មន្ត្រីរាជរដ្ឋាភិបាលខ្មែរជាន់ខ្ពស់ទទួលបន្ទុកផ្នែកធនធានទឹកបានមានប្រសាសន៍កាលពីថ្ងៃអាទិត្យថា កម្ពុជានឹងចំណាយប្រាក់ប្រមាណជា ៤០០លានដុល្លារអាមេរិកចាប់ពីចុងឆ្នាំនេះទៅដើម្បីសាងសង់ទំនប់ទឹកនៅក្រោមមហិច្ឆតាក្នុងការធ្វើអនុត្តរភាពប្រព័ន្ធធារាសាស្ត្រដ៏ធំនៅក្នុងប្រទេស។
ថ្លែងនៅក្នុងបទសម្ភាសន៍ជាមួយឌឹ មេគង្គ ថែមស៍ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានមានប្រសាសន៍ថា ផ្ទៃដីស្រែប្រមាណជាង ១លានហិកតានៅទូទាំងប្រទេសសង្ឃឹមថា នឹងទទួលបានការស្រោចស្រពក្រោយពីគម្រោងនេះបញ្ចប់ការងាររបស់ខ្លួនទាំងស្រុងនៅចុងអាណត្តិរាជរដ្ឋាភិបាលទី៤ ខាងមុខនេះ។
លោក លឹម គានហោ បានថ្លែងឲ្យដឹងថា៖ "ឥឡូវនេះយើងកំពុងស្ថិតនៅក្នុងដំណើរការសាងសង់ក្នុងជំហានបឋម ហើយក្រោយពេលបញ្ចប់យើងសង្ឃឹមថា ការស្រោចស្រពអាចនឹងឈានដល់កម្រិតជិត ៦០% នៃផ្ទៃដីស្រែទាំងមូលដែលមាននាពេលបច្ចុប្បន្ន"។
យោងតាមក្រសួងធនធានទឹក និងឧតុនិយមបានឲ្យដឹងថា សព្វថ្ងៃនៅទូទាំងប្រទេសមានផ្ទៃដីស្រែប្រមាណតែ ៤៤%ប៉ុណ្ណោះដែលទទួលបានការស្រោចស្រពទឹក ក្រៅពីនោះនៅពុំទាន់ទទួលបាននៅឡើយទេ ដោយសារមានបញ្ហាកង្វះប្រព័ន្ធធារាសាស្ត្រ។
បច្ចុប្បន្នក្រសួងធនធានទឹកមានគម្រោងធ្វើទំនប់ដ៏ធំមួយនៅក្នុងរដូវប្រាំងខាងមុខនេះជាមួយប្រទេសកាតា នៅឯទន្លេវ៉ាយកូ ក្នុងខេត្តស្វាយរៀង ដែលមានតម្លៃប្រមាណជាង ២០០លានដុល្លារអាមេរិក ហើយអាចស្រោចស្រពផ្ទៃដីស្រែចំនួនជាង ៣០០ពាន់ហិកតា និងធ្វើទំនប់នៅស្ទឹងសែនជាមួយប្រទេសគុយវ៉ែត ដែលមានតម្លៃសរុបប្រមាណជាង ១០០លានដុល្លារអាមេរិក ដែលមានអានុភាពស្រោចស្រពលើផ្ទៃដីបង្កបង្កើនផលចំនួន១០ម៉ឺនហិកតា។ ដូចគ្នានេះដែរ ក្រសួងក៏មានគម្រោងក្នុងការធ្វើទំនប់ក្រាំងពន្លៃនៅរដូវប្រាំងនេះ ក្រោមកម្ចីសម្បទានរបស់រដ្ឋាភិបាលកូរ៉េ ដែលមានទឹកប្រាក់ ៣៣លានដុល្លារអាមេរិក និងធ្វើទំនប់បាសាល់ និងនៅជីក្រែង ក្រោមកម្ចីឥណទានពីរដ្ឋាភិបាលឥណ្ឌាដែលមានទឹកប្រាក់សរុបចំនួន ៣០លានដុល្លារអាមេរិកព្រម ទាំងធ្វើទំនប់គំហតអូសទឹកពីស្ទឹងសង្កែដែលមានតម្លៃជាង ៥២លានដុល្លារអាមេរិក។
