អាជ្ញាធរក្រុងភ្នំពេញបញ្ជាក់ឲ្យដឹងកាលពីចុងសប្ដាហ៍មុនថា ខ្លួននឹងធ្វើការផាកពិន័យឬ ដកហូតអាជ្ញាប័ណ្ណពីក្រុមហ៊ុនរថយន្តដឹកជញ្ជូនអ្នកដំណើរ និងម្ចាស់ចំណតបង់ប្រាក់ណាមួយដែលបានដំឡើងថ្លៃធ្វើដំណើររបស់ប្រជាពលរដ្ឋពីភ្នំពេញទៅតាមបណ្ដាខេត្តក្រុងនានា នៅក្នុងឱកាសយុទ្ធនាការ ក៏ដូចជាក្នុងថ្ងៃបោះឆ្នោតជ្រើសរើសតំណាងរាស្ត្រអាណត្តិទី៤ ដែលនឹងប្រព្រឹត្តឡើងនៅថ្ងៃទី២៧ ខែកក្កដា ខាងមុខនេះ។
ដោយបារម្ភខ្លាចថា ថ្លៃរថយន្តធ្វើដំណើររបស់ប្រជាពលរដ្ឋនៅក្នុងពេលយុទ្ធនាការឃោសនាមានតម្លៃខ្ពស់នោះ លោក ប៉ា សុជាតិវង្ស អភិបាលរងក្រុងភ្នំពេញ បានឲ្យដឹងកាលពីថ្ងៃទី៥ កក្កដា ថា"សាលាក្រុងបានកោះហៅក្រុមហ៊ុនទាំងអស់ដែលពាក់ព័ន្ធនឹងការដឹកជញ្ជូនអ្នកដំណើរមកជួបប្រជុំដើម្បីកំណត់នូវតម្លៃរបស់ខ្លួនឲ្យនៅធម្មតាមិនឲ្យដំឡើងថ្លៃអ្វីទាំងអស់។ បើក្រុមហ៊ុនណាមួយដំឡើងថ្លៃធ្វើដំណើរ បើយើងដឹង យើងនឹងដកឡាយសិន (អាជ្ញាប័ណ្ណ) ពីក្រុមហ៊ុននោះ"។ លោក ប៉ា សុជាតិវង្ស បានគូសបញ្ជាក់បន្ថែមទៀតថា៖ "ការគំរាមដកអាជ្ញាប័ណ្ណពីក្រុមហ៊ុនណាដែលហ៊ានដំឡើងថ្លៃឈ្នួលធ្វើដំណើរ នៅក្នុងអំឡុងពេលយុទ្ធនាការបោះឆ្នោតនេះ គឺជាវិធានការមួយដើម្បីជួយដល់កម្មករ ប្រជាពលរដ្ឋដែលត្រូវវិលត្រឡប់ទៅកាន់ស្រុកកំណើតនៅថ្ងៃបោះឆ្នោត។ ជាពិសេសនៅមុន និងក្រោយមួយថ្ងៃ គឺជាពេលវេលាដែលយើងអនុញ្ញាតឲ្យបងប្អូនឈប់សម្រាកដើម្បីទៅបោះឆ្នោត គឺតម្លៃធ្វើដំណើរត្រូវរក្សាទុកឲ្យនៅតម្លៃធម្មតាដដែល"។ "ការតម្រូវឲ្យរក្សាទុកថ្លៃធ្វើដំណើរដល់ម្ចាស់រថយន្តទាំងអស់ឲ្យនៅថ្លៃធម្មតានៅក្នុងអំឡុងពេលយុទ្ធនាការបោះឆ្នោតនេះ ត្រូវបានឯកភាពពីម្ចាស់ក្រុមហ៊ុនទាំងអស់ មិនមានជាបញ្ហាអ្វីនោះទេ មិនថា ឡានក្រុងធំៗ ឬរថយន្តតាក់ស៊ីតូចៗនោះទេ គឺតម្លៃនៅធម្មតាដូចដើម" លោក ប៉ា សុជាតិវង្ស បញ្ជាក់ឲ្យដឹងដូច្នេះ។
ពាក់ព័ន្ធនឹងការកំណត់តម្លៃរថយន្តតាក់ស៊ីក្នុងយុទ្ធនាការបោះឆ្នោត ក៏ដូចជាថ្ងៃបោះឆ្នោតនេះដែរ លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ មានប្រសាសន៍ថា៖ "ការកំណត់តម្លៃរថយន្តក្នុងថ្ងៃបោះឆ្នោតនេះ សមាគមខ្ញុំត្រៀមចេញសេចក្ដីថ្លែងការណ៍មួយជម្រាបទៅដល់រដ្ឋាភិបាល