១ សេចក្តីផ្តើម
កម្មវិធីស្រ្តី (Women Empowerment for Social Change) របស់អង្គការវិទ្យាស្ថានបើកទូលាយ ត្រូវបានផ្តួចផ្តើមឡើងនាឆ្នាំ២០០៦ ។ បច្ចុប្បន្នកម្មវិធីនេះមានសកម្មភាពធំៗ ចំនួនបីគឺ ៖
- វិបផតថលស្តីអំពីស្ត្រី http://women.open.org.kh (កិច្ចប្រជុំនៃវេទិកាស្ត្រី កិច្ចប្រជុំនៃក្រុមទីប្រឹក្សាសរសេរបទវិចារណកថា)
- ការកសាងសមត្ថភាព ផ្នែកបច្ចេកវិទ្យា គមនាគមន៍ ព័ត៌មានវិទ្យា
- ការស្ទង់មតិអំពី យេនឌ័រ និងបច្ចេកវិទ្យា គមនាគមន៍ ព័ត៌មានវិទ្យា
២ គោលគំនិតយុទ្ធសាស្រ្តនៃគម្រោងស្ត្រី
២.១ ទស្សនៈវិស័យ
ឆ្ពោះទៅកាន់សង្គមមួយដែលអ្នកចូលរួម និងសកម្មជនស្រ្តី នឹងអាចមានឱកាសធ្វើអោយមានការផ្លាស់ប្តូរ នៅក្នុងការអភិវឌ្ឍន៍សង្គម តាមរយៈការទទួល និងចូលទៅកាន់ ការប្រើប្រាស់ព័ត៌មាន មានភាពជឿជាក់ក្នុងការបញ្ចេញមតិយោបល់ និងមានចំណេះដឹងក្នុងការប្រើប្រាស់បច្ចេកវិទ្យាព័ត៌មាន ដើម្បីបង្កើនសមត្ថភាពការងារ និងចែករំលែកចំណេះដឹង និងបទពិសោធន៍ទាំងនេះ ទៅអោយស្រ្តីផ្សេងទៀត ។
២.២ បេសកកម្ម
កម្មវិធីស្រ្តីមានបេសកកម្ម ផ្តល់ជូននូវព័ត៌មាន និងសំរបសំរួលការពិភាក្សាអំពីស្រ្តី អំពីការយល់ដឹងពីសិទិ្ធរបស់ស្រ្តី តាមរយៈការប្រើប្រាស់ជាយុទ្ធសាស្រ្ត នូវបច្ចេកវិទ្យា គមនាគមន៍និងព័ត៌មានវិទ្យា ។ កម្មវិធីនេះក៏ផ្តល់ជូនផងដែរ នូវមធ្យោបាយនានា សំរាប់ប្រើប្រាស់ ក្នុងការទំនាក់ទំនង និងវគ្គបណ្តុះបណ្តាល ដើម្បីគាំទ្រកិច្ចប្រឹងប្រែងរបស់អង្គការនិងបណ្តាញស្រ្តី ដើម្បីអង្គការនិងបណ្តាញស្រ្តីទាំងនោះមានសមត្ថភាព ជួយទៅកាន់ស្រ្តីឯទៀត តាមរយៈបច្ចេកវិទ្យាគមនាគមន៍ និងព័ត៌មានវិទ្យា ។
២.៣ គោលបំណង
កម្មវិធីនេះមានគោលបំណងលើកកំពស់ ការចូលរួមដោយសមភាពរវាងស្រ្តីនិងបុរស ក្នុងការអភិវឌ្ឍន៍សង្គម ដែលនៅក្នុងនោះស្រ្តីអាចអនុវត្តសិទិ្ធរបស់ខ្លួន ដោយមានតុល្យភាព និងអាចកសាង សមត្ថភាពដើម្បីក្លាយជាអ្នកមានភាពម្ចាស់ការ និងបង្កើនការចូលរួមរបស់ស្រ្តី ក្នុងសកម្មភាពសង្គម សេដ្ឋកិច្ចនិងគោលនយោបាយ ។
៣. គោលគំនិតយុទ្ធសាស្រ្តរបស់វិបផតថលស្តីអំពីស្ត្រី
