ទិដ្ឋភាពរួមក្នុងវគ្គបណ្ដុះបណ្ដាលមន្ត្រីជំរឿន (រូបថត ហុងរី)ខេត្តបាត់ដំបង ៖ មន្ត្រីសម្ភាសន៍ និងមន្ត្រីត្រួតពិនិត្យជំរឿនចំនួន៣៣៦នាក់ នៅក្នុងស្រុកបាត់ដំបង បានមកចូលរួមក្នុងវគ្គបណ្ដុះបណ្ដាលស្ដីពីមន្ត្រីសម្ភាសន៍ និងមន្ត្រីត្រួតពិនិត្យជំរឿនទូទៅនៅប្រជារាស្ត្រកម្ពុជាឆ្នាំ២០០៨ ដែលប្រារព្ធធ្វើឡើងនៅសាលាស្រុកនាព្រឹកថ្ងៃទី១១ កុម្ភៈ ក្រោមអធិបតីភាពលោក ប៊ុត គឹមស៊ាន អភិបាលរងខេត្តនិងជាទីប្រឹក្សាសម្ដេចអគ្គមហាពញាចក្រី ហេង សំរិន។ អញ្ជើញចូលរួមក្នុងឱកាសនោះមានប្រធានមន្ទីរផែនការខេត្ត មន្ត្រីជំរឿនតំបន់ លោក អ៊ុយ រី អភិបាលស្រុកបាត់ដំបង និងអភិបាលរងស្រុកទាំងអស់ ប្រធានការិយាល័យអប់រំស្រុក មន្ត្រីប៉ូលិស កងរាជអាវុធហត្ថ និងយោធា ប្រធានក្រុមប្រឹក្សាឃុំទាំង១០ក្នុងស្រុក និងលោកគ្រូ អ្នកគ្រូយ៉ាងច្រើនកុះករ។
លោក អ៊ុយ រី អភិបាលស្រុកបាត់ដំបង និងជាប្រធានគណៈកម្មការជំរឿនស្រុកបានថ្លែងថា ក្នុងនាមអាជ្ញាធរស្រុក និងក្នុងនាមគណៈកម្មការជំរឿនទូទៅនូវប្រជារាស្ត្រស្រុកខ្ញុំចាត់ទុកថា ការងារជំរឿនទូទៅនៅប្រជារាស្ត្រក្នុងឆ្នាំ២០០៨ ពិតជាមានសារសំខាន់ណាស់ ពីព្រោះស្របពេលដែលរាជរដ្ឋាភិបាលបានបញ្ចប់អាណត្តិ៥ឆ្នាំរបស់ខ្លួន ជារយៈពេលមួយដែលរាជរដ្ឋាភិបាលត្រូវការពិនិត្យវាយតម្លៃឡើងវិញ នូវលទ្ធផលនៃការអនុវត្តន៍គោលនយោបាយនិងយុទ្ធសាស្ត្រចតុកោណរបស់ខ្លួនផងដែរ។ ដូច្នេះការធ្វើជំរឿនទូទៅនូវប្រជារាស្ត្រប្រទេសកម្ពុជា គឺជាមូលដ្ឋានព័ត៌មានមួយដ៏សំខាន់សម្រាប់រាជរដ្ឋាភិបាលថាតើទទួលជោគជ័យកម្រិតណា? ហើយអ្វីខ្លះដែលរាជរដ្ឋាភិបាលត្រូវតែយកចិត្តទុកដាក់បន្ថែមទៀតសម្រាប់អាណត្តិក្រោយ។ ស្រុកបាត់ដំបងជាស្រុកមួយដែលមានលក្ខណៈពិសេសជាងគេនៅទូទាំងខេត្តបាត់ដំបងទាំងមូល ដោយសារស្រុកនេះមានប្រជាជនរស់នៅច្រើនកុះករ ហើយលំនៅឋាននីមួយៗមានលក្ខណៈស្មុគស្មាញច្រើន ដូចជាលំនៅឋានប្រភេទភូមិគ្រឹះ លំនៅឋានលាយឡំគ្នាច្រើន ជាប្រភេទផ្ទះល្វែង ហាងទំនិញ សណ្ឋាគារ កន្លែងស្ថាប័ននានា សំណង់អនាធិបតេយ្យ។ល។ ដែលធ្វើអោយមានកាលំបាកចូលទៅសម្ភាសន៍ និងពិបាកស្វែងរកជួបម្ចាស់លំនៅឋាន ដើម្បីធ្វើសម្ភាសន៍ជាដើម។