ក៏ដូចជាអំពាវនាវដល់ក្រុមអ្នករត់តាក់ស៊ីនៅក្នុងប្រទេសកម្ពុជាទាំងអស់សូមមេត្តាកុំដំឡើងថ្លៃឈ្នួលរថយន្ត ចំពោះប្រជាពលរដ្ឋដែលជិះទៅចូលរួមការបោះឆ្នោតជ្រើសរើសមេដឹកនាំដ៏ល្អសម្រាប់អភិវឌ្ឍន៍ប្រទេស"។ លោក វ៉ន ពៅ បញ្ជាក់ឲ្យដឹងបន្ថែមទៀតថា៖ "បើសិនជាម្ចាស់រថយន្តតាក់ស៊ីទាំងអស់ដំឡើងឈ្នួលចំពោះអ្នកជិះក្នុងពេលបោះឆ្នោតបានន័យថា យើងកំពុងតែកម្ទេចប្រទេសជាតិ យើងកំពុងតែបំបិទសិទ្ធិសេរីភាពប្រជាពលរដ្ឋក្រីក្រតូចតាចដែលចង់ទាមទារនូវសិទ្ធិសេរីភាព ទាមទារនូវអ្នកដឹកនាំថ្មីសម្រាប់ដឹកនាំប្រទេសឲ្យសម្បូររុងរឿង។ មិនតែប៉ុណ្ណោះ បើសិនជាអ្នករត់តាក់ស៊ីចង់ដំឡើងថ្លៃមែននោះ ហើយបើសិនជាមិនមានអ្នកទៅបោះឆ្នោតគ្រប់គ្រាន់ទេ កុំសង្ឃឹមថា តម្លៃសាំងនៅប្រទេសកម្ពុជាមានតម្លៃថោកឲ្យសោះ" លោក វ៉ន ពៅ បញ្ជាក់ឲ្យដឹងយ៉ាងដូច្នេះ"។
ទាក់ទងនឹងការបោះឆ្នោតអាណត្តិទី៤ ខាងមុខនេះដែរ សហភាពសហជីពកម្ពុជាដឹកនាំដោយលោក រ៉ុង ឈុន កាលពីថ្ងៃទី២ ខែកក្កដា បានចេញសេចក្ដីអំពាវនាវចំហមួយច្បាប់អំពាវនាវទៅដល់សមាជិក- សមាជិកា លោកគ្រូ អ្នកគ្រូ បងប្អូន កម្មករ-កម្មការិនី មន្ត្រីរាជការ និងបងប្អូនជនរួមជាតិទាំងអស់ទៅចូលរួមបោះឆ្នោតឲ្យបានគ្រប់ៗគ្នាឲ្យគណបក្សអ្នកប្រជាធិបតេយ្យដឹកនាំប្រទេសម្ដង ដើម្បីការពារអធិបតេយ្យភាព បូរណភាពទឹកដី និងស្ដារនូវកេរ្ដិ៍ឈ្មោះជាតិយើងឡើងវិញ ជាពិសេសការលើកកម្ពស់ជីវភាពរស់នៅរបស់បងប្អូនជនរួមជាតិឲ្យបានរស់នៅជាមនុស្សប្រកបដោយកិត្តិយស និងមានសេរីភាពក្នុងលោកនេះ។
បន្ថែមលើសេចក្ដីអំពាវនាវតាមលិខិតឲ្យពលរដ្ឋទៅចូលរួមបោះឆ្នោតឲ្យបានច្រើនលោក រ៉ុង ឈុន ប្រធានសហភាពសហជីពកម្ពុជា មានប្រសាសន៍អំពាវនាវដល់ថៅកែក្រុមហ៊ុន រោងចក្រកាត់ដេរ រោងចក្រស្បែកជើងក៏ដូចជា ហាងខារ៉ាអូខេ កាស៊ីណូ សណ្ឋាគារ បើកប្រាក់ខែមុនថ្ងៃទី២៤ កក្កដា នេះ ដើម្បីបង្កឲ្យពួកគាត់មានសោហ៊ុយធ្វើដំណើរទៅចូលរួមបោះឆ្នោត ម្យ៉ាងទៀតសូមឲ្យផ្ដល់លទ្ធភាពមានប្រាក់បុរេបទានឲ្យលោកគ្រូ អ្នកគ្រូ បងប្អូន កម្មករ- កម្មការិនី មន្ត្រីរាជការ អ្នកធ្វើការតាមហាងខារ៉ាអូខេ កាស៊ីណូ សណ្ឋាគារ ទាំងអស់ឲ្យពួកគាត់បានខ្ចីដើម្បីមានប្រាក់សម្រាប់ធ្វើសោហ៊ុយទៅចូលរួមធ្វើការបោះឆ្នោត"៕