រាជធានីភ្នំពេញ៖ នៅសាលប្រជុំរបស់ធនាគារជាតិនៃកម្ពុជានាព្រឹកថ្ងៃទី៧ កក្កដាមានប្រារព្ធពិធីបើកវគ្គសុក្រឹតការសម្រាប់មន្ត្រីបុគ្គលិកធនាគារជាតិនៃកម្ពុជាជំនាន់ទី៩ ក្រោមអធិបតីភាពលោក ជា ចាន់តូ ទេសាភិបាលធនាគារជាតិនៃកម្ពុជា ដោយមានសិក្ខាកាមចូលរួមចំនួន៩០នាក់។
តាមរបាយការណ៍របស់គណៈកម្មការរៀបចំវគ្គសុក្រឹតការនេះបានឲ្យដឹងថា ដោយទទួលបានការអនុញ្ញាតពីលោកទេសាភិបាលគណៈកម្មការរៀបចំវគ្គសិក្សា បានរៀបចំវគ្គសុក្រឹតការជំនាន់ទី៩ ដែលប្រព្រឹត្តទៅចាប់ពីថ្ងៃទី ៧ កក្កដា រហូតដល់ថ្ងៃទី ១១ កញ្ញា ឆ្នាំ ២០០៨ ដោយមានសិក្ខាកាមជាមន្ត្រីបុគ្គលិកចំនួន៩០នាក់ ក្នុងនោះមកពីទីស្នាក់ការកណ្ដាល៤៩នាក់ និងមកពីសាខាធនាគារជាតិនៃកម្ពុជាចំនួន៤១នាក់។ វគ្គសុក្រឹតការសម្រាប់មន្ត្រីបុគ្គលិកបានអនុវត្តចាប់តាំងពីឆ្នាំ ១៩៩៩រហូតមកដល់ឆ្នាំ ២០០៧ គឺមានចំនួន៨វគ្គ រួចមកហើយ ដោយមានមន្ត្រីបុគ្គលិកក្នុងក្របខណ្ឌ និងមន្ត្រីបុគ្គលិកជ្រើសរើសសរុបចំនួន៥៥៥នាក់ ក្នុងនោះ មកពីទីស្នាក់ការកណ្ដាលចំនួន២៨៩នាក់ និងមកពីសាខាធនាគារជាតិនៃកម្ពុជាចំនួន២៦៦នាក់។ វគ្គសុក្រឹតការបានរៀបចំឡើងក្នុងគោលបំណងជំរុញឲ្យសិក្ខាកាមយល់ដឹងអំពីប្រតិបត្តិការរបស់ធនាគារកណ្ដាល និងសកម្មភាពការងារផ្សេងៗពាក់ព័ន្ធនឹងសេដ្ឋកិច្ចប្រព័ន្ធធនាគារ និងហិរញ្ញវត្ថុ។
មន្ត្រីដែលត្រូវឧទ្ទេសនាមក្នុងវគ្គសុក្រឹតការជំនាន់ទី៩នេះ រួមមានលោកជំទាវទេសាភិបាលរង លោក- លោកស្រីថ្នាក់អគ្គនាយក ថ្នាក់ការិយាល័យ និងជំនាញការអមធនាគារជាតិនៃកម្ពុជា។ លើសពីនេះទៀត វគ្គសុក្រឹតការនេះមានកិត្តិយសយ៉ាងក្រៃលែងដោយមានវត្តមានដ៏ខ្ពង់ខ្ពស់របស់លោកទេសាភិបាលបានចូលរួមផ្ដល់នូវបទឧទ្ទេសនាមដូចវគ្គមុនៗដែរ ដើម្បីញ៉ាំងឲ្យដំណើរការប្រកបដោយជោគជ័យ។
ក្នុងឱកាសនោះដែរ លោក ជា ចាន់តូ ទេសាភិបាលធនាគារជាតិនៃកម្ពុជា បានថ្លែងថា ឆ្នាំនេះ វគ្គសុក្រឹតការរបស់យើងបានប្រារព្ធធ្វើឡើងចំពេលដែលប្រជាជនកម្ពុជានៅទូទាំងប្រទេស កំពុងត្រៀមខ្លួនចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៤ ដែលនឹងប្រព្រឹត្តទៅនៅថ្ងៃទី ២៧ កក្កដា ឆ្នាំ ២០០៨ ខាងមុខនេះ។
