លោកស ខេង អញ្ជើញកាត់ខ្សែបូក្នុងពិធីបញ្ចុះខណ្ឌសីមាវត្តចែងរង្ស៊ី (រូបថត ៖ អ.សំអាន)ខេត្តបាត់ដំបង ៖ ប្រទេសកម្ពុជាយើងទើបតែធ្វើជំរឿនប្រជាពលរដ្ឋបានចំនួន ២លើកប៉ុណ្ណោះ។ ដែលក្នុងនោះអំឡុងសម័យសង្គមរាស្ត្រនិយមធ្វើបានចំនួន១លើក ហើយជាលើកទី២បានធ្វើឡើងក្នុងអំឡុងឆ្នាំ១៩៩៨ ក្នុងសម័យព្រះរាជាណាចក្រកម្ពុជាជាលើកទី២ ហើយសម្រាប់ការត្រៀមរៀបចំធ្វើការជំរឿនប្រជាពលរដ្ឋកម្ពុជាដែលគ្រោងធ្វើឡើងនៅថ្ងៃទី៣ ដល់ថ្ងៃទី១៣ ខែមីនា ឆ្នាំ២០០៨ឆាប់ៗខាងមុខនេះ គឺជាការធ្វើជំរឿន និងអង្កេតប្រជាពលរដ្ឋកម្ពុជាលើកទី៣ ក្នុងរយៈពេលចន្លោះ១០ឆ្នាំ កន្លងមកនោះ។
នេះជាប្រសាសន៍របស់លោកឧបនាយករដ្ឋមន្ត្រីស ខេងរដ្ឋមន្ត្រីក្រសួងមហាផ្ទៃក្នុងឱកាសប្រារព្ធពិធីបញ្ចុះខណ្ឌសីមា វត្តចែងរង្ស៊ី ស្ថិតក្នុងឃុំអូរដំបង ស្រុកសង្កែ ខេត្តបាត់ដំបង កាលពីព្រឹកថ្ងៃទី០៦ ខែកុម្ភៈ ឆ្នាំ២០០៨កន្លងទៅថ្មីៗនេះ។
តាមរយៈប្រសាសន៍សំណេះសំណាលជាមួយប្រជាពលរដ្ឋនៅទីនោះ លោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃបានលើកឡើងនូវព្រឹត្តិការណ៍ជាតិសំខាន់ៗសម្រាប់ឆ្នាំ២០០៨នេះថា ក្នុងឆ្នាំនេះមានព្រឹត្តិការណ៍សំខាន់ចំនួន២ ដែលសំណូមពរដល់ប្រជាពលរដ្ឋទាំងអស់គ្រប់ទិសទី គ្រប់ខេត្ត - ក្រុងត្រូវចូលរួម ដែលក្នុងនោះព្រឹត្តិការណ៍បោះឆ្នោតជាតិជាសកលអាណត្តិទី៤នៃរដ្ឋសភាដែលប្រព្រឹត្តធ្វើឡើងនាថ្ងៃទី២៧ ខែកក្កដា ឆ្នាំ២០០៨ខាងមុខ។ ព្រឹត្តិការណ៍ទី២ទៀតនោះ ឆ្នាំ២០០៨នេះនៅថ្ងៃទី០៣ ដល់ថ្ងៃទី១៣ ខែមីនា ឆ្នាំ២០០៨គឺកម្ពុជាយើងធ្វើជំរឿនប្រជាពលរដ្ឋក្របខ័ណ្ឌថ្នាក់ជាតិនៅទូទាំងប្រទេសតែម្ដង។
លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានធ្វើការគូសបញ្ជាក់ពន្យល់ហេតុផលដល់ប្រជាពលរដ្ឋទាំងអស់ថា ការធ្វើជំរឿនប្រជាពលរដ្ឋគឺមានន័យថា មិនត្រឹមតែរាប់ចំនួនប្រជាពលរដ្ឋនោះទេ អត្ថន័យផ្ដោតយ៉ាងសំខាន់នោះការធ្វើជំរឿននូវប្រជាពលរដ្ឋបានន័យថា រាប់មនុស្សផង និងអង្កេតលើបញ្ហាទាំងអស់របស់មនុស្សផង។
