ក្រុមប្រឹក្សាជាតិកម្ពុជាដើម្បីស្ត្រីក្នុងកិច្ចប្រជុំក្រោមអធិបតីភាពសម្តេចតេជោហ៊ុន សែន (រូបថត ច័ន្ទថា)រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា និងជាអនុប្រធានកិត្តិយសនៃក្រុមប្រឹក្សាជាតិកម្ពុជាដើម្បីស្ត្រី នៅព្រឹកថ្ងៃទី១៩ ខែកុម្ភៈ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកកិច្ចប្រជុំបូកសរុបការងារក្រុមប្រឹក្សាជាតិកម្ពុជាដើម្បីស្ត្រីប្រចាំឆ្នាំ២០០៧ និងលើកទិសដៅសកម្មភាពការងារឆ្នាំ២០០៨ នៅទីស្ដីការបណ្ដោះអាសន្ននៃគណៈរដ្ឋមន្ត្រី ។
សុន្ទរកថារបស់លោកជំទាវ អ៊ឹង កន្ថាផាវី ប្រធានក្រុមប្រឹក្សាជាតិកម្ពុជាដើម្បីស្ត្រី បានឲ្យដឹងថា ឆ្នាំ២០០៧ កន្លងទៅក្រសួង ស្ថាប័ន និងខេត្ត - ក្រុងមួយចំនួន ដែលបានបើកសិក្ខាសាលារួចបានសហការជាមួយក្រុមប្រឹក្សាជាតិកម្ពុជាដើម្បីស្ត្រី អនុវត្តតាមអនុសាសន៍របស់សម្ដេចនាយករដ្ឋមន្ត្រីយ៉ាងសកម្ម ។ សកម្មភាពការងាររបស់ក្រុមប្រឹក្សាជាតិកម្ពុជាដើម្បីស្ត្រីសង្កត់ធ្ងន់លើការងារផ្សព្វផ្សាយខ្លឹមសារអនុសញ្ញា CEDAW និងយោបល់សន្និដ្ឋាន៤២ ចំណុចរបស់គណៈកម្មាធិការទទួលបន្ទុក CEDAW នៅអង្គការសហប្រជាជាតិ នៅថ្នាក់ជាតិបានចប់ជាស្ថាពរចំនួន២៥ក្រសួង ស្ថាប័ន និងថ្នាក់ខេត្ត - ក្រុងចំនួន១៥ ព្រមទាំងមានការយកចិត្តទុកដាក់ចូលរួមយ៉ាងសកម្មពីថ្នាក់ដឹកនាំក្រសួង ស្ថាប័ន និងសមាជិក - សមាជិកាក្រុមប្រឹក្សាជាតិកម្ពុជាដើម្បីស្ត្រី ។ ជាងនេះទៅទៀតលោក លោកស្រី ដែលជាសមាជិក សមាជិកាក.ជ.ក.ស បានចូលរួមដឹកនាំគណៈប្រតិភូចុះទៅផ្សព្វផ្សាយអនុសញ្ញា CEDAW និង យោបល់សន្និដ្ឋាន៤២ ចំណុចនៅខេត្ត - ក្រុង ។
លោកជំទាវអ៊ឹង កន្ថាផាវី បញ្ជាក់ថា ការងារចុះផ្សព្វផ្សាយយ៉ាងផុលផុសបានឆ្លុះបញ្ចាំងពីសកម្មភាពគ្រប់រូបភាព នៃប្រព័ន្ធផ្សព្វផ្សាយធ្វើឲ្យមជ្ឈដ្ឋានជាតិ និងអន្តរជាតិយកចិត្តទុកដាក់យ៉ាងខ្លាំង និងកាន់តែទទួលស្គាល់ការងាររបស់ក្រុមប្រឹក្សាជាតិកម្ពុជាដើម្បីស្ត្រី (ក.ជ.ក.