លោក ជា ចាន់តូ បានលើកឡើងនៅចុងឆ្នាំ ២០០៧ និងដើមឆ្នាំ ២០០៨ នេះ ពិភពលោកទាំងមូលប្រឈមមុខនឹងបញ្ហាធំៗមួយចំនួនដូចជា ១-វិបត្តិឥណទាននិក្ខេប (Mortgage loan crisis) ២-ប្រេងឥន្ធនៈឡើងថ្លៃ ៣- ការធ្លាក់ចុះនៃប្រាក់ដុល្លារអាមេរិក ៤-គ្រោះធម្មជាតិក្នុងតំបន់ ៥- ការឡើងថ្លៃនៃគ្រឿងឧបភោគ- បរិភោគ ឬវិបត្តិអង្ករ និង ៦- បញ្ហាអតិផរណាដែលជាកង្វល់រួមរបស់កម្ពុជាយើងផង របស់តំបន់ផង និងរបស់ពិភពលោកទាំងមូលផង។ តាមរបាយការណ៍របស់អង្គការមូលនិធិរូបិយវត្ថុអន្តរជាតិ (IMF) នៅឆ្នាំ ២០០៨ សេដ្ឋកិច្ចពិភពលោករំពឹងថា កំណើនធ្លាក់ចុះមកត្រឹម ៤,៨% ធៀបជាមួយអត្រាកំណើន ៥,២% ក្នុងឆ្នាំ២០០៧។ សេដ្ឋកិច្ច សហរដ្ឋអាមេរិកនិងអឺរ៉ុបមានការកើនឡើង ១,៩% និង ២,១% រៀងគ្នា។ កំណើនសេដ្ឋកិច្ចខ្ពស់ក្នុងបណ្ដាប្រទេសអាស៊ីត្រូវបានរំពឹងថា សន្ទុះកំណើននឹងរក្សាបាននូវភាពប្រសើរដោយប្រទេសចិនមានកំណើន១០% ប្រទេសឥណ្ឌាកើន៨% ប្រទេសជប៉ុននឹងកើន១,៧% និងក្រុមប្រទេសអាស៊ាននឹងធ្លាក់មកត្រឹម៥,៧% ក្នុងឆ្នាំ២០០៨ ធៀបនឹង៦,៥% នៅឆ្នាំ ២០០៧។
ចំពោះសេដ្ឋកិច្ចកម្ពុជា នៅឆ្នាំ ២០០៨ នេះ បើតាមការព្យាករណ៍ដោយប្រុងប្រយ័ត្នគ្រោងថា មានកំណើនក្នុងកំរិត៩,៥% ធៀបនឹងអត្រាកំណើន១០,១% នៅឆ្នាំ ២០០៧។ ជារួម ស្ថានភាពម៉ាក្រូសេដ្ឋកិច្ចកម្ពុជាមានស្ថិរភាពល្អប្រសើរ ទោះបីជាសម្ពាធអតិផរណានៅចុងឆ្នាំ ២០០៧ និងដើមឆ្នាំ ២០០៨ កើនឡើងគួរឲ្យកត់សំគាល់ក៏ដោយ។ អត្រាប្ដូរប្រាក់ និងតម្លៃប្រាក់រៀលមានស្ថិរភាពល្អ បើធៀបនឹងដុល្លារអាមេរិក។ ចំណែកឯទុនបម្រុងអន្តរជាតិបានបន្តកើនឡើងជាង២ពាន់លានដុល្លារអាមេរិក។ ឥណទានចំពោះវិស័យឯកជនមានការកើនឡើងចំនួន៨០% និងប្រាក់បញ្ញើក្នុងប្រព័ន្ធធនាគារមានការកើនឡើងចំនួន៧៥% នៅឆ្នាំ ២០០៧។ ប្រការនេះបង្ហាញថា ជំនឿទុកចិត្តលើប្រព័ន្ធធនាគារកើនឡើងហើយប្រតិបត្តិការធនាគារក៏កាន់តែមានសកម្មភាពខ្លាំងឡើងផងដែរ៕