លោក អ៊ុយ រី បានបន្តទៀតថា ដើម្បីកាត់បន្ថយការលំបាកទាំងនេះ សូមលោកមេឃុំ និងមន្ត្រីទទួលបន្ទុកជំរឿនគ្រប់លំដាប់ថ្នាក់ សហការនិងយកចិត្តទុកដាក់ដោយធ្វើការផ្សព្វផ្សាយទៅដល់ស្រទាប់ប្រជាជននៅមូលដ្ឋានតាមរយៈបដា និងខិត្តប័ណ្ណ ដែលមន្ទីរផែនការបានចែកជូនតាមបណ្ដាឃុំនីមួយៗ សម្រាប់ធ្វើការផ្សព្វផ្សាយដើម្បីឱ្យប្រជាជនក្នុងស្រុករបស់យើងបានយល់ដឹងជ្រួតជ្រាបទាំងអស់គ្នា។ ខ្ញុំសង្ឃឹមនិងជឿជាក់ថា វគ្គបណ្ដុះបណ្ដាលនេះនឹងប្រព្រឹត្តិទៅមានលក្ខណៈល្អប្រសើរ ពីព្រោះលោកគ្រូ អ្នកគ្រូ និងអស់លោក លោកស្រីដែលជាមន្ត្រីត្រួតពិនិត្យ និងមន្ត្រីសម្ភាសន៍ជំរឿនភាគច្រើនដែលបានជ្រើសរើសសុទ្ធតែមានបទពិសោធន៍ចូលរួមធ្វើជំរឿនក្នុងឆ្នាំ១៩៩៨ ម្ដងរួចមកហើយ។ ដូច្នេះត្រូវយោគយល់ថា ការងារជំរឿនទូទៅនូវប្រជារាស្ត្រនេះ ជាយុទ្ធនាការរបស់ជាតិតម្រូវឱ្យយើងចូលរួមទាំងអស់គ្នា ទើបការធ្វើជំរឿននេះទទួលបានលទ្ធផលត្រឹមត្រូវតាមការចង់បានរបស់រាជរដ្ឋាភិបាល។
លោក ប៊ុត គឹមស៊ាន អភិបាលរងខេត្តបានមានប្រសាសន៍ថា ការងារជំរឿនទូទៅនូវប្រជារាស្ត្រ គឺជាការងារមួយដ៏មានសារៈសំខាន់ជាប្រវត្តិសាស្ត្ររបស់ជាតិ ដើម្បីប្រមូលនូវទិន្នន័យដ៏ជាក់លាក់អំពីចំនួនសមាសភាព និងចរិតលក្ខណៈប្រជាជនសម្រាប់ជាមូលដ្ឋានក្នុងការរៀបចំផែនការអភិវឌ្ឍន៍នានា សមស្របទៅតាមតម្រូវការនិងលទ្ធភាពធនធានជាក់ស្ដែងរបស់ប្រទេសជាតិ។ ក្នុងនាមអភិបាលខេត្ត ខ្ញុំស្នើសុំឱ្យលោកអភិបាលស្រុក លោកមេឃុំគ្រប់ឃុំ ពេលយុទ្ធនាការត្រូវធ្វើការតាមដានឱ្យបានដិតដល់ចំពោះសកម្មភាពប្រតិបត្តិការរបស់មន្ត្រីសម្ភាសន៍ ហើយមានវិធានការដោះស្រាយអោយបានទាន់ពេលវេលារាល់ការលំបាកនានា និងត្រូវមានវិធានការអោយបានម៉ត់ចត់ក្នុងការរក្សាសន្តិសុខ សុវត្ថិភាពជូនមន្ត្រីសម្ភាសន៍ មន្ត្រីត្រួតពិនិត្យជំរឿនដែលត្រូវចុះប្រតិបត្តិការតាមមណ្ឌលជំរឿនទាំងអស់ឱ្យបាន១០០%។
លោកអភិបាលរងខេត្តបន្តទៀតថា ការបណ្ដុះបណ្ដាលមន្ត្រីជំរឿនខេត្ត មន្ត្រីជំនួយការជំរឿនខេត្ត និងគ្រូបង្វឹកជំរឿនសម្រាប់ស្រុក សរុបមានចំនួន៣៨នាក់ បានធ្វើរួចរាល់ហើយ ហើយថ្ងៃនេះជាការងារថ្មីមួយទៀតដែលគណៈកម្មការជំរឿនទូទៅនូវប្រជារាស្ត្រខេត្ត ធ្វើការបណ្ដុះបណ្ដាលព្រមគ្នាដល់មន្ត្រីត្រួតពិនិត្យ មន្ត្រីសម្ភាសន៍ជំរឿន មន្ត្រីជំរឿនឃុំ និងមន្ត្រីបម្រុងនៅទូទាំងខេត្ត ក៏ដូចជាស្រុកបាត់ដំបងនេះដែរ។ មន្ត្រីត្រួតពិនិត្យជំរឿន មន្ត្រីសម្ភាសន៍ជំរឿន មន្ត្រីជំរឿនឃុំ និងបម្រុងក្នុងម្នាក់ៗត្រូវចូលរួមបណ្ដុះបណ្ដាល១វគ្គ រយៈពេល៥ថ្ងៃពេញ ដែលវគ្គបណ្ដុះបណ្ដាលនេះត្រូវបានចែកជាពីរវគ្គផ្សេងគ្នា គឺវគ្គទី១ពីថ្ងៃទី១១-១៥ ខែកុម្ភៈ ឆ្នាំ២០០៨ ហើយវគ្គទី២ ពីថ្ងៃទី១៨-២២ ខែកុម្ភៈ ឆ្នាំ២០០៨។ សិក្ខាកាមសរុបនៅទូទាំងខេត្តមានចំនួន២.៨៣៩នាក់៕