ភ្នំពេញ ៖ ស្ត្រីចំណាស់ម្នាក់ខណៈពេលកំពុងរៀបតុបតែងខ្លួនលាបក្រែមថែមម្សៅឲ្យជនរងគ្រោះ ត្រូវប្រជាពលរដ្ឋនាំគ្នាឃាត់ខ្លួនប្រគល់ឲ្យសមត្ថកិច្ចធ្វើការស៊ើបអង្កេត។
ហេតុការណ៍នេះកើតឡើងកាលពីវេលាម៉ោង ១០ព្រឹក ថ្ងៃទី ១៩ ខែ មិថុនា ឆ្នាំ ២០០៨ នៅចំណុចសហគមន៍ ភូមិដើមអំពិល សង្កាត់ច្បារអំពៅទី១ ខណ្ឌមានជ័យ រាជធានីភ្នំពេញ។
ជនសង្ស័យដែលត្រូវឃាត់ខ្លួនមានឈ្មោះ អ៊ន ប្រសើ ភេទ ស្រី អាយុ ៥៣ឆ្នាំ នៅភូមិប្រធាតុ ឃុំព្រែកស្ដី ស្រុកកោះធំ ខេត្តកណ្ដាល។
ជនរងគ្រោះមានឈ្មោះ ហេង ស្រស់ ភេទ ស្រី អាយុ១៤ឆ្នាំ រស់នៅជាមួយជីដូនចាស់ជរាក្នុងភូមិព្រែកកុក ឃុំព្រែកស្ដី ស្រុកកោះធំ ខេត្តកណ្ដាល។
បើតាមក្មេងស្រីរងគ្រោះនិយាយ ស្ត្រីចំណាស់រូបនេះបាននាំខ្លួនមកភ្នំពេញដោយអះអាងថា មកលក់នំបញ្ចុកនៅភោជនីយដ្ឋានផ្ទះសំណាក់ខារ៉ាអូខេកូប្រា២ ដែលមានទីតាំងនៅឃុំវាលស្បូវ ស្រុកកៀនស្វាយ ខេត្តកណ្ដាល។
ប៉ុន្តែនៅពេលមកដល់សហគមន៍ភូមិដើមអំពិល ដែលមានផ្ទះស្គាល់គ្នានៅទីនោះ ជនសង្ស័យបានរៀបចំតុបតែងខ្លួនប្រាណឲ្យក្មេងស្រីរងគ្រោះដូចជាលាបក្រែម លាបម្សៅ ធ្វើយ៉ាងណាឲ្យស្អាតបានត្រឹមត្រូវដែលគេតែងពោលថា "ក្ដាមស្រែ" ចូលក្រុង។
ប្រភពនេះបន្តថា នៅពេលនោះក្មេងស្រីរងគ្រោះចេះតែប្រកែកយំថាមិនព្រមទៅជាមួយនោះទេ។ នៅពេលឃើញសភាពបែបនេះអ្នកជិតខាងមានការសង្ស័យក៏នាំគ្នាសួរនាំតែស្ត្រីរូបនោះដោយមានការភ័យខ្លាច បានរត់គេចចេញពីការចោមរោមសួរ ប៉ុន្តែមិនអាចរត់ទៅណាបានឡើយ ព្រោះប្រជាពលរដ្ឋនៅក្នុងសហគមន៍នាំគ្នាឃាត់ខ្លួនប្រគល់ឲ្យសមត្ថកិច្ចចាត់ការបន្ត។ បន្ទាប់ពីសមត្ថកិច្ចធ្វើការសួរនាំយ៉ាងល្អិតល្អន់ជនសង្ស័យបានសារភាពថា កាលពីថ្ងៃទី ១៧ ខែ មិថុនា ខ្លួនបានទៅកាន់ភោជនីយដ្ឋានកូប្រា២ ហើយនិយាយរាយរាប់ថា មានគេចង់បានក្មេងស្រីស្រស់ស្អាតម្នាក់ហើយពេលនោះគាត់បានទទួលលុយពីគេចំនួន២០ដុល្លារ ដោយសន្យាថានាំយកក្មេងស្រីមកឲ្យ។
រហូតមកដល់ថ្ងៃកើតហេតុនេះដោយសារល្បិចលួងលោមយ៉ាងប៉ិនប្រសប់របស់ស្ត្រីរូបនេះ ធ្វើឲ្យក្មេងស្រីរងគ្រោះយល់ព្រមមកតាម ព្រោះឮថាមកលក់នំបញ្ចុកនៅទីនោះ។ ប៉ុន្តែនៅពេលមកដល់ស្ត្រីចំណាស់នេះមិនទាន់យកទៅកូប្រាភ្លាមៗទេ ពោលគឺគាត់រៀបចំធ្វើខ្លួនឲ្យស្អាតសិន ក្រោយពីធ្វើខ្លួនស្អាតហើយ គាត់បម្រុងនាំក្មេងស្រីនេះទៅកូប្រា២ ប៉ុន្តែដោយសារមានស្ត្រីម្នាក់ ឈ្មោះ ធារី អាយុ ៣៨ឆ្នាំ ស្គាល់ក្មេងស្រីរងគ្រោះ កើតការសួរនាំក៏បែករឿងទើបគេធ្វើឃាត់ខ្លួនប្រគល់ឲ្យសមត្ថកិច្ចតែម្ដង។
បច្ចុប្បន្នសមត្ថកិច្ចកំពុងកសាងឯកសារបញ្ជូនទៅតុលាការ ដើម្បីចាត់ការតាមច្បាប់៕