លោកស ខេង បានលើកជាឧទាហរណ៍ពន្យល់ថា ឧបមាក្រុមគ្រួសារមួយហ្នឹងមានមនុស្សប៉ុន្មាននាក់? អាយុ១៨ឆ្នាំប៉ុន្មាននាក់? អាយុ១ខែប៉ុន្មាននាក់? កម្រិតសិក្សាដល់ថ្នាក់ណា? ជីវភាពរស់នៅយ៉ាងដូចម្ដេច? សុខភាព។ល។ និង។ល។ ទាំងអស់នេះជាព័ត៌មានអង្កេតហើយត្រូវបានគេប្រមូលនូវព័ត៌មានទាំងអស់នេះឡើងដើម្បីធ្វើការវិភាគក្នុងក្របខ័ណ្ឌទូទាំងប្រទេសដើម្បីយកទៅពិនិត្យផ្អែកលើទិន្នន័យដែលប្រមូលបានទាំងនេះ ដើម្បីប្រើប្រាស់នូវតម្រូវការចាំបាច់របស់ប្រទេសកម្ពុជា ហើយការធ្វើរបៀបនេះ ប្រទេសណាក៏គេធ្វើរបៀបនេះដែរ លើសកលលោក។
លោកស ខេង រដ្ឋមន្ត្រីក្រសួងមហាផ្ទៃបានក្រើនរំលឹកដាស់តឿន និងជំរុញដល់អាជ្ញាធរដែនដីគ្រប់លំដាប់ថ្នាក់ដែលអនុវត្ត និងទទួលខុសត្រូវផ្ទាល់ ជាពិសេសគឺថ្នាក់មូលដ្ឋានឃុំតែម្ដង ដែលត្រូវធ្វើកិច្ចការងារនេះជាក់ស្ដែងនោះ។ កិច្ចការនេះធ្វើឡើងក្នុងរយៈពេល១០ថ្ងៃប៉ុណ្ណោះ ដូចនេះគ្រប់អាជ្ញាធរទទួលខុសត្រូវ ត្រូវចេះបែងចែកកម្លាំងចុះស្រង់ស្ថិតិព័ត៌មានធ្វើបទសម្ភាសន៍ឲ្យបានសមស្របទាន់ពេលវេលា ដោយត្រូវចាត់កម្លាំងចុះតាមខ្នងផ្ទះនីមួយៗក្នុងមូលដ្ឋានភូមិ - ឃុំរបស់ខ្លួន។ ការចុះធ្វើជំរឿនប្រជាពលរដ្ឋក្នុងខេត្តបាត់ដំបង យ៉ាងហោចណាស់ជាង៣០០០នាក់ ដើម្បីចុះស្រង់ និងធ្វើជំរឿនក្នុងខេត្ត។
ជាមួយគ្នានេះដែរលោកស ខេងក៏បានអំពាវនាវដល់ប្រជាពលរដ្ឋទាំងអស់ដោយលើកឡើង និងរំលឹកថា ក្នុងចន្លោះពេលវេលាដែលធ្វើជំរឿននេះ គួរប្រជាពលរដ្ឋទាំងអស់លៃលកពេលវេលាដើម្បីមានវត្តមាននៅក្នុងផ្ទះរបស់ខ្លួនសម្រាប់ការចុះស្រង់ព័ត៌មាន និងជំរឿន និងជួយសម្រួលដល់ការចុះធ្វើជំរឿនរបស់មន្ត្រីជំនាញទាំងនោះ។ ជាការល្អទៀតនោះ គួរមានវត្តមានមេគ្រួសារប្ដីឬប្រពន្ធសម្រាប់ការផ្ដល់បទសម្ភាសន៍ដល់មន្ត្រីទាំងនោះ ក្នុងខណៈពេលដែលក្រុមមន្ត្រីជំនាញបានចុះទៅដល់លំនៅឋានរបស់ខ្លួន។
តាមការប៉ាន់ប្រមាណរបស់លោកស ខេង និងជាប្រធានគណៈកម្មាធិការជំរឿនប្រជាពលរដ្ឋថ្នាក់ជាតិបានឲ្យដឹងថា ចាប់តាំងពីឆ្នាំ១៩៧៩មក ដល់ថ្ងៃនេះមានចំនួនប្រជាជនអាចកើនប្រមាណ១៥លាននាក់៕