រូបភាព៖ The Mekong Times
បន្ទាប់ពីដំណើរការចរចាអស់រយៈពេល ១២ម៉ោង រួចមក កិច្ចចរចារវាងថៃ និងកម្ពុជា បានបិទបញ្ចប់នៅវេលាម៉ោង ១០យប់ ថ្ងៃចន្ទ ម្សិលមិញ។ បើទោះបីជាមិនទាន់ដោះស្រាយបញ្ហាទាំងស្រុង ប៉ុន្តែកិច្ចចរចានេះគឺត្រូវបានភាគីទាំងពីរអះអាងថា ទទួលបានលទ្ធផលជាផ្លែផ្កា។ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស ដែលបានដឹកនាំកិច្ចចរចាជាមួយនឹងសមភាគថៃ លោក ទី ប៊ុនណាក់ បានថ្លែងនៅក្នុងសន្និសីទកាសែតថា កិច្ចចរចាបានទទួលផ្លែផ្កា។ បើតាមលោក ហោ ណាំហុង ភាគីនៅក្នុងកិច្ចចរចាខ្មែរ-ថៃនឹងស្នើទៅរដ្ឋាភិបាលរៀងខ្លួនដូចជា ៖ "ភាគីទាំងពីរបានព្រមព្រៀងគ្នាក្នុងការបើកឲ្យមានកិច្ចប្រជុំថ្នាក់ការបរទេស ជាបន្តទៀតដើម្បីដោះស្រាយបញ្ហាជាបន្ត។ បន្ទាប់មកនឹងមានកិច្ចប្រជុំគណៈកម្មាធិការចម្រុះព្រំដែនដើម្បីដោះស្រាយបញ្ហា"។
លោក ហោ ណាំហុង ក៏បានឲ្យដឹងថាភាគីទាំងពីរនឹងស្នើទៅរដ្ឋាភិបាលទាំងពីរដើម្បីដោះមីននៅតំបន់ដែលត្រូវវាស់វែងព្រំដែន និងតំបន់ដែលត្រូវបោះបង្គោលព្រំដែន។ លោកបន្តថា ភាគីខ្មែរ - ថៃបានព្រមព្រៀងគ្នារៀបចំកងកម្លាំងវិញចេញពីវត្តកែវសិក្ខាគិរីស្វារៈ នៅតំបន់ជុំវិញព្រះវិហារ និងនៅក្នុងតំបន់ប្រាសាទព្រះវិហារ។ "ការព្រមព្រៀងគ្នានេះ គឺនឹងមិនប៉ះពាល់ដល់សិទ្ធិរបស់ភាគីទាំងពីរក្នុងការវាស់វែងព្រំដែន និងបោះបង្គោលព្រំដែនព្រមទាំងជំហរស្របច្បាប់របស់ភាគីទាំងពីរទេ" លោកឧបនាយករដ្ឋមន្ត្រីថ្លែងយ៉ាងដូច្នេះមុននឹងបន្ថែមថា៖ "បញ្ហានៅសេសសល់មួយចំនួនទៀតនឹងត្រូវដោះស្រាយពេលក្រោយ"៕