ជំរឿនទូទៅនូវប្រជាជនកម្ពុជាឆ្នាំ២០០៨រយៈពេល១០ថ្ងៃ ដែលបានបើកជាផ្លូវការកាលពីថ្ងៃទី៣ មីនា នឹងត្រូវបញ្ចប់នៅថ្ងៃទី១៣មីនានេះ។ មន្ត្រីក្រសួងផែនការបានថ្លែងឲ្យដឹងកាលពីថ្ងៃពុធម្សិលមិញថា យុទ្ធនាការធ្វើជំរឿនដែលបានចាប់ផ្ដើមពីម៉ោង០០ថ្ងៃទី០៣ ខែមីនា រហូតមកដល់ថ្ងៃ១២ខែមីនាឆ្នាំ២០០៨នេះសម្រេចបានលទ្ធផលជាង៩០% ហើយ។ ការសម្រេចលទ្ធផលល្អ ដែលត្រូវបានលោកស្រីហង្ស លីណាអគ្គលេខាធិការរងនៃក្រសួងផែនការថ្លែងពន្យល់ថា គឺបណ្ដាលមកពីការខិតខំប្រឹងប្រែងរបស់មន្ត្រីជំរឿនចំពោះកិច្ចប្រតិបត្តិការណ៍ ភាពសកម្មនៃការចូលរួមរបស់ប្រជាពលរដ្ឋសមត្ថភាពនៃក្រុមមន្ត្រីចុះធ្វើជំរឿនជាដើម។
លោកស្រីហង្ស លីណាមានប្រសាសន៍ថា៖ "យោងតាមរបាយការណ៍ពីថ្នាក់ខេត្ត និងក្រុងភ្នំពេញបានឲ្យដឹងថា ចាប់តាំងពីដំណើរការក្នុងធ្វើជំរឿនមក កម្ពុជាបានសម្រេចលទ្ធផលជាង ៩០% ហើយមកទល់ថ្ងៃពុធនេះ"។ លោកស្រីបន្តថា៖ "ទន្ទឹមនឹងការសម្រេចជោគជ័យនេះ មានមន្ត្រីជំរឿនមួយចំនួនបានជួបប្រទះនឹងការលំបាកលើបញ្ហាថវិកា ដែលផ្ដល់សម្រាប់មន្ត្រីធ្វើជំរឿនមានកម្រិត មន្ត្រីធ្វើជំរឿនខ្លះត្រូវចុះបំពេញភារៈកិច្ចនៅតំបន់ឆ្ងាយៗដាច់ស្រយាល ឬចូលលុកទៅក្នុងព្រៃភ្នំជាដើម។ ប៉ុន្តែទោះបីយ៉ាងនេះក្ដី យើងនៅតែសហការគ្នាដើម្បីធ្វើដំណើរទៅតំបន់ព្រៃដាច់ស្រយាលដែរ ដើម្បីធ្វើជំរឿនប្រជាជន។ដូច្នេះនេះគឺជាផលពិបាកសម្រាប់មន្ត្រីជំរឿនយើង"។ បើទោះបីជាដំណើរការជំរឿនត្រូវបិទបញ្ចប់ជាផ្លូវការនៅថ្ងៃនេះក្ដី ប៉ុន្តែបើតាមការឲ្យដឹងរបស់លោកស្រីហង្ស លីណា ការធ្វើជំរឿននេះត្រូវបានពន្យារពេលសម្រាប់តំបន់មួយចំនួន ដូចជាទីក្រុងភ្នំពេញ និងខេត្តមណ្ឌលគីរី។ លោកស្រីបានថ្លែងថា៖ "ការពន្យារពេលនេះ គឺត្រឹមតែ១ថ្ងៃប៉ុណ្ណោះព្រោះយើងគ្រាន់តែមិនទាន់បានចុះជួបជាមួយអ្នកដែលត្រូវសម្ភាសន៍សម្រាប់តំបន់មួយចំនួន ដោយសារតែកម្មករដែលធ្វើការសំណង់គាត់ពុំមានវេលាគ្រប់គ្រាន់ក្នុងការជួបជាមួយមន្ត្រីជំរឿនទេ ដូច្នេះយើងក៏មានការយឺតយ៉ាវ។ ចំណែកឯខេត្តមណ្ឌលគីរីវិញយើងទើបតែទទួលព័ត៌មាននៃការរស់នៅរបស់បងប្អូនដែលនៅតំបន់ឆ្ងាយៗដាច់ស្រយាល ដូច្នេះយើងត្រូវចំណាយពេលវេលាសម្រាប់ការធ្វើដំណើរផ្លូវឆ្ងាយ"។
