ភ្នំពេញ៖ ទោះបីជាការពិនិត្យជាតួលេខបង្ហាញថា និន្នាការអត្រាមរណភាពរបស់កុមារក្នុងប្រទេសកម្ពុជាមានការថយចុះក៏ដោយ ប៉ុន្តែផ្នែកសង្គមស៊ីវិលដែលធ្វើសកម្មភាពគាំពារដល់កុមារនៅតែសម្ដែងការព្រួយបារម្ភនៅឡើយប្រសិនបើសេវាសុខភាពមិនត្រូវបានលើកកម្ពស់ឲ្យប្រសើរជាងនេះថែមទៀតទេខណៈដែលគោលដៅនេះនឹងបញ្ចប់នៅឆ្នាំ២០១៥ខាងមុខ។
គោលដៅអភិវឌ្ឍន៍សហស្សវត្សរ៍កម្ពុជាកាត់បន្ថយអត្រាមរណភាពរបស់កុមារ នាខែកញ្ញាឆ្នាំ២០០០ ប្រទេសចំនួន១៨៩បានឯកភាពគ្នា នៅក្នុងមហាសន្និបាតអង្គការសហប្រជាជាតិដោយអនុម័តលើសេចក្ដីប្រកាស សហស្សវត្សរ៍ហើយដែលសេចក្ដីប្រកាសនេះត្រូវបានគេហៅថា គោលដៅអភិវឌ្ឍន៍សហស្សវត្សរ៍ដែលកម្ពុជា បានអនុម័តនៅឆ្នាំ២០០៣ ហើយការសម្រេចកាត់បន្ថយអត្រាមរណភាពកុមារស្ថិតក្នុងគោលដៅទី៤ ក្នុងចំណោមគោលដៅទាំង៩ ដែលកម្ពុជាបានដាក់ចេញ។
ប៉ុន្តែអ្វីដែលយើងលើកយកមកពិនិត្យមើលនៅទីនេះ គឺចំណុចគោលដៅទី៤ គឺការកាត់បន្ថយអត្រាមរណភាពកុមារ។ យោងតាមរបាយការណ៍គោលដៅអភិវឌ្ឍន៍សហស្សវត្សរ៍កម្ពុជាដែលបោះពុម្ពឆ្នាំ២០០៣ បានបង្ហាញពីសូចនាករ និងចំណុចដៅរបស់ខ្លួនទាក់ទងទៅនឹងការកាត់បន្ថយអត្រាមរណភាពកុមារក្រោមអាយុ៥ឆ្នាំថា រហូតដល់ឆ្នាំ២០១៥ គឺទី១- កាត់បន្ថយអត្រាមរណភាពកុមារអាយុក្រោម៥ឆ្នាំក្នុង១០០០កំណើត រស់នៅពី១២៤នៅឆ្នាំ១៩៩៨ ឲ្យធ្លាក់ចុះមកនៅត្រឹម៦៥នៅឆ្នាំ២០១៥។ ទី២- កាត់បន្ថយអត្រាមរណភាពទារកក្នុង១០០០កំណើត រស់នៅពីចំនួន៩៥នៅឆ្នាំ១៩៩៨ ឲ្យមកនៅត្រឹម៥០នៅឆ្នាំ២០១៥ ទី៣- បង្កើនសមាមាត្រនៃកុមារអាយុក្រោម១ឆ្នាំបានទទួលការចាក់ថ្នាំការពារកញ្ជ្រឹលពី ៤១,៤ភាគរយនៅឆ្នាំ២០០០ ឲ្យកើនដល់៩០ភាគរយនៅឆ្នាំ២០១៥។ ទី៤- បង្កើនសមាមាត្រនៃកុមារអាយុ ៦-៥៩ខែ បានទទួលថ្នាំវីតាមីនអាពី២៨ភាគរយ នៅឆ្នាំ២០០០ទៅ៩០ភាគរយនៅឆ្នាំ២០១៥។ ទី៥-បង្កើនសមាមាត្រនៃកុមារអាយុក្រោម១ឆ្នាំបានទទួលការចាក់ថ្នាំការពារជំងឺខាន់ស្លាក់ ក្អកមាន់ តេតាណូស ពី៤៣ភាគរយនៅឆ្នាំ២០០០ ទៅ៩០នៅឆ្នាំ២០១៥។ ទី៦- បង្កើនសមាមាត្រនៃទារកត្រូវបានបំបៅដោះដល់អាយុ៦ខែពី១១,៤ភាគរយនៃឆ្នាំ២០០០ ទៅ៤៩ភាគរយនៃឆ្នាំ២០១៥។ ទី៧- បង្កើនសមាមាត្រនៃម្ដាយដែលចាប់ផ្ដើមបំបៅដោះទារកទើបនឹងកើតក្នុងរយៈពេល១ម៉ោង នៃកំណើតពី១១ភាគរយនៅឆ្នាំ២០០០ ទៅ៦២ភាគរយនៅឆ្នាំ២០១៥។