ស) ព្រមទាំងចូលរួមចំណែកយ៉ាងខ្លាំងក្លាថែមទៀត ។ ទាក់ទិន នឹងទិសដៅសកម្មភាពការងារឆ្នាំ២០០៨លោកស្រីអ៊ឹង កន្ថាផាវី មានប្រសាសន៍ថាការរៀបចំរចនាសម្ព័ន្ធ ការត្រៀមសរសេររបាយការណ៍ជាតិលើកទី៤ លើកទី៥ ស្ដីពីការអនុវត្តអនុសញ្ញា CEDAW នៅកម្ពុជាទៅអង្គការសហប្រជាជាតិ។ ត្រៀមរៀបចំនីតិវិធីនៃការផ្ដល់សច្ចាប័នលើពិធីសារតាមជម្រើសរបស់អនុសញ្ញា CEDAW ដែលក្រសួងការបរទេស និងសហប្រតិបត្តិការអន្តរជាតិបានចុះហត្ថលេខានាថ្ងៃទី១១ ខែវិច្ឆិកា ឆ្នាំ២០០១ កន្លងមក ។ ការងារផ្សព្វផ្សាយខ្លឹមសារអនុសញ្ញា CEDAW និងយោបល់សន្និដ្ឋាន៤២ចំណុចរបស់អ.ស.ប ។ បន្តការផ្សព្វផ្សាយនៅតាមក្រសួង៣ទៀត គឺក្រសួងការបរទេស និងសហប្រតិបត្តិអន្តរជាតិ ក្រសួងផែនការ និងក្រសួងយុត្តិធម៌ និងតាមខេត្តក្រុងដូចជាខេត្តរតនគិរី មណ្ឌលគីរី ស្ទឹងត្រែង ព្រះវិហារ បន្ទាយមានជ័យ កណ្ដាល កោះកុង និងក្រុងប៉ៃលិន ។ ត្រៀមសហការជាមួយអង្គការសន្តិភាព និងអភិវឌ្ឍន៍របស់ប្រទេសអេស្ប៉ាញ ដើម្បីចុះផ្សព្វផ្សាយអនុសញ្ញា CEDAW នៅតាមស្រុកក្នុងខេត្ត៤ គឺខេត្តក្រចេះ មណ្ឌលគិរី ស្ទឹងត្រែង និងរតនគិរី ។ ការចុះតាមដានវាយតម្លៃការអនុវត្តន៍ច្បាប់អំពីហិង្សាលើស្ត្រី ។ ការងារតាមដាន និងវាយតម្លៃការងារផ្សព្វផ្សាយខ្លឹមសារអនុសញ្ញា CEDAW ។ ការងារប្រជុំបូកសរុបការងារឆ្នាំ២០០៨ និងលើកទិសដៅសកម្មភាពឆ្នាំ២០០៩របស់ក.ជ.ក.ស ។
កម្រងអនុសាសន៍សម្រាប់អនុវត្តការងារក្រុមប្រឹក្សាជាតិកម្ពុជាដើម្បីស្ត្រី របស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអនុប្រធានកិត្តិយសនៃក្រុមប្រឹក្សាជាតិកម្ពុជាដើម្បីស្ត្រីសំដៅទប់ស្កាត់ បង្ការ បង្ក្រាប និងផ្ដន្ទាទោសជនល្មើសដើម្បីលើកឡើងនូវវិធានការជួយជនរងគ្រោះ មានកិច្ចសហការល្អរវាងស្នងការនគរបាល និងតុលាការខេត្ត - ក្រុង គឺជាកត្តាកំណត់ជោគជ័យ ឬបរាជ័យក្នុងការផ្ដន្ទាទោសជនល្មើស ។ ខេត្ត - ក្រុង នានាដែលស្ថាប័នអនុវត្តច្បាប់ទាំងពីរសហការគ្នាល្អ ការអនុវត្តច្បាប់ គឺមានប្រសិទ្ធភាព ។ ដោយឡែកខេត្ត - ក្រុងណាដែលស្ថាប័នអនុវត្តច្បាប់ទាំងពីរមើលបំណាំគ្នា ឆ្លើយដាក់គ្នា គឺការអនុវត្តច្បាប់ពុំមានប្រសិទ្ធភាពធ្វើឲ្យជនល្មើសរួចខ្លួនពីទោសទណ្ឌ ។
