សហរដ្ឋអាមេរិកបើកសម្ពោធកម្មវិធីបណ្ដុះបណ្ដាលកាលពីថ្ងៃទី៣០ ខែមិថុនា ដែលនឹងបង្ហាញដល់មន្ត្រីក្រសួងយុត្តិធម៌នូវដំណើរការប្រព័ន្ធព័ត៌មានថ្មីដែលបង្កើតឡើងដើម្បីបង្កើននូវសមត្ថភាព តម្លាភាព និងការទទួលខុសត្រូវនៅក្នុងតុលាការ។
សហរដ្ឋអាមេរិកគាំទ្រដល់ប្រព័ន្ធដែលនឹងចាប់ផ្ដើមរៀបចំឡើងឲ្យកាន់តែទំនើបតាមរបៀបដែលក្រសួងទុកដាក់រៀបចំឯកសារការងារតុលាការ។
ប្រព័ន្ធនេះរួមមាន ប្រព័ន្ធគ្រប់គ្រងទិន្នន័យយុត្តិធម៌ ប្រព័ន្ធអ៊ីត្រាណេតសម្រាប់ចែករំលែកព័ត៌មាននៅក្នុងការិយាល័យ និងគេហទំព័រសម្រាប់ផ្សព្វផ្សាយនូវព័ត៌មានក្នុងតុលាការដូចជាចំនួនរឿងក្ដី និងអត្រានៃការជម្រះ។
វគ្គបណ្ដុះបណ្ដាលនេះត្រូវបានគាំទ្រឧបត្ថម្ភដោយសហរដ្ឋអាមេរិកតាមរយៈ ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) វគ្គនេះមានរយៈពេល៤ខែដែលនឹងត្រូវបណ្ដុះបណ្ដាលដល់មន្ត្រីរបស់ក្រសួងពី៧៥-៩០នាក់។ នេះគឺជាវគ្គបណ្ដុះបណ្ដាលព័ត៌មានវិទ្យាដំបូងដល់មន្ត្រីក្រោមឱវាទក្រសួង។
ក្នុងពិធីសម្ពោធនៅឯក្រសួងយុត្តិធម៌កាលពីថ្ងៃទី៣០ ខែមិថុនា ឯកអគ្គរដ្ឋទូតសហរដ្ឋអាមេរិក លោកស្រី Carol A.Rodley រួមជាមួយឯកឧត្ដម អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ជាគណៈធិបតីនៅក្នុងពិធីសម្ពោធវគ្គបណ្ដុះបណ្ដាល និងប្រព័ន្ធព័ត៌មានយុត្តិធម៌ថ្មីដែលមានសក្ដានុពលនេះ។
លោកស្រីឯកអគ្គរដ្ឋទូត Rodley បានមានប្រសាសន៍ថា «ខ្ញុំមានភាពរំភើបណាស់ចំពោះសក្ដានុពលនៃប្រព័ន្ធទាំងនេះក្នុងការពង្រឹងផ្នែកជាច្រើននៃកំណែទម្រង់ច្បាប់ និងប្រព័ន្ធយុត្តិធម៌»។ លោកស្រីបានបន្តទៀតថា «ក្រសួងនឹងមានលទ្ធភាពកាន់តែលឿន និងសុក្រឹតក្នុងការកំណត់ឲ្យច្បាស់ថា ផ្នែកណានៃណានៃកំណែទម្រង់ប្រព័ន្ធយុត្តិធម៌ កំពុងទទួលជោគជ័យ ហើយផ្នែកណាដែលត្រូវផ្ដោតការយកចិត្តទុកដាក់ជាងមុន»។
ដូចដែលក្រសួងយុត្តិធម៌ រួមជាមួយមេធាវី និងចៅក្រមទាំងអស់ទូទាំងប្រទេសរួមគ្នាធ្វើទំនើបកម្មប្រព័ន្ធយុត្តិធម៌ ប្រជាពលរដ្ឋកម្ពុជាកាន់តែច្រើនឡើងនឹងបែរមកជឿជាក់លើតុលាការដើម្បីដោះស្រាយនូវជម្លោះរបស់ពួកគេ។
ជាលទ្ធផលចំនួនសំណុំរឿងបណ្ដឹង និងភាពស្មុគស្មាញរបស់ក្រសួងណឹងកើនឡើង ហើយបញ្ហានឹងត្រូវបានដោះស្រាយដោយប្រព័ន្ធថ្មីនេះ។
សហរដ្ឋអាមេរិកប្ដេជ្ញាធ្វើការងារជាមួយក្រសួងយុត្តិធម៌ និងដៃគូកម្ពុជាក្នុងការអភិវឌ្ឍន៍ប្រព័ន្ធយុត្តិធម៌មួយដែលមានប្រសិទ្ធភាព យុត្តិធម៌ និងឯករាជ្យ។
ជាចុងក្រោយ USAID បានផ្ដល់ថវិកាប្រហែលជា២លានដុល្លារនៅក្នុងឆ្នាំនេះ ដើម្បីពង្រឹងនូវប្រព័ន្ធច្បាប់នៅកម្ពុជា ដោយបណ្ដុះបណ្ដាលចៅក្រម និងមេធាវី និងផ្ដល់ឲ្យសាធារណៈអាចទទួលបាននូវព័ត៌មានអំពីតុលាការ៕