ការឆ្លើយតប ពីរដ្ឋាភិបាលកម្ពុជាចំពោះគោលដៅនេះលោកសាស្ត្រាចារ្យ សាន់ ចាន់សឿន ប្រធានកម្មវិធីជាតិចាក់ថ្នាំបង្ការ បានមានប្រសាសន៍ថា ការផ្ដល់វ៉ាក់សាំងការពារជំងឺកញ្ជ្រិល និងវ៉ាក់សាំងចំនួន៦មុខទៀតដល់កុមារអាយុក្រោម១ឆ្នាំ និងអាយុក្រោម៥ឆ្នាំបានសម្រេចមុនគោលដៅឆ្នាំ២០១៥ស្ទើរ១០០ភាគរយ មកទល់បច្ចុប្បន្ននេះ។ ការផ្ដល់គ្រាប់ថ្នាំវីតាមីនអា បានកើនឡើងជិតដល់គោលដៅផងដែរ ដោយរហូតមកទល់ពេលនេះ សម្រេចបាន៨២ភាគរយ លើគោលដៅ១០០ភាគរយ។
យោងតាមសូចនាករ ដែលបានចុះផ្សាយក្នុងរបាយការណ៍គោលដៅអភិវឌ្ឍន៍សហស្សវត្សរ៍កម្ពុជាដែលបានបោះពុម្ពផ្សាយកាលពីឆ្នាំ២០០៣ បានបង្ហាញថា សមាមាត្រនៃទារកដែលបានបំបៅដោយទឹកដោះសុទ្ធដល់រយៈពេល៦ខែបានកើនពី ១១,៤ភាគរយ នៅឆ្នាំ២០០០ ដល់២០ភាគរយ នៅឆ្នាំ២០០៥ ហើយកំណត់ឲ្យបាន៣៤ភាគរយ នៅឆ្នាំ២០១០ និងដល់៤៩ភាគរយ ដល់ឆ្នាំ២០១៥។ សមាមាត្រនៃម្ដាយដែលបានចាប់ផ្ដើមបំបៅដោះទារកទើបនឹងកើតក្នុងចន្លោះរយៈពេលមួយម៉ោងនៃកំណើតមាន១១ភាគរយ នៅឆ្នាំ២០០០ ដល់២៨ភាគរយ នៅឆ្នាំ២០០៥ ដែលទិសដៅកំណត់ត្រូវសម្រេចឲ្យបាន៤៥ភាគរយ នៅឆ្នាំ២០១០ និងដល់៦២ភាគរយ នៅឆ្នាំ២០១៥។ សំដៅការកាត់បន្ថយអត្រាស្លាប់របស់កុមារលោកសាស្ត្រាចារ្យ សាន់ ចាន់សឿន បានបន្តថា យើងសង្កេតឃើញថា ការស្លាប់របស់កុមារអាយុក្រោម១ឆ្នាំ និងក្រោមឆ្នាំ៥ឆ្នាំបានថយចុះគួរឲ្យកត់សម្គាល់ដោយការអង្កេតប្រជាសាស្ត្រ និងសុខភាពកម្ពុជា ដែលធ្វើឡើងដោយក្រសួងសុខាភិបាល និងក្រសួងផែនការឆ្នាំ២០០០ និង២០០៥ បានបង្ហាញថា អត្រាស្លាប់របស់កុមារអាយុក្រោម១ឆ្នាំ បានថយចុះពី៨៣ នៅឆ្នាំ២០០០មកនៅត្រឹម៦៦ ហើយកុមារអាយុក្រោម៥ឆ្នាំបានថយចុះពី១២៤ នៅឆ្នាំ២០០០មកនៅត្រឹម៨៣ក្នុង១.០០០កំណើតរស់។ ប៉ុន្តែអត្រាស្លាប់របស់ទារកកើតភ្លាមៗ មានអត្រាស្លាប់២៧លើ១.០០០កំណើតរស់។ បញ្ហាប្រឈមចំពោះមុខ។
