយនូវគោលនយោបាយ១១ខរបស់គណបក្សប្រជាជនកម្ពុជាដែលបានចែងច្បាស់អំពីគោលជំហរទិសដៅ និងយុទ្ធសាស្ត្ររបស់គណបក្សសម្រាប់រដ្ឋាភិបាលក្នុងអាណត្តិទី៤ នៃរដ្ឋសភា និងដើម្បីបន្តអភិវឌ្ឍន៍ប្រទេសជាតិលើគ្រប់វិស័យ ព្រមទាំងកំណត់ទិសដៅភារកិច្ចសម្រាប់សមាជិកសមាគមនារីកម្ពុជាដើម្បីសន្តិភាព និងអភិវឌ្ឍន៍យកទៅអនុវត្តបន្តទៀត។ សមាគមនារីខេត្ត - ក្រុងត្រូវបន្តធ្វើការផ្សព្វផ្សាយសេចក្ដីសម្រេចចិត្តរបស់សន្និបាតនេះឲ្យបានដល់សមាជិក សមាជិកានៅទូទាំងប្រទេសក្នុងឱកាសអបអរសាទរខួបលើកទី៩៨ ទិវាអន្តរជាតិនារី៨មីនា ខាងមុខនេះ។
គណៈអធិបតី ភ្ញៀវកិត្តិយស និងសមាជិក សមាជិកានៃអង្គសន្និបាត មានចំនួនសរុប៧០០នាក់ ដែលមានសមាសភាពជាថ្នាក់ដឹកនាំគណៈកម្មាធិការ គណបក្សប្រជាជនក្រសួង - ស្ថាប័ន និងភរិយា គណៈកម្មាធិការកណ្ដាល និងថ្នាក់ខេត្ត - ក្រុងរបស់សមាគមនារីកម្ពុជាដើម្បីសន្តិភាព និងអភិវឌ្ឍន៍នារីមេឃុំ ចៅសង្កាត់ និងជំទប់ទី១ទូទាំងប្រទេស ភរិយាអភិបាល ឬអភិបាលរងខេត្ត - ក្រុង លោកជំទាវឧកញ៉ា អាជីវករ ពាណិជ្ជករតំណាងកម្មការិនី សហជីព និងសិស្សនិស្សិត៕