ភ្នំពេញ៖ មន្ត្រីសុខាភិបាលបាននិយាយថា គ្លីនិកចំនួនពាក់កណ្ដាលក្នុងចំណោមគ្លីនិកបើកព្យាបាលជំងឺ នៅរាជធានីភ្នំពេញគ្មានច្បាប់អនុញ្ញាតពីក្រសួងសុខាភិបាលឡើយ។
លោកសាស្ត្រាចារ្យវេជ្ជបណ្ឌិត វេង ថៃ នាយកមន្ទីរសុខាភិបាលរាជធានីភ្នំពេញ បានមានប្រសាសន៍នាព្រឹកថ្ងៃពុធនេះថា នៅរាជធានីភ្នំពេញមានគ្លីនិកចំនួន១០០០កន្លែង ក្នុងនោះមានគ្លីនិកតែ៥០០កន្លែងប៉ុណ្ណោះ មានច្បាប់អនុញ្ញាតពីក្រសួងសុខាភិបាល។ លោកបន្តថា ក្រសួងសុខាភិបាលកំពុងសម្រេចមិនអនុញ្ញាតឲ្យគ្លីនិក ឬសេវាព្យាបាលជំងឺណាមួយមានលក់ឱសថនោះឡើយ។
លោកបន្តថា "ច្បាប់ដែលទើបធ្វើវិសោធនកម្មថ្មីៗនេះ ទាំងសេវាសាធារណៈ និងសេវាឯកជនត្រូវតែមានទោស បើប្រព្រឹត្តខុសច្បាប់"។ លោកបន្ថែមថា "អ្នកលក់ឱសថក្លែងក្លាយមុនធ្វើវិសោធនកម្មច្បាប់ពីការគ្រប់គ្រងឱសថ បាននិយាយពីការដាក់ពិន័យ ឬជាប់ពន្ធនាគារ ប៉ុន្តែក្រោយធ្វើវិសោធនកម្មច្បាប់ថ្មីនេះ បានធ្វើការដាក់ទោសទាំងពីរ ទាំងផាកពិន័យ និងជាប់ពន្ធនាគារ"។
លោកសាស្ត្រាចារ្យវេជ្ជបណ្ឌិត វេង ថៃ បានមានប្រសាសន៍ថា ដូច្នេះតម្រូវឲ្យគ្រូពេទ្យដែលបើកគ្លីនិក និងបើកឱសថស្ថានលក់ឱសថត្រូវចុះជាសមាជិកគណៈគ្រូពេទ្យ ដែលមានទីតាំងនៅជាន់ទី៥ នៃមន្ទីរពេទ្យមិត្តភាពខ្មែរ-សូវៀត។ លោកបន្ថែមថា អ្វីដែលលំបាកនោះត្រង់ថា សមាគមគ្រូពេទ្យ គ្រូពេទ្យទៅចុះឈ្មោះ៤ឬ៥ដងមិនជួប ធ្វើឲ្យគ្រូពេទ្យទាំងឡាយខ្ជិលក្នុងការចូលជាសមាជិកគណៈគ្រូពេទ្យ។
លោក ហ៊ុយ សេដ្ឋ អគ្គលេខាធិការសមាគមគ្រូពេទ្យ បានមានប្រសាសន៍ថា ដោយសារកង្វះថវិកា និងមិនមានការបង់វិភាគទានប្រចាំឆ្នាំរបស់សមាជិកគណៈគ្រូពេទ្យ ទីតាំងបំពេញការងាររបស់គណៈគ្រូពេទ្យមិនសូវមានមនុស្សជួយធ្វើការ។ លោកបន្តថា ជាមួយនឹងការរវល់ការងារជាច្រើនរបស់ថ្នាក់ដឹកនាំសមាគមគណៈគ្រូពេទ្យ បានធ្វើឲ្យការងារនេះមិនសូវមានសកម្មភាព។
លោកបន្តថា បញ្ហានេះទាមទារឲ្យសមាជិកគណៈគ្រូពេទ្យ និងគ្រូពេទ្យទាំងអស់ចូលជាសមាជិកគណៈគ្រូពេទ្យ និងគ្រូពេទ្យទាំងអស់ចូលជាសមាជិកគណៈគ្រូពេទ្យ ហើយត្រូវបង់ថវិកាប្រចាំខែម្នាក់១០០០រៀលជាប់ជាប្រចាំនឹងធ្វើឲ្យសមាគមគណៈគ្រូពេទ្យដំណើរការងាររបស់ខ្លួនបានល្អ។
លោកវេជ្ជបណ្ឌិត ម៉ៅ តាន់អ៊ាង នាយកមជ្ឈមណ្ឌលជាតិកម្ចាត់រោគរបេង បានមានប្រសាសន៍ថា ការចុះឈ្មោះចូលជាសមាជិកគណៈគ្រូពេទ្យជាកាតព្វកិច្ចរបស់គ្រូពេទ្យទាំងអស់ដែលនេះជាកិច្ចការមួយមានសារសំខាន់ណាស់ក្នុងការចូលរួមលើកកម្ពស់វិស័យសុខាភិបាលកម្ពុជា។ លោកបន្តថា នៅសហរដ្ឋអាមេរិក គ្រូពេទ្យ វេជ្ជបណ្ឌិតត្រូវមានទិដ្ឋាការចំនួន២បន្ថែមលើសញ្ញាប័ត្រដែលខ្លួនមាន ទើបអាចបំពេញការងារបាន។
លោកបន្តថា ទិដ្ឋាការទាំងនោះមានទិដ្ឋាការការងារ និងទិដ្ឋាការកន្លែងដែលគ្រូពេទ្យត្រូវតែមាន ទើបអាចរកទទួលទានលើវិស័យវេជ្ជសាស្ត្របាន ហើយរៀងរាល់ពីរឆ្នាំម្ដងគេតែងតែមានការឆែកពីសមត្ថភាពការងារ និងចំណេះដឹងរបស់គ្រូពេទ្យទាំងនោះថា ទទួលបាននូវការបណ្ដុះបណ្ដាល និងទទួលបានចំណេះដឹងថ្មីៗតាមការវិវឌ្ឍន៍របស់អ្នកវិទ្យាសាស្ត្រដែរឬយ៉ាងណាព្រោះវិទ្យាសាស្ត្រតែងតែមានការវិវឌ្ឍន៍ជានិច្ចលើការប្រើប្រាស់ឱសថ ឬសម្ភារៈវេជ្ជសាស្ត្រផ្សេងៗទៀត ដែលតែងតែផ្លាស់ប្ដូរ។
លោកវេជ្ជបណ្ឌិត ម៉ៅ តាន់អ៊ាង បានមានប្រសាសន៍ដោយសង្កត់ធ្ងន់ថា នៅស្រុកខ្មែរគេនិយាយពីប្រព័ន្ធអប់រំយើងគ្មានស្តង់ដារអន្តរជាតិ គេមើលងាយថា ខ្មែរអន់ ដូច្នេះការចូលជាសមាជិកគណៈគ្រូពេទ្យជាកាតព្វកិច្ចដែលត្រូវតែធ្វើ ដើម្បីយើងអាចប្រមូលចងក្រងគ្នា រួមគ្នាក្នុងការអភិវឌ្ឍន៍វិស័យវេជ្ជសាស្ត្រកម្ពុជា បើពុំដូច្នេះទេគេថា យើងអន់មកពីខ្មែរអន់៕