លោក យ៉ង សាំងកុមារ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (សេដាក) បានស្វាគមន៍ភ្លាមៗចំពោះគម្រោងចំណាយប្រាក់ក្នុងការធ្វើអនុត្តរភាពប្រព័ន្ធធារាសាស្ត្រ ដោយលោកវាយតម្លៃថា ផែនការនេះអាចជួយធ្វើឲ្យទិន្នផលស្រូវនៅក្នុងប្រទេសកើនឡើងយ៉ាងតិចក៏ជាង១លានតោនដែរក្នុងមួយឆ្នាំៗ។ លោក យ៉ង សាំងកុមារ បានមានប្រសាសន៍បានមានប្រសាសន៍ថា៖ "នេះជាគម្រោងល្អ ប៉ុន្តែរដ្ឋាភិបាលត្រូវតែកម្រិតការចាយវាយឲ្យមានប្រសិទ្ធភាព ជាពិសេសពាក់ព័ន្ធថា តើប្រព័ន្ធរបៀបណាដែលគេត្រូវសាងសង់ ឬស្ដារដើម្បីកុំឲ្យមានការបាត់បង់ថវិកាជាតិ"។
លោក យ៉ង សាំងកុមារ បានមានប្រសាសន៍បន្ថែមថា៖ "យើងគួរតែផ្ដោតការជួយផ្ដល់ទឹកឲ្យកសិករធ្វើស្រូវរដូវវស្សាឲ្យមានស្ថេរភាពជាអាទិភាពទី១ ពីព្រោះថា ការធ្វើដូច្នេះអាចធ្វើឲ្យទិន្នផលស្រូវរបស់យើងមានការកើនឡើងខ្ពស់ជាងពេលសព្វថ្ងៃ"។
សូមបញ្ជាក់ថា បច្ចុប្បន្នដោយសារកង្វះប្រព័ន្ធធារាសាស្ត្រក្នុងការស្រោចស្រពផលិតកម្មស្រូវរបស់ប្រទេសកម្ពុជាទទួលបានទិន្នផលជាមធ្យមតែ ១,៦តោន ទៅ២តោនប៉ុណ្ណោះក្នុងមួយហិកតា។ ទាក់ទងនឹងប្រព័ន្ធធារាសាស្ត្រនេះ លោក យ៉ង សាំងកុមារ បានថ្លែងថា៖ "បើសិនជាផ្ទៃដីរបស់យើងជាងមួយលានហិកតាមានការស្រោចស្រពទឹកគ្រប់គ្រាន់នៅរដូវវស្សាតាមបទពិសោធន៍របស់យើងនោះ កសិករអាចនឹងទទួលទិន្នផលស្រូវកើនឡើងយ៉ាងតិចក៏ក្នុងចន្លោះពី ៣០% ទៅ ៥០% ដែរ ពោលគឺប្រមាណជាជាង ១លានតោនថែមទៀត"។
បច្ចុប្បន្នប្រទេសកម្ពុជាដែលមានផ្ទៃដីសម្រាប់ការធ្វើកសិកម្មដំណាំស្រូវសរុបប្រមាណជាង២,៥លានហិកតា ទទួលបានបរិមាណផលស្រូវក្នុងមួយឆ្នាំៗ ប្រមាណពី ៦ទៅ៧លានតោន ក្នុងនោះអាចមានលទ្ធភាពធ្វើការនាំចេញចំនួនប្រមាណជាង ២លានតោន។ កាលពីថ្ងៃទី៦ ខែសីហា ឆ្នាំ២០០៨ថ្លែងនៅចំពោះមុខប្រជាពលរដ្ឋជាច្រើនពាន់នាក់ដែលជួបជុំនៅឯពិធីស្ទូងស្រូវជានិមិត្តរូបក្នុងខេត្តកំពង់ស្ពឺ លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលក្នុងអាណត្តិបន្ទាប់ដែលទើបកើតចេញពីការបោះឆ្នោតកាលពីថ្ងៃ២៧ ខែកក្កដា មានបំណងធ្វើអនុត្តរភាពប្រព័ន្ធធារាសាស្ត្រដើម្បីប្រែក្លាយប្រទេសកម្ពុជាឲ្យទៅជាប្រទេសអ្នកនាំអង្ករចេញមួយដ៏ធំក្នុងតំបន់។ លោកនាយករដ្ឋមន្ត្រីបានមានប្រសាសន៍ថា៖ "កម្ពុជានឹងមានលទ្ធភាពសល់ស្រូវលក់ទៅក្រៅប្រទេសពី ៤ ទៅ៥ លានតោនក្នុងមួយឆ្នាំៗនៅក្រោមនយោបាយនៃការធ្វើអនុត្តរភាពប្រព័ន្ធធារាសាស្ត្រទឹកនេះ"៕