អាជ្ញាធរស្រុកក្នុងខេត្តព្រៃវែង បានចាត់វិធានការ ការពារ និងទប់ស្កាត់ជំងឺរាករូស និងក្អួតចង្អោរ បន្ទាប់ពីអ្នកភូមិ៦នាក់ ក្នុងឃុំរក្សជ័យ ស្រុកបាភ្នំ បានកើតជំងឺនេះជាបន្តបន្ទាប់រួចមក។
លោក អ៊ុក ស៊ុនដេត អនុប្រធានស្រុកប្រតិបត្តិអ្នកលឿង ប្រាប់កាសែតភ្នំពេញប៉ុស្ដិ៍ កាលពីថ្ងៃព្រហស្បតិ៍ថា ក្រុមការងាររបស់លោកដែលមកពីខេត្ត ស្រុក និងអាជ្ញាធរភូមិជុំ បានចុះទៅស្រាវជ្រាវ និងព្យាបាលអ្នកជំងឺ ក្នុងឃុំរក្សជ័យដែលកំពុងតែរាករូស និងក្អួត។
លោកថ្លែងថា "ជំហានដំបូងយើងស្រាវជ្រាវរកមូលហេតុ ដែលបង្កជំងឺ និងព្យាបាលពួកគេ ដោយយើងមានផ្ដល់ជាថ្នាំអូរ៉ាលីត្រ និងថ្នាំរាកដល់អ្នកភូមិ"។ វិធានការរបស់អាជ្ញាធរនេះ ធ្វើឡើងបន្ទាប់ពីអ្នកភូមិចំនួន ៦នាក់ក្នុងភូមិចំនួន៣ គឺភូមិតាអួក ភូមិជ្រួលធំ និងភូមិថ្មីក្រៅ កំពុងកើតជំងឺរាករូស និងក្អួតចង្អោរ តាំងពីថ្ងៃទី០១ ខែកុម្ភៈ កន្លងទៅដែលអាជ្ញា និងអ្នកភូមិព្រួយបារម្ភថា អាចជាជំងឺអាសន្នរោគ ព្រោះកន្លងមកមានអ្នកភូមិចំនួន៣៤នាក់ ក្នុងឃុំធាយជាប់គ្នានឹងឃុំរក្សជ័យ បានកើតជំងឺរាករូស និងក្អួត ហើយត្រូវគ្រូពេទ្យជំនាញអះអាងថា ជាជំងឺអាសន្នរោគ។ តែអ្នកជំងឺក្នុងឃុំធាយនោះត្រូវបានសះស្បើយវិញ បន្ទាប់ពីមានការអន្តរាគមន៍ទាន់ពេលវេលាពីគ្រូពេទ្យបង្អែកស្រុក និងខេត្ត។
លោក ហុង សុផល មេឃុំរក្សជ័យ ក្នុងស្រុកបាភ្នំ បានឲ្យដឹងថា អ្នកជំងឺទាំង៦នាក់នោះ នៅមិនទាន់ជាសះស្បើយនៅឡើយទេ ហើយក្នុងនោះមាន២នាក់ មានអាការធ្ងន់ធ្ងរម្នាក់ឈ្មោះ ខួន អួន ភេទស្រី អាយុ៦២ឆ្នាំ កំពុងសំរាកព្យាបាលនៅផ្ទះ ក្នុងភូមិថ្មីក្រៅ និងម្នាក់ទៀតឈ្មោះស្វាយរ៉ុយ អាយុ៥០ឆ្នាំ ត្រូវបានបញ្ជូន មកព្យាបាលនៅមន្ទីរពេទ្យកាល់ម៉ែត។ លោកបញ្ជាក់ទៀតថា លោកបានអញ្ជើញមេភូមិទាំង១២ភូមិ មកប្រជុំជាបន្ទាន់ ដើម្បីជំរុញឲ្យពួកគាត់ ជួយផ្សព្វផ្សាយ និងអប់រំដល់អ្នកភូមិឲ្យចេះរក្សាអនាម័យចំណីអាហារឲ្យបានត្រឹមត្រូវ។
អ្នកស្រី ស្រ៊ុន វ៉ាន់ថុន កូនស្រី លោកស្វាយ រ៉ុយ ដែលបញ្ជូនមកសម្រាកព្យាបាល នៅមន្ទីរពេទ្យកាល់ម៉ែត្រ បានឲ្យដឹងកាលពីថ្ងៃព្រហស្បតិ៍ថា ឪពុករបស់អ្នកស្រី នៅមិនទាន់បានធូរស្រាល នៅឡើយទេ ហើយគ្រូពេទ្យ បានបន្តដាក់សៀរ៉ូមអស់ជិត១៥០ផ្លោកហើយ។ អ្នកស្រីថ្លែងទៀតថា "គាត់រាកហូរដូចទឹក ហូបមិនបាន និយាយខ្សាវៗ។ ពេទ្យមិនប្រាប់ថា គាត់មានជំងឺអីទេ តែបាននាំគ្នាសម្រុក មកមើលគាត់ច្រើនណាស់ ដូចជាសង្ស័យថា គាត់មានជំងឺអ្វីចម្លែកអ៊ីចឹង"។
លោក លី សុវណ្ណ អនុប្រធាននាយកដ្ឋានប្រយុទ្ធប្រឆាំងជំងឺឆ្លងនៃក្រសួងសុខាភិបាល បានឲ្យដឹងថា លោកបានបញ្ជូនមន្ត្រីជំនាញចុះទៅស្រាវជ្រាវ និងព្យាបាលអ្នកជំងឺនៅក្នុងឃុំរក្សជ័យនោះហើយ។ លោកបញ្ជាក់ថា ក្រុមការងាររបស់លោក បានយកកំហាកអ្នកជំងឺមកពិសោធន៍ ហើយទទួលបានលទ្ធផលខ្លះៗហើយ តែលោកបដិសេធមិនទាន់ប្រាប់ពីលទ្ធផលនោះទេដោយអះអាងថា មិនទាន់ពិតប្រាកដ។ លោកបញ្ជាក់ ប្រសិនបើអ្នកភូមិ មានអាការរាករូស ឬក្អួតចង្អោរ ខ្វះជាតិទឹក ពួកគេត្រូវហូបទឹកឲ្យបានច្រើន ជាពិសេសទឹកអូរ៉ាលីត្រ ក្នុងករណីធ្ងន់ធ្ងរ ត្រូវបញ្ជូនទៅពេទ្យ៕