អ្វីជាបញ្ហាត្រូវប្រឈមចំពោះមុខលោកសាស្ត្រាចារ្យ សាន់ ចាន់សឿន បានបន្តថា បញ្ហាប្រឈមរបស់យើងដោយសារប្រជាជនកម្ពុជាជាង៩០ភាគរយរស់នៅជនបទ ការយល់ដឹងពីបញ្ហាសុខភាពនៅមានកម្រិតកង្វះទឹកស្អាត និងអនាម័យជនបទ ពិសេសការប្រើប្រាស់បង្គន់អនាម័យនៅមានកម្រិតទាបហេដ្ឋារចនាសម្ព័ន្ធនៅមានការលំបាកនៅឡើយ។ នៅតាមតំបន់ជនបទដាច់ស្រយាល ជាហេតុធ្វើឲ្យការបញ្ជូនកុមារ ទារក និងស្ត្រីមានផ្ទៃពោះមកមណ្ឌលសុខភាពយឺត សុទ្ធជាបញ្ហាប្រឈមដែលធ្វើឲ្យកុមារ ទារក និងស្ត្រីមានអត្រាស្លាប់ខ្ពស់។
លោកបានបន្ត ដោយពន្យល់ប្រាប់ពីមូលហេតុធ្វើឲ្យកុមារឈឺថា កត្តាបរិស្ថាន កង្វះអនាម័យ ការប្រែប្រួលអាកាសធាតុ និងជីវភាពរស់នៅរបស់ប្រជាជន ពិសេសការយល់ដឹងពីការធ្វើអនាម័យរបស់ប្រជាជននៅតាមកម្រិតជាមូលហេតុបណ្ដាលឲ្យកុមារឈឺ ដោយសារជំងឺទាំងនេះច្រើន។ ជំងឺអ្វីជាដើមចមដែលបណ្ដាលឲ្យកុមារស្លាប់ច្រើនជាងគេ។
ក្រុមមន្ត្រីសុខាភិបាលសុទ្ធតែទទួលស្គាល់ថា ចាប់តាំងពីទសវត្សរ៍ទី៩០រហូតមកទល់បច្ចុប្បន្ននេះ ជំងឺផ្លូវដង្ហើម ជំងឺរាករូស ជំងឺកង្វះអាហារូបត្ថម្ភ ជំងឺឆ្លងតាមរដូវកាល ដូចជាជំងឺគ្រុនឈាម នៅតែនាំមុខគេនៅកម្ពុជា ក៏ដូចជាបណ្ដាប្រទេសក្នុងតំបន់។
លោកសាស្ត្រាចារ្យវេជ្ជបណ្ឌិត ឈួ អ៊ីម៉េង នាយកមន្ទីរពេទ្យកុមារជាតិ បានមានប្រសាសន៍ថា អត្រាស្លាប់ក្នុងមន្ទីរពេទ្យមានការថយចុះពី៤ភាគរយ នៅដើមទសវត្សរ៍ទី៩០មកនៅត្រឹម២,៤ភាគរយ នៅពាក់កណ្ដាលទសវត្សរ៍ដដែល និងធ្លាក់ចុះរហូតដល់១,១២ភាគរយនៅបច្ចុប្បន្ននេះ។ លោកបន្តថា បច្ចុប្បន្នជំងឺផ្លូវដង្ហើមគ្របដណ្ដប់១២ភាគរយ ជំងឺរាកមួល និងជំងឺគ្រុនពោះវៀន៣ភាគរយ ជំងឺទារកទើបនឹងកើតប្រមាណ០,៧ភាគរយនៃកុមារដែលសម្រាកក្នុងមន្ទីរពេទ្យ និងជំងឺផ្សេងៗមួយចំនួនទៀត។ កាលពីឆ្នាំ២០០៨កន្លងមកនេះ មន្ទីរពេទ្យទទួលកុមារកើតជំងឺចូលសម្រាកព្យាបាលចំនួន១០.៤៧៨នាក់។
