កម្ពុជាមានអត្រាប្រេវ៉ាឡង់មេរោគអេដស៍ចំណាស់ថ្នាក់ខ្ពស់ទី២ក្នុងចំណោមប្រទេសក្នុងតំបន់
ភ្នំពេញ៖ តាមការអង្កេតឈាមរកអត្រាផ្ទុកមេរោគអេដស៍សម្រាប់ឆ្នាំ២០០៦នៅប្រទេសកម្ពុជាបានឲ្យដឹងថា នៅកម្ពុជាមានមនុស្សអាយុលើសពី១៥ឆ្នាំចំនួន៣-៤នាក់បានឆ្លងមេរោគអេដស៍ថ្មីនៅក្នុងឆ្នាំ២០០៦ក្នុងមួយថ្ងៃ។
លទ្ធផលនេះត្រូវបានយកមកផ្សព្វផ្សាយនៅក្នុងកិច្ចប្រជុំមួយកាលពីរសៀលថ្ងៃទី១៥ ខែសីហា ឆ្នាំ២០០៨ នៅសណ្ឋាគារសាន់វ៉េ ដែលកិច្ចប្រជុំនេះរៀបចំឡើងដោយមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែកនិងកាមរោគ ដោយមានការចូលរួមពីលោកវេជ្ជបណ្ឌិត ម៉ម ប៊ុនហេង រដ្ឋលេខាធិការក្រសួងសុខាភិបាល។ តាមការអង្កេតឈាមរកអត្រាផ្ទុកមេរោគអេដស៍សម្រាប់ឆ្នាំ២០០៦បានអនុវត្តលើខេត្ត-ក្រុងចំនួន២២ ក្នុងចំណោមខេត្ត-ក្រុងទាំង២៤ (លើកលែងក្រុងកែប និងខេត្តមណ្ឌលគិរី)។
យោងតាមសេចក្ដីប្រកាសព័ត៌មានរបស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគបានឲ្យដឹងថា ការសិក្សាបង្ហាញថា នៅឆ្នាំ២០០៦អត្រាប្រេវ៉ាឡង់មេរោគអេដស៍នៅលើក្រុមនារីរកស៊ីផ្លូវភេទមាន១៤,៧% និងក្រុមស្ត្រីមានផ្ទៃពោះមាន១,១%។
ផ្អែកលើទិន្នន័យថ្មីនេះយើងបានធ្វើការប៉ាន់ប្រមាណថា អត្រាមនុស្សពេញវ័យដែលមានផ្ទុកមេរោគអេដស៍នៅទូទាំងប្រទេសគឺមាន០,៩%នៅក្នុងឆ្នាំ២០០៦។ តួលេខនេះមានន័យថា នៅក្នុងចំណោមប្រជាពលរដ្ឋកម្ពុជាដែលមានអាយុ១៥-៤៩ឆ្នាំ ១០០នាក់ មានមនុស្សម្នាក់មានផ្ទុកមេរោគអេដស៍ហើយអត្រាប្រេវ៉ាឡង់នេះបានធ្លាក់ចុះបើប្រៀបធៀបទៅនឹងឆ្នាំ២០០៣ដែលមានអត្រាប្រមាណ១,២%។
សម្រាប់ក្រុមប្រជាជនគោលដៅយើងរកឃើញថា អត្រាប្រេវ៉ាឡង់មេរោគអេដស៍ក្នុងចំណោមស្ត្រីមានផ្ទៃពោះបានធ្លាក់ចុះពី១,៦%នៅឆ្នាំ២០០៣មកនៅត្រឹម១,១%ក្នុងឆ្នាំ២០០៦ ចំណែកឯក្រុមនារីរកស៊ីផ្លូវភេទវិញបានធ្លាក់ចុះពី២៣,៤%នៅឆ្នាំ២០០៣មកនៅត្រឹម១៤,៧%ក្នុងឆ្នាំ២០០៦។
ការសិក្សានេះក៏បានធ្វើការប៉ាន់ស្មានអត្រាអាំងស៊ីដង់(អត្រាករណីឆ្លងថ្មី)ផងដែរ ហើយអត្រាអាំងស៊ីដង់មេរោគអេដស៍ក្នុងចំណោមក្រុមនារីរកស៊ីផ្លូវភេទ និងស្ត្រីមានផ្ទៃពោះក៏មានការធ្លាក់ចុះដែរបើប្រៀបធៀបជាមួយតួលេខដែលបានប៉ាន់ស្មាននៅឆ្នាំ១៩៩៩,២០០០ និង២០០៦។ ការសិក្សាបង្ហាញថា នៅឆ្នាំ២០០៦ មានស្ត្រីមានផ្ទៃពោះ០,០៧%នៃស្ត្រីមានផ្ទៃពោះទាំងអស់បានឆ្លងមេរោគអេដស៍ថ្មីដែលតួលេខនេះមានន័យថា មានស្ត្រីមានផ្ទៃពោះប្រមាណ៧០នាក់បានឆ្លងមេរោគអេដស៍ថ្មីក្នុងចំណោមស្ត្រីមានផ្ទៃពោះ១០០.០០០នាក់។ បន្ថែមពីលើនេះ យើងបានធ្វើការប៉ាន់ស្មានថា នៅកម្ពុជាមានមនុស្សអាយុលើសពី១៥ឆ្នាំចំនួន៣ទៅ៤នាក់បានឆ្លងមេរោគអេដស៍ថ្មី នៅក្នុងឆ្នាំ២០០៦ក្នុងមួយថ្ងៃ។
