ភ្នំពេញ ៖ ក្រុមហ៊ុនប្រេងឥន្ធនៈសាំងហ្គាពួរ (Singapore Petroleum Company) បានអះអាងថា ខ្លួន និងក្រុមហ៊ុនដៃគូកំពុងតែចាប់ផ្ដើមដំណើរការខួងរុករកអណ្ដូងប្រេងកាតនៅក្នុងប្លុកបេ នាតំបន់ឆ្នេររបស់ប្រទេសកម្ពុជា កាលពីថ្ងៃ អង្គារ កន្លងទៅនេះ។
យោងទៅតាមសេចក្ដីប្រកាសមួយរបស់ក្រុមហ៊ុនខាងលើ កាលពីថ្ងៃទី ៨ ខែ កក្កដា កន្លងទៅបានឲ្យដឹងថា អណ្ដូងដែលកំពុងតែខួងនោះ គឺជាអណ្ដូងទីមួយនៅក្នុងប្លុកបេ ដែលមានចម្ងាយប្រមាណជា ១៦០គីឡូម៉ែត្រ ភាគនិរតីពីទីក្រុងព្រះសីហនុ ហើយមានចម្ងាយប្រមាណជា៨០គីឡូម៉ែត្រ ពីកន្លែងត្រួតស៊ីគ្នានៃព្រំដែនសមុទ្រកម្ពុជា និងថៃ។
ប្រភពដដែលនោះបានឲ្យដឹងថា ការខួងនេះ គឺដើម្បីសាកល្បងពិសោធន៍សក្ដានុពលនៃអ៊ីដ្រូកាបូន (Hydrocarbon) ដែលជាជំហានដ៏សំខាន់មួយសម្រាប់កំណត់អំពីការធ្វើអាជីវកម្មធនធានប្រេងកាត។ គេរំពឹងថា នឹងអាចទទួលបានលទ្ធផលនៅក្នុងរង្វង់ប្រមាណជា ១៥ថ្ងៃ ដោយត្រូវខួងរហូតដល់ទៅជម្រៅ២.៩១៧ម៉ែត្រ ក្រោមសមុទ្រ។
លោក តែ ដួងតារា អគ្គលេខាធិការនៃអាជ្ញាធរប្រេងកាតកម្ពុជាមិនអាចទំនាក់ទំនងបានទេកាលពីថ្ងៃទី ៩ ខែ កក្កដា ប៉ុន្តែកាលពីដើមខែ មីនា កន្លងទៅលោកបានអះអាងថា ការធ្វើអាជីវកម្មប្រេងកាតនៅក្នុងប្រទេសកម្ពុជាប្រហែលជានឹងប្រព្រឹត្តទៅនៅក្នុងរង្វង់ឆ្នាំ ២០១១ ខាងមុខ ហើយនៅពេលនោះតម្លៃប្រេងនៅក្នុងប្រទេសនឹងចុះថោក។
កំណប់រ៉ែប្រេងកាតនៅក្នុងប្រទេសកម្ពុជា ត្រូវបានគេអះអាងអំពីវត្តមានរបស់វាពិតប្រាកដកាលពីឆ្នាំ ២០០៥ ដោយក្រុមហ៊ុនអាមេរិកាំង មួយហើយនៅពេលបច្ចុប្បន្ននេះរដ្ឋាភិបាលបែងចែកនៃការរុករកវត្តមានរ៉ែដ៏មានតម្លៃនេះជា៦ប្លុក។
ក្រុមហ៊ុនប្រេងឥន្ធនៈសាំងហ្គាពួរ គឺជាក្រុមហ៊ុនរុករករ៉ែប្រេងកាត និងឧស្ម័ននៅក្នុងតំបន់មួយដែលកំពុងតែកាន់កាប់ភាគហ៊ុននៅក្នុងប្លុកបេនោះចំនួន៣៣,៣៣ភាគរយ៕