៣.១ គោលបំណង
ជំរុញដល់ការយល់ដឹង អំពីសមភាពយេនឌ័រ និងការផ្តល់អំណាចដល់ស្ត្រី តាមរយៈការបង្កើតឲ្យមាន ឧបករណ៏សម្រាប់ការផ្សព្វផ្សាយព័ត៌មាន ជាភាសាខ្មែរ និងសម្រាប់ការប្រាស្រ័យទាក់ទង ក្នុងចំណោមសកម្មជន ដែលធ្វើការងារអំពីស្ត្រី ។ ព័ត៌មានផ្សព្វផ្សាយនៅលើវិបផតថល រួមមានអំពីច្បាប់នានា អំពីសិទ្ធិក្នុងការចូលទៅកាន់ព័ត៌មាន សិទ្ធិក្នុងការបញ្ចេញមតិយោបល់ អំពីកង្វល់នានារបស់ស្ត្រី អំពីគំនិតផ្តួចផ្តើម ការចូលទៅកាន់ប្រព័ន្ធយុត្តិធម៏ និងព័ត៌មានផ្សេងៗឯទៀត ដែលអាចជួយដល់ស្ត្រី ឬស្ថាប័នស្ត្រី ដែលជាអ្នកគាំទ្រដល់សមភាពយេនឌ័រ ។
ជំរុញដល់ការប្រាស្រ័យទាក់ទង តាមរយៈការសម្របសម្រួល និងបំផុសឲ្យមានការពិភាក្សាយ៉ាងផុសផុល តាមរយៈសារអេឡិចត្រូនិច និងដោយផ្ទាល់ រវាងស្ថាប័នធ្វើការងារ អំពីស្ត្រី និងស្ថាប័នពាក់ព័ន្ធ ដើម្បីពង្រីកកិច្ចសហប្រតិបត្តិការ ប្រកបដោយជោគជ័យថែមទៀត និងដើម្បីការចែករំលែកព័ត៌មានទៅវិញទៅមក ។
៣.២ ពាក្យស្លោករបស់វិបផតថលស្តីអំពីស្ត្រី
ជំរុញសមភាពយេនឌ័រក្នុងសង្គមមួយ ដែលស្ត្រីអាចប្រើប្រាស់សិទ្ធិរបស់ខ្លួន មានតុល្យភាព និងអាចកសាងសមត្ថភាព ដើម្បីក្លាយជាអ្នកមានភាពម្ចាស់ការ ។ ពាក្យស្លោកនេះគឺជាគោលបំណងរួមរបស់កម្មវិធីស្ត្រី ។
៤ ក្រុមទីប្រឹក្សាសរសេរបទវិចារណកថា
ក្រុមទីប្រឹក្សាសរសេរបទវិចារណកថា គឺជាក្រុមការងារមួយ ដែលមានសមាជិកមកពីស្ថាប័នផ្សេងៗ ឬជាបុគ្គលម្នាក់ៗ រួមជាមួយនិងសមាជិកនៃក្រុមស្ត្រី របស់អង្គការវិទ្យាស្ថានបើកទូលាយ ។ សមាជិកក្រុមនេះមានចំនួនតិចបំផុត៥នាក់ និងច្រើនបំផុត ១២ នាក់ ។
៤.១ គោលបំណងនៃការបង្កើតក្រុមទីប្រឹក្សាសរសេរបទវិចារណកថា
ប្រមូលផ្តុំមតិយោបល់ ពីអ្នកមានបទពិសោធន៏ខាងនិពន្ធ ការសរសេរអត្ថបទ រួមទាំងការសរសេរបទវិចារណកថា ដែលមកពីមជ្ឈដ្្ឋានខុសៗគ្នា ដោយធ្វើការឆ្លុះបញ្ចាំង អំពីខ្លឹមសារនៃវិបផតថល ជាមួយនិងបញ្ហានានារបស់ស្ត្រីដែលកើតមានក្នុងសង្គម ដើម្បីធ្វើឲ្យវិបផតថលស្ត្រី ឆ្លើយតបទៅនឹងតំរូវការក្រុមគោលដៅ ជាកញ្ចក់នៃតថភាពសង្គម មានលក្ខណៈវិជ្ជាជីវៈខ្ពស់ មានព័ត៌មានថ្មី ទាន់ពេលវេលា សំបូរបែប ទាក់ទាញ និងឆ្លើយតបទៅនឹងតំរូវការ របស់អ្នកអាន។