សេចក្ដីប្រកាសព័ត៌មានខាងលើឲ្យដឹងបន្ថែមថា ទោះបីជាអត្រាប្រេវ៉ាឡង់ និងអាំងស៊ីដង់បានធ្លាក់ចុះនៅតាមក្រុមគោលដៅក៏ដោយក៏តួលេខនេះនៅមានកម្រិតខ្ពស់នៅឡើយបើប្រៀបធៀបជាមួយប្រទេសនានានៅក្នុងតំបន់។ យោងតាមរបាយការណ៍របស់អង្គការ UNAIDS ស្ដីពីចំណាត់ថ្នាក់ស្ថានភាពមេរោគអេដស៍នៅលើពិភពលោកប្រចាំឆ្នាំ២០០៨ប្រទេសកម្ពុជាយើងស្ថិតនៅលំដាប់ដែលមានអត្រាប្រេវ៉ាឡង់មេរោគអេដស៍ក្នុងចំណោមប្រជាជនទូទៅខ្ពស់ទី២ក្នុងចំណោមប្រទេសទាំងអស់នៅតំបន់អាស៊ីខាងត្បូង និងអាស៊ីអាគ្នេយ៍។
ទោះបីកម្ពុជាបានទទួលលទ្ធផលល្អគួរឲ្យកត់សំគាល់នៅក្នុងការកាត់បន្ថយអត្រាប្រេវ៉ាឡង់និងអាំងស៊ីដង់របស់មេរោគអេដស៍ការបង្កើនសេវាធ្វើតេស្តឈាមរកមេរោគអេដស៍ដោយស្ម័គ្រចិត្តនិងសំងាត់ និងការផ្ដល់ឱសថប្រឆាំងមេរោគអេដស៍ដល់អ្នកផ្ទុកមេរោគអេដស៍ដែលត្រូវការក៏ដោយក៏យើងនៅតែអាចជួបនឹងការផ្ទុះឡើងសារជាថ្មីរបស់មេរោគអេដស៍ដែរបើសិនជាកម្មវិធីប្រយុទ្ធនឹងជំងឺអេដស៍ដែលកំពុងអនុវត្តមិនត្រូវបានពង្រឹង និងបានធានាឲ្យមាននិរន្តរភាព។ ដូចនេះ ដើម្បីកាត់បន្ថយឲ្យបានជាអតិបរិមានូវអត្រាឆ្លងរបស់មេរោគអេដស៍រាជរដ្ឋាភិបាលកម្ពុជានឹងបន្តការខិតខំប្រឹងប្រែងប្រយុទ្ធនិងការពារការរាតត្បាតរបស់មេរោគអេដស៍ និងធានានូវការបង្ការ និងការថែទាំព្យាបាលសម្រាប់អ្នកជំងឺដែលត្រូវការ។ បន្ថែមពីលើនេះការគាំទ្រពីដៃគូជាតិ និងអន្តរជាតិនៅតែមានសារៈសំខាន់ក្នុងការបន្ត និងជំរុញការឆ្លើយតបទៅនឹងការរាលដាលរបស់មេរោគអេដស៍ជំងឺអេដស៍នៅប្រទេសកម្ពុជា។
លោកវេជ្ជបណ្ឌិត ម៉ម ប៊ុនហេង បានមានប្រសាសន៍នៅការអង្កេតឈាមរកអត្រាផ្ទុកមេរោគអេដស៍នេះមានសារៈសំខាន់ខ្លាំងណាស់ក្នុងការចង្អុលបង្ហាញទិសការរៀបចំផែនការសកម្មភាពប្រយុទ្ធទប់ស្កាត់ឲ្យបានសមស្របទៅតាមស្ថានភាពជាក់ស្ដែង និងកម្រិតគ្រោះថ្នាក់នៃការចម្លងមេរោគអេដស៍ក្នុងចំណោមក្រុមគោលដៅហើយក៏ជាមធ្យោបាយមួយសម្រាប់ជួយឲ្យគ្រប់គ្រងកម្មវិធីអេដស៍ទាំងរបស់ស្ថាប័នរដ្ឋាភិបាល និងអង្គការក្រៅរដ្ឋាភិបាលធ្វើការលៃលកថវិកាចំណាយឲ្យចំទិសដៅ និងមានប្រសិទ្ធភាព។
លោកវេជ្ជបណ្ឌិត ម៉ម ប៊ុនហេង បន្តថា ការអង្កេតតាមដាននេះត្រូវបានធ្វើឡើងយ៉ាងម៉ត់ចត់តាមបែបវិទ្យាសាស្ត្រដើម្បីកាត់បន្ថយភាពលំអៀងជាអតិបរិមាដែលធ្វើឲ្យលទ្ធផលដែលចេញពីការអង្កេតនេះមានភាពត្រឹមត្រូវអាចយកទៅប្រើប្រាស់បាន។
លោកវេជ្ជបណ្ឌិត ម៉ម ប៊ុនហេង បានសំដែងនូវការកោតសរសើរយ៉ាងជ្រាលជ្រៅចំពោះការខិតខំប្រឹងប្រែងរបស់ មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ និងអង្គការ US-CDC, USAID, PRASIT និងអង្គការសុខភាពពិភពលោក (WHO)៕
ឃ្លា ភាសាខ្មែរ !
"នៅកម្ពុជាមានមនុស្សអាយុលើសពី១៥ឆ្នាំ ចំនួន៣-៤នាក់បានឆ្លងមេរោគអេដស៍ថ្មី នៅក្នុងឆ្នាំ២០០៦ ក្នុងមួយថ្ងៃ"។
តើ មានមេរោគអេដ៍ប្រភេទថ្មី ឬ? ឬ ... ចំនួន៣-៤នាក់ថ្មី បានឆ្លងមេរោគអេដស៍ រៀងរាល់ថ្ងៃ ក្នុងឆ្នាំ២០០៦?