មន្ត្រីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈបានឲ្យដឹងកាលពីថ្ងៃអង្គារម្សិលមិញថា កម្ពុជាមានគម្រោងក្នុងការបញ្ជូនពលករឲ្យទៅធ្វើការនៅក្នុងប្រទេសកាតានាពេលឆាប់ៗខាងមុខនេះ បើសិនណា ការពិភាក្សាដែលកំពុងធ្វើរវាងរដ្ឋាភិបាលនៃប្រទេសទាំងពីរអាចអនុវត្តន៍បាន។
លោក អ៊ំ មាន អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា៖ "យើងកំពុងពិនិត្យទៅលើខ្លឹមសារនៃអនុស្សរណៈស្ដីពីការយោគយល់ក្នុងការបញ្ជូនពលករ ហើយយើងនឹងអនុវត្តន៍វាភ្លាម បើសិនណា លក្ខខណ្ឌទាំងឡាយធានាដល់សុវត្ថិភាព និងសុខុមាលភាពពលកររបស់យើង"។ លោក អ៊ំ មាន បានថ្លែងថា៖ "ការបញ្ជូនពលកររបស់យើងចេញ គឺអាចឲ្យពួកគេបានសិក្សា និងបង្កើននូវជំនាញថែមមួយកម្រិតទៀត ពីព្រោះថា ពេលដែលពួកគេត្រឡប់មកវិញគេអាចធ្វើការក្នុងនាមជាអ្នករួមចំណែកកសាងសេដ្ឋកិច្ចជាតិរបស់យើងឲ្យមានសក្ដានុពលកាន់តែខ្លាំង"។ លោក អ៊ំ មាន បានមានប្រសាសន៍បន្ថែមថា៖ "យើងគិតថា ពលករទាំងនោះមិនមែនបានត្រឹមតែបៀវត្សរ៍ច្រើនសម្រាប់រួមចំណែកដល់ការបង្កើនជីវភាពគ្រួសាររបស់គេផ្ទាល់ប៉ុណ្ណោះទេ ប៉ុន្តែក៏ជួយប្រមូលរូបិយប័ណ្ណមកក្នុងប្រទេសកាន់តែច្រើនផងដែរ"។
ប្រទេសកម្ពុជា ដែលមានកម្លាំងពលកម្មប្រមាណជាង ៣០ ម៉ឺននាក់ក្នុងមួយឆ្នាំៗ មានមហិច្ឆតាចង់បញ្ជូនពលកររបស់ខ្លួនចេញទៅកាន់ទីផ្សារការងារនៅក្រៅប្រទេសឲ្យបានច្រើនតាមតែអាចធ្វើទៅបាននៅក្នុងពេលវេលាដ៏ខ្លីខាងមុខនេះ។
យោងតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈបានឲ្យដឹងថា បច្ចុប្បន្នប្រទេសកម្ពុជាបានបញ្ជូនចេញពលករស្របច្បាប់ទៅធ្វើការនៅក្រៅប្រទេសតាមប្រព័ន្ធ ITS និង EPS សរុបបានចំនួន ២១ ៨២៦ នាក់ ក្នុងនោះទៅថៃ ៧ ៣៧៥ នាក់ ម៉ាឡេស៊ី ១១ ៨៥២ នាក់ និងប្រទេសកូរ៉េខាងត្បូង ២ ៥៩៩ នាក់។