៤.២ ភារកិច្ចរបស់ក្រុមទីប្រឹក្សាសរសេរបទវិចារណកថា
ចូលរួមក្នុងកិច្ចប្រជុំរបស់ក្រុមទីប្រឹក្សាសរសេរបទវិចារណកថា ដែលធ្វើឡើងនៅទីស្នាក់ការ របស់អង្គកាវិទ្យាស្ថានបើកទូលាយ ក្នុងសប្ដាហ៍ទី២ រៀងរាល់២ខែម្តង ដើម្បីពិភាក្សាគ្នាលើបញ្ហាដូចខាងក្រោម៖
- ផ្តល់ការណែនាំ តម្រង់ទិស ដល់ការសរសេរបទវិចារណកថា
- ចូលរួមផ្ដល់គំនិតយោបល់ ក៏ដូចជាអនុសាសន៍នានា សម្រាប់អភិវឌ្ឍវិបផតថល ស្ត្រី
- ពិនិត្យឡើងវិញអំពីជ្រុងជ្រោយនានានៃបញ្ហាស្ត្រី
ដើម្បីឲ្យការងារនេះប្រព្រឹត្តទៅដោយរលូន ទាមទារសមាជិក នៃក្រុមទីប្រឹក្សាសរសេរបទវិចារណកថា ប្រតិបត្តិនូវការងារមួយចំនួនដូចមានរៀបរាប់ខាងក្រោម ។ សមាជិកក្រុមអាចធ្វើការនៅកន្លែងណាក៏បាន តែសូមផ្តល់មតិ ឬយោបល់របស់ខ្លួន មកកាន់ក្រុមស្ត្រីនៃអង្គការវិទ្យាស្ថានបើកទូលាយ តាមរយៈសារអេឡិចត្រូនិច ឬតាមរយៈទូរស័ព្ទ ឬតាមរយៈការជួបផ្ទាល់ ។ ការងារទាំងនោះរួមមាន៖
- តាមពេលវាលាសមរម្យមួយ ពិនិត្យនិងសង្កេតមើល ខ្លឹមសារដែលបានដកស្រង់ដាក់បញ្ចូល ទៅក្នុង វិបផតថលស្តីអំពីស្ត្រី ដោយធ្វើការឆ្លុះបញ្ជាំង ថាតើខ្លឹមសារនិងនិងបទវិចារណកថា ដែលបានដាក់បញ្ចូលទាំងនោះ សមស្របទៅតាមគោលគំនិត និងពាក្យស្លោករបស់វិបផតថលដែរឬទេ?
- ផ្តល់យោបល់ អំពីខ្លឹមសារ ក៏ដូចជាការរចនា របស់វិបផតថលស្តីអំពីស្ត្រី ដើម្បីធ្វើឲ្យវិបផតថលមានលក្ខណៈកាន់តែប្រសើរ ពីមួយពេលទៅមួយពេល ។
- ចូលរួមក្នុងការបំភ្លឺ និងឆ្លើយតបទៅនឹងសំនួរផ្សេងៗ របស់អ្នកអាន ទៅលើបទវិចារណកថា
- ផ្ដល់អនុសាសន៍ ដល់ក្រុមស្ត្រី ក្នុងការឆ្លើយតបទៅ កាន់អ្នកអានដែលមានចម្ងល់ សំនួរ ឬសំណូមពរផ្សេងៗ ។
- បំផុសគំនិតនិងបង្កើតប្រធានបទថ្មីៗ សម្រាប់ការពិភាក្សា ក្នុងវេទិកាស្ត្រី និងនៅក្នុងការពិភាក្សា ជាលក្ខណៈអេឡិចត្រូនិចដូចជា បញ្ជីសំបុត្ររួម វេទិកាពិភាក្សា និងកំណត់ហេតុបណ្តាញ ជាដើម ។
៤.៣ តើអ្នកណាខ្លះអាចចូលរួមក្នុងក្រុមនេះបាន?
