រាជធានីភ្នំពេញ៖ លោក យឹម យ៉ាន់ អនុរដ្ឋលេខាធិការក្រសួងសុខាភិបាល បានឲ្យដឹងថា ក្នុងឆ្នាំនេះក្រសួងសុខាភិបាលបានរកឃើញផ្ទះលក់ថ្នាំពេទ្យអត់ច្បាប់ចំនួនជាង១.០០០ផ្ទះ និងចំនួន១៣០០កន្លែងទៀតមានច្បាប់ត្រឹមត្រូវពីក្រសួងសុខាភិបាល។ លើសពីនេះមានបន្ទប់ព្យាបាលចំនួន១.៧០០អត់ច្បាប់ គឺស្មើគ្នាជាមួយបន្ទប់ព្យាបាលដែលមានច្បាប់ត្រឹមត្រូវ។ លោកបញ្ជាក់ថា ប៉ុន្មានឆ្នាំមុនទីតាំងលក់ថ្នាំពេទ្យ និងបន្ទប់ផ្ដល់សេវាព្យាបាលដែលអត់ច្បាប់ច្រើនជាងកន្លែងដែលមានច្បាប់ តែឆ្នាំនេះមានការថយចុះហើយ។ ក្នុងអាណត្តិថ្មីនេះក្រសួងសុខាភិបាលនឹងខិតខំលុបបំបាត់ឲ្យបានកាន់តែច្រើនថែមទៀតចំពោះទីតាំងដែលអត់ច្បាប់។
លោក យឹម យ៉ាន់ បានឲ្យដឹងបែបនេះកាលពីថ្ងៃទី១៧ វិច្ឆិកា នៅសណ្ឋាគារកាំបូឌីយ៉ាណា ក្នុងសន្និសីទកាសែតមួយដើម្បីឆ្លើយតបក្នុងឱកាសបើកកិច្ចប្រជុំបញ្ចប់ប្រតិបត្តិការប្រឆាំងផលិតផលឱសថក្លែងក្លាយ និងវគ្គបណ្ដុះបណ្ដាលលើការអនុវត្តច្បាប់ស្ដីពីការប្រយុទ្ធប្រឆាំងការក្លែងក្លាយឱសថ ព្យាបាលអន្តរជាតិ ដែលពិធីនេះប្រព្រឹត្តឡើងក្រោមអធិបតីភាពលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ក្រោមគំនិតផ្ដួចផ្ដើមរួមគ្នារវាងអង្គការនគរបាលអន្តរជាតិ អង្គការសុខភាពពិភពលោក និងអង្គការគយ។
លោក យឹម យ៉ាន់ បន្តឲ្យដឹងថា ក្នុងប្រទេសកម្ពុជាបច្ចុប្បន្នមានរោងចក្រផលិតឱសថចំនួន៧កំពុងដំណើរការ ដោយមានថ្នាំចំនួន៩០០មុខត្រូវបានចុះបញ្ជីរួចហើយនៅក្នុងក្រសួងសុខាភិបាល ហើយមានក្រុមហ៊ុនរកស៊ីជួញដូរថ្នាំពេទ្យចំនួន១៤៨ទៀត កំពុងដំណើរការនៅក្នុងប្រទេសកម្ពុជាដែលក្នុងនោះមានក្រុមហ៊ុនខ្លះបានបើកសាខានៅតាមបណ្ដាខេត្តមួយចំនួនក្នុងប្រទេសកម្ពុជា។ ទោះជាយ៉ាងណាក៏ដោយក្រសួងសុខាភិបាលមិនអនុញ្ញាតឲ្យមានក្រុមហ៊ុនណានាំចូលឱសថរបេងទេដើម្បីចៀសវាងនូវភាពស៊ាំ។
