រូបថតនារីកូនខ្មែរដែលជាប់រង្វាន់រូបថតមួយដែលអ្នកថតរូប បានផ្ដិតយករូបភាពរបស់កុមារីជនជាតិកម្ពុជាមួយរូប បានត្រូវឈ្នះនៅក្នុងកម្មវិធីប្រឡងប្រណាំងស្នាដៃមួយ របស់អង្គការសម្ព័ន្ធសិល្បៈបូនីតា (Art League of Bonita)។
យោងទៅតាមសេចក្ដីប្រកាសព័ត៌មានមួយ របស់អង្គការនេះបានឲ្យដឹងថា អ្នកដែលឈ្នះនៅក្នុងពិព័រណ៍សមាជិកប្រចាំឆ្នាំ កាលពីថ្ងៃសុក្រ សប្ដាហ៍កន្លងទៅនេះ គឺបានទៅលើលោកថម រីស (Tom Reusse)។
ប្រភពដដែលនោះបានឲ្យដឹងថា នៅក្នុងកម្មវិធីប្រឡងស្នាដៃថតរូបនេះមានមនុស្សជាសមាជិករបស់អង្គការនេះ ចំនួនប្រមាណជា៥០០នាក់ បានចូលរួម ដោយពួកគេបាននាំយកនូវស្នាដៃថតជាច្រើនដែលពួកគេបានថត តែរូបថតដែលឈ្នះជារូបភាពដ៏ល្អដាច់គេនោះ គឺជារូបភាពរបស់កុមារីជនជាតិកម្ពុជាទៅវិញ។
ពិធីនេះ គឺជាពិធីមួយដែលគេរៀបចំឡើងដើម្បីធ្វើសកម្មភាពរៃអង្គាសប្រាក់សម្រាប់កិច្ចការមនុស្សធម៌មួយ។ នៅក្នុងកម្មវិធីនេះ គេបានយករូបភាពមកដាក់តាំងនៅតាមបន្ទប់តាំងពិព័រណ៍ដើម្បីលក់ ហើយយកប្រាក់សម្រាប់ផ្គត់ផ្គង់កម្មវិធីមនុស្សធម៌ផ្សេងៗ។
សេចក្ដីប្រកាសព័ត៌មានដដែលនោះ បានឲ្យដឹងថា កម្មវិធីនេះនឹងត្រូវបញ្ចប់នៅក្នុងថ្ងៃទី២១ ខែកុម្ភៈខាងមុខ។
អង្គការសម្ព័ន្ធសិល្បៈបូនីតានេះ គឺជាអង្គការមិនគិតប្រាក់ចំណេញមួយដែលមានមូលដ្ឋាននៅក្នុងរដ្ឋផ្លរីដា (Florida) សហរដ្ឋអាមេរិក ៕