ជាលក្ខណៈស្ថាប័ន
- អង្គការមិនមែនរដ្ឋាភិបាល ឬស្ថាប័នធ្វើការងារស្រ្តី ដែលធ្វើការងារជំនាញខាងផលិត និងផ្សព្វផ្សាយព័ត៌មាន
- អង្គការមិនមែនរដ្ឋាភិបាល និងស្ថាប័ននានា ធ្វើការងារទាក់ទង ការនិពន្ធ និងការសរសេរបទវិចារណកថា ដូចជាសារព័ត៌មាន ព្រឹតិ្តបត្រព័ត៌មាន ទស្សនាវដ្ដី វិទ្យុទូរទស្សន៍ ព័ត៌មានជាអេឡិចត្រូនិច ។ល។
- អង្គការមិនមែនរដ្ឋាភិបាល ឬស្ថាប័ននានាធ្វើការងារ ទាក់ទងយេនឌ័រ ច្បាប់ សិទ្ធិមនុស្ស ការស្រាវជ្រាវអំពីសង្គម ឬការងារផ្សេងៗដែលអាចពាក់ព័ន្ធជាមួយកម្មវិធីស្រ្តី
- សមាគមអ្នកនិពន្ធ
ជាលក្ខណៈបុគ្គល
- ជាសាស្ត្រាចារ្យឬនិស្សិត ផ្នែកសង្គមវិទ្យា ទស្សនវិទ្យា ច្បាប់ សារព័ត៌មាន ប្រវត្តិសាស្រ្តមនុស្សជាតិ និងវប្បធម៌ ព័ត៌មានវិទ្យា
- អ្នកជំនាញយេនឌ័រ
៤.៤ លក្ខណៈវិនិច្ឆ័យ
សមាជិកក្រុមទីប្រឹក្សាសរសេរបទវិចារណកថា ត្រូវមានលក្ខណៈសម្បត្តិ ឆ្លើយតបភាគច្រើនទៅនិងក្ខណៈវិនិច្ឆ័យ ដូចខាងក្រោមនេះ៖
- មានចំណេះដឹង បទពិសោធន៏និងជំនាញ ក្នុងការសរសេរ ដូចជា៖ បទវិចារណកថា អត្ថបទព័ត៌មាន បទអត្ថាធិប្បាយ បទយកការណ៏ និពន្ធរឿង ។ល។ យ៉ាងតិចមួយឆ្នាំ ។
- មានបទពិសោធន៍ ឬចំណេះដឹង អំពីការងារនិងបញ្ហានានារបស់ស្ត្រី ឬយេនឌ័រ ឬច្បាប់ ឬវិទ្យាសាស្ត្រសង្គម ឬការសិក្សាស្រាវជ្រាវទាក់ទងអំពីស្ត្រី
- មានសមត្ថភាពក្នុងការវិនិច្ឆ័យ និងធ្វើការវិភាគបានល្អ ទៅលើបញ្ហា នានារបស់កម្មវិធីស្ត្រី និងគោរពក្រមសីលធម៌វិជ្ជាជីវៈសារព័ត៌មាន
- មានសុឆន្ទៈចូលរួមពិភាក្សា បញ្ចេញមតិយោបល់ និងផ្តល់អនុសាសន៍ ប្រកបដោយលក្ខណៈសមហេតុផល ព្រមទាំងស្រឡាញ់ការអាន និងការសរសេរ
- មានជំនាញល្អ ក្នុងការប្រាស្រ័យទាក់ទង ដោយផ្ទាល់ និងការប្រាស្រ័យទាក់ទងតាមលក្ខណៈអេឡិចត្រូនិក
- ចេះប្រើប្រាស់កុំព្យូទ័រ កម្មវិធីការិយាល័យ សារអេឡិចត្រូនិក ស្វែងរកព័ត៌មានលើ អ៊ីនធឺណិត ការបញ្ចូលព័ត៌មានជាលក្ខណៈអេឡិចត្រូនិក
- មានចំណេះដឹងទូលាយ ផ្នែកសង្គម នយោបាយ វប្បធម៌ សេដ្ឋកិច្ច និងអំពីអត្ថប្រយោជន៍ នៃការប្រើប្រាស់ បច្ចេកវិទ្យាព័ត៌មាន ក្នុងការអភិវឌ្ឍន៍សង្គម
- អាចប្រើប្រាស់ភាសាខ្មែរ និងអង់គ្លេស បានល្អ សំរាប់ការអាន សរសេរនិងនិយាយ
៤.៥ លក្ខខណ្ឌការងារ ការចូលរួមចំណែកនិងផលប្រយោជន៏
លក្ខខណ្ឌការងារ