លោក ជូ យិនស៊ីម រដ្ឋលេខាធិការក្រសួងសុខាភិបាលបានថ្លែងថា នៅក្នុងប្រទេសកម្ពុជាបច្ចុប្បន្នក្រសួងសុខាភិបាលបានរកឃើញឱសថមានគុណភាពមិនត្រឹមត្រូវចំនួន២៦មុខ ក្នុងនោះមានបីមុខបានចុះបញ្ជីក្នុងក្រសួងសុខាភិបាល។ ក្រុមអ្នកលួចផលិតឱសថក្លែងក្លាយភាគច្រើនគេផលិតឱសថគ្រុនចាញ់ របេង ពួកអង់ទីប៊ីយ៉ូទិក និងថ្នាំប្រឆាំងមេរោគអេដស៍ ពីព្រោះពួកឱសថទាំងនេះសុទ្ធតែមានតំលៃខ្ពស់ ហើយមានលក្ខណៈធ្ងន់ធ្ងរណាស់ចំពោះអ្នកប្រើប្រាស់ ពីព្រោះថា ត្រូវប្រើប្រាស់ក្នុងរយៈពេលយូរ។
លោកបញ្ជាក់ថា ក្រសួងសុខាភិបាលធ្វើការបែងចែកផ្ទះលក់ឱសថអត់ច្បាប់ជាបីប្រភេទ គឺប្រភេទA ផ្ទះលក់ឱសថទ្រង់ទ្រាយធំ ដែលបច្ចុប្បន្ននេះក្រសួងសុខាភិបាលបានលុបបំបាត់ចោលអស់ទៅហើយមិនមានទៀតទេនៅទីក្រុងភ្នំពេញ តែខេត្តខ្លះនៅតែមាននៅឡើយ។ ប្រភេទB គឺគ្លីនិកមួយចំនួនមានលក់ឱសថដែលច្បាប់មិនឲ្យមានលក់នៅតាមគ្លីនិកព្យាបាលនោះទេ។ ប្រភេទC គឺផ្ទះលក់ឱសថអត់ច្បាប់ដែរ តែលក់លាយជាមួយចាប់ហួយ។ ចំពោះថ្នាំដែលក្រសួងសុខាភិបាលបានអនុញ្ញាតឲ្យចរាចរនៅលើទីផ្សារនៃព្រះរាជាណាចក្រកម្ពុជា គឺមានជិត៧ពាន់មុខ។ តាមការអង្កេតទៅលើការចរាចរឱសថក្លែងក្លាយនៅក្នុងប្រទេសកម្ពុជា គឺបានចាប់ផ្ដើមធ្វើឡើងតាំងពីឆ្នាំ២០០០មក។
ក្នុងឱកាសនោះ លោក ស ខេង បានថ្លែងថា តាមការប៉ាន់ប្រមាណរបស់អង្គការសុខភាពពិភពលោក ដែលចេញផ្សាយនៅឆ្នាំ២០០៧កន្លងមកនេះបានវាយតំលៃថា មានមនុស្សនៅក្នុងតំបន់អាស៊ីប្រមាណ២សែននាក់ បានស្លាប់ក្នុងមួយឆ្នាំៗបណ្ដាលមកពីការប្រើប្រាស់ឱសថក្លែងក្លាយ ជាពិសេសគឺឱសថសំរាប់ព្យាបាលជំងឺគ្រុនចាញ់ ហើយបើសិនជាមានការត្រួតពិនិត្យឲ្យបានត្រឹមត្រូវនោះ គឺអាចជួយសង្គ្រោះមនុស្សបាន១លាននាក់ក្នុងមួយឆ្នាំ។ លោកបញ្ជាក់ថា ទោះបីប្រទេសកម្ពុជាមិនមែនជាប្រភពក្នុងការផលិតឱសថក្លែងក្លាយ ឬចែកចាយឱសថប្រភេទនេះក៏ដោយ ក៏រាជរដ្ឋាភិបាលបានបង្កើតឡើងនូវយន្តការថ្នាក់ជាតិ គឺគណៈកម្មការលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ដែលមានសមាសភាពចម្រុះមកពីក្រសួងសុខាភិបាល ក្រសួងមហាផ្ទៃ ក្រសួងព័ត៌មាន ក្រសួងពាណិជ្ជកម្ម ក្រសួងអប់រំ ក្រសួងសេដ្ឋកិច្ច និងក្រសួងកសិកម្ម៕