លោកវេជ្ជបណ្ឌិត អ៊ូ ឃីឡាយ ប្រធានមន្ទីរពេទ្យបង្អែកខេត្តក្រចេះ និងលោកវេជ្ជបណ្ឌិត អ៊ាវ តារាវុធ ប្រធានមន្ទីរពេទ្យបង្អែកសិរីសោភ័ណ ខេត្តបន្ទាយមានជ័យបានមានប្រសាសន៍ឲ្យដឹងថា "អត្រាស្លាប់របស់កុមារ និងទារកទើបនឹងកើតមានការថយចុះជាងមុនហើយករណីស្លាប់ភាគច្រើនបណ្ដាលមកពីមូលហេតុនៃការបញ្ជូនកុមារមានជំងឺមកកាន់សេវាសុខាភិបាលមានការយឺតយ៉ាវ"។
- ដំណោះស្រាយចំពោះមុខ
ក្នុងឋានៈជាអ្នកធ្វើការសម្រេចចិត្តខាងនយោបាយ លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ឲ្យដឹងថា ការកាត់បន្ថយអត្រាស្លាប់របស់កុមារ ត្រូវចាប់ផ្ដើមតាំងពីស្ត្រីមានផ្ទៃពោះ តាមរយៈការអប់រំឲ្យពួកគេទៅពិនិត្យផ្ទៃពោះទៅសម្រាលនៅមណ្ឌលសុខភាពដែលមានឆ្មបជំនាញ។ បន្ទាប់មកជំរុញឲ្យកុមារបានទទួលវ៉ាសាំងបង្ការជំងឺ៧មុខ ការផ្ដល់គ្រាប់ថ្នាំជីវភាពអា ការបំបៅដោះម្ដាយឲ្យគ្រប់អាយុ៦ខែឲ្យបានគ្រប់ៗគ្នា និងការផ្ដល់អាហារបំប៉នឲ្យបានគ្រប់គ្រាន់ដល់កុមារ។
លោកបន្តថា យើងក៏ជំរុញឲ្យគ្រូពេទ្យតាមដានការលូតលាស់របស់កុមារ និងអប់រំប្រជាជនឲ្យចេះសម្អាតអនាម័យបរិស្ថាន អនាម័យខ្លួនប្រាណដើម្បីជៀសផុតពីជំងឺដង្ហើម ជំងឺរាករូស និងជំងឺផ្សេងៗទៀត ដែលអាចការពារបាន។ លោកបន្តថា ការអប់រំប្រជាជនឲ្យយល់ដឹងមានសារសំខាន់ណាស់ ដើម្បីឲ្យគាត់អាចបញ្ជូនកូនមកមន្ទីរពេទ្យបានទាន់ពេលវេលា ព្រោះការបញ្ជូនកូនមកយឺតនឹងនាំឲ្យមានគ្រោះថ្នាក់ដល់ជីវិតកុមារ។ លោករដ្ឋមន្ត្រីបានបន្តថា យើងកំពុងពង្រឹងការងារនេះតទៅទៀត ធ្វើម៉េចឲ្យអស់លទ្ធភាពរបស់យើង ដើម្បីកាត់បន្ថយការស្លាប់របស់កុមារ និងទារក និងលើកកម្ពស់សុខភាពកុមារឲ្យបានរឹងមាំសមនឹងពាក្យថា សុខភាពកុមារល្អអនាគតបវររុងរឿង"។ លោកបន្តថា យើងកំពុងខិតខំរួមគ្នាដើម្បីសម្រេចទិសដៅរបស់យើង បើទោះជាយើងកំពុងជួបវិបត្តិសេដ្ឋកិច្ចនិងហិរញ្ញវត្ថុសកលក្ដី។ យើងអនុវត្តតាមយុទ្ធសាស្ត្រចតុកោណជំហានទី២ និងផែនការយុទ្ធសាស្ត្រជាតិសុខាភិបាល"។
