ប្រជាជន១៤ភាគរយប៉ុណ្ណោះដែលបានប្រើប្រាស់បង្គន់
ផ្ទះរបស់ប្រធានសមាគមបង្គន់ពិភពលោកមានរូបដូចបង្គន់ ហើយល្បីល្បាញនៅទូទាំងពិភពលោកភ្នំពេញ៖ ប្រទេសកម្ពុជានឹងចាប់ផ្ដើមចូលរួមនៅក្នុងបដិវត្តបង្គន់នៅពេលឆាប់ៗនេះ ដោយសហការជាមួយសមាគមបង្គន់ពិភពលោក។
ចយ យុន ស៊ុង (CHOI Yoon-Sung) អ្នកពិគ្រោះយោបល់នៃសមាគមបង្គន់ពិភពលោក បាននិយាយថា ប្រទេសកម្ពុជាត្រូវបានជ្រើសរើសជាប្រទេសមួយសម្រាប់គម្រោងសាកល្បងសាងសង់បង្គន់សាធារណៈ ដែលផ្ដួចផ្ដើមដោយសមាគមបង្គន់ពិភពលោក។ ប្រទេសទាំង១០ដែលត្រូវបានជ្រើសរើសនោះរួមមាន ប្រទេសកម្ពុជា ប្រទេសឡាវ ប្រទេសឥណ្ឌូនេស៊ី ប្រទេសចិន ប្រទេសម៉ុងហ្គោលី ហ្គាណា កាមេរូន កេនយ៉ា ប៉ាគីស្ថាន និងអាហ្វ្រិកខាងត្បូង។ ប្រទេសទាំង១០ត្រូវបានជ្រើសរើសចេញពីប្រទេសចំនួន១៩ ដែលបានស្នើសុំគម្រោងនេះ។
ចយ យុន ស៊ុង បាននិយាយថា រដ្ឋាភិបាលកម្ពុជាបានផ្ដល់ដីជិតព្រះបរមរាជវាំងដើម្បីធ្វើការសាងសង់បង្គន់សាធារណៈនៅក្នុងគម្រោងសាកល្បងនេះ។ គម្រោងដែលនឹងត្រូវចំណាយលុយពី៣៥.០០០ទៅ៤៥.០០០ដុល្លារអាមេរិក នឹងសាងសង់បង្គន់ដែលអាចឲ្យមនុស្សពិការក៏មានលទ្ធភាពប្រើប្រាស់បង្គន់នោះផងដែរ។ គម្រោងនេះគឺមានគោលបំណងដើម្បីកែលំអបង្គន់នៅកម្ពុជា និងលើកទឹកចិត្តប្រជាជនឲ្យប្រើប្រាស់បង្គន់ដើម្បីរក្សាអនាម័យ។ នេះគឺជាផ្នែកមួយនៃបដិវត្តបង្គន់ ដោយផ្ដោតទៅលើការលើកកម្ពស់ឲ្យមានបង្គន់សាធារណៈដែលអាចបម្រើដល់សាធារណជន។
គម្រោងសាកល្បងសាងសង់បង្គន់សាធារណៈដែលផ្ដួចផ្ដើមដោយសមាគមបង្គន់ពិភពលោកនឹងចាប់ផ្ដើមនៅក្នុងរង្វង់ខែកញ្ញា ហើយត្រូវបញ្ចប់ឲ្យបានមុនពេលខួបមួយឆ្នាំនៃការបង្កើតសមាគមបង្គន់ពិភពលោក ដែលត្រូវនឹងថ្ងៃទី២២ ខែវិច្ឆិកា។
សមាគមបង្គន់ពិភពលោកកំពុងតែធ្វើបដិវត្តបង្គន់មួយនៅទូទាំងពិភពលោក ដោយក្នុងនោះក៏រួមមានប្រទេសកម្ពុជាផងដែរ។ គោលបំណងគឺដើម្បីបង្កើតវប្បធម៌នៃការប្រើប្រាស់បង្គន់។
យោងទៅតាមការអង្កេតមួយកាលពីឆ្នាំ២០០៤បានឲ្យដឹងថា ប្រជាជនកម្ពុជាប្រមាណតែ១៤ភាគរយប៉ុណ្ណោះប្រើប្រាស់បង្គន់។ រដ្ឋាភិបាលកម្ពុជាមានគោលបំណងបង្កើនការប្រើប្រាស់បង្គន់នៅក្នុងចំណោមប្រជាជនកម្ពុជាឲ្យបានដល់៣០ភាគរយនៅត្រឹមឆ្នាំ២០១៥។ កង្វះខាតអនាម័យនេះបានរួមចំណែកនាំឲ្យមានជំងឺរាករូស ដែលធ្វើឲ្យប៉ះពាល់ដល់សុខភាពប្រជាជនកម្ពុជា ពិសេសកុមារ។
ចយ យុន ស៊ុង បាននិយាយថា បង្គន់គឺជាបញ្ហាដ៏ធំមួយនៅក្នុងប្រទេសកម្ពុជា។ ប្រជាជនភាគច្រើននៅជនបទមិនទាន់មានទម្លាប់ប្រើប្រាស់បង្គន់នៅឡើយ។ ចយ យុន ស៊ុង ក៏បានសង្កេតឃើញផងដែរថា បង្គន់សាធារណៈកម្ពុជាមានលក្ខណៈតូចចង្អៀត ហើយមិនទាន់មានអនាម័យនៅឡើយ។ យើងចង់ឲ្យមានករផ្លាស់ប្ដូរឥរិយាបថនៃការបន្ទោបង់ដោយមិនប្រើបង្គន់ ហើយឲ្យពួកគេងាកមកប្រើបង្គន់វិញ។
ប្រទេសកម្ពុជាក៏មានគម្រោងបង្កើតសមាគមបង្គន់ថ្នាក់ជាតិមួយផងដែរ ដើម្បីដោះស្រាយបញ្ហាបង្គន់នេះ៕