លោកគល់ បញ្ញានាយកប្រតិបត្តិអង្គការ Comfrel បានមានប្រសាសន៍ថា៖ "ការពន្យារពេលនៃការធ្វើជំរឿនលើស១ថ្ងៃទៀតវាគឺជារឿងល្អព្រោះយើងអាចមានឱកាសច្រើនប្រមូលប្រជាពលរដ្ឋ ម៉្យាងទៀតយើងក៏អាចដឹងពីភាពខ្វះខាតរបស់ប្រជាពលរដ្ឋនៅតាមតំបន់ដាច់ស្រយាល និងតាមជនបទមួយចំនួនដែលកំពុងជួបផលលំបាក"។ លោកក៏បានជំរុញឲ្យក្រសួងផែនការសម្រេចការធ្វើជំរឿនឲ្យបាន ១០០% និងបានថ្លែងថា ដើម្បីអាចឲ្យលទ្ធផលនៃជំរឿននេះទុកចិត្តបានគួរតែមានការត្រួតពិនិត្យពីអង្គការក្រៅរដ្ឋាភិបាលផងដែរ។
សម្រាប់លោកហង្ស ពុទ្ធា នាយកប្រតិបត្តិអង្គការនិកហ្វីក មានប្រសាសន៍ថា៖"អ្វីដែលអ្នកអង្កេតការណ៍បានរាយការណ៍មកអំពីដំណើរការជំរឿនក្នុងពេលបច្ចុប្បន្ននេះ គឺតួលេខអាចយកជាផ្លូវការបាន"។ លោកគូសបញ្ជាក់ថា ដោយសារកត្តាភូមិសាស្ត្រ និងកត្តាប្រជាពលរដ្ឋធ្វើឲ្យជំរឿនមានការលំបាក និងត្រូវពន្យារពេល ពិសេសទាក់ទង និងបញ្ញត្តិ និងការចំណាយថវិកា ឬពេលវេលាជាដើម"។ លោកបន្តថា៖"ដូច្នេះក្នុងនាមជាអង្គការសង្កេតការណ៍ក៏ជួបបញ្ហាលំបាកដែរ។ ប៉ុន្តែអ្វីដែលសំខាន់បំផុត គឺដើម្បីឲ្យបានតួលេខមួយប្រាកដច្បាស់លាស់ដែលអាចប្រើប្រាស់ជាផ្លូវការបានយើងទាំងអស់គ្នាគួរខិតខំប្រឹងប្រែងបន្ថែមទៀត ហើយក្រសួងគួរធ្វើការត្រួតពិនិត្យឲ្យបាន ល្អិតល្អន់ចំពោះការស្រង់ទិន្នន័យ និងការចំណាយថវិកាចំពោះមន្ត្រីជំរឿនជាដើម។
គួរបញ្ជាក់ថា បន្ទាប់ពីរបបប៉ុល ពតបានដួលរលំទៅនៅឆ្នាំ១៩៧៩ កម្ពុជាបានធ្វើជំរឿនប្រជារាស្ត្រពីរលើកធំៗ គឺជំរឿនប្រជារាស្ត្រ និងលំនៅដ្ឋានលើកទី១ ដែលប្រទេសកម្ពុជាបានដឹកនាំធ្វើនៅឆ្នាំ១៩៩៨ ហើយបានបង្ហាញថា កម្ពុជាមានប្រជាជនចំនួន១១.៤លាននាក់។ សម្រាប់ឆ្នាំ២០០៨នេះ កម្ពុជាបានបើកធ្វើជំរឿនរាប់ប្រជាជនខ្លួន ម្ដងទៀតហើយត្រូវគេប៉ាន់ស្មានថា ប្រជាជនកម្ពុជា និងមានជាង១៤.៥លាននាក់៕