ប្រមុខនៃរាជរដ្ឋាភិបាលកម្ពុជាសម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ក្នុងពិធីបើកសន្និបាតសុខាភិបាលលើកទី៣០ កាលពីថ្ងៃទី២៣មីនា ឆ្នាំ២០០៩កន្លងមកថា បានណែនាំដល់ក្រសួងសុខាភិបាលក្រសួងស្ថាប័នពាក់ព័ន្ធ និងដៃគូអភិវឌ្ឍន៍ទាំងអស់ ត្រូវបន្តរួមគ្នាអនុវត្តផែនការយុទ្ធសាស្ត្រសុខាភិបាល២០០៨-២០១៥ ដោយយកចិត្តទុកដាក់ជាពិសេសលើការផ្ដល់ហិរញ្ញវត្ថុ និងបច្ចេកទេសដើម្បីគាំទ្រដល់ការធ្វើគោលនយោបាយ និងអ្នកអនុវត្តទាំងថ្នាក់ជាតិ និងថ្នាក់ក្រោមជាតិសម្រាប់លើកកម្ពស់វិស័យសុខាភិបាលទូទាំងប្រទេស។
លោក កែម ឡី ប្រធានគណៈកម្មាធិការសម្របសម្រួលប្រយុទ្ធជំងឺអេដស៍ ដែលជាអង្គការក្រៅរដ្ឋាភិបាលក្នុងស្រុកមួយ បានមានប្រសាសន៍ឲ្យដឹងថា យោងតាមការសិក្សានៅតាមសហគមន៍ និងមណ្ឌលសុខភាពមួយចំនួន ដោយមានការជួបជាមួយប្រជាជនមូលដ្ឋាន ឆ្មបនិងមន្ត្រីបំពេញការងារដទៃទៀត នៅរាជធានីភ្នំពេញតាកែវ និងខេត្តកំពង់ស្ពឺ ដែលបានចាប់ផ្ដើម ពីខែវិច្ឆិកាឆ្នាំ២០០៨ ដល់ខែកុម្ភៈឆ្នាំនេះបានរកឃើញថា "ប្រសិនបើរដ្ឋាភិបាលមិនផ្លាស់ប្ដូររបៀបនៃការធ្វើការងារ និងយុទ្ធសាស្ត្រធ្វើការ ខ្ញុំមិនសង្ឃឹមថា យើងអាចសម្រេចបានតាមទិសដៅអភិវឌ្ឍន៍សហស្សវត្សរ៍នោះទេ។ លោកបន្ថែមថា អត្រាស្លាប់របស់កុមារមិនធ្ងន់ធ្ងរទេ បើសង្គ្រោះកុមារបានល្អនាំឲ្យការថែទាំកុមារបានល្អ។
លោកបន្តថា បើក្រសួងដទៃទៀតមានប្រាក់ឧបត្ថម្ភទាប វាមិនជះឥទ្ធិពលធ្ងន់ធ្ងរទេ ប៉ុន្តែកង្វះថវិកាក្នុងវិស័យសុខាភិបាល និងក្រសួងអប់រំវាជាបញ្ហាធំ ព្រោះវានឹងធ្វើឲ្យប្រជាជនមិនបានជួបពេទ្យ កុមារមិនបានទៅសាលារៀន។ លោកបន្តថា ដោយសារប្រាក់ឧបត្ថម្ភទាប បានធ្វើឲ្យប្រជាជនទៅរកឆ្មបមិនឃើញនៅតាមមណ្ឌលសុខភាពព្រោះមួយថ្ងៃគាត់ធ្វើការតែ២ទៅ៣ម៉ោងប៉ុណ្ណោះ។
លោក ហង្ស វុទ្ធី អ្នកគ្រប់គ្រងកម្មវិធីជាន់ខ្ពស់នៃអង្គការសង្គ្រោះកុមារដែលកំពុងធ្វើការលើវិស័យសុខាភិបាលអប់រំ និងសង្គមកិច្ចបញ្ហាកុមារ បានមានប្រសាសន៍ថា អង្គការការសង្គ្រោះកុមារបាន និងកំពុងរួមចំណែកលើកកម្ពស់សុខុមាលភាពប្រជាពលរដ្ឋ និងកាត់បន្ថយអត្រាស្លាប់របស់មាតាទារក និងកុមារតាមរយៈការអប់រំប្រជាជនឲ្យយល់ដឹងពីវិធីការពារជំងឺបញ្ចៀសការស្លាប់ដែលអាចការពារបាននិងការថែទាំស្ត្រី និងកុមារ។ លោកបន្តថា អង្គការក៏បានជួយបណ្ដុះបណ្ដាលពង្រឹងសមត្ថភាពមន្ត្រីសុខាភិបាលដើម្បីឲ្យពួកគេផ្ដល់សេវាសុខាភិបាលប្រកបដោយគុណភាព និងមានប្រសិទ្ធភាពខ្ពស់ផងដែរ។
