រាជធានីភ្នំពេញ ថ្ងៃទី៨ សីហា ២០០៨ ៖ ក្នុងការប្ដេជ្ញាចិត្តរបស់សង្គមកុំព្យូទ័រកម្ពុជា នាំវិបុលភាពដល់កម្ពុជាតាមរយៈគមនាគមន៍ ព័ត៌មានវិទ្យា សហការជាមួយសមាគមបច្ចេកវិទ្យា គមនាគមន៍ ព័ត៌មានវិទ្យាកម្ពុជា ឧបត្ថម្ភដោយក្រុមហ៊ុនកេនតិចណូឡូជី និងវិទ្យាស្ថានអ៊ុង បានរៀបចំវេទិកាស្ដីពី "បច្ចេកវិទ្យា គមនាគមន៍ ព័ត៌មានវិទ្យា ជាការដ្ឋាននៃកំណើន និងកំណែទំរង់វិស័យសាធារណៈ" ដែលប្រព្រឹត្តទៅនៅថ្ងៃទី៨ ខែសីហា ឆ្នាំ២០០៨ វេលាម៉ោង១និង៣០នាទី រហូតដល់ម៉ោង៥និង៣០នាទីល្ងាច នៅបន្ទប់ Exchange Program នៃមជ្ឈមណ្ឌលសហប្រតិបត្តិការកម្ពុជា - ជប៉ុន (CJCC) ស្ថិតនៅក្នុងសាកលវិទ្យាល័យភូមិន្ទភ្នំពេញ។ វេទិកាប្រព្រឹត្តទៅក្រោមអធិបតីភាពលោក កេន ចាន់ថន ប្រធានស្ថាបនិកសង្គមកុំព្យូទ័រកម្ពុជា និងជាប្រធានស្ដីទីសមាគមបច្ចេកវិទ្យា គមនាគមន៍ ព័ត៌មានវិទ្យាកម្ពុជា។
លោក កេន ចាន់ថន បានមានប្រសាសន៍ថា "សព្វថ្ងៃនេះមានភស្តុតាងកាន់តែច្រើនឡើងដែលបានបង្ហាញពីតួនាទីគន្លឹះរបស់បច្ចេកវិទ្យា គមនាគមន៍ ព័ត៌មានវិទ្យា (ICT) ជាការដ្ឋាននៃកំណើន និងកំណែទំរង់វិស័យសាធារណៈ តាមរយៈការបង្កើតចំណូល និងការងារ ការជំរុញផលិតភាព និងការប្រកួតប្រជែងនៃធុរកិច្ច និងការលើកកំពស់អភិបាលកិច្ចល្អ គណនេយ្យភាព និងតម្លាភាពក្នុងវិស័យសាធារណៈ"។ វេទិកាពិភាក្សាផ្ដោតលើប្រធានបទ : ១- ប្រភពកំណើនប្រកបដោយចីរភាពជាសាកល (Global Sourcing of Services for Achieving Sustainable & Inclusive Growth) ២- ការអភិវឌ្ឍន៍វិស័យឧស្សាហកម្មព័ត៌មានវិទ្យា/សេវាដែលទាក់ទងនឹងព័ត៌មានវិទ្យា (IT/ITES Industry Development) ៣- ស្ថាបត្យកម្មសហគ្រាសនៃរដ្ឋាភិបាលជាការដ្ឋាននៃកំណើន (Government Eterprise Architecture as Enabler of Public Sector Reform) និង ៤- កម្មវិធីព័ត៌មានវិទ្យាសំរាប់វិស័យសាធារណៈ (ICT Applications for the Public Sector)។
អនុសាសន៍ពីកិច្ចពិភាក្សា នឹងជាធាតុចូលសំរាប់របាយការណ៍ប្រភពនៃកំណើន (Source of Growth Report) ដែលរៀបចំសំរាប់វេទិកាសហប្រតិបត្តិការអភិវឌ្ឍន៍កម្ពុជា លើកទី២ (Second Cambodia Development Cooperation Forum) គ្រោងនឹងរៀបចំនៅចុងឆ្នាំ២០០៨ ខាងមុខ។
សង្គមកុំព្យូទ័រកម្ពុជា (សកក) : ជាអង្គភាពមិនស្វែងរកប្រាក់ចំណេញ មានទស្សនៈវិស័យ នាំវិបុលភាពដល់ប្រទេសកម្ពុជាតាមរយៈបច្ចេកវិទ្យាគមនាគមន៍ព័ត៌មានវិទ្យា។ សកក មានកម្មវិធីសំខាន់ៗចំនួន៦ : (១)- ការពិគ្រោះយោបល់លើគោលនយោបាយបច្ចេកវិទ្យា គមនាគមន៍ ព័ត៌មានវិទ្យា (២)- អភិវឌ្ឍន៍ធនធានមនុស្សផ្នែកបច្ចេកវិទ្យា គមនាគមន៍ព័ត៌មានវិទ្យា (៣)- បច្ចេកវិទ្យា គមនាគមន៍ព័ត៌មានវិទ្យាសំរាប់ទាំងអស់គ្នា (៤)- ការជំរុញបច្ចេកវិទ្យា គមនាគមន៍ព័ត៌មានវិទ្យាក្នុងអាជីវកម្ម (៥)-ការអភិវឌ្ឍន៍មាតិកា និងការគ្រប់គ្រងចំណេះដឹង (៦)- គំនិតផ្ដួចផ្ដើមអំពី e-Cambodia។ ព័ត៌មានបន្ថែម www.ccs.org.kh ។ សមាគមបច្ចេកវិទ្យា គមនាគមន៍ ព័ត៌មានវិទ្យាកម្ពុជា (សបគពក) : សមាគមនសមាជិកភាព នៃអង្គភាពអាជីវកម្មវិស័យ បច្ចេកវិទ្យា គមនាគមន៍ ព័ត៌មានវិទ្យានៅកម្ពុជា មានសមាជិកជាក្រុមហ៊ុន អង្គការ ផ្នែកបច្ចេកវិទ្យា គមនាគមន៍ ព័ត៌មានវិទ្យា និងទូរគមនាគមន៍។ សមាគម មានទស្សនៈ វិស័យ : កម្ពុជាដែលមានការអភិវឌ្ឍន៍ ឧស្សាហកម្មបច្ចេកវិទ្យា គមនាគមន៍ ព័ត៌មានវិទ្យាប្រកបដោយចីរភាព។ ព័ត៌មានបន្ថែម www.ictcam.org.kh ៕