អនុសាសន៍សម្ដេចនាយករដ្ឋមន្ត្រី សូមឲ្យក្រសួងមហាផ្ទៃ និងក្រសួងយុត្តិធម៌ ជួយណែនាំបន្ថែមដល់មន្ទីរទាំងពីរខាងលើ ឲ្យសហការគ្នាឲ្យបានល្អ ។ សំណូមពរអាជ្ញាធរខេត្ត - ក្រុងបិទកន្លែងបញ្ចាំងវីដេអូអាសអាភាស ដែលជាកត្តាអាក្រក់បំផុតនាំឲ្យកើតឡើងនូវអំពើចាប់រំលោភសេពសន្ថវៈ ជួញដូរមនុស្ស និងធ្វើអាជីវកម្មផ្លូវភេទ ។ សូមជួយធ្វើការអប់រំដល់សាធារណជនឲ្យយល់ដឹងអំពីសិទ្ធិ និង អំពីនីតិវិធីតុលាការ និងជួយហ្វឹកហ្វឺនដល់មន្ត្រីប៉ូលិសយុត្តិធម៌ រដ្ឋអំណាចមូលដ្ឋានឲ្យយល់ដឹងអំពីច្បាប់ និងកាតព្វកិច្ចរបស់ខ្លួន ។ទាក់ទងនឹងការធ្វើកោសល្យវិច័យ គឺមានការលំបាកយ៉ាងខ្លាំងនៅតាមមូលដ្ឋានឃុំ - ភូមិ ដោយមណ្ឌលសុខភាពបង្អែកពុំអាចចេញលិខិតបញ្ជាក់លទ្ធផលឲ្យទាន់ពេលវេលា និងទាមទារមានការចំណាយថវិកាច្រើន ហើយជួនកាលហួសកាលរយៈ២៤ម៉ោងបាត់ភស្តុតាងធ្វើឲ្យជនល្មើសរួចខ្លួន ។ ពាក់ព័ន្ធបញ្ហានេះសូមក្រសួងសុខាភិបាលគួរពិនិត្យផ្ដល់សេវាឲ្យទាន់ពេលវេលា ដោយយកតម្លៃទាបឬមិនចាច់បង់ថ្លៃ និងត្រូវមានមនសិការវិជ្ជាជីវៈខ្ពស់ ។
ក្នុងករណីចាប់រំលោភសេពសន្ថវៈលើកូនស្រីបង្កើត ក្មួយស្រីបង្កើត កូនប្រពន្ធដើម និងការលក់ដូរកូនស្រីឲ្យធ្វើជាពេស្យាចារ ដោយមូលហេតុក្រីក្រនោះ ធ្វើឲ្យស្រុតចុះយ៉ាងខ្លាំងនូវសីលធម៌សង្គម និងតម្លៃគ្រួសារខ្មែរនាពេលបច្ចុប្បន្ន ។ អនុសាសន៍សូមឲ្យក្រសួងពាក់ព័ន្ធទាំងអស់ចូលរួមផ្សព្វផ្សាយតាមគ្រប់មធ្យោបាយដើម្បីស្ដារឡើងវិញនូវសីលធម៌សង្គម និងតម្លៃគ្រួសារខ្មែរ និងដាក់ទណ្ឌកម្មឲ្យធ្ងន់ធ្ងរបំផុតដល់ជនល្មើស ។
ពាក់ព័ន្ធនឹងបញ្ហាបញ្ជូនពលករទៅធ្វើការនៅក្រៅប្រទេស អនុសាសន៍សូមឲ្យក្រសួងការងារ និងបណ្ដុះបណ្ដាលវិជ្ជាជីវៈ និងក្រុមហ៊ុនពាក់ព័ន្ធត្រូវមានវិធានការថ្មីបន្ថែមទៀតសម្រាប់គ្រប់គ្រងពលករដែលទៅធ្វើការនៅក្រៅប្រទេសឲ្យបានល្អ ហើយស្ថានទូតខ្មែរនៅបរទេសគួរមានវិធានការជួយអន្តរាគមន៍ឲ្យមានប្រសិទ្ធភាព ។ អនុសាសន៍ទាំងនេះជាកត្តាសំខាន់ណាស់ចំពោះក្រសួង ស្ថាប័នពាក់ព័ន្ធដើម្បីរិះរកវិធានការទប់ស្កាត់ ភាពអសកម្មនៃការអនុវត្តន៍ច្បាប់ ៕