នៅពេលសួរថា តើលោកគិតថា កម្ពុជានឹងអាចសម្រេចបានតាមគោលដៅអភិវឌ្ឍន៍សហស្សវត្សរ៍ក្នុងការកាត់បន្ថយអត្រាស្លាប់របស់មាតា និងទារកឬទេ លោក ហង្ស វុទ្ធី បានមានប្រសាសន៍ថា "ខ្ញុំមានការសង្ឃឹមខ្លាំងថា យើងនឹងសម្រេចបាន បើយើងមានការប្រឹងប្រែងរួមគ្នារវាងរដ្ឋាភិបាលអង្គការក្រៅរដ្ឋាភិបាល និងដៃគូអភិវឌ្ឍន៍នានាយើងនឹងទៅដល់គោលដៅដែលបានដាក់ចេញ"។
លោកបន្តថា ដើម្បីសម្រេចគោលដៅនេះ យើងត្រូវឈរលើមូលដ្ឋាន៥ ទី១- កៀរគរមូលនិធិដើម្បីយើងអាចមានលទ្ធភាពក្នុងការអនុវត្តន៍កម្មវិធីនានាដែលបានដាក់ចេញ ទី២- ក្រសួងសុខាភិបាលត្រូវទម្លាក់ឆ្មបឲ្យបានកាន់តែច្រើនថែមទៀតទៅតំបន់ជនបទដាច់ស្រយាល ទី៣- បណ្ដុះបណ្ដាលមន្ត្រីអនុវត្តការងារបន្ថែម ទី៤- រៀបចំប្រព័ន្ធប្រព័ន្ធបញ្ជូនអ្នកជំងឺពីសហគមន៍ទៅមណ្ឌលសុខភាព ឬមន្ទីរពេទ្យបង្អែកនានាឲ្យបានឆាប់រហ័ស និងទី៥- បង្កើនការអប់រំដល់ម្ដាយ និងប្រជាពលរដ្ឋឲ្យយល់ពីផលប្រយោជន៍នៃការពិនិត្យផ្ទៃពោះ ការសម្រាល កូនដោយឆ្មបមានជំនាញ និងឲ្យគាត់យល់ដឹងពីរោគសញ្ញាមួយចំនួនដែលបង្កគ្រោះថ្នាក់ដល់មាតា ទារក និងកុមារ។
លោក រីឆាត ប្រាយដល (Richard Bridle) ប្រធានតំណាងអង្គការ យូនីសេហ្វប្រចាំកម្ពុជា បានមានប្រសាសន៍ប្រាប់ក្រុមអ្នកកាសែត ក្នុងសន្និសីទសារព័ត៌មាន កាលពីចុងខែកញ្ញាថា ការអភិវឌ្ឍន៍កុមារនៅក្នុងប្រទេសកម្ពុជាមានការរីកចម្រើនគួរឲ្យកត់សម្គាល់ ដូចជាក្នុងវិស័យសុខាភិបាល អប់រំ ផ្គត់ផ្គង់ទឹកជនបទ អនាម័យ កិច្ចការពារសង្គម និងការអភិវឌ្ឍន៍បែបប្រជាធិបតេយ្យនៅថ្នាក់ក្រោមជាតិជាពិសេសការបង្កើនការបំបៅកូនដោយទឹកដោះម្ដាយតែមួយមុខគត់ពី១២ភាគរយនៅឆ្នាំ២០០០ ដល់៦៦ភាគរយនៅឆ្នាំ២០០៨ ដែលជាតួលេខដ៏ខ្ពស់ជាងគេមួយនៅក្នុងបណ្ដាប្រទេសក្នុងតំបន់អាស៊ី។