កាលពីថ្ងៃអង្គារម្សិលមិញ គេមិនទាន់ច្បាស់នៅឡើយទេថា តើកម្ពុជានឹងនាំចេញកម្លាំងពលកម្មរបស់ខ្លួនប៉ុន្មាននាក់ ទៅកាន់ប្រទេសកាតានោះ ពីព្រោះថា ប្រទេសកាតាដែលជាអ្នកចង់បានពលករពីកម្ពុជានៅមិនទាន់បញ្ជូនបញ្ជី ស្ដីពីតម្រូវការពលកររបស់ខ្លួនមកឲ្យកម្ពុជានៅឡើយទេ។ បច្ចុប្បន្នកម្ពុជា និងប្រទេសកាតាកំពុងតែធ្វើការពិភាក្សាតាមរយៈក្រសួងការបរទេសនៃប្រទេសទាំងពីរទៅលើការងារនេះហើយ។ នេះបើយោងតាមការអះអាងរបស់ក្រសួងការងារ និងបណ្ដុះបណ្ដាលវិជ្ជាជីវៈ"។
លោក សុន ឆ័យ ប្រធានគណៈកម្មការកិច្ចការបរទេសនៃរដ្ឋសភាជាតិ បានមានប្រសាសន៍ថា យើងមានការបារម្ភខ្លាំងណាស់ចំពោះផែនការបញ្ជូនចេញនូវកម្លាំងពលកម្មពីកម្ពុជា ពីព្រោះថា ភាគច្រើននៃពលករទាំងនោះ ច្រើនតែទៅធ្វើការផ្អែកទៅលើការប្រើកម្លាំងច្រើនជាងជំនាញ។ លោក សុន ឆ័យ បានថ្លែងថា៖ "យើងគិតថា ការបញ្ជូនពលករចេញទៅក្រៅប្រទេស មិនមែនជាមធ្យោបាយពង្រឹង និងលើកតម្កើងជីវភាពពលរដ្ឋ និងសេដ្ឋកិច្ចជាតិទេ។ ការធ្វើឲ្យជោគជ័យដល់ការទ្រទ្រង់ជីវភាពរស់នៅរបស់ពលរដ្ឋប្រសើរឡើង គឺរដ្ឋាភិបាលចាំបាច់ត្រូវតែរៀបរយប្រទេសធ្វើឲ្យមានការទាក់ទាញវិនិយោគដោយបង្កើតការងារក្នុងស្រុក"។
ដោយលើកឧទាហរណ៍ពីប្រទេសហ្វីលីពីនដែលមានការបញ្ជូនចេញពលករទៅក្រៅប្រទេសជិតពាក់កណ្ដាលក្នុងមួយឆ្នាំៗនោះលោក សុន ឆ័យ បានមានប្រសាសន៍ថា៖ "យើងមិនឃើញប្រទេសនេះមានជីវភាព និងសេដ្ឋកិច្ចប្រសើរជាងប្រទេសដទៃនៅក្នុងតំបន់ទេ។ ពួកគេអន់ជាងថៃ និងម៉ាឡេស៊ីទៅទៀត"។
គួររម្លឹកថា ដើម្បីធ្វើឲ្យពលករកម្ពុជាមានសក្ដានុពលក្នុងការរកប្រាក់ចំណូលជួយគ្រួសារ និងសេដ្ឋកិច្ច កាលពីថ្ងៃទី១២ ខែមិថុនា ឆ្នាំ២០០៨ លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីបានអំពាវនាវឲ្យគ្រប់គ្រឹះស្ថានឧត្ដមសិក្សាទាំងអស់នៅទូទាំងប្រទេស ធ្វើការតម្រង់ទិសអប់រំធនធានមនុស្សរបស់ខ្លួនឲ្យត្រូវទៅនឹងតម្រូវការទីផ្សារការងារព្រោះថា ការអភិវឌ្ឍធនធានមនុស្សចំទិស គឺជាឆ្អឹងខ្នងនៃការអភិវឌ្ឍជាតិ។
ទាក់ទងនឹងបញ្ហានេះ លោក អ៊ំ មាន បានមានប្រសាសន៍ថា៖ "យើងនឹងបណ្ដុះបណ្ដាលយុវជនរបស់យើងឲ្យតម្រង់ទិសទៅរកជំនាញខ្ពស់ៗដើម្បីអាចប្រកួតប្រជែងការងារនៅក្រៅប្រទេសបាន។ កម្ពុជានឹងបញ្ជូនចេញតែពលករដែលមានជំនាញប៉ុណ្ណោះនៅពេលអនាគត"៕