ក្រុមទីប្រឹក្សាសរសេរបទវិចារណកថា គឺជាក្រុមធ្វើការដោយស្មគ្រចិត្ត មានលក្ខណៈសេរី និងមិនមានប្រាក់បៀរវត្សរ៏ឡើយ ។ លើកលែងតែការមកប្រជុំដោយជួបជុំគ្នាផ្ទាល់ សមាជិករបស់ក្រុម នឹងមិនតម្រូវឲ្យមកធ្វើការជាប្រចាំ នៅទីស្នាក់ការអង្គវិទ្យាស្ថានបើកទូលាយទេ តែសមាជិកអាចធ្វើការពីទីស្នាក់ការផ្ទាល់របស់គេ ឬទីកន្លែងដែលគេកំណត់ ។
ការមកប្រជុំដោយជួបគ្នាផ្ទាល់ នឹងមានរយៈពេល មិនលើសពី ២ម៉ោងឡើយ ក្នុងមួយលើកៗ។
ការចូលរួមចំណែកនិងផលប្រយោជន៍
- ចូលរួមចំណែក ក្នុងការសិក្សានិងវិភាគ អំពីបញ្ហាយេនឌ័រ និងការប្រើប្រាស់ បច្ចេកវិទ្យា ។
- ចូលរួមចំណែក ក្នុងការផ្លាស់ប្តូរសង្គម និងការអភិវឌ្ឍន៏ តាមរយៈការសរសេរ និងការបញ្ចេញមតិយោបល់
- ចែករំលែកចំណេះដឹង និងពង្រឹងសមត្ថភាព ជាមួយសមាជិកក្នុងក្រុម ខាងផ្នែកនិពន្ធ និងសារព័ត៌មាន
- ឈ្មោះរបស់សមាជិក ក្រុមទីប្រឹក្សាសរសេរបទវិចារណកថា នឹងត្រូវបានផ្សព្វផ្សាយ នៅលើវិបផតថលស្តីអំពីស្ត្រី
- ទទួលបាននូវចំណេះដឹងថ្មីៗ និងពង្រឹងសមត្ថភាព អំពីការប្រើប្រាស់បច្ចេកវិទ្យា អំពីកម្មវិធីស្ត្រី
៤.៦ រយៈពេលនៃសមាជិកភាព
ជាលក្ខណៈរួម ១វដ្តនៃក្រុមទីប្រឹក្សាសរសេរបទវិចារណកថា គឺមានរយៈពេល១ឆ្នាំ ដែលរយៈពេលនេះ អាចមានការប្រែប្រួល និងបត់បែនទៅតាម វដ្តនៃរយៈពេលគម្រោង របស់កម្មវិធីស្រ្តី ។
៤.៧ តើធ្វើយ៉ាងណាអាចចូលរួមក្នុងក្រុមនេះបាន?
ប្រសិនបើលោកស្រី លោក អ្នកនាង កញ្ញា មានការចាប់អារម្មណ៏ ក្នុងការចូលរួមជាមួយក្រុមទីប្រឹក្សាសរសេរបទវិចារណកថា សូមអនុវត្តន៍ នូវចំនុចដូចខាងក្រោម៖
- សិក្សាអំពីកម្មវិធីស្ត្រី របស់អង្គការវិទ្យាស្ថានបើកទូលាយ តាមរយៈអាសយដ្ឋានតំបន់បណ្តាញនេះ http://women.open.org.kh/km/about
- បំពេញបែបបទ ដូចដែលជូនភ្ជាប់មកជាមួយនៅផ្នែកឯកសារភ្ជាប់ ស្ថិតនៅផ្នែកខាងក្រោមនៃអត្ថបទនេះ
- ប្រវត្តិរូបសង្ខេបរបស់លោកអ្នកដែលមានព័ត៌មានថ្មីបំផុត
សូមផ្ញើសំណុំឯកសារ ដែលមានបែបបទ និងប្រវត្តិរូបសង្ខេប មកកាន់ក្រុមការងារស្ត្រី នៃអង្គការវិទ្យាស្ថានបើកទូលាយ ដែលមានអាសយដ្ឋានទំនាក់ទំនង៖
ផ្ទះលេខ ១៩ ផ្លូវលេខ ៣៧៤
សង្កាត់ទួលស្វាយព្រៃ ១ ខ័ណ្ឌចំការមន (ទល់មុខសាលាសង្កាត់ ទួលស្វាយព្រៃ ១)
ទូរស័ព្វលេខ ០២៣ ២២៤ ៨២១
សារអេឡិចត្រូនិក women[@]open.org.kh
| ឯកសារភ្ជាប់ | ទំហំ |
|---|---|
| editorial_form_v5_131207-251207.pdf | 62.5 គីឡូបៃ |
| editorial_concept-selectioncritier_pmdmd_v5_131207-251207.pdf | 140.7 គីឡូបៃ |