លោកបន្តថា "វាមានសារសំខាន់ណាស់ដែលត្រូវរក្សា និងបន្តការបង្កើនថវិកាសម្រាប់វិស័យសង្គម និងពង្រីកបន្ថែមនូវសំណាញ់សុវត្ថិភាពសង្គមរយៈពេលវែងដើម្បីឲ្យកុមារនៅតែអាចបន្តរស់នៅជាមួយគ្រួសាររបស់ពួកគេ និងបន្តទទួលបានការអប់រំ និងការទទួលបានលទ្ធភាពថែទាំសុខភាពក្នុងតម្លៃសមស្រប"។
លោកធីម៉ូធី ចនស្ដន់ (Timothy Johnston) អ្នកជំនាញជាន់ខ្ពស់ផ្នែកសុខភាពរបស់ធនាគារពិភពលោក បានបង្ហាញនូវការកត់សម្គាល់របស់លោកថា កម្ពុជាកំពុងបោះជំហានយ៉ាងត្រង់ទៅមុខឆ្ពោះទៅរកការកាត់បន្ថយអត្រាមរណភាពនៃកុមារ។ ប៉ុន្តែកម្ពុជានៅត្រូវការកិច្ចប្រឹងប្រែងបន្តទៀតដើម្បីសម្រេចគោលដៅសហស្សវត្សរ៍ក្នុងឆ្នាំ២០១៥។ លោកនិយាយបន្តទៀតថា មានចំណុចអាទិភាពចំនួន៣ ដើម្បីសម្រេចគោលដៅសហស្សវត្សរ៍ក្នុងផ្នែកកាត់បន្ថយអត្រាមរណៈរបស់កុមារនេះ។ ទី១ កែលំអធ្វើយ៉ាងណាឲ្យប្រជាជនក្រីក្រទទួលបានសេវាសុខភាព។ ទី២ បង្កើនគុណភាពការថែទាំកុមារតាមរយៈការបំពាក់បំប៉នការធានាអំពីការទទួលបាននូវការឧបត្ថម្ភ និងគ្រឿងបរិក្ខាចាំបាច់នានា និងការលើកទឹកចិត្តដល់បុគ្គលិកសុខាភិបាល។ ទី៣ ផ្ដោតការយកចិត្តទុកដាក់ទៅក្នុងសហគមន៍ដែលមានអត្រាមរណភាពនៃកុមារ ព្រមទាំងធ្វើឲ្យល្អប្រសើរឡើងនូវការផ្ដល់អាហារូបត្ថម្ភដល់កុមារបរិស្ថានអនាម័យល្អជាដើម។
នៅពេលសួរថា តើធនាគារពិភពលោកអាចចូលរួមចំណែកអ្វីខ្លះក្នុងការកាត់បន្ថយអត្រា អត្រាមរណភាពកុមារ? លោកបាននិយាយថា ធនាគារពិភពលោកកំពុងផ្ដល់ជំនួយហិរញ្ញវត្ថុទៅដល់គម្រោងគាំទ្រផ្នែកសុខភាពចំនួន២។ ធនាគារពិភពលោកបានផ្ដល់ជំនួយ៣០លានដុល្លារ ទៅលើគម្រោងគាំទ្រផ្នែកសុខភាពទី២។ គម្រោងគាំទ្រផ្នែកសុខភាពទី២នេះ ត្រូវបានបង្កើតឡើងដើម្បីផ្ដល់ការគាំទ្រដល់ផែនការយុទ្ធសាស្ត្រផ្នែកសុខភាពរបស់រដ្ឋាភិបាល។
គួរនិយាយឲ្យដឹងថាដែរថា យុទ្ធនាការជាសកលអំពីការរស់រានមានជីវិតរបស់កុមារបានចាប់ផ្ដើមពីថ្ងៃទី៥ ខែតុលា ឆ្នាំ២០០៩ ដល់ឆ្នាំ ២០១៥ ដែលបញ្ហានេះមិនមែនមានការយកចិត្តទុកដាក់តែនៅប្រទេសកម្ពុជាទេ ប៉ុន្តែអង្គការសង្គ្រោះកុមារបានធ្វើយុទ្ធនាការនេះទូទាំងពិភពលោក៕
